លោក ចូ បៃដិន ថាអាចនឹងពិចារណាដកខ្លួនពីការប្រកួត ប្រសិនបើគ្រូពេទ្យប្រាប់ថាមានបញ្ហាសុខភាព
21-September-2026 / ព័ត៌មានអន្តរជាតិ
អាមេរិក៖ ប្រធានាធិបតីអាមេរិក លោក ចូ បៃដិន បាននិយាយថាលោកនឹងពិចារណាឡើងវិញពីការដកខ្លួនចេញពីការប្រកួតប្រជែងក្នុងការបោះឆ្នោតប្រធានាធិបតីអាមេរិក នៅខែវិច្ឆិកាខាងមុខ ប្រសិនបើក្រុមគ្រូពេទ្យប្រាប់ថារូបលោកមានបញ្ហាសុខភាព។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។លោក បៃដិន ធ្វើការកត់សម្គាល់បែបនេះនៅក្នុងកិច្ចសម្ភាសន៍ជាមួយទូរទស្សន៍ BET News ដែលត្រូវបានថតកាលពីថ្ងៃអង្គារ និងចេញផ្សាយកាលពីថ្ងៃពុធ ទី១៧ ខែកក្កដា។ នៅពេល ត្រូវបានសាកសួរថាតើមានលក្ខខណ្ឌអ្វីដែលអាចជំរុញឱ្យលោកពិចារណាដកខ្លួនពីការប្រកួត លោក បៃដិន បានគូសបញ្ជាក់ដូច្នេះថា «ប្រសិនបើខ្ញុំមានបញ្ហាសុខភាពណាមួយ ហើយ ប្រសិនបើក្រុមគ្រូពេទ្យប្រាប់ខ្ញុំថាខ្ញុំពិតមានបញ្ហាសុខភាពប្រាកដមែន»។
នេះគឺជាលើកទី១ដែលលោក បៃដិន បាននិយាយដោយបើកចំហពីបញ្ហាដែលអាចបង្ខំឱ្យលោកពិចារណាឡើងវិញពីការដកខ្លួនចេញពីការប្រកួត។ លោក បៃដិន នៅក្នុងកិច្ចសម្ភាសន៍ ជាមួយទូរទស្សន៍ ABC News មួយសប្ដាហ៍ក្រោយធ្វើមិនបានល្អក្នុងវេទិកាតស៊ូមតិជាមួយលោក ដូណាល់ ត្រាំ កាលពីចុងខែមិថុនា បានច្រានចោលការអំពាវនាវឱ្យលោកដកខ្លួន ដោយនិយាយថាមានតែព្រះទេដែលអាចបង្ខំឱ្យរូបលោកដកខ្លួនពីការប្រកួត។ ជាថ្មីម្ដងទៀត កាលពីសប្ដាហ៍មុន លោកបានថ្លែងនៅក្នុងសនិ្នសីទសារព័ត៌មានជាមួយការសង្កត់ធ្ងន់ថា លោកអាចនឹងបោះបង់ចោលការប្រកួត ប្រសិនបើមន្ត្រីជំនិតរបស់លោកបង្ហាញភស្តុតាងថាលោកនឹងមិនអាចយកឈ្នះលោក ដូណាល់ ត្រាំ នៅខែវិច្ឆិកាខាងមុខបានទេ។
គួរបញ្ជាក់ថា បទសម្ភាសន៍របស់លោក ចូ បៃដិន ជាមួយ BET News ធ្វើឡើងតែមួយថ្ងៃប៉ុណ្ណោះ មុននឹងលោក ចូ បៃដិន ត្រូវបានសេតវិមានបញ្ជាក់ថាបានឆ្លងកូវីដ១៩ អំឡុង ធ្វើដំណើរទស្សនកិច្ចមួយទៅកាន់ទីក្រុង Las Vegas កាលពីថ្ងៃពុធ ទី១៧ ខែកក្កដា។ប្រការនេះបានធ្វើឲ្យការឃោសនាបោះឆ្នោតរបស់លោក ចូ បៃដិន ត្រូវរអាក់រអួល បន្ទាប់ពីលោកឆ្លងជំងឺកូវីដ១៩។ ក្នុងសប្តាហ៍នេះ សុខភាពប្រធានាធិបតីអាមេរិក ចាប់មិនស្រួលខ្លាំង នៅថ្ងៃអង្គារ៍-ថ្ងៃពុធ ព្រោះសីតុណ្ហភាពក្នុងខ្លួន ឡើងកម្តៅខ្លាំង ដល់ទៅជាង ៤០ អង្សា។
លោកសម្រេចលុបចោលមេទ្ទីញជំនួបឃោសនានយោបាយ និងលុបចោលជំនួបជាមួយសហគមដើមកំណើតអាមេរិកឡាទីន នៅក្នុងទីក្រុង Las Vegas នៅនាទីចុងក្រោយ។ លោក ដូ បៃដិន គ្រាន់តែមានប្រសាសន៍យ៉ាងខ្លី ថា«សុខសប្បាយជាធម្មតាទេ» មុននឹងជិះយន្តហោះទៅផ្ទះផ្ទាល់ខ្លួន ជាប់មាត់សមុទ្រ ក្នុងក្រុង Delaware ដើម្បីធ្វើចត្តាឡីស័ក ដាក់ឃុំខ្លួនឯងឲ្យដាច់ឆ្ងាយពីគេ។
ការឆ្លងជំងឺកូវីដរបស់បេក្ខជនប្រធានាធិបតី តំណាងបក្សប្រជាធិបតេយ្យរូបនេះ កាន់តែធ្វើឲ្យពន្លឺក្តីសង្ឃឹមនៅខាងបក្សប្រជាធិបតេយ្យ កាន់តែស្រអាប់។ ស្រអាប់ព្រោះតែ រូបប្រធានាធិបតីវ័យ៨១ឆ្នាំ ត្រូវរងការរិះគន់ច្រើនឡើងៗ ពីបញ្ហាសុខភាពរាងកាយចាស់ទ្រុឌទ្រោម និងបញ្ញាស្មារតី វង្វេងភ្លេចភ្លាំងភាន់ច្រឡំ។ ជាថ្មីម្តងទៀត ក្នុងសម្ភាសន៍ដើមសប្តាហ៍នេះ លោកបាននិយាយច្រឡំឆ្នាំ ២០០៨ ថា ២០២០ ឆ្នាំដែលលោក បារ៉ាក់ អូប៉ាម៉ា ជ្រើសរើសគាំទ្ររូបលោកឲ្យឈរឈ្មោះជាអនុប្រធានាធិបតី។
សមាជិកក្នុងគណបក្សប្រជាធិបតេយ្យ និងក្រុមតារាភាពយន្ត នៅពិភពហូលីវូដ ព្រមទាំងពួកសេដ្ឋីម្ចាស់ជំនួយ កាន់តែច្រើនឡើងៗ ថាពួកគេចង់ឲ្យលោក បៃដិន ដកបេក្ខភាពប្រកួតប្រជែងបោះឆ្នោតប្រធានាធិបតីអាណត្តិទី២។ នេះបើតាមបណ្តាញសារព៌ត៌មានអាមេរិក ដោយបញ្ជាក់ទៀថា ក្នុងបក្សប្រជាធិបតេយ្យខ្លួនឯង យ៉ាងហោច មានសមាជិករដ្ឋសភា ជាង ២០នាក់ ហើយនិងមេធំនៅព្រឹទ្ធសភាផង គឺលោក Chuck Schumer។ លោក Chuck Schumer ប្រធានក្រុមបក្សប្រជាធិបតេយ្យនៅព្រឹទ្ធសភា បានថ្លែងយ៉ាងទទូច និងបានប្រាប់ផ្ទាល់ទៅលោក ចូ បៃដិន កាលពីថ្ងៃសៅរ៍ ថា ដើម្បីគណបក្សប្រជាធិបតេយ្យ និងដើម្បីប្រទេសជាតិ គួរណាស់តែលោក ដៃបិន ដកខ្លួនចេញទៅ។ នេះបើតាមការអះអាងរបស់មន្ត្រីនៅជិតក្បែរខ្លួនលោក ដែលប្រាប់ទៅសារព័ត៌មានអាមេរិក ក៏ប៉ុន្តែ ក្នុងសេចក្តីថ្លែងការណ៍ផ្លូវការ លោកព្រឹទ្ធសមាជិករូបនេះ បានចាត់ចោលសម្តីខាងលើ។
នៅរដ្ឋសភាវិញ មនុស្សស្និទ្ធនឹងលោកស្រី ណាន់ស៊ី ប៉េឡូស៊ី គឺ លោក Adam Schiff បានដាស់តឿនឲ្យលោក បៃដិន ទម្លាក់ភាពមានៈ និងដកបេក្ខភាពចេញ។ បើតាមប្រភពពីសមាជិករដ្ឋសភាមកពីរដ្ឋកាលីហ្វ័រញ៉ារូបនេះ សូម្បីតែលោកស្រី ណាន់ស៊ី ប៉េឡូស៊ី អតីតប្រធានសភាលោកស្រី ក៏យល់ស្របថា វត្តមានរបស់លោក បៃដិន អាចនឹងបំផ្លាញដល់លទ្ធភាពឈ្នះឆ្នោតបានសំឡេងភាគច្រើន ចំពោះបក្សប្រជាធិបតេយ្យ។
