យន្តហោះចម្បាំងF16មានវត្តមាននៅអ៊ុយក្រែនហើយទន្ទឹមគ្នានោះរុស្ស៊ីក៏ធ្វើសមយុទ្ធអាវុធនុយក្លេអែរដែរ!
08-July-2026 / ព័ត៌មានអន្តរជាតិ
អ៊ុយក្រែន៖ រដ្ឋមន្ត្រីការបរទេសនៃប្រទេសលីទុយអានី និងមន្ត្រីអាមេរិកម្នាក់និយាយថា យន្តហោះចម្បាំង F-16 នៅក្នុងកញ្ចប់ជំនួយដំបូងបង្អស់ បានទៅដល់ប្រទេសអ៊ុយក្រែនហើយ ដោយមានការរំពឹងទុក ថាទីក្រុងកៀវ កិច្ចខិតខំប្រឹងប្រែងនេះ នឹងជួយកសាងសមត្ថភាពកងទ័ពអាកាសរបស់ខ្លួនឡើងវិញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១ ខែសីហា ឆ្នាំ ២០២៤។
លោក Gabrielius Landsbergis រដ្ឋមន្ត្រីការបរទេសលីទុយអានី បានបង្ហោះសារមួយលើបណ្តាញសង្គម X ដូច្នេះថា «វត្តមាន F-16 នៅអ៊ុយក្រែន នឹងធ្វើឱ្យរឿងដែលសឹងតែមិនអាចទៅរួច ប្រែជាអាចសម្រេចបានទាំងស្រុង»។ មន្ត្រីអាមេរិកមួយរូប បាននិយាយក្នុងលក្ខខណ្ឌមិនបញ្ចេញឈ្មោះថា ការចែកចាយយន្តហោះចម្បាំង F-16 បានធ្វើឡើងរួចរាល់ហើយ។តែ កងទ័ពអាកាសអ៊ុយក្រែន មិនទាន់ឆ្លើយតបចំពោះសំណើសុំការអត្ថាធិប្បាយរបស់ Reuters នៅឡើយទេ។
ទាក់ទងនិងប្រសិទ្ធភាពយន្តហោះចម្បាំង F-16 លោក Federico Borsari មកពី Center for European Policy Analysis មានមូលដ្ឋានក្នុងទីក្រុងវ៉ាស៊ីនតោន បាននិយាយថា F-16 ទំនងជានឹងមានបេសកកម្មស្នូលចំនួន៣។ រួមមានការស្ទាក់ចាប់បំផ្លាញមីស៊ីល និងដ្រូនដែលរុស្ស៉ីបាញ់ស្រោចលើអ៊ុយក្រែនឥតឈប់ឈរ បំផ្លាញប្រព័ន្ធការពារដែនអាកាសសត្រូវ ព្រមទាំងវាយប្រហារលើទីតាំងកងទ័ពរុស្ស៉ី និងឃ្លាំងស្ដុកអាវុធដោយប្រើមីស៊ីលបាញ់ពីអាកាសទៅដី។
តាមលោក Borsari យន្ដហោះចម្បាំងផលិតដោយអាមេរិកមួយនេះនឹងមានឥទ្ធិពលមួយចំនួនលើសមរភូមិសង្គ្រាម។ ព័ត៌មានជាច្រើនពាក់ព័ន្ធនឹងការដាក់ពង្រាយ F-16 ត្រូវបានលាក់ការ ហើយថាតើលោកខាងលិចនឹងអនុញ្ញាតឱ្យអ៊ុយក្រែនប្រើយន្ដហោះចម្បាំងនេះ វាយប្រហារលើគោលដៅណាខ្លះ ឬក៏ថាតើអាវុធអ្វីខ្លះដែលត្រូវបញ្ជូនទៅជាមួយ F-16 ក៏មិនត្រូវបានបង្ហើបឱ្យដឹងនោះដែរ។
F-16 អាចបំពាក់មីស៊ីលគ្រូស Storm Shadow ផលិតដោយចក្រភពអង់គ្លេសដែលបាញ់បានចម្ងាយជាង២៥០គីឡូម៉ែត្រ ហើយដែលចម្ងាយបាញ់នេះអាចឱ្យអ៊ុយក្រែនវាយប្រហារចូល ក្នុងទឹកដីរុស្ស៉ី។ F-16 ក៏អាចបំពាក់មីស៊ីលរយៈចម្ងាយឆ្ងាយបាញ់ពីអាកាសទៅអាកាសដែលអាចគំរាមកំហែងដល់យន្ដហោះទម្លាក់គ្រាប់បែក និងយន្ដហោះចម្បាំងរុស្ស៉ីផងដែរ។ បន្ថែមពីលើនេះ ប្រព័ន្ធរ៉ាដាដ៏ទំនើបបំពាក់លើ F-16 អាចអនុញ្ញាតឱ្យពីឡុតអ៊ុយក្រែនកំណត់គោលដៅវាយប្រហារបានឆ្ងាយជាងយន្ដហោះចម្បាំងដែលអ៊ុយក្រែន មានដូចជា MiG-29, Su-27 និង Su-24។
ការគ្រប់គ្រងដែនអាកាសគឺផ្ដល់អត្ថប្រយោជន៍យ៉ាងខ្លាំងដល់កងទ័ពជើងគោក ពីព្រោះយន្ដហោះចម្បាំងអាចធ្វើជាខែលការពារកងទ័ពជើងគោក។ ប៉ុន្តែ ការប្រើប្រាស់ F-16 ដើម្បីគាំទ្រកងទ័ពអ៊ុយក្រែននៅសមរភូមិមុខ ក៏ប្រថុយនឹងហានិភ័យខ្ពស់នៃការបាញ់ទម្លាក់ដែរ ដោយសារតែរុស្ស៉ីមានប្រព័ន្ធការពារដែនអាកាសទំនើបៗ។ តែយ៉ាងណា មានប្រសើរជាងអត់ ហើយណាមួយ F-16 អាចនឹងជះឥទ្ធិពលក្រោមរូបភាពជាសង្គ្រាមចិត្តសាស្ត្រប្រឆាំងនឹងពីឡុតរុស្ស៉ី និងជាការលើកទឹកចិត្ត រួមទាំងស្មារតីបន្តការប្រយុទ្ធរបស់កងទ័ពអ៊ុយក្រែន។
គួរបញ្ជាក់ថា ប្រទេសដាណឺម៉ាក ប្តេជ្ញាបរិច្ចាគយន្តហោះចម្បាំងសរុបចំនួន ១៩គ្រឿង ខណៈដែលហូឡង់ សន្យាបញ្ជូនទៅអ៊ុយក្រែនចំនួន ២៤គ្រឿង។ ន័រវែស ឯណោះវិញក៏បានអះអាងថា នឹងបរិច្ចាគយន្តហោះចម្បាំង F-16 ចំនួន ៦គ្រឿងទៅកាន់អ៊ុយក្រែនផងដែរ។ទន្ទឹមគ្នានិងវត្តមានយន្តហោះហោះចម្បាំង F-16 ក្រសួងការពារជាតិរុស្ស៊ី នៅថ្ងៃពុធសប្តាហ៍នេះ បាននិយាយថា កងកម្លាំងរុស្ស៊ី បានចាប់ផ្តើមសមយុទ្ធដំណាក់កាលទីបី ដើម្បីអនុវត្តនូវផែនការដាក់ពង្រាយអាវុធនុយក្លេអ៊ែរយុទ្ធសាស្ត្រ ។
នៅក្នុងសេចក្តីថ្លែងការណ៍មួយនៅលើបណ្តាញសារអេឡិចត្រូនិកតេឡេក្រាម (Telegram) ក្រសួងការពារជាតិរុស្ស៊ី បាននិយាយថា "អនុលោមតាមការសម្រេចចិត្តរបស់ប្រធានសហព័ន្ធរុស្ស៊ី ដំណាក់កាលទីបីនៃសមយុទ្ធកងកម្លាំងនុយក្លេអ៊ែរយុទ្ធសាស្ត្រ បានចាប់ផ្តើមប្រព្រឹត្តទៅ" ។ក្រសួងការពារជាតិរុស្ស៊ី បានឱ្យដឹងជាបន្តថា ទាហានមកពីតំបន់យោធាភាគខាងត្បូង និងកណ្តាល នឹងហ្វឹកហាត់ពីរបៀបដាក់ពង្រាយក្បាលគ្រាប់សម្រាប់ប្រព័ន្ធប្រតិបត្តិការ និងកាំជ្រួចយុទ្ធសាស្ត្រអ៊ីសកាន់ឌ័រ-អិម (Iskander-M) ហើយនឹងផ្លាស់ទីដោយសម្ងាត់ទៅកាន់ទីតាំងបាញ់បង្ហោះ ។
ក្រសួងបានរៀបរាប់ទៀតថា "ដំណាក់កាលនៃសមយុទ្ធនាពេលបច្ចុប្បន្ន គឺសំដៅដល់ការត្រៀមលក្ខណៈរបស់អង្គភាពយោធា និងយុទ្ធោបករណ៍នៃអង្គភាពប្រយុទ្ធសម្រាប់ទទួលបានចំណេះដឹងក្នុងការប្រើប្រាស់អាវុធនុយក្លេអ៊ែរយុទ្ធសាស្ត្ររបស់រុស្ស៊ី ដើម្បីបំពេញបេសកកម្មប្រយុទ្ធ" ។
រុស្ស៊ី បានធ្វើសមយុទ្ធដំណាក់កាលទី១ ក្នុងខែឧសភា ហើយសម្ព័ន្ធមិត្តបេឡារុស បានចូលរួមក្នុងដំណាក់ទី២ ក្នុងខែមិថុនា ។រុស្ស៊ីនិយាយថា សហរដ្ឋអាម៉េរិក និងអឺរ៉ុប កំពុងតែជំរុញពិភពលោក ឱ្យឆ្ពោះទៅរកចំណុចកំពូលនៃការប្រឈមមុខនុយក្លេអ៊ែដាក់គ្នាទៅវិញទៅមក តាមរយៈការផ្គត់ផ្គង់អាវុធមានតម្លៃរាប់ពាន់លានដុល្លារអាម៉េរិក ដល់អ៊ុយក្រែន ដែលអាវុធខ្លះ ត្រូវបានប្រើប្រាស់នៅក្នុងសកម្មភាពប្រឆាំងនឹងទឹកដីរុស្ស៊ី ។
គួររំឮកថា ចាប់តាំងពីការបញ្ជូនទាហានរាប់ពាន់នាក់ ឱ្យចូលទៅឈ្លានពានអ៊ុយក្រែន កាលពីថ្ងៃទី ២៤ ខែកុម្ភៈ ឆ្នាំ ២០២២ ប្រធានាធិបតីរុស្ស៊ី វ្ល៉ាឌីមៀ ពុទីន បានគំរាមម្តងហើយម្តងទៀតថា រុស្ស៊ីអាចនឹងប្រើប្រាស់អាវុធនុយក្លេអ៊ែរដើម្បីការពារខ្លួនប្រសិនបើស្ថិតនៅក្នុងស្ថានភាពធ្ងន់ធ្ងរ ខណៈលោកខាងលិច លើកឡើងថា ជាការបំភ័យដើម្បីបង្ហាញឥទ្ធិពលយោធា ៕
