កម្ពុជាមានរោងចក្រតម្លើងរថយន្ត៩រាជរដ្ឋាភិបាលកំពុងគិតគូពីបញ្ហាពន្ធដើម្បីឲ្យប្រជាពើរដ្ឋមានលទ្ធភាពទិញជិះ
25-April-2025 / សេដ្ឋកិច្ច
ពោធិ៍សាត់៖ ពីប្រទេសដែលធ្លាប់តែនាំចូលសូម្បីតែភេសជ្ជៈមួយកំប៉ុង នៅពេលនេះកម្ពុជាមានលទ្ធភាព និងសមត្ថភាពក្នុងការនាំចេញទំនិញ ឬផលិតផលផ្សេងៗ ក្នុងនោះ មានទាំងសមត្ថភាពអាចដំឡើងរថយន្ដដោយខ្លួនឯងផងដែរ។ នេះបើតាមការឲ្យដឹងពី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា។ក្នុងឱកាសអញ្ជើញសម្ពោធដាក់ឲ្យដំណើរការខ្សែច្រវាក់ផលិតកម្មថ្មី និងរោងចក្រដំឡើងគ្រឿងបង្គុំរថយន្ត Ford របស់ក្រុមហ៊ុន RMA Cambodia ស្ថិតនៅក្នុងស្រុកក្រគរ ខេត្តពោធិ៍សាត់ នាព្រឹកថ្ងៃទី២២ ខែមេសា ឆ្នាំ២០២៥.។
សម្ដេចមហាបវរធិបតី ហ៊ុន ម៉ាណែតមានប្រសាសន៍ថា «បច្ចុប្បន្នយើងមាន៩រោងចក្រដំឡើងរថយន្ដ នៅក្នុងតំបន់សេដ្ឋកិច្ចពិសេសមានចំនួន៦ និងនៅខាងក្រៅមានចំនួន៣។ សូមកុំយល់ច្រឡំថាយើងគ្រាន់តែជាប្រទេសកសិកម្ម [...] ខុសពីអតីតកាលកម្ពុជា សូម្បីតែទឹកក្រូចមួយកំប៉ុងក៏នាំមកពីខាងក្រៅ តែឥលូវយើងមានលទ្ធភាពរហូតដល់ផលិតរថយន្ដក្នុងប្រទេស ដើម្បីបម្រើទីផ្សារខាងក្នុង ហើយថ្ងៃខាងមុខអាចមានលទ្ធភាពផ្គុំនាំចេញ»។
បើតាម សម្ដេចមហាបវរធិបតី, រោងចក្រដំឡើងរថយន្ដទាំងអស់នៅកម្ពុជា គឺប្រើប្រាស់បច្ចេកវិទ្យាទំនើប ប្រើប្រាស់រ៉ូម៉ូតដែលកូនខ្មែរជាអ្នកបញ្ជា មិនមែនក្រុមហ៊ុនប្រើប្រាស់កម្លាំងពលកម្មមកពីបរទេសទាំងអស់នោះទេ។ អ្វីដែលកាន់តែមោទនភាពទៀតនោះ គឺរថយន្ដដែលត្រូវបានផលិតនៅកម្ពុជា មានសញ្ញា ឬអក្សរ Made In Cambodia។
សម្ដេចមហាបវរធិបតី ហ៊ុន ម៉ាណែត បានចាត់ទុកថា ការបោះជំហានរបស់កម្ពុជា ប្រៀបដូចជំហានគីង្គក់ ដោយដើរសន្សឹមៗ តែបោះជំហានទៅមុខជានិច្ច ហើយសម្ដេចរំពឹងថា នៅថ្ងៃខាងមុខក្រៅពីការដំឡើងរថយន្ដហើយនោះ ក្រុមហ៊ុនក្នុងប្រទេសកម្ពុជា នឹងបោះជំហានបន្ដទៀត ក្នុងការផលិតគ្រឿងបង្គុំដោយខ្លួនឯង ខណៈបច្ចុប្បន្ននេះគ្រឿងបង្គុំមួយផ្នែកជាការនាំចូលមកពីក្រៅប្រទេស។សម្ដេចមហាបវរធិបតី ប្រមុខនៃរាជរដ្ឋាភិបាលកម្ពុជា បានលើកទឹកចិត្តដល់ប្រជាពលរដ្ឋខ្មែរ ប្រើប្រាស់រថយន្ដដែលមានក្រុមហ៊ុនផលិតក្នុងស្រុក ដើម្បីបង្កលក្ខណៈងាយស្រួល នៅពេលត្រូវការផ្លាស់ប្ដូរគ្រឿងបន្លាស់ផ្សេងៗ ព្រមទាំងមានសេវាកម្មថែទាំល្អប្រសើរផងដែរ។ រាជរដ្ឋាភិបាលមិនចាប់បង្ខំ ឬកាត់ផ្ដាច់ការនាំចូលរថយន្ដមួយទឹកមកពីក្រៅប្រទេសនោះទេ ពោលគ្រាន់តែបង្កលក្ខណៈងាយស្រួលធ្វើយ៉ាងណាឲ្យរថយន្ដផលិតក្នុងស្រុក មានតម្លៃទាប ហើយពលរដ្ឋមានលទ្ធភាពក្នុងការទិញប្រើ។សម្ដេចនាយករដ្ឋមន្ត្រី បានមានប្រសាសន៍ថា ការដាក់ពន្ធ ការលើកលែងពន្ធ ការបន្ធូរបន្ថយពន្ធ ការលើកទឹកចិត្តក្នុងកម្រិតណាមួយ ក៏បានជួយសម្រួលដល់ការផលិតនៅក្នុងស្រុក ដើម្បីប្រជាពលរដ្ឋរបស់យើងមានលទ្ធភាពទិញឡានថ្មីក្នុងតម្លៃសមរម្យ ដោយមានលក្ខណៈស្ដង់ដារអន្តរជាតិ ដែលផ្ដល់ជាជម្រើសបន្ថែមទៀតជូនប្រជាពលរដ្ឋ។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំឱ្យក្រសួងរ៉ែ និងថាមពល សង់ស្ថានីយបញ្ចូលថាមពលរថយន្តអគ្គិសនីនៅតាមផ្លូវជាតិឱ្យបានច្រើន ហើយគិតគូរឱ្យបានខ្ពស់ពីសុវត្ថិភាព។
សម្ដេចនាយករដ្ឋមន្ត្រី មានប្រសាសន៍ថា៖ «ហើយចំពោះវិស័យឧស្សាហកម្មធន់ធ្ងន់នៅកម្ពុជា ជាពិសេសវិស័យរថយន្តនេះផង ការសង្កេតការប្រើប្រាស់រថយន្តអគ្គិសនី EVនៅកម្ពុជា ក៏មានកំណើនគួរឱ្យកត់សម្គាល់ យ៉ាងណាមិញការប្រើប្រាស់ភាគច្រើននៅតែទីក្រុង និងទីប្រជុំជន ដែលអាចបណ្ដាលមកពីស្ថានីបញ្ចូលអគ្គិសនីនៅតាមខេត្ត នៅមានកម្រិត។ […] សូមឱ្យក្រសួងតែនិងថាមពលពិនិត្យមើល ជាមួយក្រុមហ៊ុនឯកជនពិនិត្យមើលការពង្រាយឱ្យបានច្រើន ដើម្បីលើកទឹកចិត្ត។ […] ប៉ុន្តែសូមឱ្យគិតគូរអំពីស្តង់ដារសុវត្ថិភាព និងគុណភាព ត្រូវធានាឱ្យបាន ព្រោះ EV ធ្វើមិនស្រួលឆេះ។ អញ្ចឹងសូមឱ្យយកចិត្តទុកដាក់ ហើយសូមឱ្យវិស័យឯកជនទាំងអស់គិតគូរបែបនេះ សូមឱ្យគ្រប់គ្រងឱ្យបានធ្វើកិច្ចការងារនេះ យើងដើរយឺតបន្តិច ប៉ុន្តែដោយមានភាពច្បាស់លាស់ទើបដើរឆ្ងាយ ហើយបើមានបញ្ហាធ្វើឱ្យបាត់ទំនុកចិត្តទាំងអស់ ស្តង់ដារបច្ចេកទេសនេះគឺប្រយ័ត្នប្រយែង។ សូមឱ្យពិនិត្យមើលស្តង់ដារសុវត្ថិភាព គឺជារឿងសំខាន់»។
សូមជម្រាបថា រោងចក្រផ្គុំ និងដំឡើងរថយន្ដនៅក្នុងប្រទេសកម្ពុជា កំពុងដំណើរការប្រតិបត្តិការអាជីវកម្មរបស់ខ្លួនមាននៅ តំបន់សេដ្ឋកិច្ចពិសេសរាជធានីភ្នំពេញ, ខេត្តស្វាយរៀង, ខេត្តពោធិ៍សាត់, ខេត្តកោះកុង, ខេត្តបន្ទាយមានជ័យ និងខេត្តកណ្ដាល។សម្ដេចបវរធិបតី បានលើកពី ការធានាបាននូវស្ថេរភាពនយោបាយរបស់រដ្ឋាភិបាលជូនដល់វិនិយោគិន គឺបង្ហាញពីភាពប្រាកដប្រជា ហើយរាជរដ្ឋាភិបាលកម្ពុជាពីមួយអាណត្តិទៅមួយអាណត្តិ ខិតខំធ្វើយ៉ាងណាលើកទឹកចិត្តការវិនិយោគឱ្យកាន់តែមានភាពល្អប្រសើរ ដើម្បីទាក់ទាញអ្នកវិនិយោគកាន់តែច្រើន ហើយអ្នកវិនិយោគនៅនឹងកន្លែងកាន់តែរីកចម្រើន។
សម្ដេចនាយករដ្ឋមន្ត្រី ថា៖ «នៅប្រទេសមួយចំនួន កំពុងតែចាប់ផ្ដើមធ្វើស្រាប់តែរឹងបន្ដឹង ធ្វើឱ្យវិនិយោគិនចាកចេញ អ្នក business គឺដឹងហើយ ប្រទេសខ្លះប្រទេសធំក៏ដោយ ប៉ុន្តែនៅកម្ពុជាយើងធានាបាននូវស្ថេរភាព ហើយពីមួយអាណត្តិទៅមួយអាណត្តិយើងគិតពីខិតខំធ្វើយ៉ាងណា ដើម្បីកែទម្រង់ សម្រួលឱ្យកាន់តែល្អប្រសើរ កាត់បន្ថយនូវកាតព្វកិច្ច គេហៅលក្ខខណ្ឌផ្សេងៗជាច្រើន សម្រួលនីតិវិធីជាច្រើន ដើម្បីឱ្យកាន់តែធូរ។ សូម្បីតែពន្ធនៅក្នុងវិស័យនេះ យើងក៏បានផ្ដល់គោលការណ៍អនុគ្រោះច្រើនណាស់..»។
សម្ដេចបវរធិបតី ហ៊ុន ម៉ាណែត បានគូសបញ្ជាក់ថាការកែទម្រង់នានា សម្រួលដល់វិនិយោគិនគឺផ្ដល់អត្ថប្រយោជន៍ច្រើនណាស់ ក្នុងនោះក្រុមហ៊ុនបានផ្ដល់ការងារជូនប្រជាពលរដ្ឋរបស់យើង តួយ៉ាងដូចក្រុមហ៊ុន Ford ពីបុគ្គលិក ១៦០នាក់ ឡើងមកជាង៤០០នាក់ ដែលនេះមានន័យថាជាការគិតគូរដល់ជីវភាពរបស់បងប្អូនប្រជាពលរដ្ឋ និងបន្កឱ្យមាននូវចរន្តសេដ្ឋកិច្ចវិលជុំបន្ថែមទៀត។
