រាជធានីភ្នំពេញ ត្រៀមសប្បាយខេត្តកណ្តាលបិទផ្លូវដើម្បីធ្វើកម្មវិធីបើកការដ្ឋានសាងសង់ «ព្រែកជីកហ្វូណនតេជោ»
ភ្នំពេញ៖ នារសៀលថ្ងៃទី០៤ ខែសីហា ឆ្នាំ២០២៤នេះ លោក ឃួង ស្រេង អភិបាលរាជធានីភ្នំពេញ បានកិច្ចប្រជុំត្រួតពិនិត្យការងារសន្តិសុខ សុវត្ថិភាព សណ្ដាប់ធ្នាប់ សាធារណៈ និងពិនិត្យទីតាំងប្រារព្ធកម្មវិធីប្រគំតន្ត្រីជាក់ស្ដែង ដើម្បីអបអរសាទរពិធីបើកការដ្ឋានសាងសង់ «ព្រែកជីកហ្វូណន តេជោ»ព្រឹក ថ្ងៃទី០៥ ខែសីហា ឆ្នាំ២០២៤ នៅមុខសាលមហោស្រពកោះពេជ្រ ព្រមទាំងរៀបចំពិធីអុជទៀនធូប សុំសេចក្ដីសុខ សេចក្ដីចម្រើន ដំណើរការកម្មវិធី ប្រកបដោយរលូន។
លោក ឃួង ស្រេង បានលើកឡើងថា ការដ្ឋានសាងសង់ «ព្រែកជីកហ្វូណនតេជោ» នេះ ជាផលប្រយោជន៍ដ៏ធំធេង សម្រាប់ប្រជាជាតិកម្ពុជាយើង។ គម្រោងព្រែកជីកហ្វូណន-តេជោ ជាព្រែកជីកប្រវត្តិសាស្ត្រលើកទី១ នៅកម្ពុជា ក្រោមគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន ហើយបច្ចុប្បន្នសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឲ្យបន្តសម្រេចបានដើម្បីផលប្រយោជន៍ខ្មែរជំនាន់ក្រោយ។ យើងពិតជាមានភព្វវាសនាណាស់ ដែលបានចូលរួមលើការងារព្រែកជីកហ្វូណន-តេជោនេះ។
លោក ឃួង ស្រេង បានបញ្ជាក់ថា ការងារសំខាន់របស់កម្លាំងសមត្ថកិច្ច គឺកិច្ចការពារសន្តិសុខ សុវត្ថិភាព និងសណ្ដាប់ធ្នាប់សាធារណៈ ក្នុងពិធីអបអរសាទរ ថ្ងៃបើកការដ្ឋានគម្រោងព្រែកជីកហ្វូណន-តេជោ នៅថ្ងៃស្អែកនេះ ដែលទាមទារឲ្យកងកម្លាំង និងអាជ្ញាធរខណ្ឌទាំង១៤ យកអស់កម្លាំងកាយចិត្ត ក្នុងស្មារតីខ្មែររួមជាតិតែមួយ ធ្វើយ៉ាងណាឲ្យពិធីនេះដំណើរទៅដោយរលូន មានសុខសុវត្ថិភាព ជាមួយភាពសប្បាយរីករាយ។
គម្រោងព្រែកជីកហ្វូណន-តេជោ នឹងបើកការដ្ឋាន នៅព្រឹកថ្ងៃទី០៥ ខែសីហា ឆ្នាំ២០២៤ស្អែកនេះ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។
គ្រប់ខណ្ឌ គ្រប់មន្ទីរ ចំណុះឲ្យរដ្ឋបាលរាជធានីភ្នំពេញ ក៏មានការរៀបចំអបអរសាទរពិធីបើកការដ្ឋានគម្រោងព្រែកជីកហ្វូណន-តេជោនេះដែរ ដោយធ្វើឡើងនៅតាមអង្គភាពរៀងៗខ្លួន មានទាំងការដាក់ទង់ជាតិ ទង់សាសនា និងការទូងស្គ អោយមានភាពគគ្រឹកគគ្រែង ក្នុងស្មារតីជាតិតែមួយ។ ដោយឡែក វិហារ សាសនានានា នៅក្នុងភូមិសាស្ត្ររាជធានីភ្នំពេញ ក៏មានការទូងស្គបែបនេះផងដែរ។
ក្រោយពិធីបើកការដ្ឋានបានបញ្ចប់ នៅរាត្រីថ្ងៃទី៥ ខែសីហា ឆ្នាំ២០២៤ នឹងមានការប្រគុំតន្ត្រីនៅមុខសាលមហោស្រពកោះពេជ្រ ដែលមានសិល្បករ និងកីឡាករ ល្បីៗរបស់កម្ពុជា និងមានអ្នកចូលរួមប្រមាណជាង១ម៉ឺននាក់ ជាមួយនិងការរៀបចំបាញ់កាំជ្រួច នៅទន្លេ៤មុខ ចំនួន២លើក នោះគឺនៅម៉ោង៧៖២០នាទី និងម៉ោង៩៖៩យប់។
សម្រាប់ខេត្តកណ្ដាលវិញក៏មានការចេញសេចក្ដីជូនដំណឹងពីការបិទចរាចរណ៍ទាំងស្រុងនៅលើកំណាត់ផ្លូវជាតិលេខ១ និងផ្លូវនាវាចរគ្រប់ប្រភេទ ចាប់ពីម៉ោង០០៖០០នាទី កណ្ដាលអធ្រាត្រ ដល់ម៉ោង១២៖០០នាទី ថ្ងៃត្រង់ទី០៥ ខែសីហា ឆ្នាំ២០២៤ ដើម្បីសម្រួលដល់ការប្រារព្ធពិធីបើកការដ្ឋានសាងសង់ព្រែកជីកហ្វូណនតេជោ ក្រោមអធិបតីភាពសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវ ពេជ ចន្ទមុន្នី។
ក្នុងសេចក្ដីជូនដំណឹងនៅថ្ងៃទី០៤ ខែសីហា ឆ្នាំ២០២៤នេះ រដ្ឋបាលខេត្តកណ្ដាល បានបញ្ជាក់ថា អាជ្ញាធរសម្រេចបិទចរាចរណ៍មធ្យោបាយធ្វើដំណើរគ្រប់ប្រភេទ នៅលើកំណា ត់ផ្លូវជាតិលេខ១ ចាប់ពីស្តុបបំបែកខ្នែងផ្លូវក្រវ៉ាត់ក្រុងទី៣ ត្រង់កំពង់ផែស្វយ័តក្រុងភ្នំពេញ គ.ម៣០+១៤០ ភូមិកណ្តាលលើ ឃុំបន្ទាយដែក ស្រុកកៀនស្វាយ រហូតដល់អ្នកលឿង ត្រើយខាងលិច និងបិទការធ្វើនាវាចរគ្រប់ប្រភេទតាមបណ្ដោយដងទន្លេមេគង្គ ក្នុងភូមិសាស្ត្រទឹកដីខេត្តកណ្ដាល។
មធ្យោបាយធ្វើដំណើរគ្រប់ប្រភេទ ដែលមានបំណងធ្វើដំណើរចូលរាជធានីភ្នំពេញ អាចធ្វើចរាចរណ៍ ចេញពីផ្លូវជាតិលេខ១ ពីអ្នកលឿង ត្រើយខាងកើត វាងតាមផ្លូវជាតិលេខ១១ ដល់រង្វង់មូលស្វាយអន្ទរ បន្តមកផ្លូវជាតិលេខ៨ ដល់ស្ពានព្រែកតាមាក់ ឆ្លងចូលផ្លូវជាតិលេខ៦ និងអាចបន្តធ្វើដំណើរតាមមហាវិថីឈ្នះ-ឈ្នះ ឆ្ពោះមកផ្លូវជាតិលេខ៥។ ចំពោះមធ្យោបាយធ្វើដំណើរគ្រប់ប្រភេទ ពីរាជធានីភ្នំពេញទៅអ្នកលឿង អាចវាងត្រឡប់តាម ទិសដៅដូចបានរៀបរាប់ខាងលើ៕
