បើលោកស្រី កាម៉ាឡា ហារីសក្លាយជាបេក្ខជនប្រធានាធិបតីរបស់គណបក្សប្រជាធិបតេយ្យវានឹងបង្កការចលាចលក្នុងគណបក្សសាធារណរដ្ឋ?
19-January-2026 / ព័ត៌មានអន្តរជាតិ
អាមេរិក៖ អនុប្រធានាធិបតីអាមេរិក (Kamala Harris) ទទួលបានសំឡេងគាំទ្រភាគច្រើនគ្រប់គ្រងពីប្រតិភូគណបក្សប្រជាធិបតេយ្យ ដើម្បី ឈ្នះការតែងតាំងជាបេក្ខជនប្រធានាធិបតីជំនួសលោក ចូ បៃដិន ដែលបានសម្រេចចិត្តដកខ្លួនចេញពីការប្រកួតកាលពីថ្ងៃអាទិត្យសប្ដាហ៍មុន។ ទីភ្នាក់ងារសារព័ត៌មាន Reutersបានចេញផ្សាយ ដោយផ្អែកលើប្រភពពីក្រុមការងារយុទ្ធនាការឃោសនាបោះឆ្នោតរបស់លោកស្រី ហារីស។
បើតាមការវាយតម្លៃពីទីភ្នាក់ងារសារព័ត៌មាន Associated Press គិតត្រឹមកាលពីថ្ងៃចន្ទ ទី២២ ខែកក្កដា លោកស្រី ហារីស មានប្រតិភូនៅក្នុងដៃ ២២១៤រូបដែលបាន សន្យាថានឹងបោះឆ្នោតគាំទ្រលោកស្រី ជាបេក្ខជនប្រធានាធិបតីនៅថ្ងៃសមាជជាតិរបស់គណបក្សប្រជាធិបតេយ្យនៅខែសីហាខាងមុខ ហើយចំនួនប្រតិភូនេះគឺលើសពីសំឡេង ភាគច្រើនដែលត្រូវការជាចាំបាច់ដើម្បីទទួលបានការតែងតាំង។ក៏ប៉ុន្តែ Associated Press បាននិយាយថានេះគ្រាន់តែជាតួលេខ និងក្រៅផ្លូវការប៉ុណ្ណោះ ពីព្រោះប្រតិភូបក្សប្រជាធិបតេយ្យមានសេរីភាព ឬអាចប្ដូរចិត្តបានក្នុងការបោះឆ្នោត ជ្រើសរើសបេក្ខជនផ្លូវការ នៅឯសមាជជាតិរបស់បក្សដែលគ្រោងនឹងប្រព្រឹត្តទៅពីថ្ងៃទី១៩ ដល់ថ្ងៃទី២២ ខែសីហា ក្នុងទីក្រុង Chicago។
លោក ចូ បៃដិនប្រធានាធបតីអាមេរិក កាលពីថ្ងៃអាទិត្យសប្ដាហ៍មុន បានប្រកាសដកខ្លួនចេញពីការប្រជែងតំណែងប្រធានាធិបតីក្នុងឆ្នាំ២០២៤ ដែលលោកអះអាងថាធ្វើឡើងដើម្បី ប្រយោជន៍សម្រាប់បក្សប្រជាធិបតេយ្យ និងប្រទេសជាតិ។ លោក បៃដិន ក៏បានប្រកាសគាំទ្រលោកស្រី ហារីសជាបេក្ខជនប្រធានាធិបតីជំនួសរូបលោកផងដែរដែលការណ៍នេះធ្វើឱ្យ ក្រុមអ្នកជំនាញយល់ថាលោកស្រីកំពុងមានប្រៀបលើបេក្ខជនផ្សេងទៀតនៅក្នុងបក្ស។
ប្រមុខគណបក្សប្រជាធិបតេយ្យ បានសន្យាថាដំណើរការជ្រើសរើសបេក្ខជនមកជំនួសលោក ចូ បៃដិននឹងប្រព្រឹត្តទៅប្រកបដោយតម្លាភាពនិងតាមវិន័យ ឱ្យសមជាបក្សប្រជាធិបតេយ្យមានសាមគ្គីជាធ្លុងមួយ និងបេក្ខជនម្នាក់ដែលមានសមត្ថភាពយកឈ្នះលោកដូណាល់ត្រាំ។ទោះបីជាមានការព្រមព្រៀងលើរូបបេក្ខជនណាម្នាក់រួចហើយក៏ដោយ ក៏ដំណើរការតែងតាំងបេក្ខជនប្រធានាធិបតីថ្មីមកជំនួសលោកចូបៃដិន ត្រូវឆ្លងកាត់បែបបទបច្ចេកទេសខ្លាំងបន្តិចដោយចៀសមិនរួចទេ។ ព្រោះ ប្រធានាធិបតីដែលត្រូវបានជ្រើសរើសឱ្យឈរឈ្មោះជាថ្មី បានឆ្លងកាត់ការបោះឆ្នោតតាមរដ្ឋជាបន្ទាប់តាំងពីខែមករាដល់ខែមិថុនា២០២៤ និងត្រូវប្រកាសតែងតែងជាផ្លូវការនៅថ្ងៃទី១៩សីហាខាងមុខ។
ឥលូវលោកបានដកខ្លួនចេញ ប្រតិភូបក្សទាំង៣៩០០រូប ត្រូវសម្រេចចិត្តជាថ្មី និងមានសេរីភាពពេញលេញក្នុងការជ្រើសរើសបេក្ខជនដែលខ្លួនពេញចិត្ត។ ដូច្នេះចរន្តនីមួយៗរបស់បក្សអាចស្នើ និងជំរុញបេក្ខជនរបស់ខ្លួនឱ្យបានក្លាយបេក្ខជនរបស់បក្ស ដែលគេពិបាកនឹងស្មានដឹងជាមុនណាស់។វិធានច្បាប់ផ្ទៃក្នុងរបស់បក្សប្រជាធិបតេយ្យ បានចែងថា ក្នុងករណីបេក្ខជនជ្រើសរើរួច ស្លាប់ លាលែង ឬបាត់បង់សមត្ថភាព ប្រធានគណបក្សនឹងពិគ្រោះជាមួយមេដឹកនាំបក្សប្រចាំសភា និងប្រចាំសមាគមអភិបាល មុននឹងជ្រើសតាំងបេក្ខជនម្នាក់ ដែលនឹងត្រូវតែងតាំងជាផ្លូវការនៅខែសីហា។ សម្រាប់ពេលនេះ មានការគាំទ្រច្រើនកំពុងស្រោចទៅលើរូបលោកស្រី ខាម៉ាឡា ហារីស។ តែលោកស្រីអនុប្រធានាធិបតី ខាម៉ាឡា ហារីស ដែលលោកចូបៃដិន ជ្រើសរើសជាបេក្ខជនអនុប្រធានាធិបតី សម្រាប់អាណត្តិថ្មី មិនប្រាកដថានឹងក្លាយជាបេក្ខជនប្រធានាធិបតីទេ។
លោកស្រី ខាម៉ាឡា ហារីស ជាស្ត្រីទីមួយ ជាស្ត្រីអាមេរិកស្បែកខ្មៅកាត់អាហ្វ្រិក និងជាស្ត្រីដើមកំណើតអាស៊ីដំបូងគេបង្អស់ ដែលបានក្លាយជាអនុប្រធានាធិបតីអាមេរិក។ លោកស្រី ហារីស ក៏ជាស្ត្រីអាមេរិក និងជាស្ត្រីអាមេរិកស្បែកខ្មៅទីមួយដែលបានទទួលតួនាទីជារដ្ឋអាជ្ញានៅរដ្ឋកាលីហ្វ័រញ៉ា និងជាសមាជិកព្រឹទ្ធសភាអាមេរិកស្បែកខ្មៅស្រីទីពីរប៉ុណ្ណោះក្នុងប្រវត្តិអាមេរិក។ លោកស្រី ហារីស មានឪពុកដើមកំណើតហ្សាម៉ាអ៊ីក ម្តាយជាជនជាតិឥណ្ឌា។ក្នុងវ័យ៥៩ឆ្នាំ លោកខាម៉ាឡា ហារីស នឹងក្លាយជាបេក្ខនារីប្រធានាធិបតីអាមេរិកទីមួយ មានពណ៌សម្បុរស្បែកនិងដើមកំណើតអាហ្វ្រិកកាត់អាស៊ីឬ? ពេលនេះគ្រប់ចក្ខុកំពុងផ្តោតលើរូបលោកស្រីយ៉ាងខ្លាំង។
ពេលនេះ លោក ចូ បៃដិន ដែលបន្តបំពេញនាទីជាប្រធានាធិបតីរហូតដល់ចប់អាណត្តិនៅខែមករា២០២៥ និងជាឥស្សរជនដ៏ប្រកបដោយឥទ្ធិពលម្នាក់ក្នុងជួរបក្សប្រជាធិបតេយ្យបានប្រកាសផ្តល់ការគាំទ្រទាំងស្រុងទៅលើរូបលោកស្រី ខាម៉ាឡា ហារីស។ ប្រធានគណបក្ស អតីតប្រធានាធិបតីអាមេរិក ប្លីលគ្លីនតុន និងលោកស្រី ហ៊ីលឡារី គ្លីនតុន សមាគមគណៈកម្មការបក្សប្រជាធិបតេយ្យ សុទ្ធតែបានប្រកាសគាំទ្រភ្លាមបេក្ខភាពលោកស្រី ហារីស។ ប៉ុន្មានម៉ោងក្រោយ លោក Gavin Newsom អភិបាលរដ្ឋកាលីហ្វ័រនីញ៉ា ដែលគេយល់ថាអាចជាគូប្រជែងម្នាក់ក្នុងការជ្រើសរើសបេក្ខជនប្រធានាធិបតីបក្សប្រជាធិបតេយ្យនេះ ក៏បានប្រកាសគាំទ្រលោកស្រី ខាម៉ាឡា ហារីសដែរ។
នៅឡើយតែលោកស្រីណាន់ស៊ី ប៉េឡូស៊ី អតីតប្រធានសភា និងអតីតប្រធានាធិបតីអាមេរិកបារ៉ាក់ អូបាម៉ាទេ ដែលស្ងាត់មិនចេញស្តី។ លោក បារ៉ាក់ អូបាម៉ា ថាប្រតិភូបក្សជាអ្នកសម្រេចនៅពេលបោះឆ្នោតតែងតាំងបេក្ខជនជាផ្លូវការថ្ងៃទី ១៩សីហា។ក្រៅអំពីលោកស្រីហារីស អាចមានឥស្សរជនពីរបីរូបទៀត ចង់ឈរឈ្មោះបេក្ខជនប្រធានធិបតីដែរនោះគឺ អភិបាលរដ្ឋមីស៊ីហ្កែនGretchen Whitmer ឬ អភិបាលរដ្ឋពែនស៊ីវ៉ាន់នី Josh Shapiro។
ប្រសិនបើលោកស្រី ខាម៉ាឡា ហារីស ក្លាយជាបេក្ខជនប្រធានាធិបតីជាផ្លូវការ វាអាចគ្រាន់បើបន្តិចព្រោះអាមេរិកស្គាល់លោកស្រីជិតបួនឆ្នាំមកហើយ ក្នុងនាមជាអនុប្រធានាធិបតី និងបានចេញឃោសនាច្រើនដែរ ក្នុងនាមជាបេក្ខជនអនុប្រធានាធិបតីសម្រាប់អាណត្តិថ្មី។ការដកខ្លួនរបស់បេក្ខជនបៃដិន មិនត្រឹមតែធ្វើឱ្យមានការប្តូរផ្លាស់ក្នុងរង្វង់គណបក្សប្រជាធិបតេយ្យទេ គណបក្សសាធារណរដ្ឋ ក៏ដូចជាបេក្ខជនប្រធានាធិបតីបក្សសាធារណរដ្ឋលោកដូណាល់ត្រាំផ្ទាល់ ក៏ច្រងាប់ច្រងិលដែរ ដោយត្រូវរៀបយុទ្ធសាស្ត្រឃោសនាថ្មី។ ព្រោះគូប្រជែងថ្មី មិនដឹងជានរណា។ កន្លងមក លោកដូណាល់ត្រាំ ផ្តោតការវាយប្រហារនយោបាយខ្លាំងទៅលើតែសុខភាពលោកបៃដិន បង្អាប់លោកបៃដិននិយាយមិនទៅមុខ គិតមិនរហ័ស។ល។ និង។ល។ ចុះបើបែរជាលោកស្រីហារីសវ័យ៥៩ឆ្នាំ កំពុងពេញកម្លាំង និងជាស្ត្រី មានបុព្វហេតុការពារសិទ្ធិរំលូតកូនរបស់ស្ត្រី តើលោកត្រាំទៅបង្វែរការឃោសនាទៅទិសណា? លោកត្រាំនឹងក្លាយជាបេក្ខជនចាស់ជរាបំផុតវិញ។
