សភាពាណិជ្ជកម្មកម្ពុជា និងអ្នកជំនាញ IMF ជួបពិភាក្សាគ្នាពីការ រឿងលើកកម្ពស់ការប្រើប្រាស់ប្រាក់រៀលក្នុងពេលដែលធនាគាជាតិប្រកាស់ចាត់វិធានការថ្មី
15-March-2026 / សេដ្ឋកិច្ច
ភ្នំពេញ៖ នៅក្នុងកិច្ចប្រជុំពិភាក្សាអំពី សេចក្តីព្រាងយុទ្ធសាស្ត្រលើកកម្ពស់ការប្រើប្រាស់ប្រាក់រៀល សភាពាណិជ្ជកម្មកម្ពុជា ដែលតំណាងវិស័យឯកជន បានគាំទ្រយ៉ាងពេញទំហឹងអនុវត្ត និងឯកភាពស្របតាមយុទ្ធសាស្ត្រដែលបាន និងកំពុងធ្វើការលើកកម្ពស់ការប្រើប្រាស់ប្រាក់រៀលនៅកម្ពុជា របស់រដ្ឋាភិបាល ជាពិសេស ធនាគារជាតិ នៃកម្ពុជា។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា នៅរសៀលថ្ងៃទី ១៦ខែកញ្ញា ឆ្នាំ ២០២៤ បានដឹកនាំសមាជិកសមាជិកា សភាពាណិជ្ជកម្មកម្ពុជា ជួបប្រជុំជាមួយក្រុមការងារបច្ចេកទេស និងអ្នកជំនាញការ ក្រោមជំនួយបច្ចេកទេស របស់មូលនិធិរូបិយវត្ថុអន្តរជាតិ (IMF) ក្រុមបេសកកម្មដែលដឹកនាំដោយ លោក Yury Achkasov ទីប្រឹក្សាផ្នែកប្រតិបត្តិការប្តូរប្រាក់ និងរូបិយវត្ថុប្រចាំកម្ពុជា របស់ការិយាល័យអភិវឌ្ឍន៍សមត្ថភាពរបស់មូលនិធិរូបិយវត្ថុអន្តរជាតិប្រចាំប្រទេសថៃ (CDOT) ដែលមកបំពេញបេសកកម្មនៅធនាគារជាតិនៃកម្ពុជា។
កិច្ចពិភាក្សានេះធ្វើឡើង ក្នុងគោលបំណងពិនិត្យ និងកែសម្រួលសេចក្តីព្រាងយុទ្ធសាស្ត្រ លើកកម្ពស់ការប្រើប្រាស់ប្រាក់រៀល។ ដោយទិន្នន័យអត្ថប្រយោជន៍ និងហានិភ័យដុល្លារូបនីយកម្មនៃប្រតិបត្តិការធុរកិច្ច ជាធាតុដ៏សំខាន់សម្រាប់សេចក្តីព្រាងយុទ្ធសាស្ត្រលើកកម្ពស់ការប្រើប្រាស់ប្រាក់រៀល ក្រុមបេសកកម្មមានបំណងស្វែងយល់បន្ថែមពីវិស័យឯកជន ដែលសភាពាណិជ្ជកម្មកម្ពុជា ដើរតួយ៉ាងសំខាន់ឲ្យវិស័យឯកជន។
ក្នុងកិច្ចពិភាក្សានេះ អ្នកឧកញ៉ា លឹម ហេង ព្រមទាំងសមាជិកមាជិកា ក្នុងនោះ ក៏មានការចូលរួម ពីតំណាងសមាគមធនាគារនៃកម្ពុជា និងតំណាងសមាគមមីក្រូហិរញ្ញវត្ថុ និងតំណាងពីធនាគារឯកជន និងសមាគមមួយចំនួន បានផ្តល់ធាតុចូល និងផ្តល់អនុសាសន៍ ជាច្រើន ដូចជាការប្រើប្រាស់ប្រាក់រៀល តាមហាងលក់រាយ និងស្នើសុំឲ្យអនុវត្តសម្រាប់គ្រប់ភាគីទាំងអស់ដែលកំពុងធ្វើប្រតិបត្តិការ ធុរកិច្ច និងវិនិយោគនៅកម្ពុជា ឲ្យបែរមកប្រើប្រាស់ប្រាក់រៀល ហើយសម្រាប់ជាពិសេសក្នុងវិស័យទេសចរណ៍ ជាដើម។
លោក Yury Achkasov ទីប្រឹក្សា ផ្នែកប្រតិបត្តិការប្តូរប្រាក់និងរូបិយវត្ថុប្រចាំកម្ពុជា របស់ការិយាល័យអភិវឌ្ឍន៍សមត្ថភាពរបស់មូលនិធិ រូបិយវត្ថុអន្តរជាតិ (IMF )ប្រចាំប្រទេសថៃ (CDOT) បានស្នើដល់សមាជិកនៃសភាពាណិជ្ជកម្មកម្ពុជាបន្តជំរុញការប្រើប្រាស់រូបបិយប័ណ្ណក្នុងស្រុកដើម្បីធ្វើឱ្យសេដ្ឋកិច្ចកម្ពុជាកាន់តែរឹងមាំ និងមិនងាយទទួលរងឥទ្ធិពលអវិជ្ជមានពីការប្រែប្រួលអត្រាប្តូរប្រាក់នៃរូបិយបណ្ណអន្តរជាតិ។
លោកថា ទិន្នន័យអត្ថប្រយោជន៍និងហានិភ័យដុល្លារូបនីយកម្មនៃប្រតិបត្តិការធុរកិច្ច ជាធាតុ ដ៏សំខាន់សម្រាប់សេចក្តីព្រាងយុទ្ធសាស្ត្រលើកកម្ពស់ការប្រើប្រាស់ប្រាក់រៀល ក្រុមបេសកកម្មមាន បំណងស្វែងយល់បន្ថែមពីវិស័យឯកជន ដែលសភាពាណិជ្ជកម្មកម្ពុជា ដើតួយ៉ាងសំខាន់ឲ្យវិស័យឯកជន។
អ្នកឧកញ៉ា លឹម ហេងបានលើកឡើងថា៖«ក្នុងនាមសភាពាណិជ្ជកម្ម តំណាងវិស័យឯកជន សូមគាំទ្រយ៉ាងពេញទំហឹងអនុវត្ត នឹងឯកភាពស្របតាមយុទ្ធសាស្ត្រដែលបានកំពុងធ្វើការលើកកម្ពស់ការប្រើប្រាស់ប្រាក់រៀលនៅកម្ពុជា របស់រដ្ឋាភិបាល ជាពិសេស ធនាគារជាតិ នៃកម្ពុជា»។
IMF ក៏បានផ្តល់ជាគន្លឹះសំខាន់ៗ ជាបទពិសោធន៍ ដែលប្រទេសមួយចំនួននៅតំបន់អាមេរិកឡាទីន និងតំបន់អាស៊ាន និងប្រទេសជាច្រើន បានប្រែមកគាំទ្រប្រើប្រាស់រូបិយវត្ថុ ជាតិរបស់ខ្លួនបានទាំងស្រុងវិញ ទាំងនេះហើយ ជាមូលដ្ឋានសម្រាប់កម្ពុជា ក្នុងការគាំទ្រការប្រើប្រាស់ប្រាក់រៀល ផងដែរ។
ទន្ទឹមនិងជំនួបជាមួយស្ថាបន័មូលនីធីរូបីយ៍វត្ថុអន្តរជាតិ(IMF) ធនាគាជាតិនៃកម្ពុជាក៏ គ្រោងដាក់ឲ្យប្រើប្រាស់ប្រព័ន្ធទូទាត់តាមរយៈ QR Code ថ្មី ដែលជាការរួមបញ្ចូលគ្នារវាងប្រព័ន្ធ QR Code ប្រាក់រៀល និងប្រព័ន្ធ QR Code ប្រាក់ដុល្លារ ទៅជាប្រព័ន្ធ QR Code តែមួយ ដើម្បីផ្តល់ភាពងាយស្រួលដល់សាធារណជន និងភ្ញៀវទេស ចរបរទេស ក្នុងប្រតិបត្តិការទូទាត់ប្រាក់ ជាពិសេសក៏ជាផ្នែកដ៏សំខាន់មួយចូលរួមលើកកម្ពស់ការប្រើប្រាស់ប្រាក់រៀលខ្មែរផងដែរ។
ដើម្បីសម្រួលដល់ដំណើរការប្រព័ន្ធទូទាត់តាមរយៈ QR Code ថ្មីនេះ ធនាគារជាតិនៃកម្ពុជា ក៏បានតម្រូវឲ្យគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុទាំងអស់ នៅទូទាំងប្រទេស ត្រូវបង្កើតគណនីជាប្រាក់រៀលខ្មែរ ជូនដល់អតិថិជនរបស់ខ្លួន ដោយឥតគិតកម្រៃសេវាឡើយ។ នៅពេលប្រព័ន្ធ QR Code ថ្មីនេះ ដំណើរការជាផ្លូវការ នោះប្រព័ន្ធ QR Code ដែលសាធារណជន កំពុងប្រើប្រាស់សព្វថ្ងៃនេះ នឹងមិនអាចប្រើប្រាស់បានទៀតនោះទេ។
លោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា នៅក្នុងជំនួបជាមួយអ្នកសារព័ត៌មាន នារសៀលថ្ងៃទី ១៧ខែ កញ្ញា ឆ្នាំ ២០២៤នេះ បានមានប្រសាសន៍ថា គម្រោងដាក់ឲ្យប្រើប្រាស់ប្រព័ន្ធទូទាត់តាមរយៈ QR Code ថ្មីនេះ នឹងចាប់ផ្តើមដាក់ឲ្យអនុវត្តនាពេលឆាប់ៗខាងមុខនេះ ខណៈបច្ចុប្បន្នធនាគារជាតិនៃកម្ពុជា កំពុងទុកពេលឲ្យបណ្តាគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុ ក្នុងស្រុកទាំងអស់ បើកគណនីប្រាក់រៀលជូនអតិថិជនរបស់ខ្លួន ឲ្យបានគ្រប់គ្នា និងជំរុញការផ្សព្វផ្សាយពីការផ្លាស់ប្តូរនេះ ឲ្យសាធារណជនបានយល់ដឹងបានទូលំទូលាយជាមុនសិន។
