បន្ទាប់ពីឥណ្ឌូណេស៊ីប្រកាសអាសន្នសម្តេចតេជោប្រាប់ភារធារីស្ថានទូតអាមេរិកថាល្បែងអនឡាញពិបាកបង្ក្រាបទាល់តែមានការសហការដើម្បីទប់ស្កាត់
21-September-2026 / ព័ត៌មានជាតិ
ភ្នំពេញ៖ នៅវិមានព្រឹទ្ធសភា រាជធានីភ្នំពេញសម្តេចតេជោ ហ៊ុន សែន ប្រធានព្រឹទ្ធសភា លោកស្រី ប្រៃហ្គេត អែលវ៉កឃឺរ (Bridgette L. Walker) ភារធារីស្តីទីនៃស្ថានទូតសហរដ្ឋអាមេរិកប្រចាំកម្ពុជានៅព្រឹកថ្ងៃអង្គារ ទី១៧ ខែធ្នូ ឆ្នាំ២០២៤ បានជួបពិភាក្សាគ្នាលើកិច្ចការងារមួយចំនួន នៃទំនាក់ទំនងកម្ពុជា-អាមេរិក។
ក្នុងនោះដែរលោកស្រី ប្រៃហ្គេត អែលវ៉កឃឺរ បានចែករំលែកនូវការព្រួយបារម្ភ អំពីបទល្មើសឆបោកអនឡាញ ដែលជះឥទ្ធិពលមិនល្អដល់បរិយាកាសវិនិយោគ និងសេដ្ឋកិច្ចនៅកម្ពុជា និងនៅក្នុងតំបន់។
ឆ្លើយតបនឹងការព្រួយបារម្ភនេះ សម្តេចតេជោ ហ៊ុន សែន បានជម្រាបជូនដល់លោកស្រីថា បទល្មើសអនឡាញមានទម្រង់ និងលក្ខណៈស្មុគស្មាញ និងបំលាស់ទីពីប្រទេសមួយទៅប្រទេសមួយ ដែលនេះ ទាមទារការយកចិត្តទុកដាក់ និងកិច្ចសហប្រតិបត្តិការតំបន់ ដើម្បីទប់ស្កាត់បទល្មើសនេះ។
សម្តេចតេជោ ហ៊ុន សែន ក៏បានបញ្ជាក់ផងដែរថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានពង្រីកការយកចិត្តទុកដាក់វិសាលភាព និងពង្រឹងយន្តការទប់ស្កាត់បន្ថែមលើបទល្មើសអនឡាញនេះ។
សូមបញ្ជាក់ថាថ្មីទាក់ទងល្បែងអនឡាញនៅប្រទេសកម្ពុជានេះដែរក្រសួងការបរទេសឥណ្ឌូណេស៊ីបានឲ្យដឹងពីនិន្នាការកើនឡើងយ៉ាងឆាប់រហ័សនៃពលរដ្ឋឥណ្ឌូនេស៊ី ចូលរួមពាក់ពន្ធ័បញ្ហាល្បែងអនឡាញ នៅកម្ពុជា។ ប្រភពពីសារព័ត៌មាន The Jakarta Globeបានឲ្យដឹងថា៖ លោកជូថានូហ្គ្រាហា( Judha Nugraha )ប្រធាននាយកដ្ឋានផ្នែកគាំពារពលរដ្ឋឥណ្ឌូណេស៊ីបានបញ្ជាក់ក្នុងសន្និសីទកាសែតមួយ នាថ្ងៃទី១៦ធ្នូថាផ្អែកទៅលើរបាយការណ៍ដែលផ្តល់ដោយស្ថានទូតឥណ្ឌូណេស៊ីប្រចាំនៅកម្ពុជា ពលរដ្ឋឥណ្ឌូណេស៊ីដែលមានវត្តមាននៅកម្ពុជាជាច្រើន បានធ្លាក់ខ្លួនជាជនរងគ្រោះ នៅក្នុងឧស្សាហកម្មល្បែងអនឡាញ។
មន្ត្រីឥណ្ឌូណេស៊ីខាងលើបានឲ្យដឹងថា ស្ថានទូតឥណ្ឌូណេស៊ីប្រចាំនៅកម្ពុជា បានដោះស្រាយករណីផ្លូវច្បាប់របស់ពលរដ្ឋឥណ្ឌូណេស៊ីនៅកម្ពុជា ក្នុងឆ្នាំ២០២៤នេះ ចំនួន២៣២១ករណី ក្នុងនោះ ១៧៦១ករណី ឬស្មើនឹង ៧៧% ទាក់ទងនឹងការបោកប្រាស់អនឡាញ។ ប្រធាននាយកដ្ឋានគាំពារពលរដ្ឋឥណ្ឌូណេស៊ី លោក Judha Nugraha និយាយមិនលាក់ថា ការណ៍នេះកំពុងធ្វើឱ្យឥណ្ឌូណេស៊ីកាន់តែឈឺក្បាលពីបញ្ហាល្បែងអនឡាញរបស់ប្រជាជនខ្លួន។
របាយការណ៍រដ្ឋាភិបាលឥណ្ឌូណេស៊ីបានបង្ហាញថា ប្រសិនបើគ្មានចំណាត់ការដ៏មានប្រសិទ្ធភាពទេនោះ ចរន្តលុយហូរចូលទៅក្នុងល្បែងអនឡាញក្នុងឆ្នាំ២០២៤នេះនឹងកើនឡើងដល់ទៅជាង ៦១ពាន់១៧៨លានដុល្លារ (៩៨១ ពាន់ពាន់លាន Rupiah) ហើយទឹកប្រាក់ដ៏ច្រើននេះ ភាគច្រើនទំនងជាត្រូវហូរចូលទៅប្រទេសកម្ពុជា និងថៃ។របាយការណ៍របស់ស្ថានទូតឥណ្ឌូណេស៊ីប្រចាំនៅកម្ពុជាបានបង្ហាញថា ក្នុងឆ្នាំ២០២៣ ចំនួនពលរដ្ឋឥណ្ឌូណេស៊ីរងគ្រោះ ដែលស្ម័គ្រចិត្តចុះបញ្ជីនៅស្ថានទូតបានកើនឡើងចំនួន ៦៣៨% ដែលភាគច្រើនមានពាក់ព័ន្ធនឹងការបន្លំបោកប្រាស់អនឡាញ និងល្បែងអនឡាញ។
ឥណ្ឌូណេស៊ីបានកត់សំគាល់ឃើញពលរដ្ឋរបស់ខ្លួនកាន់តែច្រើនមករស់នៅ និងធ្វើការនៅកម្ពុជា នៅប៉ុន្មានឆ្នាំចុងក្រោយនេះ។ ជាក់ស្តែង អ្នកមកចុះឈ្មោះនៅមកស្ថានទូតបានកើនឡើងពីចំនួន ២៣៣២នាក់ ក្នុងឆ្នាំ២០២០ ទៅចំនួន ១៧ ២១២នាក់នៅក្នុងឆ្នាំ២០២៣។ ប៉ុន្តែមន្ត្រីគាំពារពលរដ្ឋឥណ្ឌូណេស៊ីបានលើកឡើងពីតួលេខខុសគ្នាដាច់ស្រឡះ រវាងតួលេខរបស់រដ្ឋាភិបាលកម្ពុជា និងចំនួនពលរដ្ឋឥណ្ឌូណេស៊ី ទៅចុះឈ្មោះនៅស្ថានទូត។ ចំនួនពលរដ្ឋឥណ្ឌូណេស៊ីរស់នៅកម្ពុជាដែលចុះឈ្មោះនៅស្ថានទូតឥណ្ឌូណេស៊ីប្រចាំកម្ពុជា មានប្រមាណ ១៧ ២១២ ខុសគ្នាដាច់ពីរបាយការណ៍របស់អាជ្ញាធរអន្តោប្រវេសន៍កម្ពុជាដែលថា ពលរដ្ឋឥណ្ឌូណេស៊ីដែលមានបណ្ណស្នាក់នៅកម្ពុជា មានចំនួនដល់ទៅ ៨៩ ០០០នាក់។
ទាក់ទងល្បែងអនឡាញនៅកម្ពុជានេះដែរ ក្រសួងមហាផ្ទៃកម្ពុជាបានដាក់ចេញយន្តការក្តៅ ដោយដាក់ឱសានវាទឱ្យបញ្ឈប់រាល់សកម្មភាពផ្សព្វផ្សាយ និងការធ្វើអាជីវកម្មល្បែងអនឡាញខុសច្បាប់ត្រឹមថ្ងៃទី១០ធ្នូ ហើយអាជ្ញាធរត្រូវចុះចាត់ការអាជីវកម្មល្បែងអនឡាញខុសច្បាប់នៅតាមមូលដ្ឋានចាប់ពីថ្ងៃទី១១ធ្នូ។ តែគេមិនទាន់ឃើញមានការបង្ហាញលទ្ធផលនៃការបង្ក្រាបល្បែងអនឡាញតាមបទបញ្ជាររបស់ក្រសួងមហាផ្ទៃនៅឡើយទេ ៕
