កសិដ្ឋានចិញ្ចឹមគោសាច់នៅបាត់ដំបង មានតម្រូវការទិញគោពីកសិករក្នុងចំនួន១០,០០០ ទៅ១,៥០០០ក្បាល ជារៀងរាល់ឆ្នាំ
06-June-2026 / សេដ្ឋកិច្ច
បាត់ដំបង៖ជាសហស្ថាបនិក កសិដ្ឋានចិញ្ចឹមគោសាច់ RPRU ដែលមានទីតាំងស្ថិតនៅ ស្រុកបាណន់ ខេត្តបាត់ដំបង លោក ឆាយ ជំនូន បានឲ្យដឹង ថា កសិដ្ឋាន នៅតែមានតម្រូវការទិញគោពីកសិករពីគ្រប់តំបន់ ដើម្បីយកមកបំប៉ន់សាច់ សម្រាប់ផ្គត់ផ្គង់ទៅកាន់ទីផ្សារវិញ ក្នុងចំនួនពី ១០,០០០ ទៅ ១,៥០០០ក្បាល ក្នុង១ឆ្នាំ។
បើតាមតំណាងកសិដ្ឋានរូបនេះ ជារៀលរាល់ថ្ងៃកសិដ្ឋានបានប្រមូលទិញគោពីគ្រប់មជ្ឃដ្ឋានបានចន្លោះពី ៤០ក្បាល ទៅ៥០ក្បាល និងអាចបំប៉ន់សាច់លក់ចេញទៅកាន់ទីផ្សារវិញបានចន្លោះពី ៥០ក្បាល ទៅ៦០ក្បាល ផងដែរ។
ទាក់ទងនឹងតម្លៃទិញចូលវិញ ចំពោះគោសំបក ដែលជាប្រភេទពូជគោខ្មែរ ទិញពីកសិករក្នុងតម្លៃ ចន្លោះពី ៨០០០រៀល ទៅ៩០០០រៀលក្នុង១គីឡូក្រាម ដោយគិតតាមទម្ងន់គោចាប់ពី៦០០គីឡូក្រាមឡើងទៅ។មូលហេតុលោក ឆាយ ជំនូន ឱ្យដឹងដែរថា កសិដ្ឋានមានបំណង ចង់ឱ្យកសិករមានទីផ្សារ ខណៈបច្ចុប្បន្នគោខ្មែរ មិនសូវមានទីផ្សារល្អ ដូចកាលពេលកន្លងទៅ។
កសិដ្ឋានចិញ្ចឹមគោសាច់ RPRU ជាកសិដ្ឋានឈានមុខគេក្នុងតំបន់ដែលផ្ដោតលើការចិញ្ចឹមគោសាច់ និងបានពង្រីកខ្លួនក្នុងការបង្កើនការចិញ្ចឹមគោឱ្យដល់ ១០,០០០ ទៅ ១,៥០០០ក្បាល ក្នុងឆ្នាំ២០២៥។សម្រាប់ការចិញ្ចឹមលោក ឆាយ ជំនូន តំណាងកសិដ្ឋានចិញ្ចឹមគោសាច់ RPRU បានឱ្យ ដឹងថា កសិដ្ឋានរបស់លោក គ្រោងនឹងចំណាយដើមទុនប្រមាណ ១០លានដុល្លារ ដើម្បីរៀបចំកសិដ្ឋានមួយកន្លែង ដើរប្រមូលទិញគោពីកសិករពីតំបន់ផ្សេងៗ មកចិញ្ចឹមក្នុងកសិដ្ឋានផ្ទាល់ និងសម្រាប់ផលិតសាច់លក់ចេញទៅកាន់ទីផ្សារក្នុងស្រុក។ កសិដ្ឋានចិញ្ចឹមគោសាច់នេះ ក៏គ្រោងរៀបចំថ្មីបន្ថែមទៀត ក្នុងការអភិវឌ្ឍប្រភេទពូជគោដែលទិញពីប្រទេសជិតខាង ដើម្បីបង្កាត់ពូជគោទាំងនេះ ឱ្យកាន់តែសម្បូរបែបក្នុងស្រុក ផងដែរ។
លោក ឆាយ ជំនូន បានបន្ថែមទៀតថា សម្រាប់ទៅថ្ងៃអនាគត កសិដ្ឋានរបស់លោក ក៏គ្រោងនឹងរៀបចំបន្ថែមទៀតទៅលើហេដ្ឋារចនាសម្ព័ន្ធផ្សេងៗ ក្នុងនោះមានដូចជា៖ ម៉ាស៊ីនផលិតចំណីគោ ចំការស្មៅគោ នឹងគ្រោងស្នើសុំទៅខាងសាលាស្រុក ដើម្បីធ្វើច្បាប់បើកកន្លែងសត្តឃាត ដែលមានស្ដង់ដាមួយ នៅក្នុងកសិដ្ឋានផ្ទាល់ ងាយស្រួលក្នុងការផលិតសាច់ សម្រាប់លក់ចេញទៅកាន់ទីផ្សារ។លោក ឆាយ ជំនូន បន្ថែមថា ចំពោះបញ្ហាដែលជាឧបសគ្គវិញនោះ កសិដ្ឋានរបស់លោក កំពុងតែត្រូវការធនធានមនុស្ស និងអ្នកជំនាញបច្ចេកទេស ផ្នែកបង្កាត់ពូជគោ និងថែទាំគោ ជាច្រើននាក់ទៀត ទើបអាចដំណើរការគម្រោងនៃការបង្កាត់ពូជគោ ដែលនឹងត្រូវទិញចូលមកពីប្រទេសជិតខាង តាមផែនការគ្រោងទុក។
គួរបញ្ជាក់ដែរថា កសិដ្ឋានចិញ្ចឹមគោសាច់ RPRU ជាកសិដ្ឋានថ្មីមួយដែលបង្កើតឡើងកាលពីឆ្នាំ ២០២៣ ដែលពេលបច្ចុប្បន្ននេះ កសិដ្ឋានបានចំណាយដើមទុនអស់ជិតប្រមាណជាង ៦ លានដុល្លារ ដើម្បីបើកដំណើរការកសិដ្ឋាន និងបានប្រមូលទិញគោពីកសិករជាង ១,៦០០ ក្បាល រួចមកហើយ។ កសិដ្ឋានចិញ្ចឹមគោសាច់ RPRU មានទីតាំងស្ថិតនៅភូមិ ព្រៃផ្ដៅ ឃុំតាក្រៀម ស្រុកបាណន់ ខេត្តបាត់ដំបង។សូមបញ្ជាក់ដែរថាក្រៅពីកសិដ្ឋានខាងលើនៅរាជធានីភ្នំពេញតំបន់ជ្រោយចង្វារក៏មានទីសត្វឃាតមួយកន្លែងដែលប្រមូលទិញគោពីប្រជាកសិករក្នុងមួយថ្ងៃខ្ទង់រយក្បាលផងដែរ។សត្វពាហនៈស្រុកខ្មែរត្រូវបានប្រជាពលរដ្ឋចិញ្ចឹមសម្រាប់តែលក់យកសាច់តែប៉ុណ្ណោះលែងសម្រាប់ធ្វើការអូសទាញទៀតហើយ!។
មានការកត់សម្គាល់ថាក្នុងរយៈកាល៤ទៅ៥ឆ្នាំចុងក្រោយនេះ គោមិនមានទីផ្សារល្អទេ ។សម្រាប់ឆ្នាំ២០២៤ កសិករចិញ្ចឹមគោមិនបានប្រសើរទេ ដោយកត្តាស្មៅមិនសូវសម្បូណ៍ និងការបង្ករកំណើតមិនសូវល្អ ផលិតគោបានទីផ្សារគោគ្មានហាងឆេង ដោយគោបរទេសវាយលុកចូលទីផ្សារក្នុងស្រុកខ្លាំងជាង។
