ករណីបាញ់ប្រហារលើលោក ដូណាល់ ត្រាំ នៅរដ្ឋ Pennsylvania គឺជាការប៉ុនប៉ងធ្វើឃាតខ្មាន់កាំភ្លើងអ្នកធ្លាប់បភឆ្នោតឲ្យ!
22-August-2024 / ព័ត៌មានអន្តរជាតិ
(អាមេរិក៖ អតីតប្រធានាធីបតីអាមេរិក លោក ដូណាល់ ត្រាំដែល បានរងរបួសចំស្លឹកត្រចៀក ក្នុងករណីបាញ់ប្រហារមួយ អំឡុងពិធីជួបជុំក្រុមអ្នកគាំទ្ររបស់លោក នៅរដ្ឋ Pennsylvaniaកាលពីថ្ងៃសៅរ៍ត្រុវបានទីភ្នាក់ងារស៉ើបអង្កេតសហព័ន្ធ FBI បានទទួលស្គាល់ជាផ្លូវការថា វាគឺជាការប៉ុនប៉ងធ្វើឃាតលើរូបលោក។ នេះបើតាមការចេញផ្សាយដោយ ទីភ្នាក់ងារព័ត៌មាន CNA នាថ្ងៃអាទិត្យ ទី១៤ ខែកក្កដា ឆ្នាំ២០២៤។
ទីភ្នាក់ងារ FBI បានបញ្ជាក់ជាផ្លូវការ ក្នុងសន្និសីទសារព័ត៌ថា ហេតុការណ៍បាញ់ប្រហារលើ លោក ដូណាល់ ត្រាំ គឺជាអ្វីដែល FBI ហៅថា ការប៉ុនប៉ងធ្វើឃាតលើ អតីតប្រធានាធីបតីអាមេរិករូបនេះ។ តែលោក ត្រាំ បានរួចផុតពីគ្រោះថ្នាក់ ដោយមិនមានរងរបួសធ្ងន់ធ្ងរ ខ្មាន់កាំភ្លើងបានស្លាប់ ហើយអ្នកចូលរួមកម្មវិធីម្នាក់ ក៏បានស្លាប់ផងដែរ ខណៈ២នាក់ទៀតបានរងរបួស។ អាជ្ញាធរអាមេរិក បាននិយាយថា ពួកគេកំណត់អត្តសញ្ញាណខ្មាន់កាំភ្លើងបានហើយ ប៉ុន្តែមិនទាន់ត្រៀមរួចរាល់ ដើម្បីប្រកាសជាសាធារណៈនៅឡើយទេ។ ទន្ទឹមគ្នា ពួកគេក៏មិនទាន់កំណត់បាន ចេតនានៅពីក្រោយការប៉ុនប៉ងធ្វើឃាត លោក ត្រាំ នេះដែរ។
ក្នុងសេចក្តីថ្លែងការណ៍បន្ទាប់ពីការបាញ់ប្រហារ លោក ត្រាំ និយាយថា “ខ្ញុំសូមថ្លែងអំណរគុណ ដល់សេវាសម្ងាត់សហរដ្ឋអាមេរិក និងកងកម្លាំងអនុវត្តច្បាប់ទាំងអស់ សម្រាប់ការឆ្លើយតបយ៉ាងឆាប់រហ័ស លើការបាញ់ប្រហារដែលទើបតែកើតឡើងនៅទីក្រុង Butler រដ្ឋ Pennsylvania។ សំខាន់! ខ្ញុំសូមចូលរួមរំលែកទុក្ខដល់គ្រួសារសពជនរងគ្រោះក្នុងពិធីជួបជុំ និងសូមចូលរួមរំលែកទុក្ខដល់គ្រួសារអ្នករងរបួសធ្ងន់ផងដែរ។ វាជារឿងមិនគួរឲ្យជឿ ដែលទង្វើបែបនេះអាចកើតឡើងក្នុងប្រទេសយើងបាន។ នៅពេលនេះ យើងមិនទាន់ដឹងអ្វីសោះអំពីឃាតករ ដែលបានស្លាប់ទៅហើយ។ ខ្ញុំត្រូវបានគេបាញ់ ដោយគ្រាប់កាំភ្លើងហោះទម្លុះត្រចៀកខាងស្តាំរបស់ខ្ញុំ។ ខ្ញុំដឹងភ្លាមថាមានអ្វីមិនប្រក្រតីកើតឡើងហើយ ខ្ញុំបានឮសំឡេងញ័រៗ ស្នូរគ្រាប់កាំភ្លើង ហើយភ្លាមៗខ្ញុំមានអារម្មណ៍ថា គ្រាប់កាំភ្លើងបានហោះកាត់ស្បែក។ មានឈាមហូរច្រើន ដូច្នេះខ្ញុំដឹងថាអ្វីកំពុងកើតឡើង។ សូមព្រះជាម្ចាស់ប្រទានពរដល់អាមេរិក!”។
គួរបញ្ជាក់ថា បើតាមសារព័ត៌មានអាមេរិក New York Post ខ្មាន់កាំភ្លើងដែលធ្វើសកម្មភាពប៉ងធ្វើឃាត អតីតប្រធានាធិបតីអាមេរិក លោក ដូណាល់ ត្រាំ កាលពីថ្ងៃសៅរ៍ចុងសប្តាហ៍នេះ ត្រូវបានកំណត់អត្តសញ្ញាណថា មានឈ្មោះ Thomas Matthew Crooks អាយុ២០ឆ្នាំ។ បុរសរូបនោះបានធ្វើសកម្មភាពបាញ់ប្រហារ ចេញពីលើដំបូលរោងចក្រមួយ មានចម្ងាយត្រឹមជាង១០០ម៉ែត្រប៉ុណ្ណោះ ពីវេទិកាដែលលោក ត្រាំ ឈរថ្លែងសារ។ ខ្មាន់កាំភ្លើង មិនស្ថិតក្នុងចំណោម អ្នកចូលរួមកម្មវិធីជួបជុំក្រុមអ្នកគាំទ្ររបស់លោក ត្រាំ ដែលប្រព្រឹត្តទៅនៅឯទីក្រុង Butler នៃរដ្ឋ Pennsylvania នោះទេ ហើយរូបគេ ត្រូវបានក្រុមអ្នកបាញ់កាំភ្លើងស៉ីប នៃកងអង្គរក្សសម្ងាត់ Secret Service ដែលការពារសុវត្ថិភាព សម្រាប់កម្មវិធីរបស់លោក ត្រាំ បាញ់សម្លាប់ភ្លាមៗ។ កាំភ្លើងវែងមួយដើមប្រភេទ AR-style ត្រូវបានរកឃើញ នៅកន្លែងធ្វើសកម្មភាពរបស់ខ្មាន់កាំភ្លើង។ ខ្មាន់កាំភ្លើងបាញ់ប្រហារលោក ត្រាំ គឺមានឈ្មោះ Thomas Matthew Crooks ជាអ្នកចុះឈ្មោះបោះឆ្នោតឲ្យគណបក្សសាធារណរដ្ឋ ប៉ុន្តែរូបគេក៏ធ្លាប់មានប្រវត្តិបរិច្ចាគប្រាក់ខ្លះទៅឲ្យក្រុមដែលមានទំនាក់ទំនងជាមួយគណបក្សប្រជាធិបតេយ្យក្នុងឆ្នាំ២០២១ដែរ។ជនដៃដល់រូបនេះ គឺជាអ្នករស់នៅក្នុងតំបន់ Bethel Park នៃរដ្ឋ Pennsylvania ស្ថិតនៅចម្ងាយ៥៦គីឡូម៉ែត្រ ភាគខាងត្បូងទីតាំងជួបជុំរបស់លោកុំ ត្រាំ។FBI បញ្ជាក់ថា Crooks ពិតជាប៉ុនប៉ងធ្វើឃាតលោក ត្រាំ មែន ប៉ុន្តែមូលហេតុដែលជំរុញចិត្តឲ្យគេធ្វើបែបនេះ ក៏មិនទាន់ដឹងច្បាស់នៅឡើយដែរ។
ចំណែកប្រធានាធិបតីអាមេរិកលោក ចូ បៃដិន បានចេញមុខថ្កោលទោសការបាញ់ប្រហារលើគូប្រជែងគឺលោក ដូណាល់ ត្រាំ នៅឯការជួបជុំក្នុងរដ្ឋ Pennsylvania កាលពីថ្ងៃសៅរ៍ទី១៣ខែកក្កដាឆ្នាំ២០២៤ (ពេលវេលានៅសហរដ្ឋអាមេរិក)។លោកបៃដិន បានចេញសេចក្តីថ្លែងការណ៍ថា “ខ្ញុំធូរចិត្តពេលឮថា គាត់មានសុវត្ថិភាព និងមិនកើតអី។ ខ្ញុំកំពុងអធិស្ឋានដល់គាត់និងក្រុមគ្រួសារ ព្រមទាំងអ្នកទាំងអស់ដែលស្ថិតនៅក្នុងការជួបជុំនោះ ហើយកំពុងរង់ចាំព័ត៌មានថ្មីៗ។ គ្មានកន្លែងសម្រាប់អំពើហិង្សាបែបនេះទេ នៅសហរដ្ឋអាមេរិក។ យើងមិនអាចអនុញ្ញាតឲ្យរឿងនេះកើតឡើងបានឡើយ។ ខ្ញុំសង្ឃឹមថា នឹងបាននិយាយជាមួយលោក ត្រាំ ក្នុងពេលឆាប់ៗ”។
ទោះបីរងរបួសតែក្រុមយុទ្ធនាការឃោសនារបស់លោក ដូណាល់ ត្រាំ បានឱ្យដឹងថា លោក ត្រាំ នឹងនៅតែទៅចូលរួមព្រឹត្តិការណ៍សមាជជាតិរបស់គណបក្សសាធារណរដ្ឋ ហៅថា Republican National Convention នាសប្តាហ៍ក្រោយ បន្ទាប់ពីបេក្ខជនប្រធានាធិបតីរូបនេះ ទើបតែបានរងការបាញ់ប្រហាររបួសចំស្លឹកត្រចៀក ក្នុងករណីវាយប្រហារប៉ុនប៉ងធ្វើឃាត អំឡុងការជួបជុំក្រុមអ្នកគាំទ្រ នៅឯរដ្ឋ Pennsylvania។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអាទិត្យ ទី១៤ ខែកក្កដា ឆ្នាំ២០២៤។
យុទ្ធនាការឃោសនារបស់លោក ត្រាំ បាននិយាយថាដូច្នេះថា «លោក ដូណាល់ ត្រាំ នៅតែទន្ទឹងរង់ចាំទៅចូលរួមជាមួយអ្នកទាំងអស់គ្នា ក្នុងទីក្រុង Milwaukee នៃរដ្ឋ Wisconsin ស្របពេលដែលយើង នឹងប្រារព្ធសមាជជាតិរបស់យើង ដើម្បីតែងតាំងរូបលោកជាផ្លូវការ ឱ្យធ្វើជាបេក្ខជនឆ្ពោះទៅកាន់តំណែងជា ប្រធានាធិបតីទី៤៧ របស់សហរដ្ឋអាមេរិក»។ ព្រឹត្តិការណ៍ Republican National Convention នឹងប្រព្រឹត្តទៅនាថ្ងៃទី១៥-១៨ ខែកក្កដា។ ចំណែកសមាជ National Convention របស់បក្សប្រជាធិបតេយ្យវិញ នឹងរៀបចំឡើងនៅថ្ងៃទី១៩-២២ ខែសីហា ហើយប្រធានាធិបតីអាមេរិកបច្ចុប្បន្ន គឺលោក ចូ បៃដិន ត្រូវគេរំពឹងថា នឹងត្រូវតែងតាំងជាបេក្ខជនតំណាងបក្សប្រជាធិបតេយ្យ ដើម្បីតទល់ជាមួយលោក ត្រាំ។គួរបញ្ជាក់ថា ការបោះឆ្នោតជ្រើសរើសប្រធានាធិបតីអាមេរិក នឹងប្រព្រឹត្តទៅនាថ្ងៃទី៥ ខែវិច្ឆិកា ហើយវានឹងជាការប្រកួតប្រជែងគ្នាសាជាថ្មី រវាងលោក ត្រាំ និងលោក បៃដិន បន្ទាប់ពីលោក ត្រាំ បានចាញ់លោក បៃដិន ក្នុងការបោះឆ្នោតប្រធានាធិបតីឆ្នាំ២០២០។ លោក ត្រាំ ធ្លាប់ធ្វើជាប្រធានាធិបតីអាមេរិក ចាប់ពីឆ្នាំ២០១៧ ដល់ឆ្នាំ២០២១។
សូមរំលឹកថា ហេតុការណ៍នេះបានរំឮកដល់ប្រវត្តិសាស្ត្ររបស់សហរដ្ឋអាមេរិក ដែលមានមេដឹកនាំត្រូវបានគេប៉ុនប៉ងធ្វើឃាត និងធ្វើឃាតបានសម្រេច។ ខាងក្រោមនេះជាអតីតប្រធានាធិបតី ប្រធានាធិបតី និងបេក្ខជនប្រធានាធិបតីរបស់សហរដ្ឋអាមេរិក ដែលបានរួចផុតពីការប៉ុនប៉ងធ្វើឃាត៖១. លោកប្រធានាធិបតី Andrew Jackson៖ អំឡុងសម័យសង្គ្រាមត្រជាក់ លោកត្រូវបានគេលួចបាញ់ ខណៈចូលរួមក្នុងពិធីបុណ្យសពមួយនៅឯវិមាន Capitol។ ខ្មាន់កាំភ្លើង បានបាញ់ចំនួន២ដង តែកាំភ្លើងមិនដំណើរការ។
២. លោកប្រធានាធិបតី Theodore Roosevelt ៖ ដូចគ្នាទៅនឹងលោក ត្រាំ ដែរ, លោក Roosevelt បានចូលរួមប្រកួតប្រជែងសាជាថ្មីក្នុងការបោះឆ្នោតប្រធានាធិបតិអាមេរិក ជាមួយការធ្វើយុទ្ធនាការឃោសនាបោះឆ្នោតក្នុងឆ្នាំ១៩១២។ លោកត្រូវបានគេប៉ុនប៉ងធ្វើឃាតមិនបានសម្រេចអំឡុងធ្វើដំណើរនៅតាមផ្លូវឆ្ពោះទៅកាន់ទីក្រុង Milwaukee ដើម្បីថ្លែងសុន្ទរកថា។៣. លោកប្រធានាធិបតី President Franklin D. Roosevelt៖ លោកជាប្រធានាធិបតីជាប់ឆ្នោតម្នាក់ នៅពេលត្រូវបានគេប៉ុនប៉ងធ្វើឃាតដោយការបាញ់ប្រហារមួយ ក្នុងទីក្រុង Miami នៅឆ្នាំ១៩៣៣។ ខ្មាន់កាំភ្លើងឈ្មោះ Guiseppe Zangara បានបាញ់លោក Roosevelt ខុស តែបែរជាបាញ់ត្រូវចំអតីតចៅក្រុង Chicago Anton Cermak បណ្ដាលឱ្យបាត់បង់ជីវិត។
៤. លោកប្រធានាធិបតី Harry Truman៖ លោក Truman បានឡើងកាន់តំណែងបន្ទាប់ពីលោក Roosevelt បានទទួលមរណភាព។ លោក Truman ត្រូវបានគេបាញ់ នៅឯ សេតវិមានតែម្ដងក្នុងឆ្នាំ១៩៥០ តែមិនបានសម្រេច។ ខ្មាន់កាំភ្លើងនៅពេលនោះមានឈ្មោះ Puerto Rican គឺជាអ្នកកាសែតម្នាក់។៥. អភិបាលរដ្ឋ Alabama លោក George Wallace៖ លោកបានចូលរួមប្រកួតប្រជែងដណ្ដើមតំណែងជាប្រធានាធិបតីអាមេរិកជាលើកទី៣ ក្នុងឆ្នាំ១៩៧២។ លោកត្រូវគេ បាញ់ប្រហារនៅបន្ទាប់ពីធ្វើយុទ្ធនាការឃោសនាបោះឆ្នោតមួយនៅខាងក្រៅរដ្ឋធានីវ៉ាស៊ីនតោន។ ការបាញ់ប្រហារនេះបានធ្វើឱ្យលោកពិការដើរមិនរួច។
៦. លោកប្រធានាធិបតី Gerald Ford៖ លោក Gerald Ford បានជួបប្រទះនឹងការប៉ុនប៉ងធ្វើឃាតចំនួន២លើកក្នុងឆ្នាំ១៩៧៥។ តែការប៉ុនប៉ងទាំង២លើកនេះបានទទួល បរាជ័យ។៧. លោកប្រធានាធិបតី Ronald Reagan៖ លោកត្រូវបានគេបាញ់ក្នុងឆ្នាំ១៩៨១ នៅខាងក្រៅសណ្ឋាគារ Hilton ក្នុងរដ្ឋធានីវ៉ាស៊ីនតោន បន្ទាប់ពីបញ្ចប់ការថ្លែងសុន្ទរថា មួយ។ លេខារបស់លោកម្នាក់ឈ្មោះ James Brady បានរងរបួសធ្ងន់ធ្ងរជាងលោក Reagan។ លេខារូបនេះក្រោយមកបានក្លាយជាសកម្មជនម្នាក់ទាមទារឱ្យមានច្បាប់ គ្រប់គ្រងអាវុធក្នុងសហរដ្ឋអាមេរិក។
៨. លោកប្រធានាធិបតី Barack Obama៖ បុរសម្នាក់មកពីរដ្ឋ Idaho ត្រូវបានចោទប្រកាន់ពីបទប៉ុនប៉ងធ្វើឃាតលោក Obama នៅពេលដែលរូបគេបាញ់តម្រង់ទៅកាន់ សេតវិមានកាលពីឆ្នាំ២០១១។គួរបញ្ជាក់ថា នៅក្នុងប្រវត្តិសាស្ត្រអាមេរិក មានប្រធានាធិបតី៤រូប ដែលត្រូវបានគេធ្វើឃាត ក្នុងនោះរួមមានលោក Abraham Lincoln, លោក James A. Garfield, លោក William McKinley និងលោក John F. Kennedy៕
