រដ្ឋអាជ្ញាបារាំង អះអាងថា CEO របស់ Telegram ត្រូវបានចាប់ខ្លួន ជុំវិញការស៊ើបអង្កេតពីរូបភាពអាសអាភាសរបស់កុមារ និងការជួញដូរគ្រឿងញៀន នៅលើកម្មវិធីមួយនេះ
07-May-2026 / ព័ត៌មានអន្តរជាតិ
ប្រទេសបារាំង៖កាលពីថ្ងៃទី២៦ ខែសីហា ក្រុមរដ្ឋអាជ្ញានៅក្នុងប្រទេសបារាំង បានឲ្យដឹងថា CEO និងជាស្ថាបនិកកម្មវិធីផ្ញើសារ Telegram លោកប៉ាវ៉ែលដួរ៉ូវ( Pavel Durov) ត្រូវបានឃាត់ខ្លួន នៅក្រោមក្របខណ្ឌនៃការស៊ើបអង្កេតលើបទល្មើសព្រហ្មទណ្ឌ ពាក់ព័ន្ធនឹងរូបភាពអាសអាភាសរបស់កុមារ ការជួញដូរគ្រឿងញៀន និងការឆបោកនៅលើបណ្ដាញ ទំនាក់ទំនងសង្គមដ៏មានប្រជាប្រិយភាពមួយនេះ។
ទីភ្នាក់ងារសារព័ត៌មាន Reuters ថ្ងៃទី២៧ ខែសីហា ឆ្នាំ២០២៤ផ្សាយថាបើតាមក្រុមរដ្ឋអាជា្ញបារាំង ការចាប់ខ្លួនលោក Pavel Durov ធ្វើឡើងជាផ្នែកមួយនៃការស៊ើបអង្កេតលើមនុស្សម្នាក់ មិនត្រូវបានបញ្ជាក់អត្តសញ្ញាណ ដែលធ្វើឡើងដោយ ការិយាល័យប្រឆាំងបទល្មើសសាយប័រ (cybercrime) កាលពីថ្ងៃទី៨ ខែកក្កដា។ការស៊ើបអង្កេតនេះដែរផ្ដោតលើការសមគំនិត ក្នុងបទល្មើសព្រហ្មទណ្ឌជាច្រើន រួមមាន ការប្រើប្រាស់ Telegram ជាកន្លែងឆបោក បង្ហោះរូបភាពអាសអាភាសរបស់កុមារ ជួញដូរគ្រឿងញៀន និងក្លែងបន្លំ ព្រមទាំងការបដិសេធកិច្ចសហការផ្ដល់ព័ត៌មានដល់អាជ្ញាធរ ការលាងលុយកខ្វក់ និងការផ្ដល់សេវា crypto សម្រាប់ពួកឧក្រិដ្ឋជន។ លោក Pavel Durov ត្រូវបានគេរាយការណ៍ថា អាចស្ថិតក្រោមការឃុំខ្លួនរហូតដល់ថ្ងៃពុធសប្ដាហ៍នេះ។
ទាក់ទងរឿងនេះដែរលោកប្រធានាធិបតីបារាំងអេម៉ានុយអែលម៉ាក្រុន( Emmanuel Macron) ក៏បានធ្វើសេចក្ដីថ្លែងការណ៍ជាសាធារណៈទទួលស្គាល់ជាលើកដំបូងអំពីការចាប់ខ្លួន លោក Pavel Durov ផងដែរ ចាប់តាំងពីរូបលោកត្រូវបានប៉ូលិសបារាំងឃាត់ខ្លួននៅឯអាកាសយានដ្ឋាន ឡឺបួរហ្សេ (Le Bourget) ស្ថិតនៅខាងក្រៅទីក្រុងប៉ារីស កាលពី ថ្ងៃសៅរ៍សប្ដាហ៍មុនមក។ តាមលោក Macron ការឃាត់ខ្លួនស្ថាបនិក Telegram មិនមានជាប់ពាក់ព័ន្ធនឹងចេតនានយោបាយអ្វីនោះទេ ហើយថាបារាំងប្រកាន់ខ្ជាប់ជានិច្ចនូវ ការប្ដេជ្ញាចិត្តយ៉ាងពេញលេញចំពោះសេរីភាពបញ្ចេញមតិស្របច្បាប់។
នៅក្នុងសារមួយបង្ហោះលើបណ្ដាញទំនាក់ទំនងសង្គម X លោកម៉ាក្រុន( Macron) បានគូសបញ្ជាក់ដូច្នេះថា «ការឃាត់ខ្លួនថៅកែ Telegram នៅលើទឹកដីបារាំងត្រូវបានធ្វើឡើង ជាផ្នែកមួយនៃការស៊ើបអង្កេតតាមផ្លូវច្បាប់ ហើយវាមិនមែនជាចេតនានយោបាយអ្វីនោះទេ ដោយរឿងគ្រប់យ៉ាង គឺអាស្រ័យលើចៅក្រមជាអ្នកសម្រេច»។
សូមបញ្ជាក់ថាលោក Pavel Durov ស្ថាបនិក និងជានាយកប្រតិបត្តិ (CEO) នៃកម្មវិធីផ្ញើសារ Telegram ត្រូវបានចាប់ខ្លួននៅអាកាសយានដ្ឋាន Bourget ទីក្រុងប៉ារីស កាលពីល្ងាចថ្ងៃសៅរ៍ ទី២៤ ខែសីហា។បើតាមបណ្ដាណព័ត៌មាន TF1 បញ្ជាក់ថា លោក Durov ត្រូវបានចាប់ខ្លួននៅលើយន្តហោះឯកជនផ្ទាល់ខ្លួន ដោយលោកមានឈ្មោះក្នុងដីកាឃាត់ខ្លួនមួយរបស់សមត្ថកិច្ចបារាំង នៅក្នុងសំណុំរឿងស៊ើបអង្កេតបឋមមួយ។ ប្រភពដដែលអះអាងថា លោក Durov ត្រូវបានចាប់ខ្លួនដោយពាក់ព័ន្ធនឹងដំណើរការនៃកម្មវិធី Telegram ដែលហាក់មានភាពចន្លោះប្រហោងដែលអាចនាំឱ្យមានភាពសេរីក្នុងការអនុញ្ញាតឱ្យសកម្មភាពឧក្រិដ្ឋកម្មធ្វើឡើងតាមរយៈកម្មវិធីផ្ញើសារនេះ។
លោក Pavel Durov ត្រូវបានគេប៉ាន់ស្មានថាមានទ្រព្យសម្បត្តិសរុបប្រមាណ ១៥,៥ពាន់លានដុល្លារអាមេរិក ដែលកន្លងមកលោកធ្លាប់បាននិយាយថាបណ្ដាញសង្គម Telegram គួរតែជា “វេទិកាអព្យាក្រឹត” និងមិនមែនជា “តួអង្គណាមួយនៅក្នុងភូមិសាស្ត្រនយោបាយ” នោះទេ។ ការចាប់ខ្លួនលោក Pavel Durov បានបង្កឱ្យមានការរិះគន់ពីរុស្ស៊ី រួមទាំងមហាសេដ្ឋីអាមេរិក លោក Elon Musk ជាថៅកែបណ្ដាញទំនាក់ទំនងសង្គម X ដែល បាននិយាយថាសេរីភាពបញ្ចេញមតិនៅក្នុងទ្វីបអឺរ៉ុប កំពុងរងការវាយប្រហារ.។
អ្នកនាំពាក្យវិមានក្រេមឡាំង លោក ឌីមីទ្រី ប៉េស្កូវ បានពោលថា បច្ចុប្បន្ន រុស្ស៊ីកំពុងរង់ចាំ ស្តាប់សេចក្តីលម្អិតបន្ថែមពីអាជ្ញាធរបារាំង ដើម្បីដឹងច្បាស់ថា តើរូបលោក ប៉ាវែល ឌូរ៉ូវ មានទោសអ្វីពិតប្រាកដ មុននឹងឈានទៅដល់ការធ្វើអត្ថាធិប្បាយ អំពីការចាប់ខ្លួននេះ។
