កូរ៉េខាងត្បូង បង្ហាញពីតួលេខអ្នកដែលរត់គេចពីកូរ៉េខាងជើង ចូលទឹកដីរបស់ខ្លួនបន្ទាប់ពីប្រធានាធិបតីប្រកាសថាមិនបញ្ជូនទៅវិញ
11-March-2026 / ព័ត៌មានអន្តរជាតិ
ប្រទេសកូរ៉េ៖ក្រសួងបង្រួបបង្រួមជាតិកូរ៉េខាងត្បូង បានប្រកាសកាលពីថ្ងៃអង្គារទី២៣ ខែកក្កដា ថា ប្រជាជនដែលលួចរត់ចេញពីកូរ៉េខាងជើងហើយបានមកដល់ទឹកដីរបស់ខ្លួន មានចំនួនសរុប ១០៥នាក់ ក្នុងរយៈពេល៦ខែដើមឆ្នាំ២០២៤ ពោលគឺកើនឡើងបន្តិចបើធៀបនឹងឆ្នាំមុន។ជនជាតិកូរ៉េខាងជើងចំនួន ៤៣នាក់ បានចូលទៅដល់កូរ៉េខាងត្បូង ចន្លោះពីខែមករាដល់ខែមីនា ខណៈដែល ៦២នាក់ផ្សេងទៀត បានទៅដល់ក្នុងអំឡុងខែមេសាដល់ខែមិថុនា។
យោងតាមទិន្នន័យរបស់រដ្ឋាភិបាលក្រុងសេអ៊ូល កាលពីឆមាសទី១ ឆ្នាំ២០២៣ មានអ្នករត់គេចខ្លួនចេញពីកូរ៉េខាងជើងសរុបចំនួន ៩៩នាក់។កូរ៉េខាងត្បូង មានគោលនយោបាយយូរអង្វែង ក្នុងការទទួលយកជនភៀសខ្លួនពីកូរ៉េខាងជើងណាដែលមានបំណងចង់រស់នៅលើទឹកដីរបស់ខ្លួន ខណៈដែលបច្ចុប្បន្ននេះ ក្រុងសេអ៊ូលបានទទួលយកជនភៀសខ្លួនពីកូរ៉េខាងជើងមិនតិចជាង ៣៤ ០០០នាក់នោះឡើយ ហើយលំហូរនៃអ្នករត់ចោលស្រុកនៅតែបន្តកើនឡើងថែមទៀត ចំពេលដែលនៅក្នុងប្រទេសកូរ៉េខាងជើងកំពុងមានបញ្ហាខ្វះខាតស្បៀងអាហាររ៉ាំរ៉ៃ និងការគាបសង្កត់នយោបាយដ៏ធ្ងន់ធ្ងរ។
នៅពេលមកដល់កូរ៉េខាងត្បូង អ្នករត់ចោលស្រុកកូរ៉េខាងជើងត្រូវបានផ្តល់សញ្ជាតិ ផ្ទះសម្បែង ប្រាក់ផ្លាស់ប្តូរទីលំនៅ និងអត្ថប្រយោជន៍ផ្សេងៗទៀត។ ទោះជាបែបនេះក្ដី ហេតុតែមានប្រវត្តិមកពីប្រទេសដែលផ្ដាច់ការ ក្រីក្រ និងសង្គមនិយម ជនរត់ចោលស្រុកជាច្រើនបានជួបប្រទះនឹងបញ្ហារើសអើង និងភាពលំបាកធ្ងន់ធ្ងរ ក្នុងការសម្របខ្លួនទៅនឹងជីវិតថ្មីនៅក្នុងប្រទេសមូលធននិយម និងមានការប្រកួតប្រជែងខ្លាំង។
បច្ចុប្បន្នរាល់ព័ត៌មានលម្អិតទាក់ទិននឹងការរត់ចោលស្រុករបស់កូរ៉េខាងជើង រមែងចាយពេលរាប់ខែទម្រាំត្រូវបានទម្លាយឲ្យសាធារណជនបានដឹងឮ នេះក៏ព្រោះតែជនរត់ចោលស្រុកទាំងនោះត្រូវតម្រូវឲ្យស្ថិតនៅក្រោមការស៊ើបអង្កេតពីអាជ្ញាធរ ព្រមទាំងត្រូវឆ្លងកាត់វគ្គបណ្ដុះបណ្ដាលអំពីប្រព័ន្ធ និងសង្គមកូរ៉េខាងត្បូងជាមុនសិនដើម្បីការពារការបន្លំខ្លួនធ្វើចារកម្ម។សូមបញ្ជាក់ថា ប្រធានាធិបតីកូរ៉េខាងត្បូងលោក យុន ស៊ុកយុល (Yoon Suk Yeol) កាលពីសប្តាហ៍កន្លងទៅ បានប្តេជ្ញាចិត្ត និងធានាថា ជនភៀសខ្លួនកូរ៉េខាងជើងទាំងអស់ នឹងមិនមានការធ្វើមាតុភូមិនិវត្តន៍បញ្ជូនទៅកាន់ប្រទេសកូរ៉េខាងជើងវិញឡើយ ។
ថ្លែងនៅក្នុងពិធីមួយស្តីពីទិវាអ្នករត់ភៀសខ្លួនចេញពីកូរ៉េខាងជើង ប្រមុខដឹកនាំកូរ៉េខាងត្បូង លោក យុន (Yoon) ក៏បានថ្កោលទោសប្រទេសកូរ៉េខាងជើង ពាក់ព័ន្ធនឹងការដំឡើងរបងបន្លា របងឆក់ដោយចរន្តអគ្គិសនី និងបង្កប់គ្រាប់មីននៅតាមព្រំដែន ដើម្បីការពារករណីលួចរត់គេចចេញពីប្រទេសពីសំណាក់ប្រជាជនរបស់ខ្លួន ។
កាលពីខែធ្នូ ឆ្នាំមុន ក្រុមអ្នកសិទ្ធិមនុស្ស ដែលមានមូលដ្ឋានស្ថិតនៅក្នុងរដ្ឋធានីសេអ៊ូល បាននិយាយថា ជនជាតិកូរ៉េខាងជើងក្នុងចំនួនរហូតដល់ ៦០០ នាក់ បាន «បាត់ខ្លួន» បន្ទាប់ពីប្រទេសចិន បានបញ្ជូនជនចំណាកស្រុកកូរ៉េខាងជើង ចេញពីប្រទេសចិនទាំងបង្ខំ កាលពីខែតុលាឆ្នាំមុន ដោយក្រុមអ្នកសិទ្ធិមនុស្សបានព្រមានថា ជនភៀសខ្លួនទាំងអស់នោះ អាចប្រឈមមុខនឹងការជាប់ពន្ធនាគារ ឬក៏ទទួលរងនូវការធ្វើទារុណកម្ម អំពើហិង្សាផ្លូវភេទ ឬរហូតឈានដល់ការប្រហារជីវិតនៅក្នុងប្រទេសកូរ៉េខាងជើង ។ បន្ទាប់ពីសង្គ្រាមកូរ៉េ ឆ្នាំ ១៩៥០-៥៣ បានបញ្ចប់ដោយបទឈប់បាញ់ ប៉ុន្តែមិនមានសន្ធិសញ្ញាច្បាស់លាស់ បានធ្វើឱ្យទំនាក់ទំនងរវាងប្រទេសបងប្អូនទាំងពីរ នៅតែស្ថិតនៅក្នុងភាពមិនប្រាកដប្រជា ជាពិសេសបញ្ហានៅតាមព្រំដែនរវាងប្រទេសទាំងពីរ ៕ ប្រភព៖ Reuters
