ឱនភាពពាណិជ្ជកម្មរវាងកម្ពុជានិងចិនក្នុងរយះពេល២ខែដំបូងឆ្នាំ២០២៥
11-February-2026 / សេដ្ឋកិច្ច
ភ្នំពេញ៖ ការនាំចេញរបស់កម្ពុជា ទៅចិន ក្នុងរយៈពេលពីរខែដើមឆ្នាំ ២០២៥នេះ មានទំហំទឹប្រាក់សរុបប្រមាណ ២១៧,៩លានដុល្លារអាម៉េរិក ថយចុះ ៤,៣% បើធៀបនឹងរយៈពេលដូចគ្នាកាលពីឆ្នាំមុន ដែលមានទំហំនាំចេញសរុបប្រមាណ ២២៧,៧លានដុល្លារអាម៉េរិក។ នេះបើយោងតាមទិន្ន័យរបស់អគ្គនាយកដ្ឋានគយ និងរដ្ឋាករកម្ពុជា។
ទិន្នន័យដដែលនេះ បានបង្ហាញទៀតថា ចាប់ពីខែមករា ដល់ខែកុម្ភៈ ឆ្នាំ ២០២៥ ប្រទេសកម្ពុជា បាននាំចូលទំនិញពីប្រទេសចិនវិញ មានទំហំទឹកប្រាក់សរុបប្រមាណ ២.៤៤៤លានដុល្លារអាម៉េរិក។ តួលេខនេះ បានកើនឡើង ២៤% ពីចំនួនទឹកប្រាក់ ១.៩៧១លានដុល្លារអាម៉េរិក ដែលបាននាំចូលក្នុងរយៈពេលដូចគ្នាកាលពីឆ្នាំ ២០២៤។
មុខទំនិញដែលកម្ពុជានាំចេញទៅប្រទេសចិន ភាគច្រើន គឺជាផលិតផលកសិកម្ម។ ចំណែកមុខទំនិញសំខាន់ៗ ដែលកម្ពុជានាំចូលពីប្រទេសចិន រួមមាន៖ វត្ថុធាតុដើមវាយនភណ្ឌកាត់ដេរ, គ្រឿងអេឡិចត្រូនិក, គ្រឿងសំណង់, សម្ភារប្រើប្រាស់ប្រចាំថ្ងៃ និងគ្រឿងឧបភោគបរិ ភោគ ជាដើម។
សូមបញ្ជាក់ថាប្រទេសចិន បានរឹតបន្តឹងបទប្បញ្ញត្តិនាំចូល នៅខែមករា ឆ្នាំ ២០២៥នេះ ដើម្បីតម្រូវឱ្យធ្វើតេស្តរកសារធាតុ Basic Yellow 2 ឬ Auramine O ដែលជាសារធាតុគីមីដែលអាចបង្កជំងឺមហារីក បន្ទាប់ពីអាជ្ញាធរគយចិន កាលពីពេលថ្មីៗនេះ បានរកឃើញសាធារហាមឃាត់ទាំងនេះ នៅក្នុងផ្លែទុរេនស្រស់ពីវៀតណាម និងថៃ។ កត្តានេះហើយ បានធ្វើឲ្យអាជ្ញាធរចិន បង្កើនការត្រួតពិនិត្យរាល់ការនាំចូលទំទិញ បន្លែ ផ្លែឈើ ក៏ដូចជា កសិផលផ្សេងៗ។ ករណីយ៍ផ្លែធុរេនកម្ពុជាក៏ប្រកាន់ជំហរហាមឃាត់ទំនិញពីវៀតណាមដែលចិនហាមឃាត់ដែរ។
សូមរំលឹកថា ប្រទេសកម្ពុជា និងចិន បានបង្កើតទំនាក់ទំនងការទូតជាផ្លូវការនៅថ្ងៃទី ១៩ ខែកក្កដា ឆ្នាំ ១៩៥៨ ហើយចាប់តាំងពីពេលនោះមកបានរក្សាកិច្ចសហប្រតិបត្តិការយ៉ាងរឹងមាំ។ ទំនាក់ទំនងរបស់ប្រទេសទាំងពីរ ត្រូវបានលើកកម្ពស់ទៅជាភាពជាដៃគូនៃកិច្ចសហប្រតិបត្តិការគ្រប់ជ្រុងជ្រោយ ក្នុងឆ្នាំ ២០០៦ និងត្រូវបានធ្វើឱ្យប្រសើរឡើងបន្ថែមទៀតទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ ក្នុងឆ្នាំ ២០១០។ ហើយទំនាក់ទំនងនេះ បានរីកចម្រើនឥតឈប់ឈរ រហូតឈានដល់មិត្តភាពដែកថែប និងមិត្តភក្តិដែលគួរឱ្យទុកចិត្តបំផុត ដែលឆ្ពោះទៅក៏សាងសហគមន៍ជោគវាសនារួមកម្ពុជា-ចិន ក្នុងក្របខ័ណ្ឌ «កិច្ចសហប្រតិបត្តិការត្បូងពេជ្រ»។
ប្រទេសចិន បានចូលរួមយ៉ាងសំខាន់ក្នុងការជំរុញកំណើនសេដ្ឋកិច្ចរបស់កម្ពុជា ដោយដាក់ខ្លួនឯងថា ជាដៃគូដ៏គួរឱ្យទុកចិត្តបំផុតរបស់កម្ពុជា ដោយផ្តល់ការគាំទ្រឥតងាករេលើវិស័យផ្សេងៗ។ បន្ថែមពីនេះ ប្រទេសទាំងពីរ បានសម្រេចចុះកិច្ចព្រមព្រៀងពាណិជ្ជកម្មសេរីទ្វេភាគីនៅឆ្នាំ ២០២០ និងបានចូលជាធរមាន នៅថ្ងៃទី ១ខែមករា ឆ្នាំ ២០២២។ ប្រទេសចិនឈរលំដាប់លេខ១ក្នុងការវិនិយោគនៅកម្ពុជាលើវិស័យផ្សេងៗ។តែការវិនិយោគមិនមែនសម្រាប់ទីផ្សារចិនទេគឺសម្រាប់យកប្រទេសកម្ពុជាសម្រាប់នាំចេញទៅផ្សារអាមេរិកនិងអឺរ៉ុប។មានកិច្ចសន្យារបស់ចិនជួយទិញទំនិញកសិកម្មពីកម្ពុជាតែហាក់បីដូចជាមិនបានច្រើននោះទេបើប្រៀបការនាំចូលពីចិនមកកម្ពុជា។
ប្រការនេះហើយបានធ្វើឲ្យ ចិននៅតែមានប្រៀបលើការធ្វើពាណិជ្ជកម្មជាមួយកម្ពុជា ដោយការនាំចេញរបស់កម្ពុជាទៅចិន នៅតែមានទំហំតូច បើធៀបនឹងការចេញរបស់ចិន មកកម្ពុជាវិញ ។បើនៅតែបន្តធុនហ្នឹងទៀតប្រទេសកម្ពុជាដែលមានមូលដ្ឋានគ្រឺះជាវិស័យកសិកម្មមិនអាចជួយកសិករខ្មែរយើងបានឡើយ។កន្លងមកកម្ពុជាដកដង្ហើមពីប្រទេសជិតខាងភាគច្រើនលើសលុបលើផលិតផលកសិកម្មដូចជាស្រូវអង្ករដំឡងមីជាដើម។
