បង្ក្រាបទីតាំងអាជីវកម្មរ៉ែមាសខុសច្បាប់ នៅស្រុកអូរគ្រៀងសែនជ័យ ខេត្តក្រចេះ, ក្នុងពេលក្រុមហ៊ុនបរទេសនៅកម្ពុជារកបានមាសខ្ទង់តោន!
11-February-2026 / សេដ្ឋកិច្ច
ក្រចេះ៖ មន្ទីររ៉ែ និងថាមពលខេត្តក្រចេះ សហការជាមួយកម្លាំងអធិការដ្ឋាននគរបាលស្រុកអូរគ្រៀងសែនជ័យ បង្ក្រាបទីតាំងធ្វើអាជីវកម្មរ៉ែមាសខុសច្បាប់មួយកន្លែង ឃាត់ខ្លួនអ្នកពាក់ព័ន្ធចំនួន៤នាក់ដើម្បីទៅសួរនាំ នៅថ្ងៃទី២៤ ខែមីនា ឆ្នាំ២០២៥។ ការធ្វើអាជីវកម្មរ៉ែមាសខុសច្បាប់នេះ នៅក្នុងទីតាំងចំការស្វាយចន្ទីមួយកន្លែង ស្ថិតក្នុងភូមិអូរពោ ឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ។
សូមបញ្ជាក់ថាកាលពីថ្ងៃទី២៤ ខែកុម្ភៈ ឆ្នាំ២០២៥ មន្ត្រីជំនាញនៃមន្ទីរ៉ែនិងថាមពលខេត្តក្រចេះក៏បានសហការជាមួយនឹងកម្លាំងនគរបាលសេដ្ឋកិច្ចនៃស្នងការដ្ឋាននគរបាលខេត្តក្រចេះចុះបង្ក្រាបទីតាំងធ្វើអាជីវកម្មរ៉ែមាសចំនួន២កន្លែងដោយបានធ្វើកិច្ចសន្យាផ្អាកសកម្មភាពនៃការរុករកផងដែរ ។
ប្រតិបត្តិការបង្ក្រាបនេះធ្វើឡើនៅចំណុចអូត្រូនស្ថិតនៅក្នុងភូមិអូពោរ ឃុំ ក្បាលដំរី ស្រុកអូគ្រៀងសែនជ័យ ខេត្តក្រចេះ ។ទោះជាយ៉ាងណា លោក រត្ន័ តុលា ប្រធានមន្ទីររ៉ែនិងថាមពលខេត្តក្រចេះបានឲ្យដឹងថា ការចុះបង្ក្រាបនេះ កម្លាំងសមត្ថកិច្ចពាក់ព័ន្ធមិនបានដកហូតយកឧបករណ៍សម្ភារៈនោះទេ ដោយគ្រាន់តែហៅម្ចាស់ទីតាំងទាំងពីរនោះមកធ្វើកិច្ចសន្យាហើយបញ្ឈប់សកម្មភាពជាបន្ទាន់ ប្រសិនបើនៅតែបន្តសកម្មភាពទៀតអាជ្ញាធរនិងសមត្ថកិច្ចជំនាញនិងចាត់វិធានផ្លូវច្បាប់តែប៉ុណ្ណោះ ។ចឹងតើបានមិនមានប្រសិទ្ធីភាព។
សូមបញ្ជាក់ថាស្រុកខ្មែរយើងមានក្រុមហ៊ុន Emerald Resources NL របស់អូស្ត្រាលីជាក្រុមហ៊ុនធំមួយខាងរកមាសកាលពីត្រីមាសខែធ្នូ ឆ្នាំ២០២៤ឱ្យដឹងនៅក្នុងឯកសារមួយជាមួយផ្សារហ៊ុនអូស្ត្រាលី (Australian Stock Exchange) ថា “ការបន្តផលិតកម្ម និងដំណើរការហិរញ្ញវត្ថុដ៏រឹងមាំនៅតំបន់អូរខ្វាវ បានឃើញសាច់ប្រាក់ និងដុំមាសកើនឡើងដល់ ១៥១ លានដុល្លារនៅចុងត្រីមាស” ។
អណ្តូងរ៉ែនេះផលិតបាន ៣១,៨៨៨ អោននៅក្នុងត្រីមាស ហើយមាសដែលបានចាក់គឺ ៣១,៤៨៩ អោន។នេះគឺ ៥ ទៅ២៥ ភាគរយខ្ពស់ជាងការព្យាករណ៍របស់ក្រុមហ៊ុន Emerald ពី ២៥,០០០ ទៅ ៣០,០០០ អោន ហើយធៀបនឹងការផលិតចំនួន ២៩,១៨៤ អោន និងមាសចំនួន ៣០,៤២៥អោន ដែលបានចាក់នៅក្នុងត្រីមាសដូចគ្នាកាលពីឆ្នាំមុន។“មាសចាក់” គឺជាពេលដែលមាសដែលមិនទាន់ចម្រាញ់បានប្រែទៅជាដុំមាស។
តួលេខប្រចាំត្រីមាសខែធ្នូបានធ្វើឱ្យផលិតកម្មសរុបរបស់អូរខ្វាវ សម្រាប់ប្រតិទិនឆ្នាំ២០២៤ ដល់ ២,៩ តោន បើធៀបនឹង ៣,២ តោន ក្នុងឆ្នាំ២០២៣។
អណ្តូងរ៉ែចំហរ (open-pit mine) អូរខ្វាវ មានចម្ងាយប្រហែល ២៧៥ គីឡូម៉ែត្រភាគឦសាននៃរាជធានីភ្នំពេញ បានចាប់ផ្តើមប្រតិបត្តិការនៅឆ្នាំ២០២១ និងមានទុនបម្រុងមាសប្រមាណ ១១,៩៥ តោន។
អណ្តូងរ៉ែនេះត្រូវបានដំណើរការដោយក្រុមហ៊ុន Renaissance Minerals ដែលជាក្រុមហ៊ុនបុត្រសម្ព័ន្ធគ្រប់គ្រងទាំងស្រុងរបស់ Emerald ។ក្រុមហ៊ុន Renaissance គឺជាក្រុមហ៊ុនផលិតមាសដ៏ធំបំផុតនៅកម្ពុជា។
ក្នុងចំណោមមាសចំនួន ១៣ តោនដែលផលិតក្នុងព្រះរាជាណាចក្រកម្ពុជាក្នុងរយៈពេល ១០ ខែដំបូងនៃឆ្នាំ ២០២៤ ក្រុមហ៊ុន Renaissance មានចំនួន ១២,៥ តោន នេះបើយោងតាមទិន្នន័យដែលចេញផ្សាយដោយក្រសួងរ៉ែ និងថាមពល នៅក្នុងខែវិច្ឆិកា។
ក្រុមហ៊ុនចិន Rong Cheng Industrial Investment (Cambodia) ក៏កំពុងរុករករ៉ែនៅក្នុងខេត្តមណ្ឌលគិរី និងជាក្រុមហ៊ុនផលិតធំទីពីរដែលមាន ២២ គីឡូក្រាម។ក្រុមហ៊ុន Renaissance Minerals ផលិតលោហៈធាតុមាសពាក់កណ្តាលសម្រេច (semi-finished gold alloys) ដែលមានមាស ៩០ ភាគរយ។រ៉ែមាសដែលបានចម្រាញ់ទាំងអស់ត្រូវបានដឹកជញ្ជូនទៅកាន់ប្រទេសអូស្ត្រាលីសម្រាប់ការចម្រាញ់ ដែលរ៉ែមាសទាំងនេះត្រូវបានបម្លែងទៅជាមាសសុទ្ធ ១០០ ភាគរយ។
មានក្រុមហ៊ុនរុករករ៉ែមាសចំនួន ១០ ប្រតិបត្តិការនៅក្នុងប្រទេសកម្ពុជា ដែលទាំងអស់លើកលែងតែក្រុមហ៊ុន៣ ជាកម្មសិទ្ធិរបស់ក្រុមហ៊ុនចិន ហើយរដ្ឋាភិបាលរកចំណូលបាន ១៥ លានដុល្លារជាសួយសារពីវិស័យនេះក្នុងឆ្នាំ២០២៣ ធៀបនឹង ៥,៣ លានដុល្លារក្នុងឆ្នាំ២០២២ នេះបើយោងតាមក្រសួងរ៉ែ និងថាមពល។ក្រុមហ៊ុន Renaissance បានរាយការណ៍ពីតម្លៃជាមធ្យមសម្រាប់មាសកម្ពុជារបស់ខ្លួនគឺ ២,៦៩៩ដុល្លារក្នុងមួយអោន សម្រាប់ត្រីមាសខែធ្នូ។ប៉ុន្តែឥឡូវតម្លៃមាសឡើងថ្លៃក្នុងទីផ្សារអន្តរជាតិតែមិនដឹងថាតើកម្ពុជាទទួលបានសួយសារអាករប៉ុន្មានទេ.។
សូមបញ្ជាក់ថាបើយោងតាមប្រភពពី Reuters នៅថ្ងៃទី៤ ខែកុម្ភៈ ឆ្នាំ២០២៥ បានឱ្យដឹងថា តម្លៃមាសបានហក់ឡើងដល់កម្រិតខ្ពស់បំផុតមិនធ្លាប់មានពីមុន កាលពីថ្ងៃចន្ទ ដែលត្រូវបានជំរុញដោយលំហូរចូលប្រកបដោយសុវត្ថិភាព បន្ទាប់ពីការប្រកាសដំឡើងពន្ធដោយប្រធានាធិបតីអាមេរិក លោក ដូណាល់ ត្រាំ (Donald Trump) លើប្រទេសកាណាដា ចិន និងម៉ិកស៊ិក ដោយបានបន្ថែមទៅលើក្តីបារម្ភ នៃអតិផរណាដែលនឹងធ្វើឱ្យប៉ះពាល់ដល់កំណើនសេដ្ឋកិច្ចសកល។
តម្លៃមាសបានហក់ឡើងដល់តម្លៃកំណត់ត្រា ២,៨៣០.៤៩ដុល្លារអាមេរិកក្នុងមួយអោន ឬប្រមាណ ៣,៤១០ដុល្លារក្នុងមួយតម្លឹង កាលពីថ្ងៃចន្ទ មុនពេលធ្លាក់មកនៅត្រឹម ២,៨១៨.៩៩ក្នុងមួយអោន។មាសនាពេលអនាគតរបស់អាមេរិកបានទូទាត់ខ្ពស់ជាងនៅក្នុងតម្លៃ ២,៨៥៧.១០ដុល្លារក្នុងមួយអោន។ បណ្តាអ្នកវិភាគបានព្យាករណ៍ថា តម្លៃមាសអាចនឹងហក់ឡើងដល់ ២,៨៥០ដុល្លារក្នុងមួយអោន។
