មន្ត្រីជាន់ខ្ពស់ក្រសួងសេដ្ឋកិច្ចអួតពីរឿងបំណុលថាកម្ពុជានៅតែខ្ចីគេបានតើ!?
01-March-2025 / សេដ្ឋកិច្ច
ភ្នំពេញ៖ លោក ចាន់ សុធី រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា អ្នករិះគន់រឿងបំណុលរបស់កម្ពុជាច្រើនរហូតដល់វ័ណ្ឌ.ក ជារឿងដែលមិនសមហេតុផល ព្រោះកម្ពុជាខ្ចីបំណុល គឺដើម្បីឱ្យសេដ្ឋកិច្ចរីកធំធាត់ ខណៈស្ថានភាពបំណុល សាធារណៈនៅកម្ពុជា នៅតែអាចគ្រប់គ្រងបាន និងមានហានិភ័យទាប។
ថ្លែងនៅក្នុងវេទិកាស្តីពីការគ្រប់គ្រងមីក្រូហិរញ្ញវត្ថុ និងច្បាប់ថវិកាឆ្នាំ ២០២៥ នៅថ្ងៃទី១០ ខែកុម្ភៈ ឆ្នាំ២០២៥នេះលោកចាន់សុធីបានឲ្យដឹងថា៖ គិតត្រឹមបំណាច់ឆ្នាំ២០២៤ កម្ពុជាមានបំណុលសាធារណៈ សរុបចំនួនជាង១២ពាន់លានដុល្លារអាមេរិក ស្មើនឹងប្រមាណ២៥.៨ % នៃ ផ.ស.ស. ។ក្នុងនោះបំណុលសាធារណៈក្នុងប្រទេសមានចំនួន១១៥ លានដុល្លារអាមេរិក និងបំណុលក្រៅប្រទេសមានចំនួនជាង១២ពាន់លានដុល្លារអាមេរិក។
រដ្ឋលេខាធិការរូបនេះបញ្ជាក់ថា គោលដៅដែលកម្ពុជាខ្ចីបំណុលគេ គឺដើម្បីកសាងសេដ្ឋកិច្ចឱ្យកាន់តែរីកធំធាត់ និងដើម្បីជំរុញឱ្យវិស័យអទិភាពមួយចំនួនដូចជា វិស័យសុខាភិបាល និងអប់រំឱ្យកាន់តែរីកចម្រើន ដែលជាប្រយោជន៍ដល់មនុស្សជំនាន់ក្រោយ។ ដូច្នេះហើយ អ្នកដែលតែងតែរិះគន់រដ្ឋាភិបាលរឿងជំពាក់បំណុលបរទេស ជារឿងដែលមិនសមហេតុផល ព្រោះបើទោះបីជាបំណុលរបស់កម្ពុជាកើនឡើងក៏ដោយ ប៉ុន្តែសេដ្ឋកិច្ចកម្ពុជាក៏កើនឡើងជាបន្តបន្ទាប់ផងដែរ ។
លោកចាន់សុធីបានលើកឡើងថា ប្រទេសណាក៏ជំពាក់បំណុលដែរ គ្រាន់តែជាបំណុលក្រៅប្រទេស និងបំណុលក្នុងប្រទេសប៉ុណ្ណោះ ដោយប្រទេសខ្លះជ្រើសយកជម្រើសខ្ចីក្នុងប្រទេស និងប្រទេសខ្លះជ្រើសរើសកម្ចីក្រៅប្រទេស។ ប៉ុន្តែយ៉ាងណាមិញ ការដែលកម្ពុជាខ្ចីបំណុលក្រៅប្រទេសច្រើន ដោយកម្ពុជាមានលទ្ធភាពទទួលបានបំណុលដែលមានកម្រិតសម្បទានខ្ពស់។(មានន័យថាកម្ពុជាគ្រាន់បើដែលមានគេឲ្យខ្ចីលុយ?)។ទាក់ទងនិងប្រទេសចិនដែលកាត់បន្ថយប្រាក់កម្ចីឬជំនួយ ឬថាកម្ពុជាជម្ពាក់ចិនវណ្ឌកលោកខាន់សុធីទទួលស្គាល់ថា គឺតាមពិតទៅរដ្ឋាភិបាលចិននៅតែបន្តផ្តល់កម្ចីដល់កម្ពុជាដដែល ប៉ុន្តែគ្រាន់តែថា ចិនបន្ថយកម្ចីជាងមុន ព្រោះតែចិនត្រូវការធនធានដើម្បីអភិវឌ្ឍន៍ប្រទេសរបស់ខ្លួនផងដែរ។
សូមបញ្ជាក់ថាបើយោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា នៅឆ្នាំ ២០២៥នេះ រាជរដ្ឋាភិបាល គ្រោងខ្ចីថវិកាពីដៃគូអភិវឌ្ឍន៍ផ្សេងៗប្រមាណ ២,៧ពាន់លានដុល្លារអាម៉េរិក ដើម្បីយកទៅអភិវឌ្ឍន៍លើវិស័យអាទិភាពសំខាន់ៗសម្រាប់គាំទ្រកំណើនសេដ្ឋកិច្ច និងការអភិវឌ្ឍសង្គមឲ្យកាន់តែរីកចម្រើន ដែលនឹងធ្វើឲ្យទំហំបំណុលសាធារណៈនឹងកើនដល់ ១៤,២៨ពាន់លានដុល្លារអាម៉េរិក នៅឆ្នាំដំណាច់ឆ្នាំនេះ។ ក្នុងនោះកម្ចីពីប្រទេសចិននាំមុខគេ ប្រមាណ ៣៥% កម្ចីទ្វេភាគីផ្សេងៗ ២២% កម្ចីពីធនាគារអភិវឌ្ឍន៍អាស៊ី ២១% កម្ចីពីធនាគារពិភពលោក ១៤% បំណុលមរត ៥% និងកម្ចីពហុភាគីផ្សេងទៀត ៣%។
លោកបានបញ្ជាក់ថា ទោះមានការកើនឡើងនៃបំណុល តែវាស្ថិតក្នុងកម្រិតទាបក្រោមអនុបាតគោលនៃផលិផលក្នុងស្រុកសរុបនៅឡើយ ដែលកម្រិតនេះមិនមានហានិភ័យអ្វីត្រូវព្រួយបារម្ភនោះឡើយ។ ហើយម្យ៉ាងទៀត វាក៏ជាឳកាសសម្រាប់កម្ពុជា ដែលនៅអាចខ្ចីថវិកាពីដៃគូអភិវឌ្ឍន៍ផ្សេងៗបានក្នុងអត្រាការប្រាក់សម្បទានក្នុងកម្រិតទាប មុនពេលដែលកម្ពុជា ចាកចេញពីប្រទេសអភិវឌ្ឍន៍តិចតួចនៅឆ្នាំ ២០២៩ខាងមុខ ដែលការខ្ចីប្រាក់អាចនឹងមានការប្រាក់ខ្ពស់ជាងបច្ចុប្បន្ន។លោករដ្ឋលេខាធិការបន្តថា ការរក្សាបាននូវចីរភាពបំណុលសាធារណៈនេះ គឺអាស្រ័យដោយកម្ពុជាមានប្រព័ន្ធគ្រប់គ្រងបំណុលសាធារណៈមួយដ៏រឹងមាំ សម្រាប់គ្រងប្រតិបត្តិការ និងរក្សាទុកទិន្នន័យ ដើម្បីជាមូលដ្ឋាននៃការវិភាគ និងតាមដានហានិភ័យបំណុលផងដែរ។
សូមបញ្ជាក់ថាបើតាមការអះអាងរបស់មន្ត្រីរាជរដ្ឋាភិបាល ការគ្រប់គ្រងបំណុលសាធារណៈរបស់កម្ពុជានៅតែគ្មានហានិភ័យ ដោយរាជរដ្ឋាភិបាលប្រកាន់ខ្ជាប់នូវគោលការណ៍គន្លឹះចំនួន ៥ រួមមាន៖ ១. ខ្ចីឥណទាន ក្នុងទំហំសមស្រប ដែលស្ថានភាពថវិកា និងសេដ្ឋកិច្ចអាចទ្រាំទ្របាន, ២. ខ្ចីតែឥណទានដែលមានកម្រិតសម្បទាន ឬលក្ខខណ្ឌ អនុគ្រោះខ្ពស់, ៣. ខ្ចីសម្រាប់តែវិស័យអាទិភាពទ្រទ្រង់ចីរភាពនៃកំណើនសេដ្ឋកិច្ច និងវិស័យបង្កើនផលិតភាពសេដ្ឋកិច្ច ឬផលិតភាព ផលិតកម្ម, ៤. ប្រើប្រាស់ឥណទានប្រកបដោយតម្លាភាព, គណនេយ្យភាព, ប្រសិទ្ធភាព, និងស័ក្តិសិទ្ធិភាពខ្ពស់បំផុត, និង ៥. ប្រើប្រាស់ ឥណទានសម្រាប់ហិរញ្ញប្បទានគម្រោងវិនិយោគលើហេដ្ឋារចនាសម្ព័ន្ធសាធារណៈ ដែលមានស្តង់ដារ និងគុណភាពខ្ពស់ ស្របតាម គោលការណ៍នៃការគ្រប់គ្រងការវិនិយោគសាធារណៈ ព្រមទាំងឆ្លើយតបទៅនឹងតម្រូវការនៃការអភិវឌ្ឍជាតិនៅក្នុងដំណាក់កាលថ្មី ពិសេសធានាបាននូវចីរភាពសេដ្ឋកិច្ច, សង្គម, បរិស្ថាន, និងភាពធន់ទៅនឹងការប្រែប្រួលអាកាសធាតុ៕
