លោកឧបនាយករដ្ឋមន្ត្រី ស៊ុន ចាន់ថុលប្រកាសពីសំណងនិងព្រមានកុំចាញ់បោកគេរឿងជីកព្រែកដែលមានជម្រៅជាង៥ម៉ែត្រក្រោមនីវ៉ូទឹកទន្លេរ
16-September-2024 / សេដ្ឋកិច្ច
តាកែវ៖លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអះអាងនាព្រឹកថ្ងៃទី២៦ ខែសីហា ឆ្នាំ២០២៤ថា រាជរដ្ឋាភិបាលនឹងទូទាត់សងរាល់ផលប៉ះពាល់ក្នុងគម្រោងសាងសង់ព្រែកជីកហ្វូណនតេជោ។ តែ លោក ស៊ុន ចាន់ថុល បានសុំការយោគយល់ចំពោះប៉ះពាល់ទាំងឡាយ ហើយរាជរដ្ឋាភិបាលនឹងព្យាយាមកាត់បន្ថយផលប៉ះពាល់ឱ្យបានខ្ពស់បំផុត។
ក្នុងដំណើរចុះពិនិត្យតម្រាយផ្លូវទឹកនៃគម្រោងព្រែកជីកហ្វូណនតេជោ លោកឧបនាយករដ្ឋមន្ត្រី ស៊ុន ចាន់ថុល បានស្នើទៅប្រជាពលរដ្ឋកុំឱ្យមានការព្រួយបារម្ភលើសំណងនៃផលប៉ះពាល់និងបានឱ្យដឹងថា មន្ត្រីក្រសួងសេដ្ឋកិច្ច និងហិរញ្ញវត្ថុ នឹងចុះទៅសិក្សារាល់ផលប៉ះពាល់របស់ប្រជាពលរដ្ឋ ហើយទូទាត់សងលើការប៉ះពាល់នោះ សូម្បីតែដើមឈើហូបផ្លែនានា ក៏នឹងត្រូវទូទាត់សងផងដែរ។
លោកឧបនាយករដ្ឋមន្ត្រី បានគូសបញ្ជាក់បែបនេះ «រាជរដ្ឋាភិបាលយើងដោះស្រាយតាមគោលនយោបាយ តាមច្បាប់តម្លាប់ដែលយើងមាន មិនមែនរំលោភយកដីពីបងប្អូនប្រជាពលរដ្ឋមកកសាងព្រែកជីកនោះទេ។ សូមកុំជឿការញុះញង់រដ្ឋាភិបាលរំលោភយកដី មិនសងថវិកា មិនមែនទេ មិនមែនដាច់ខាត»។
សូមបញ្ជាក់ថា ព្រែកជីកហ្វូណនតេជោ ដែលជាកំណប់ទ្រព្យដ៏មានគុណតម្លៃផ្នែកសេដ្ឋកិច្ចរបស់ខ្មែរ ត្រូវបានប្រកាសបើកការដ្ឋានជាផ្លូវការយ៉ាងមហោឡារិក កាលពីថ្ងៃទី៥ ខែសីហា ឆ្នាំ២០២៤ ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ។គម្រោងនេះ នឹងធ្វើលើផ្លូវទឹកធម្មជាតិដែលមានស្រាបប្រវែងប្រមាណ១៣៥គីឡូម៉ែត្រ។ តម្រាយនៃការសាងសង់ព្រែកជីកនេះ ភាគច្រើនជាវាលបឹង និងវាលស្រែ សម្រាប់លំនៅឋានប្រជាពលរដ្ឋប៉ះពាល់ច្រើននៅទីប្រជុំជន។
លោកឧបនាយករដ្ឋមន្ត្រី ស៊ុន ចាន់ថុល ធ្លាប់បានឱ្យដឹងថា គម្រោងព្រែកជីកនេះ ប៉ះពាល់ប្រហែលជា ១,៥០០ខ្នង ស្ពាន៣កន្លែង រោងចក្រ១ ដីលំនៅឋាន ១៤៩.៥ហិចតា ផ្លូវជាតិ ១៨ខ្សែ ប្រវែង ៤គីឡូម៉ែត្រ ផ្លូវលំ ៧០ខ្សែ ប្រវែង ៤៥គីឡូម៉ែត្រ ទំនប់ទឹក ២ខ្សែ ប្រឡាយទឹក ១៣ខ្សែ ដីស្រែ ២.៩ពាន់ហិកតា។ទាកទងនិងទំហំជីកព្រែលោក ស៊ុន ចាន់ថុល អនុប្រធានប្រចាំការគណៈកម្មាធិការពិសេស ដើម្បីជំរុញការរៀបចំ និងការអនុវត្តគម្រោងព្រែកជីកហ្វូណនតេជោ បានប្រកាសឲ្យដឹងកាលពីថ្ងៃទី១៤ ខែសីហា ឆ្នាំ២០២៤ថា ការជីកព្រែកជីកហ្វូណនតេជោ គឺបានកំណត់ច្បាស់យកជម្រៅ ៥.៤ម៉ែត្រនៅក្រោមទឹកទាបបំផុត របស់ទន្លេមេគង្គ ទន្លេបាសាក់ ដែលយោងតាមស្ថិតិ ៤០ឆ្នាំកន្លងមកនេះ។
នៅក្នុងកម្មវិធីបាឋកថា ស្តីពី «សក្តានុពលនៃព្រែកជីកហ្វូណនតេជា សម្រាប់ការអភិវឌ្ឍកម្ពុជា» នៅសាលាភូមិន្ទរដ្ឋបាល លោក ស៊ុន ចាន់ថុល បានថ្លែងដូចនេះថា «មានអ្នកខ្លះថាជីកព្រែកហ្វូណន តែ ៥.៤ម៉ែត្រ ខែប្រាំងមានទឹកឯណា ស្ងួតចែសហើយជិះអីកើត ជិះកើតតែខែវស្សាទេ។ មិនចឹងនោះទេ ពេលក្រុមបច្ចេកទេសសិក្សា បានលម្អិតហើយថា ជីកជម្រៅ ៥.៤ម៉ែត្រ មិនមែនជីកពីផ្លូវចុះត្រឹម ៥.៤ម៉ែត្រហើយឈប់នោះទេ គឺជីកជម្រៅ ៥.៤ម៉ែត្រ នៅក្រោមទឹកទាបបំផុតរបស់ទន្លេមេគង្គ ទន្លេបាសាក់ ដែលយោងតាមស្ថិតិ ៤០ឆ្នាំកន្លងមក ដូចនេះកន្លែងខ្លះអាចត្រូវជីករហូតដល់ ៣០ម៉ែត្រ ដើម្បីបានជម្រៅ ៥.៤ម៉ែត្រនេះ»។
លោក ស៊ុន ចាន់ថុល បានបន្ថែមថា ដើម្បីឱ្យយើងអាចដំណើរការបានគ្រប់រដូវ គឺត្រូវជីកឱ្យបានជម្រៅ ៥.៤ម៉ែត្រនៅក្រោមទឹកទាបបំផុត ដែលជាក់ស្តែងតំបន់ខ្លះនៅខេត្តតាកែវ ត្រូវជីករហូតដល់ ៣០ម៉ែត្រ ដើម្បីឱ្យបានជម្រៅ ៥.៤ម៉ែត្រនេះ ហើយកន្លែងផ្សេៗទៀតក៏ត្រូវធ្វើដូវនេះដែរ គឺធ្វើយ៉ាងណាឱ្យបានជម្រៅ ៥.៤ម៉ែត្រ ក្រោមទឹកទាបបំផុតរបស់ទន្លេ។ ក្នុងនោះកន្លែងខ្លះរដូវប្រាំងមានជម្រៅយ៉ាងតិចបំផុត ៥.៤ម៉ែត្រ ហើយរដូវវស្សាអាចមានជម្រៅជាង ១០ម៉ែត្រក៏មានដែរ។លោក ស៊ុន ចាន់ថុល បានបន្ថែមថា សម្រាប់គម្រោងព្រែកជីកហ្វូណនតេជានេះ មានចំនួន ៣៨គីឡូម៉ែត្រ ដែលយើងនឹងត្រូវតម្រង់កុំឱ្យផ្លូវនេះកោងខ្លាំងពេក ដែលអាចនាំឱ្យមានបញ្ហាពេលកប៉ាល់បើកបរ តាមផ្លូវទឹកនេះផងដែរ។
សូមបញ្ជាក់ដែរថា ព្រែកជីកហ្វូណនតេជោ ត្រូវតភ្ជាប់ពីទន្លេទៅសមុទ្រ មានប្រវែង ១៨០គីឡូម៉ែត្រ ទទឹងមុខកាត់ផ្នែកខាងលើប្រវែង ១០០ម៉ែត្រ និងមុខកាត់ផ្នែកខាងក្រោមប្រមាណ ៨០ម៉ែត្រ ជម្រៅទឹកប្រមាណ ៥,៤ម៉ែត្រ និងមានគន្លងនាវាចរណ៍ចំនួន ២គន្លង។ ផ្លូវទឹកនេះចាប់ផ្តើមពីព្រែកតាកែវ នៃទន្លេមេគង្គ ឆ្លងកាត់តាមព្រែកពោធិ៍ នៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ និងបន្តរហូតដល់សមុទ្រខេត្តកែប ដោយឆ្លងកាត់ភូមិសាស្ត្រ ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប។
ព្រែកជីកហ្វូណនតេជោ នឹងត្រូវសាងសង់ស្ទើរទាំងស្រុងលើតម្រាយខ្សែផ្លូវទឹកធម្មជាតិ និងផ្លូវទឹកបុរាណ ដែលបានបន្សល់ទុកស្រាប់តាំងពីសម័យអាណាចក្រហ្វូណនមកម្ល៉េះ ក្នុងនោះផ្លូវទឹក ធម្មជាតិដែលមានស្រាប់ មានប្រវែងប្រមាណ ១៣៥គីឡូម៉ែត្រ ផ្លូវទឹកត្រូវជីកតម្រង់កុំឱ្យកោងពេក មានប្រវែងប្រមាណ ៣៨គីឡូម៉ែត្រ និងផ្លូវទឹកជីកថ្មីមានប្រវែងប្រមាណ ៧គីឡូម៉ែត្រ ដើម្បីកាត់បន្ថយកំណោង និងកាត់បន្ថយចម្ងាយតភ្ជាប់ទៅកាន់សមុទ្រ។
គម្រោងនេះនឹងសាងសង់សន្ទះផ្លូវទឹកចំនួន ៣កន្លែង ស្ថិតនៅខេត្តកណ្តាល ខេត្តតាកែវ និងខេត្តកែប ដែលធានាបាននូវប្រសិទ្ធភាពក្នុងការទប់ស្កាត់ការជ្រៀតចូលនៃទឹកប្រៃទៅ ក្នុងបណ្តាញផ្លូវទឹកសាប និងអាចកំណត់បរិមាណ និងអត្រានៃរំហូរទឹកសាបដែលត្រូវ ហូរចេញទៅសមុទ្របានប្រកបដោយប្រសិទ្ធភាពខ្ពស់។គម្រោងនេះនឹងប្រើប្រាស់រយៈពេលសាងសង់ប្រមាណ ៤៨ខែ និងគ្រោងបញ្ចប់នៅក្នុង អំឡុងឆ្នាំ២០២៨ ខាងមុខ ដោយប្រើប្រាស់ទុនវិនិយោគសរុបប្រមាណ ១.៧ពាន់លានដុល្លារអាម៉េរិក ក្នុងនោះទុនវិនិយោគរបស់សហគ្រាសសាធារណៈ និងក្រុមហ៊ុនក្នុងស្រុក មានចំនួន ៥១% និងទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន(CRBC) មានចំនួន ៤៩% ដោយការវិនិយោគនេះនឹងត្រូវអនុវត្តក្រោមរូបភាពសាងសង់-ប្រតិបត្តិការ-ផ្ទេរ (BOT)។
ទាក់ទងការធ្វើសំណង់ព្រែកជីកហ្វូណន់នេះលោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា មិនមានការណែនាំណាមួយ តម្រូវឱ្យប្រជាពលរដ្ឋ បង់ប្រាក់ជាថ្នូរបានចូលធ្វើការនៅការដ្ឋានព្រែកជីកហ្វូណនតេជោនោះឡើយ ដូច្នេះសូមប្រជាពលរដ្ឋកុំចាញ់បោកការបំភ្លៃនេះឱ្យសោះ។លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា រាជរដ្ឋាភិបាលគ្មានការតម្រូវឱ្យប្រជាពលរដ្ឋបង់ប្រាក់ ជាថ្នូរចូលធ្វើការជាមួយគម្រោងព្រែកជីកហ្វូណនតេជោនោះឡើយ។ ម្យ៉ាងវិញទៀត គិតចាប់ពីពេលប្រារព្ធពិធីបើកការដ្ឋានព្រែកជីកហ្វូណនតេជោ នាថ្ងៃទី៥ ខែសីហា រហូតមកដល់ពេលនេះ គឺមិនទាន់មានការប្រើប្រាស់គ្រឿងចក្រនៅឡើយដែរ ដោយក្រុមការងារកំពុងដោះស្រាយបញ្ហាសំណងជូនប្រជាពលរដ្ឋដែលរងផលប៉ះពាល់ជាមុនសិន។
លោកឧបនាយករដ្ឋមន្ត្រីបានអំពាវនាវដល់ប្រជាពលរដ្ឋថា «ប្រសិនបើមានគេឱ្យបង់លុយកាក់ សូមកុំមានការយល់ច្រឡំ ឬចាញ់បោកតាមការបោកប្រាស់នេះឱ្យសោះ»។លោក ស៊ុន ចាន់ថុល បានបន្តថា ប្រសិនបើមានចម្ងល់ ចង់បានព័ត៌មានជាក់ច្បាស់ពីការអនុវត្តគម្រោងព្រែកជីកហ្វូណន សូមចូលទៅមើលក្នុងគេហទំព័ររបស់ក្រសួងសាធារណការ និងដឹកជញ្ជូន និងគេទំព័រព្រែកជីកហ្វូណនតេជោ ក៏ដូចជាគ្រុបតេឡេក្រាម អ៉ីនស្តាក្រាម ទំព័រហ្វេសប៊ុកជាដើម ដោយប្រជាពលរដ្ឋអាចតាមដានព័ត៌មាន ឬខំមិនសួរ ព័ត៌មានជាមុន ដាច់ខាតកុំជឿការបោកប្រាស់រឿងទារលុយនេះឱ្យសោះ ឬក៏សូមកុំចេះ តែនិយាយទាំងខុសឱ្យសោះ។
លោក ថោ ជេដ្ឋារដ្ឋមន្ត្រីក្រសួងធនធានទឹក ដែលចូលរួមអមដំណើរលោកឧបនាយករដ្ឋមន្ត្រី ស៊ុន ចាន់ថុលបានឲ្យដឹង អំពីស្ថានភាពភូមិសាស្ត្រនៃការជីកព្រែកគឺ បានចេញដំណើរពីព្រែកតាហ៊ីងទៅទីរួមស្រុកអង្គរបូរីខេត្តតាកែវ តាមរយៈព្រែកតាហ៊ីង ព្រែកក្បាលខ្មោច និងស្ទឹងអង្គរបូរី និងស្ទឹងអូរកែវរហូតដល់ព្រំប្រទល់កម្ពុជា-វៀតណាម រួចត្រលប់មកទីរួមស្រុកអង្គរបូរីបន្តដំណើរទៅទីរួមខេត្តតាកែវតាមប្រឡាយ១៥ ដែលជាកំណាត់ផ្លូវទឹកព្រែកជីកហ្វូណនតេជោ និងបានចុះពិនិត្យទីតាំងគ្រោងសាងសង់ទ្វារទឹកនាវាចរណ៍ត្រង់ទំនប់អូរតុំ។
