៩ខែឆ្នាំ ២០២៤ កម្ពុជាទទួលបានភ្ញៀវទេសចរអន្តរជាតិជិត ៥លាននាក់និងកំពុងគិតពីវិធីអូសទាញថែម
16-November-2025 / ទេសចរណ៏និងវប្បធម៌
ភ្នំពេញ៖ ក្នុងរយៈពេល ៩ខែដំបូង ឆ្នាំ ២០២៤នេះ កម្ពុជាទទួលភ្ញៀវទេសចរអន្តរជាតិ ៤,៨ លាននាក់ កើនឡើង ២២,២% ធៀបរយៈពេលដូចគ្នាឆ្នាំ ២០២៣ ស្មើនឹង ៩៩,៧% នៃឆ្នាំ២០១៩។ផ្អែកតាមរបាយការណ៍ស្ថិតិរបស់ក្រសួងទេសចរណ៍បាន ឲ្យដឹងពីភ្ញៀវទេសចរណ៍ជាតិថា រយៈពេល ៩ខែឆ្នាំនេះ មានភ្ញៀវទេសចរជាតិដើរកម្សាន្តក្នុងស្រុកប្រមាណ ១២,១៦លាននាក់ កើនឡើង ៩,៨% និងមានភ្ញៀវទេសចរជាតិចេញក្រៅមានចំនួន ១,៣៦លាននាក់ កើនឡើង ៣,២%។ ឯ បណ្ណ័ដែលបានលក់ឱ្យទេសចរបរទេសចូលទស្សនាតំបន់រមណីយដ្ឋានអង្គរសរុបជិត ៧សែនសន្លឹក កើនឡើង ២៩,៧% និងចំណូលសរុបជាង ៣២លានដុល្លារអាម៉េរិក កើនឡើង ៣០,២%។
លោក តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានប្រាប់កាសែតថា នៅឆ្នាំ២០២៥ ខាងមុខនេះ កម្ពុជា រំពឹងថា នឹងមានភ្ញៀវទេសចរបរទេសមកកម្សាន្ត មានកំណើនឡើងវិញដូចកាលពីឆ្នាំ ២០១៩ មុនផ្ទុះរីករាលដាលនៃជំងឺកូវីដ១៩។លោក ហួត ហាក់ រដ្ឋមន្ត្រីក្រសួងទេសចរណ៍ ក្នុងឳកាសអញ្ជើញចូលរួមព្រឹត្តិការណ៍ពិធីបុណ្យក្បាច់គុនសៅលីញវូស៊ូអន្តរជាតិ លើកទី១៣ ទីក្រុងចឹងចូវ ខេត្តហឺណាន សាធារណរដ្ឋប្រជាមានិត ចាប់ពីថ្ងៃទី១៨ ដល់ ២០ ខែតុលា ឆ្នាំ២០២៤ បានបង្ហាញពីសក្ដានុពលទេសចរណ៍កម្ពុជា ដល់ក្រុមហ៊ុនចិនចំនួន ២២ ក្នុងនោះរួមមាន ម្ហូបអាហារ, បដិសណ្ឋារកិច្ច, ផ្ទះសំណាក់ សណ្ឋាគារ, សេវាកម្មល្អ, តម្លៃសមរម្យ និងកន្លែងទេសចរណ៍សម្បូរបែប ដើម្បីទាក់ទាញទេសចរចិនមកទស្សនាប្រទេសកម្ពុជា កាន់តែច្រើន។
លោករដ្ឋមន្ត្រីទេសចរណ៍ បានបញ្ជាក់ថា ក្រសួងមានផែនការទាក់ទាញទេសចរចិនពីខេត្តហឺណាន មកទស្សនាកម្ពុជា ឲ្យបាន ១លាននាក់ ដោយសហការជាមួយក្រុមហ៊ុនទេសចរណ៍ចិនធំៗនៅខេត្តហឺណាន ដែលមានពលរដ្ឋប្រមាណ ១០០លាននាក់។ លោករដ្ឋមន្ត្រីគីតថាបើបាន ១ភាគរយនៃពលរដ្ឋខេត្តហឺណាននេះមកទស្សនាកម្ពុជា អាចមានចំនួន ១លាននាក់។
លោករដ្ឋមន្ត្រីក្រសួងទេសចរណ៍ ក៏បានជំរុញឲ្យមានជើងហោះហើរត្រង់រវាងកម្ពុជា និងខេត្តហឺណាន ឲ្យបានរៀងរាល់ថ្ងៃ ខណៈដែលបច្ចុប្បន្ននេះ ជើងហោះហើរត្រង់មានតែ ៣ ដងក្នុងមួយសប្ដាហ៍។ ទាក់ទងវិស័យទេសចរណ៍នេះដែរ ប្រទេសកម្ពុជា បានសម្ដែងនូវការគាំទ្រគំនិតផ្ដួចផ្ដើម «ប្រទេស៦ គោលដៅតែ១» ក្នុងគោលបំណងដើម្បីជួយសម្រួលដល់ការធ្វើដំណើរឆ្លងកាត់ព្រំដែនសម្រាប់ភ្ញៀវទេសចរនៅក្នុងតំបន់ ។
ករណីយ៍នេះកាសែតបាងកកប៉ុស្តន៍ ឱ្យដឹងថា ការគាំទ្រនេះ ធ្វើឡើងបន្ទាប់ពីកិច្ចប្រជុំកាលពីដើមសប្ដាហ៍ រវាងរដ្ឋមន្ត្រីក្រសួងទេសចរណ៍កម្ពុជា ឯកឧត្តម ហួត ហាក់ និងទីប្រឹក្សារដ្ឋមន្ត្រីការបរទេសថៃរបស់ឯកឧត្តម Maris Sangiampongsa រួមមាន ឯកឧត្តម Dusit Manapan និងលោកជំទាវ Chayika Wongnapachant ដើម្បីពិភាក្សាគ្នា ពាក់ព័ន្ធនឹងគំនិតផ្តួចផ្ដើមសម្រាប់ការធ្វើដំណើរឆ្លងព្រំដែន ។គួររម្លឹកថា ប្រទេសថៃឡង់ដ៍ បានស្នើសុំគំនិតផ្តួចផ្ដើមបង្កើតទិដ្ឋាការរួមគ្នាសម្រាប់ប្រទេសចំនួន ៦ នៅក្នុងតំបន់អាស៊ីអាគ្នេយ៍ រួមមាន កម្ពុជា ឡាវ ម៉ាឡេស៊ី មីយ៉ាន់ម៉ា ថៃឡង់ដ៍ និងវៀតណាម ។
ប្រសិនបើគំនិតផ្ដួចផ្ដើមនេះ ត្រូវបានអនុវត្តចេញជារូបរាងពេញលេញ នោះអ្នកធ្វើដំណើរក្នុងតំបន់ នឹងលែងត្រូវការទិដ្ឋាការ ឬលិខិតអនុញ្ញាតដាច់ដោយឡែកទៀតហើយ ។ គំនិតផ្តួចផ្ដើមខាងលើនេះ យកគំរូតាមតំបន់ Schengen របស់អឺរ៉ុប ដែលអនុញ្ញាតឱ្យមានទិដ្ឋាការរួម ដោយធ្វើឱ្យអ្នកទេសចរ អាចធ្វើដំណើរដោយសេរីរវាងប្រទេសដែលចូលរួម ។នៅក្នុងកិច្ចប្រជុំនាថ្ងៃទី៩ ខែតុលា នៅខាងក្រៅកិច្ចប្រជុំកំពូលអាស៊ានលើកទី៤៤-៤៥ នៅប្រទេសឡាវ នាយករដ្ឋមន្ត្រីវៀតណាម ឯកឧត្តម Pham Minh Chinh និងនាយករដ្ឋមន្ត្រីថៃ លោកជំទាវ Paetongtarn Shinawatra បានព្រមព្រៀងសហការជាមួយប្រទេសពាក់ព័ន្ធ ដើម្បីសាកល្បងគំនិតផ្តួចផ្តើមនេះ ។កាលពីឆ្នាំមុន ប្រទេសអាស៊ីអាគ្នេយ៍ទាំង៦ បានស្វាគមន៍ភ្ញៀវទេសចរបរទេសចំនួន ៧០ លាននាក់ នេះបើយោងតាមទិន្នន័យផ្លូវការ ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា (PATA) បានផ្តល់សជាអនុសាសន៍ថា យើងត្រូវរួមគ្នាធ្វើការផ្សព្វផ្សាយឲ្យបានច្រើនពីគោលដៅទេសចរណ៍របស់យើង ទៅកាន់ពិភពលោក ដើម្បីប្រកួតប្រជែងជាមួយប្រទេសជិតខាង។លោកបានបន្តថា អ្វីដែលជាការកត់សម្គាល់កន្លងមក គឺការចូលរួមរបស់អ្នកដែលពាក់ព័ន្ធនៅមានកម្រិតនៅឡើយ។ យើងគួរតែមើលទៅលើបរិបទបច្ចុប្បន្ននៃសង្គមរបស់យើងនូវអ្វីដែលយើងខ្វះខាត និងបញ្ហាប្រឈមអ្វីខ្លះដែលត្រូវដោះស្រាយ។ ម្យ៉ាងវិញទៀត កម្ពុជានៅមានចំណុចត្រូវកែលម្អ និងពង្រឹងខ្លួនច្រើន ពិសេសការបង្កើតឱ្យមាននូវតំបន់ទេសចរណ៍សំខាន់ៗឱ្យបានច្រើន តាមរយៈពង្រឹងសេវាកម្ម រួមនឹងការផ្សព្វផ្សាយឱ្យទូលំទូលាយទៅកាន់ពិភពលោកផងដែរ។
ចូលរួមលើកកំពស់វិស័យទេសចរណ៍មន្ទីរទេសចរណ៍ខេត្តបាត់ដំបង បើកការបណ្តុះបណ្តាលបដិសណ្ឋារកិច្ចកម្ពុជា ហូកា លើជំនាញសេវាកម្មម្ហូបអាហារ និងភេសជ្ជៈដល់ក្រុមអាជីវកម្មទេសចរណ៍ និងមន្ត្រីមន្ទីរទេសចរណ៍ មកពីខេត្តចំនួន៥ មានខេត្តបាត់ដំបង កំពង់ឆ្នាំង ពោធិ៍សាត់ កោះកុង និងឧត្តរមានជ័យ សិក្សារយៈពេល៦ថ្ងៃពេញ និងប្រឡងតេស្តសមត្ថភាពរយៈពេល២ថ្ងៃ ដោយគ្រូបង្គោលជំនាញនៅមន្ទីរទេសចរណ៍ខេត្តបាត់ដំបង ។អនុប្រធានមន្ទីរ និងជាអ្នកនាំពាក្យមន្ទីរទេសចរណ៍ខេត្តបាត់ដំបង លោក ហម អរុណ បានឱ្យដឹងថា កម្មវិធីបណ្តុះបណ្តាលបដិសណ្ឋារកិច្ចកម្ពុជា (ហូកា) គឺជាគំរូបណ្តុះបណ្តាលដ៏ល្អប្រសើរ ដែលឆ្លើយតបទៅនឹងតម្រូវការអាជីវកម្មដោយផ្តល់នូវការបណ្តុះបណ្តាល បដិសណ្ឋារកិច្ច ប្រកបដោយគុណភាពដល់បុគ្គលិក ប្រធានក្រុម អ្នកគ្រប់គ្រង និងម្ចាស់អាជីវកម្មក្នុងវិស័យបដិសណ្ឋារកិច្ច ហើយវគ្គបណ្តុះបណ្តាលនេះនឹងផ្តល់អត្ថប្រយោជន៍ដល់ប្រតិបត្តិករជាម្ចាស់សណ្ឋាគារ ផ្ទះសំណាក់ រមណីយដ្ឋាន ភោជនីយដ្ឋាន ហាងកាហ្វេ និងសហគមន៍អេកូទេសចរណ៍ ដែលមានតម្រូវការបណ្តុះបណ្តាលជំនាញថ្មីៗ និងកសាងជំនាញឡើងវិញ ។ កម្មវិធីអភិវឌ្ឍន៍ជំនាញ SDP ផ្តោតយ៉ាងសំខាន់លើការដោះស្រាយបញ្ហាប្រឈមដែលកំពុងកើតមាននៅក្នុងវិស័យអប់រំ បណ្តុះបណ្តាលបច្ចេកទេសនិងវិជ្ជាជីវៈ របស់ប្រទេសកម្ពុជា ។
សូមបញ្ជាក់ថា វិស័យទេសចរណ៍រួមចំណែកប្រមាណ ១៣ភាគរយដល់សេដ្ឋកិច្ចកម្ពុជានៃផលិតផលក្នុងស្រុកសរុប។ កាលពីឆ្នាំ២០១៩ គឺជាពេលកម្ពុជាទទួលបានភ្ញៀវទេសចរអន្តរជាតិច្រើនបំផុត គឺមានចំនួន ៦,៦១លាននាក់ ដែលក្នុងនោះចំនួនភ្ញៀវជនជាតិចិន នៅឈរលើគេ គឺប្រមាណ ២,៣៦លាននាក់ ឬស្មើនឹង ៣៥,៧ភាគរយចំនួនចំនួនភ្ញៀវបរទេសសរុប៕
