ពន្ធគយអាមេរិកថ្មីលើប្រទេសដៃគូពាណិជ្ជកម្ម១៤ ក្នុងនោះកម្ពុជា៣៦%ស្មើថៃតែខ្ពស់ជាងវៀតណាម!
16-April-2026 / សេដ្ឋកិច្ច
អាមេរិក៖ ប្រធានាធិបតីអាមេរិក លោកដូណាល់ត្រាំនៅថ្ងៃទី៧ ខែកក្កដា ឆ្នាំ២០២៥នេះ បានសម្រេចយកពន្ធគយបដិការលេីប្រទេស ដៃគូពាណិជ្ជកម្មចំនួន១៤ ប្រទេស។ក្នុងនោះរួមមាន៖ កម្ពុជាអត្រា៣៦ភាគរយ, ឥណ្ឌូណេស៊ី៣២ភាគរយ, ថៃ៣៦ភាគរយ, មីយ៉ាន់ម៉ា៤៤ភាគរយ ឡាវ៤៤ភាគរយ, ម៉ាឡេស៊ី២២ភាគរយ, បង់ក្លាដែស៣៣ភាគរយ, ជប៉ុន២២ភាគរយ, សាធារណរដ្ឋកូរ៉េ២២ភាគរយ, ទុយនេស៊ី២២ភាគរយ, កាហ្សាក់ស្ថាន២២ភាគរយ, អាហ្វ្រិកខាងត្បូង៣៣ភាគរយ, ស៊ែប៊ី ៣៥ភាគរយ។បូស្នៀ និងហឺហ្សេហ្គោវីណា ៣០ភាគរយ។
តាមការវាយតម្លៃប្រសិនបើប្រៀបធៀបការដាក់ពន្ធលើកដំបូងពីអាមេរិកកម្ពុជាមានការកាត់បន្ថយអត្រាពន្ធច្រើនជាងគេក្នុងចំណោមប្រទេសទាំង ១៤។ភាពប្រសើរឡើងរបស់កម្ពុជាគឺដោយសារការចូលរួមយ៉ាងសកម្មជាមួយតំណាងពាណិជ្ជកម្មសហរដ្ឋអាមេរិក។ បច្ចុប្បន្នកម្ពុជាខិតជិតដៃគូប្រកួតប្រជែងសំខាន់របស់ខ្លួន គឺបង់ក្លាដែស និងឥណ្ឌូនេស៊ី។ ប៉ុន្តែកម្ពុជានៅពីក្រោយប្រទេសវៀតណាមដែលមានអត្រា ២០ភាគរយ។ វៀតណាមដែលនាំចេញទៅអាមេរិក១០០ពាន់លានដុល្លារនិងនាំពីអាមេរិកតែ១០ពាន់លានដុល្លារបានផ្តល់សិទ្ធិឲ្យទំនិញអាមេរិកចូលទីផ្សារវៀតណាមដោយពន្ធសូន្យ។
ប្រធានសភាពាណិជ្ជកម្មអាមេរិកនៅកម្ពុជា លោក Casey Barnett បានវាយតម្លៃថាអត្រាពន្ធ៣៦ភាគរយរបស់កម្ពុជាអាចធ្វើឲ្យ រោងចក្រមួយចំនួននៅកម្ពុជាអាចនឹងកំពុងសម្លឹងមើលប្រទេសក្រៅអាស៊ី ដូចជាអេហ្ស៊ីបជាដើម ដែលមានតម្លៃពលកម្មទាប ប៉ុន្តែមានតែពន្ធអាមេរិក ១០ភាគរយប៉ុណ្ណោះ។សូមបញ្ជាក់ថាដោយសារឱសានវាទនៃការមិនទាន់យកពន្ធពេញរយៈពេល ៩០ ថ្ងៃ ដែលត្រូវផុតកំណត់នៅថ្ងៃទី ០៩ ខែ កក្កដានេះ លោកត្រាំចាប់ផ្តើមផ្ញើសំបុត្រទៅប្រទេសប្រមាណ ១០០ ដោយមួយថ្ងៃផ្ញើចេញពី ១២ ទៅ ១៥ សំបុត្រ។ក្នុងសំបុត្រនោះ លោកត្រាំបញ្ជាក់ប្រាប់អំពីអត្រាពន្ធ ដែលអាមេរិកកំណត់លើប្រទេស ដែលធ្វើពាណិជ្ជកម្មជាមួយអាមេរិក ដែលចរចាពន្ធមិនត្រូវគ្នា ទើបអាមេរិកជាអ្នកកំណត់ឲ្យ។
កាលពីខែមេសា រដ្ឋបាល លោក ដូណាល់ ត្រាំ បានប្រកាសយកពន្ធលើទំនិញរបស់កម្ពុជារហូតដល់៤៩% ពោលខ្ពស់បំផុតក្នុងចំណោមប្រទេសនានាដែលជាប់ពន្ធរបស់អាមេរិក។ តែការដែលអាមេរិកព្រមបញ្ចុះពន្ធលើកម្ពុជាមកនៅ៣៦ភាគរយនាពេលនេះ គឺបន្ទាប់ពីមានការចរចាយ៉ាងតិច៤ដងរវាងមន្ត្រីកម្ពុជា និងអាមេរិក ដែលអាមេរិកបានទុក៩០ពេលថ្ងៃឲ្យមានការចរចា។លោក ត្រាំ លើកឡើងថា ការកំណត់អត្រាពន្ធ៣៦ភាគរយចំពោះកម្ពុជានេះ មានវត្ថុបំណងចង់ឲ្យការធ្វើពាណិជ្ជកម្មរវាងប្រទេសទាំងពីរមានតុល្យការ និងយុត្តិធម៌។
តាមប្រធានាធិបតីអាមេរិករូបនេះ អត្រាពន្ធ៣៦ភាគរយនេះ គឺតិចមែនទែន ពោលគឺតិចជាងអ្វីដែលត្រូវការដើម្បីផាត់ចោលភាពខុសគ្នានៃឱនភាពពាណិជ្ជកម្មដែលអាមេរិកមានជាមួយកម្ពុជា។ លោក ព្រមានថា បើកម្ពុជាសម្រេចដំឡើងពន្ធតបវិញដោយហេតុផលណាមួយ ក្នុងចំនួនណានោះ ចំនួននោះនឹងត្រូវរាប់បញ្ចូលបន្ថែមលើអត្រា៣៦ភាគរយដែលអាមេរិកយកពីកម្ពុជា។បើតាមលិខិតដដែលរបស់លោកត្រាំដែលត្រូវបានបង្ហោះលើបណ្តាញសង្គម Truth Social ទំនិញទាំងឡាយណាដែលផ្ទេរចេញពីកម្ពុជា ដើម្បីគេចពន្ធក្នុងអត្រាខ្ពស់ នោះនឹងត្រូវអាមេរិកដាក់ពន្ធបន្ថែមក្នុងកម្រិតខ្ពស់មួយបើខ្លួនរកឃើញ។
កាលពីខែមេសា ឆ្នាំ២០២៥ រដ្ឋបាលលោក ត្រាំ អះអាងថា កម្ពុជាបានយកពន្ធ លើទំនិញអាមេរិកជាមធ្យមក្នុងអត្រា៩៧% ទើបអាមេរិកប្រកាសយកពន្ធពីកម្ពុជា៤៩ភាគរយ។ ក្រោយមកកម្ពុជា ក៏បានប្រកាសទម្លាក់អត្រាពន្ធគយលើទំនិញនាំចូលពីអាមេរិកមកកម្ពុជា ចំនួន១៩មុខពីអត្រាពន្ធអតិបរមា៣៥% មកនៅត្រឹម៥%។ អត្រាពន្ធថ្មីរបស់អាមេរិកនេះនឹងចាប់ផ្តេីមចូលជាធរមាននៅថ្ងៃទី១ ខែសីហា ឆ្នាំ២០២៥ (ប្រភពពី White House)៕
