សម្តេចធិបតីកែសម្រួលប្រធានបញ្ជូនកងទ័ពទៅក្រៅប្រទេសនិងណែនាំឲ្យពិចារណាតម្លើងអាយុចូលនិវត្តន៍យោធា
ភ្នំពេញ៖ កម្ពុជាបានបញ្ជូនទ័ពមួកខៀវ ជិត១ម៉ឺននាក់ ចេញទៅបំពេញបេសកកម្មមនុស្សធម៌ នៅក្រោមឆត្ររបស់អង្គការ សហប្រជាជាតិ ទៅកាន់ ១២បេសកកម្ម ក្នុងប្រទេសចំនួន១០ ដែលជួបប្រទះនឹងភ្លើងសង្គ្រាមស៉ីវិល, បច្ចុប្បន្ននេះមានកងទ័ពមួកខៀវចំនួន ៦២៧នាក់ ក្នុងនោះស្ត្រី ១៣០នាក់ កំពុងបំពេញភារកិច្ចក្នុងប្រទេសចំនួន៤។
ក្នុងឱកាសអញ្ជើញជាអធិបតីអបអរសាទរខួបអនុស្សាវរីយ៍៣០ឆ្នាំ ថ្ងៃបង្កើតកងពលតូចលេខ៧០ នៅទីបញ្ជាការកងពលតូចលេខ៧០ នាព្រឹកថ្ងៃទី១៥ ខែតុលាឆ្នាំ២០២៤ សម្ដេចបវរធិបតី ហ៊ុន ម៉ាណែត បានឱ្យដឹងយ៉ាងដូច្នេះថា៖ «មកដល់ម៉ោងនេះ យើង (កម្ពុជា) បញ្ជូនកងទ័ពជិត ១ម៉ឺននាក់ នៅក្នុង១០ប្រទេស តាំងពីឆ្នាំ២០០៥មក ហើយបច្ចុប្បន្ននេះ យើងមាន ៦២៧នាក់ ក្នុងនោះមានស្ត្រី ១៣០នាក់ ដែលកំពុងបំពេញភារកិច្ចក្នុងប្រទេសចំនួន៤»។
សម្តេចមហាបវរធិបតី ហ៊ុន ម៉ាណែត ក៏បានកោតសសើរ និងថ្លែងអំណរគុណដល់កងទ័មួកខៀវកម្ពុជា មកពីគ្រប់កងឯកភាពទ័ព ដែលបានលះបង់ចូលរួមរក្សាសន្តិភាព នៅក្រោមឆត្ររបស់អង្គការសហប្រជាជាតិ (UN) នៅក្នុងប្រទេសកំពុងមានសង្គ្រាមស៉ីវិល។ ហើយកងទ័ពកម្ពុជា មិនត្រឹមតែបានចូលរួមក្នុងការធានាសន្តិភាព ការជួយជំរុញការអភិវឌ្ឍប្រទេសជាតិ ជួយដល់ប្រជាពលរដ្ឋនៅពេលជួបគ្រោះអាសន្ននានានោះទេ ប៉ុន្តែ កងទ័ពកម្ពុជា បានលើកកម្ពស់កិត្យានុភាពរបស់កម្ពុជា នៅលើឆាកអន្តរជាតិ តាមរយៈចូលរួមនៅក្នុងតំបន់បំពេញបេសកកម្ម ក្នុងតំបន់បេសកម្មរបស់ខ្លួននៅក្រៅប្រទេស។
សម្តេចមហាបវរធិបតី ហ៊ុន ម៉ាណែត ក៏បានលើកឡើងថា នៅពេលដែលសម្តេចបានជួបជាមួយថ្នាក់ដឹកនាំបរទេស គឺថ្នាក់ដឹកនាំបរទេសតែងតែកោតសសើរពីការលះបង់របស់កងទ័ពមួកខៀវកម្ពុជា ដើម្បីចូលរួមចំណែករក្សាសន្តិភាពជូនប្រទេសដែលកំពុងជួបវិបត្តិដោយសារតែភ្លើងសង្គ្រាម។ បើងាកទៅមើលពី៣០ឆ្នាំមុន ប្រទេសកម្ពុជា ជាប្រទេសដែលទទួលយកកងកម្លាំងមួកខៀវ ក្រោមឆត្ររបស់អង្គការសហប្រជាជាតិ ដើម្បីមករក្សាសន្តិភាព តែនៅក្នុងរយៈពេលដ៏ខ្លីកម្ពុជា បានប្រែក្លាយជាប្រទេសបញ្ជូនកងទ័ពមួកខៀវ ចេញទៅបំពេញបេសកម្មរក្សាសន្តិភាព បំពេញកិច្ចការងារមនុស្សធម៌នៅតាមបណ្តាប្រទេសមានសង្គ្រាមទៅវិញ។
ម្តេចមហាបវរធិបតី ហ៊ុន ម៉ាណែត បានឲ្យដឹងថា បានកែសម្រួលប្រធានក្រុមការងារបញ្ជូនកងទ័ពទៅក្រៅប្រទេស ដោយប្ដូរពីរដ្ឋមន្ដ្រីក្រសួងការបរទេស និងសហប្រតិបត្តិការអន្តរជាតិ មករដ្ឋមន្ដ្រីក្រសួងការពារជាតិ ធ្វើជាប្រធានវិញ ។ ដោយឡែកសក្រសួងការបរទេស ត្រូវចាត់តាំងរដ្ឋលេខាធិការ ១រូប ដើម្បីធ្វើជាអនុប្រធាន សម្រាប់ធ្វើការសម្របសម្រួល ពីព្រោះកិច្ចការងារនេះមានសារៈសំខាន់លើការងារទំនាក់ទំនងការទូត។
សម្ដេចមហាបវរធិបតី ហ៊ុន ម៉ាណែត ណែនាំឧបនាយករដ្ឋមន្ដ្រី ទៀ សីហា តាមដានឱ្យជាប់ជានិច្ចអំពីស្ថានភាពកងទ័ពមួកខៀវកម្ពុជានៅប្រទេសលីបង់ ខណៈបើមានស្ថានការណ៍ ចាំបាច់ត្រូវតែជម្លៀសកងទ័ពចេញ គឺជាការងារដ៏ចាំបាច់ ការរក្សាអាយុជីវិតកងទ័ពកម្ពុជា នៅក្រៅប្រទេស ជារឿងដំសំខាន់។ ចំណែកឯកសារ និងសម្ភារៈបើចាំបាច់ ត្រូវកម្ទេចចោល ត្រូវតែកម្ទេចចោលចុះ។ ខណៈកាលពីឆ្នាំ២០២៣ សម្តេចបានចារឱ្យកម្ទេចចោលឯកសារ និងសម្ភារៈនៅក្នុងប្រទេសម៉ាលី បន្ទាប់ពីអង្គការសហប្រជាជាតិ ប្រកាសដកកងទ័ពមួកខៀវចេញទាំងស្រុងពីប្រទេសមួយនេះ។
គួរបញ្ជាក់ថា រយៈពេល១៨ឆ្នាំមកនេះ កម្ពុជាបានបញ្ជូនកងកម្លាំងសរុប ៩,៤៦៥នាក់ ក្នុងនោះនារី៨០១នាក់ ទៅកាន់១២បេសកកម្មក្នុង ១០ប្រទេស រួមមាន៖ សាធារណរដ្ឋស៊ូដង់ ស៊ូដង់ខាងត្បូង ឆាដ លីបង់ សាយប្រើស ស៊ីរី អាហ្វ្រិកកណ្តាល ម៉ាលី យ៉េមែន និងសាធារណរដ្ឋប្រជាធិបតេយ្យកុងហ្គោ។ បច្ចុប្បន្ន កម្លាំងកម្ពុជាកំពុងបំពេញបេសកកម្មមានចំនួន ៦៤០នាក់ ក្នុងនោះនារី ១១៩នាក់ ក្នុងប្រទេសចំនួន៥រួមមាន៖ ស៊ូដង់ខាងត្បូង លីបង់ ម៉ាលី អាហ្វ្រិកកណ្តាល និងសាធារណរដ្ឋប្រជាធិបតេយ្យកុងហ្គោ។
ទាក់ទងកងកម្លាំងប្រដាប់អាវុធដែរសម្ដេចបវរធិបតី ហ៊ុន ម៉ាណែត បានណែនាំថា កងយោពលខេមរភូមិន្ទ ជាពិសេសកងទពជើងគោក សូមត្រៀមលក្ខខណៈ ដើម្បីចូលរួមគាំទ្រ ដល់កងរាជអាវុធហត្ថ និងនគរបាលជាតិ ដើម្បីប្រយុទ្ធប្រឆាំង នឹងបទល្មើសធំៗដែលប៉ះពាល់ដល់សន្ដិសុខជាតិ នៅពេលខាងមុខ។សម្ដេចបវរធិបតីបានបន្ដថា «ក្នុងនោះរួមមានបទល្មើសធនធានធម្មជាតិ, ការជួញដូរគ្រឿងញៀនឆ្លងដែន និងបទល្មើសឆបោកតាមអនឡាញ កិច្ចការងារនេះជាកិច្ចការងារដែលរាជរដ្ឋាភិបាល បានយកចិត្តទុកដាក់ មន្ដ្រីអនុវត្តន៍ របស់យើង ពិសេសកងកម្លាំងអនុវត្តច្បាប់ កងកម្លាំងនគរបាលជាតិ កងរាជអាវុធហត្ថ បានបំពេញភារកិច្ចយ៉ាងល្អ ប៉ុន្ដែស្ថានភាព និងការប្រែប្រួលតម្រូវការ ត្រូវបង្កើនកម្លាំង ព្រោះនេះជាហានិភ័យសម្រាប់សន្ដិសុខជាតិ និងសន្ដិសុខសង្គមរបស់ប្រជាពលរដ្ឋ»។
សម្ដេចបវរធិបតីបានថ្លែងបន្ដថា «ដូច្នេះការប្រយុទ្ធប្រឆាំង ជាមួយគ្រោះហានិភ័យ ទៅដល់ប្រទេសជាតិ មិនមែនមានតែសង្គ្រាមប្រដាប់អាវុធនោះទេ មិនមែនមានតែការបំផ្លិចបំផ្លាញសុខសន្ដិភាពប៉ុណ្ណោះនោះទេ ប៉ុន្ដែការបំផ្លាញប្រទេសកម្ពុជា តាមរយៈការបំផ្លាញសន្ដិសុខសង្គមតាម ការបំផ្លាញធនធានធម្មជាតិ ឧក្រិដកម្មឆ្លងកាត់ព្រំដែន ពិសេសគ្រឿងញៀននេះ [.....] និងការឈរបោកអនឡាញ ជាគ្រោះហានិភ័យ ទៅដល់ប្រទេសជាតិផងដែរ។
សម្រាប់ការងារចូលនីវត្ន៍វិញសម្ដេចបវរធិបតី បានបញ្ជាក់ថា នៅក្នុងជួរកងទ័ព យោធិនដែលចូលនិវត្តន៍មានច្រើនជាងអ្នកដែលរើសចូលបំពេញមកវិញ ដូច្នេះសម្ដេចបានផ្ដល់គោលការណ៍ចំពោះយោធិនដែលចូលនិវត្តន៍ សូមយកចិត្តទុកដាក់ដល់នាយទាហាន នាយទាហានរង និងពលទាហានប្រភេទ២ ដែលបាតបង់សមត្ថភាពការងារ។សម្ដេចបានបន្តថា ចំពោះយោធិនជំនាញចាំបាច់ដែលគាត់នៅមានសុខភាពល្អ គួររក្សាសិន ដើម្បីបន្សាំនិងបណ្ដុះបណ្ដាលអ្នកបន្តវេន ដូចជា ជំនាញរថក្រោះ កាំភ្លើងធំ វិស្វកម្មជាដើម។ ដោយឡែក យោធិនដែលដល់អាយុ ចូលនិវត្តន៍ តែនៅក្មេងនៅមានកម្លាំង សូមឱ្យផ្អាកការចូលនិវត្តន៍សិនដែរ មិនចាំបាច់ដាក់ឱ្យចូលនិវត្តបង្គ្រប់គោលការណ៍របស់ក្រសួងសេដ្ឋកិច្ចនិងហិរញ្ញវត្ថុនោះទេ។
សម្ដេចបវរធិបតីបានថ្លែងយ៉ាងដូច្នេះថា «នាយទាហាន នាយទាហានរង និងពលទាហានដែលនៅក្មេង នៅមានកម្លាំងមាំមួន នៅមានឆន្ទៈ ត្រូវទុកឱ្យគាត់បំពេញភារកិច្ចតទៅទៀត ព្រោះពួកគាត់បានបន្សាំនឹងការងារជាយោធិនច្រើនឆ្នាំហើយ»។សម្ដេចបវរធិបតីនាយករដ្ឋមន្ត្រី ក៏បានផ្ដល់យោបល់ទៅខាងយោធសេវាកម្ម និងខាងនីតិកម្មអាចពិនិត្យមើលពីលក្ខខន្តិកៈរបស់កងយោធពលខេមរភូមិន្ទឡើងវិញ ពិនិត្យមើលលក្ខខណ្ឌនៃការចូលនិវត្តន៍ ដូចជាដំឡើងអាយុចូលនិវត្តន៍សម្រាប់យោធិនស័ក្តិទាបៗ ហើយអាចគិតពីកាំប្រាក់ខ្លះជូនពួកគាត់ សម្រាប់ពេលខាងមុខ៕
.jpg&h=97&w=146)
.jpg&h=97&w=146)
