វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1086 នាក់
ម្សិលមិញ 5168 នាក់
សរុប 16013220 នាក់
កំពត៖ រាជរដ្ឋាភិបាលកម្ពុជាបានអនុញ្ញាតជាគោលការណ៍ឱ្យក្រសួងទេសចរណ៍សហការជាមួយរដ្ឋបាលខេត្តកំពតដែលជាម្ចាស់ផ្ទះ ក្រសួងវប្បធម៌និងវិចិត្រសិល្បៈ ក្រសួង-ស្ថាប័នពាក់ព័ន្ធ និងវិស័យឯកជនបាន រៀបចំពិធីបុណ្យ សមុទ្រលើកទី១១ ជុំទី៣ ចាប់ពីថ្ងៃទី១៣ ដល់ថ្ងៃទី១៥ ខែធ្នូ ឆ្នាំ២០២៤។
ក្នុងឱកាសអញ្ជើញជាអធិបតីបើកពិធីបុណ្យ សមុទ្រលើកទី១១ ជុំទី៣ នៅខេត្តកំពត នាល្ងាចថ្ងៃទី ១៣ ខែធ្នូ ឆ្នាំ២០២៤សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានសាទរចំពោះខេត្តកំពតដែលសម្រេចបាន នូវសមិទ្ធផលជាច្រើន ជាពិសេសនៅក្នុងឆ្នាំ២០២៤ នេះ ខេត្តកំពតបានសម្ពោធ នូវកំពង់ផែទឹកជ្រៅពហុបំណង និងសម្ពោធឱ្យប្រើប្រាស់ជាបណ្ដោះអាសន្ន នូវកំពង់ផែទេសចរណ៍អន្តរជាតិបន្ថែមទៀត។សម្តេចធិបតី ហ៊ុន ម៉ាណែត បានបញ្ជាក់ថា ទេសចរណ៍ជាការតភ្ជាប់រវាងប្រជាជន និងប្រជាជន ។ សម្តេចធិបតី បានថ្លែងអំណរគុណដល់ស្ថាប័នដែលពាក់ព័ន្ធ ប្រជាពលរដ្ឋនៅខេត្តកំពតដែលបានរួមគ្នារៀបចំព្រឹត្តិការណ៍បុណ្យសមុទ្របាន ល្អជាការជំរុញទេសចរណ៍ ។
សម្តេចធិបតី ក៏បានថ្លែងអំពីតម្លៃសុខសន្តិភាពក្នុងប្រទេសដែលបានបង្ករលក្ខណះដល់ងាយស្រួល ផ្លែផ្កាឲ្យកម្ពុជាអាចរៀបចំព្រឹត្តិការណ៍នេះ។សម្តេចធិបតី បានបង្ហាញសង្ឃឹមថា ប្រជាពលរដ្ឋ ទេសចរណ៍ធ្វើដំណើរមកលេងបុណ្យសមុទ្រច្រើននៅខេត្តកំពត។ប្រធានបទសម្រាប់ពីធីបុណ្យសមុទ្រលើកទី១១ នេះ គឺ “អបអរបេតិកភណ្ឌ និងចីរភាពនៃតំបន់ឆ្នេរ”។
គោលបំណងគឺរាជរដ្ឋាភិបាលចង់រំលេចឱ្យឃើញថា កម្ពុជាមានបេតិកភណ្ឌសម្បូរបែបមិនត្រឹមតែនៅតំបន់ប្រាសាទប៉ុណ្ណោះទេ ប៉ុន្តែនៅតំបន់ឆ្នេរសមុទ្រក៏យើងមានបេតិកភណ្ឌដែរ ។ តួយ៉ាងដូចនៅតំបន់ឆ្នេរសមុទ្រកម្ពុជាយើងដែល គ្របដណ្តប់បួនខេត្ត មានបេតិកភណ្ឌច្រើនណាស់ដូចជា ៖ មានសំពៅលិច ដែលអ្នកជំនាញបានស្រាវជ្រាវរកឃើញកុលាលភាជន៍ ពពួកសេរ៉ាមិក (កោះស្តេច) កន្លែងតម្កល់មឈូសឈើ ពាងក្រឡធំៗដាក់សពសម័យបុរាណ (នៅជីផាត)ទីទួលស្លាកស្នាមមនុស្សរស់នៅជាដើម។
ដោយឡែកនៅខេត្តកំពតនេះ ក៏មានបេតិកភណ្ឌច្រើនដែរ រាប់តាំងពីសំណង់ស្ថាបត្យកម្មសម័យអាណានិគម ប្រាសាទនៅក្នុងរូងភ្នំ (ភ្នំឈ្ងោក)នៅគុហាហ្លួងភ្នំកំពង់ត្រាច ភ្នំទទុង ភ្នំខ្យង ព្រមទាំងវិហារបុរាណ ទីទួលបុរាណផ្សេងៗទៀត។ និយាយជារួម ប្រធានបទបុណ្យសមុទ្រឆ្នាំនេះ ចង់រំលេចឱ្យឃើញពីការយចិត្តទុកដាក់ក្នុងការអភិរក្សថែរក្សាធនធានធម្មជាតិជីវៈចម្រុះបេតិកភណ្ឌនៅតំបន់ឆ្នេរ និងការអភិវឌ្ឍប្រកបដោយស្មារតីទទួលខុសត្រូវ ដើម្បីចីរភាពនៃសក្តានុពលទសចរណ៍តំបន់ឆ្នេរ ទុកជាកេរដំណែលដល់កូនចៅជំនាន់ក្រោយទៀត។
ការប្រារព្ធពិធីបុណ្យសមុទ្រមានគោលបំណងសំខាន់ គឺរួមគ្នាអភិរក្សការពារធនធានធម្មជាតិសមុទ្រ និងថែរក្សាបរិស្ថានឆ្នេរឱ្យបានស្អាត ដើម្បីបម្រើដល់ការអភិវឌ្ឍទេសចរណ៍ប្រកបដោយចីរភាពនិងការទទួលខុសត្រូវ ព្រមទាំងលើកតម្កើងការផ្សព្វផ្សាយគោលដៅទេសចរណ៍តំបន់ឆ្នេរកម្ពុជា ឱ្យកាន់តែទូលំទូលាយទាក់ទាញទេសចរជាតិនិងអន្តរជាតិ មកទស្សនាកាន់តែច្រើន។
ប្រទេសកម្ពុជាយើងមានសក្តានុពលទេសចរណ៍សម្បូរបែប ទាំងវប្បធម៌ បេតិកភណ្ឌ ប្រវត្តិសាស្ត្រ និងធម្មជាតិ។ នៅពេលដែលយើងនិយាយអំពីបេតិកភណ្ឌ ប្រាកដណាស់យើងនឹងនឹកឃើញដល់ប្រាសាទបុរាណដែលបុព្វបុរសយើងបានបន្សល់ទុកនៅ ស្ទើរគ្រប់គោលដៅពាសពេញផ្ទៃប្រទេស ក្លាយជាបេតិកភណ្ឌជាតិនិងជាបេតិភណ្ឌពិភពលោក ដែលជាមោទនភាពដ៏សម្បើមសម្រាប់យើងទាំងអស់គ្នាជាកូនចៅជំនាន់ក្រោយ។ បុណ្យសមុទ្រ គឺជាព្រឹត្តិការណ៍ដ៏ទាក់ទាញមួយ ដែលប្រារព្ធឡើងឆ្លាស់វេនគ្នានៅតាមបណ្តាខេត្តទាំងបួន នៃតំបន់ឆ្នេរដែលពោរពេញដោយសក្តានុពល៕