សម្តេចបវរធិបតី ប្រកាសបិទបញ្ចប់ការកែប្រែដីពីតំបន់៣ មកតំបន់២ នៅជុំវិញបឹងទន្លេសាប
07-November-2024 / សេដ្ឋកិច្ច
ភ្នំពេញ៖ដើម្បីថែរក្សាប្រព័ន្ធអេកូឡូស៊ីបឹងទន្លេសាប សម្រាប់ប្រជាជនកម្ពុជាទាំងអស់គ្មានការកែសម្រួលដីនៅតំបន់ជុំវិញបឹងទន្លេសាប ជាពិសេសតំបន់៣ មកជាតំបន់២ តទៅទៀតទេ ។នេះការលើកឡើងរបស់ សម្តេចមហាបវរធិបតី ហ៊ុន ម៉ាណែត បានធ្វើឡើង ក្នុងឱកាសបិទសន្និបាតបូកសរុបការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងរៀបចំដែនដី នគរូបនីយកម្ម និងសំណង់ នាល្ងាចថ្ងៃទី២៦ ខែវិច្ឆិកា ឆ្នាំ២០២៤នេះ។
សម្តេចនាយករដ្ឋមន្ត្រី បានបញ្ជាក់ថា «ថ្ងៃមុន ឯកឧត្តម សាយ សំអាល់ បានរាយការណ៍ហើយ គឺយើងបញ្ចប់ការបោះបង្គោល ហើយខ្ញុំបានប្រាប់ហើយ គ្មានការកំណត់ ឬកែសម្រួលព្រំដីទៀតទេ យើងធ្លាប់កែពីតំបន់២មកតំបន់១ ហើយកែពីតំបន់៣មកតំបន់២ ហើយថ្មីៗនេះ យើងកែរាប់ម៉ឺនហិកតាទៀតដើម្បីឱ្យប្រជាជនមានសិទ្ធិពីតំបន់៣មកតំបន់២ យើងកែសឹងតែអស់ទៅហើយ»។
សម្តេចធិបតីបានបន្តបញ្ជាក់ថា៖ «ត្រូវតែហ៊ានអារកាត់មួយដើម្បីផលប្រយោជន៍រួម ខ្ញុំសូមបញ្ជាក់ថា តំបន់៣គឺមិនមែនសម្រាប់ឯកឧត្តម សាយ សំអាល់ ឬសម្រាប់ខ្ញុំទេ ខ្ញុំអត់មានគោលដៅទៅធ្វើផ្ទះនៅហ្នឹងទេ អត់មានសម្រាប់មន្ត្រី ឬអាជ្ញាធរទន្លេសាប ធ្វើកម្មសិទ្ធិទេ គឺសម្រាប់ប្រជាជនខ្មែររាប់លាននាក់ សម្រាប់ប្រព័ន្ធអេកូឡូស៊ី សម្រាប់ប្រព័ន្ធជីវចម្រុះ ប្រព័ន្ធត្រីរបស់យើងនៅមានអនាគតវែងឆ្ងាយតទៅទៀត»។
សម្តេចធិបតីក៏ជំរុញឱ្យត្រួតពិនិត្យឱ្យបានច្បាស់នូវដីនៅតំបន់ពីរ ដែលតំបន់នេះពលរដ្ឋគ្មានសិទ្ធិលក់ដូរ និងយកធ្វើកម្មសិទ្ធិនោះទេ គ្រាន់តែមានសិទ្ធិប្រើប្រាស់ប៉ុណ្ណោះ ហើយអាជ្ញាធរខេត្តទាំង៦ ជាអ្នកផ្តល់សិទ្ធិឱ្យប្រជាពលរដ្ឋអាស្រ័យផល។ សម្តេចបានបញ្ជាក់ថា នៅពេលដែលតំបន់ទាំងអស់ ត្រូវបានបោះបង្គោលព្រំរួចហើយ នឹងមិនមានការកែសម្រួលទៀតនោះទេ។សម្តេចក៏ជំរុញឱ្យភាគីពាក់ព័ន្ធគិតគូអំពីជីវភាពរបស់ប្រជាពលរដ្ឋ ដែលរស់នៅតំបន់ជុំវិញបឹងទន្លេសាបផងដែរ ដែលពួកគាត់អាចមានចំណូលផ្សេង ក្រៅពីការធ្វើកសិកម្ម។ សម្តេចក៏ជំរុញឱ្យសិក្សាបង្កើតតំបន់ឧស្សាហកម្ម និងតំបន់សេដ្ឋកិច្ចពិសេស ដើម្បីបង្កើតការងារដល់ប្រជាពលរដ្ឋទាំងនោះផងដែរ។
សូមបញ្ជាក់ថាការកាត់ឆ្វៀលដីជូនប្រជាពលរដ្ឋ នៅតំបន់ជុំវិញបឹងទន្លេសាប បានធ្វើឡើងតាំងពីឆ្នាំ២០២២ ដើម្បីផ្តល់ជូនទៅពលរដ្ឋដែលបានអាស្រ័យផលជាក់ស្តែងចាប់ពី១០ឆ្នាំឡើងទៅ ឬអាចក្រោម១០ឆ្នាំ។ បើតាមសម្តេចមហាបវរធិបតី, ការកែសម្រួលដីពីតំបន់៣មកជាតំបន់២នេះ មានរហូតដល់ជាង៨ម៉ឺនហិកតា ដើម្បីឱ្យប្រជាជនមានកម្មសិទ្ធិ ឬមានសិទ្ធិក្នុងការប្រើប្រាស់។សម្តេចមហាបវរធិបតី ហ៊ុន ម៉ាណែត បានបញ្ជាក់ឲ្យដឹងថា រាជរដ្ឋាភិបាល គ្រោងចំណាយថវិកាប្រមាណ១០០លានដុល្លារ លើការវាស់វែងកំណត់ព្រំដីជូនប្រជាពលរដ្ឋ ដើម្បីបញ្ចប់វិវាទដីធ្លី។
សម្តេចបវរធិបតី សង្ឃឹមថា ការងារនេះ នឹងអាចបញ្ចប់ការវាស់វែងកំណត់ព្រំដីរបស់ប្រជាពលរដ្ឋ នៅត្រឹមឆ្នាំ២០២៩ ដែលចំខួប៤០ឆ្នាំ នៃការផ្តល់កម្មសិទ្ធិឯកជន លើដីធ្លីជូនប្រជាពលរដ្ឋនៅកម្ពុជា ដែលបានផ្តួចផ្ដើមឡើយ ដោយសម្ដេចតេជោ ហ៊ុន សែន។សម្តេចបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «អាណត្ដិថ្មីនេះ យើងរៀបចំចំនួន៥,០០០នាក់ សម្រាប់ចុះធ្វើ (វាស់វែងកំណត់ព្រំដី) ហើយខ្ញុំសាញេថវិកា ដើម្បីបង្កើនកញ្ចប់ថវិកា សម្រាប់ចុះធ្វើការងារនេះ ហើយយើងគ្រោង១០០លានដុល្លារ ដើម្បីរុញចប់តែម្ដង»។
ចំពោះការកំណត់ និងគ្រប់គ្រងតំបន់ទន្លេសាប ក្រសួងរៀបចំដែនដី នគរូបនីយកម្ម និងសំណង់ បានទទួលភារកិច្ចពីរាជរដ្ឋាភិបាលកម្ពុជា ដឹកនាំគណៈកម្មការចំពោះកិច្ច ធ្វើការចុះបញ្ជីដីតំបន់ទន្លេសាបទាំងដីរដ្ឋ និងដីឯកជនរបស់ប្រជាពលរដ្ឋ ដើម្បីថែរក្សាព្រៃលិចទឹកក៏ដូចជាបឹងទន្លេសាបទាំងមូលឲ្យគង់វង្ស។ ជាលទ្ធផលមកទល់ពេលនេះ ការចុះបញ្ជីដីតំបន់ទន្លេសាបសម្រេចបានដូចខាងក្រោម៖
ក-ដីតំបន់៣៖ ជាតំបន់ព្រៃលិចទឹកដែលត្រូវការពារ ហាមប៉ះពាល់ដាច់ខាត (ដីរដ្ឋ)បានចុះបញ្ជីដីតំបន់៣ជាដីរដ្ឋ រួចរាល់ជាស្ថាពរសម្រាប់ខេត្តកំពង់ឆ្នាំង និងខេត្តបន្ទាយមានជ័យ។
ខ-ដីតំបន់២៖ ជាតំបន់វាលទំនាបលិចទឹកក្នុងរដូវវស្សា ដែលតំបន់នេះអាចផ្ដល់ត្រឹមជាសិទ្ធិប្រើប្រាស់ និងអាស្រ័យផលជូនប្រជាពលរដ្ឋដែលបានបង្កបង្កើនផលជាលក្ខណៈគ្រួសារ (ដីរដ្ឋ) បានវាស់វែងដីដែលប្រជាពលរដ្ឋប្រើប្រាស់និងអាស្រ័យផលក្នុងតំបន់២ បានជាង ១៦ ម៉ឺនក្បាលដី ស្មើនឹង ៨០% នៃក្បាលដីប៉ានស្មានប្រមាណ ២០ ម៉ឺនក្បាលដី។គ-ដីតំបន់១៖ ជាតំបន់ភូមិដ្ឋានរបស់ប្រជាពលរដ្ឋអាចផ្ដល់ជាកម្មសិទ្ធិ (កម្មសិទ្ធិឯកជន) បានវាស់វែងរួចចំនួន ៧៦ ម៉ឺនក្បាលដី ស្មើនឹង ៨៨% នៃក្បាលដីប៉ានស្មានប្រមាណ ៨៦ ម៉ឺនក្បាលដី និងបានចេញបណ្ណរួចចំនួន ៥៨ ម៉ឺនក្បាលដីជូនប្រជាពលរដ្ឋ៕
