សម្រាប់អាណត្តិទី៧ក្រសួងព័ត៌មាននឹងរៀបចំបទដ្ឋានច្បាប់និងគតិយុត្ត ដើម្បីរៀបចំសណ្តាប់ធ្នាប់វិស័យសារព័ត៌មាន
11-February-2026 / ផ្សេងៗ
ភ្នំពេញ៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានគណៈកម្មាធិការរៀបចំគោលនយោបាយនិងផែនការយុទ្ធសាស្ត្រអភិវឌ្ឍវិស័យព័ត៌មាន និងសោតទស្សន៍នៅព្រឹកថ្ងៃទី១៧មិថុនា បានឱ្យដឹងថា ក្រសួងព័ត៌មានបាននិងកំពុងអភិវឌ្ឍប្រព័ន្ធផ្សព្វផ្សាយ និងរៀបចំកសាងនូវបទដ្ឋានច្បាប់និងគតិយុត្ត ដើម្បីរៀបចំសណ្តាប់ធ្នាប់ក្នុងវិស័យសារព័ត៌មានឱ្យបានល្អ និងធានាបាននូវសន្តិសុខព័ត៌មាន ដោយធ្វើយ៉ាងណាឱ្យការផ្សព្វផ្សាយព័ត៌មានថ្មី ពិត និងទូលំទូលាយ ប្រកបដោយជំនឿទុកចិត្ត និងវិជ្ជាជីវៈ ដើម្បីផ្សារភ្ជាប់គ្រប់មជ្ឈដ្ឋាន។
ថ្លែងក្នុងពិធីបើកសិក្ខាសាលាពិគ្រោះយោបល់បច្ចេកទេសរៀបចំផែនការយុទ្ធសាស្ត្រអភិវឌ្ឍន៍វិស័យព័ត៌មាន និងសោតទស្សន៍ ឆ្នាំ២០២៤-២០២៨ នាព្រឹកថ្ងៃទី១៧ ខែមិថុនា ឆ្នាំ២០២៤ នៅទីស្តីការក្រសួងព័ត៌មានលោករដ្ឋមន្ត្រី នេត្រ ភក្ត្រា បានបញ្ជាក់ថា ក្រសួងព័ត៌មានត្រូវមានផែនទីបង្ហាញផ្លូវអំពីការងារអាទិភាពដែលគ្រប់អង្គភាពចំណុះត្រូវអនុវត្តក្នុងរយៈពេល៥ឆ្នាំ ដើម្បីធ្វើឱ្យកាន់តែប្រសើរឡើងនូវប្រសិទ្ធភាពនៃការគ្រប់គ្រងនិងអភិវឌ្ឍវិស័យព័ត៌មាន និងសោតទស្សន៍ សំដៅឆ្លើយតបទៅនឹងបំណងប្រាថ្នារបស់ប្រជាជន និងការផ្លាស់ប្តូរបរិបទនៃការអភិវឌ្ឍជាតិនិងអន្តរជាតិ ជាពិសេសរួមចំណែកដល់ការប្រែក្លាយប្រទេសកម្ពុជាពីប្រទេសដែលមានចំណូលមធ្យមកម្រិតទាប ទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។
លោករដ្ឋមន្ត្រិបានបន្តថា ដើម្បីរួមចំណែកធ្វើឱ្យសម្រេចបានកិច្ចការងារខាងលើនេះ នៅក្នុងអាណត្តិទី៧នេះ ក្រសួងព័ត៌មានបានខិតខំបន្តការអភិវឌ្ឍវិស័យព័ត៌មាន ដោយផ្តោតលើការលើកកម្ពស់ហេដ្ឋារចនាសម្ពន្ធប្រព័ន្ធផ្សព្វផ្សាយព័ត៌មានគ្រប់ប្រភេទ និងការពង្រីកវិសាលភាពនៃការផ្សាយឱ្យបានកាន់តែទូលំទូលាយ និងគ្របដណ្តប់ទូទាំងប្រទេស តំបន់ និងសកល សម្រាប់ជាមធ្យោបាយក្នុងការបញ្ជ្រាបព័ត៌មានស្តីពីកម្ពុជានិងសមិទ្ធផលនៃការអភិវឌ្ឍប្រទេស។
លោក អ៊ុក សំរេច រដ្ឋលេខាធិការ និងជាអនុប្រធានអចិន្ត្រៃយ៍គណៈកម្មាធិការរៀបចំគោលនយោបាយនិងផែនការយុទ្ធសាស្ត្រអភិវឌ្ឍវិស័យព័ត៌មាន និងសោតទស្សន៍ នៃក្រសួងព័ត៌មាន បានឱ្យដឹងថា អង្គសិក្ខាសាលានាឱកាសនេះ គឺជាផែនការដ៏សំខាន់ក្នុងការកំណត់នៅទិសដៅការងារក្រសួងព័ត៌មានក្នុងការរួមចំណែកអនុវត្តយុទ្ធសាស្ត្របញ្ចកោណដំណាក់កាលទី១។លោកថា តាមរយៈយុទ្ធសាស្ត្របញ្ចកោណ វិស័យព័ត៌មានបានរួមចំណែកដ៏សំខាន់ក្នុងទិសដៅកសាងឱ្យបាននូវអភិបាលកិច្ចល្អ ដោយប្រើប្រាស់គ្រប់មធ្យោបាយដើម្បីលើកកម្ពស់ការយល់ដឹងជាសាធារណៈប្រកបដោយតម្លាភាព គណនេយ្យ និងស័ក្តិសិទ្ធិភាព ដើម្បីចូលរួមសម្រេចឱ្យបាននូវបេសកកម្មដ៏ឧត្តុង្គឧត្តមក្នុងកិច្ចថែរក្សានិងការពារសមិទ្ធផលដ៏ធំធេង ការពារសន្តិភាព ស្ថិរភាព សុវត្ថិភាព និងសណ្តាប់ធ្នាប់សង្គម និងការអភិវឌ្ឍប្រទេសដែលជាគោលជំហរដ៏មោះមុតរបស់រាជរដ្ឋាភិបាលកម្ពុជា។
សូមជម្រាបថា សម្រាប់ដំណើរការអង្គសិក្ខាសាលាពិគ្រោះយោបល់បច្ចេកទេសរៀបចំផែនការយុទ្ធសាស្ត្រអភិវឌ្ឍន៍វិស័យព័ត៌មាន និងសោតទស្សន៍ ឆ្នាំ២០២៤-២០២៨ នាឱកាសនេះ ក៏មានការធ្វើបទបង្ហាញទាក់ទងគោលបំណង និងលទ្ធផលរំពឹងទុកនៃសិក្ខាសាលា ការធ្វើទំនើបកម្មប្រព័ន្ធផ្សព្វផ្សាយ ការគ្រប់គ្រងលំហព័ត៌មាន សន្តិសុខព័ត៌មាន ការគ្រប់គ្រងបុគ្គលិកនិងតម្រូវការធនធាន ការពង្រឹងកិច្ចសហប្រតិបត្តិការអន្តរជាតិ បរិវត្តកម្មឌីជីថលក្នុងវិស័យព័ត៌មាន និងសោតទស្សន៍ ផែនការបរិវត្តកម្មឌីជីថលឆ្នាំ២០២៤ និងការរៀបចំអនុវត្តកម្មវិធីកសាងច្បាប់និងលិខិតបទដ្ឋានគិតយុត្ត និងកម្មវិធីអភិវឌ្ឍធនធានមនុស្ស។
សូមបញ្ជាក់ថាលោក នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងឲ្យដឹងកាលពីដើមខែមករាឆ្នា២០៤ថា កម្ពុជាមានអ្នកសារព័ត៌មានប្រមាណ ១ម៉ឺននាក់ និងមានស្ថាប័នព័ត៌មានចុះបញ្ជីជាង២ពាន់អង្គភាព។លោករដ្ឋមន្ត្រីថ្លែងបែបនេះក្នុងឱកាស សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញជាអធិបតីក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងព័ត៌មាន នារសៀលថ្ងៃទី២៣ ខែមករា ឆ្នាំ២០២៤។
លោកបញ្ជាក់ដូច្នេះថា៖ «នៅកម្ពុជា មានអ្នកសារព័ត៌មានប្រមាណ ១ម៉ឺននាក់ ដែលក្នុងនោះ ក្នុងនោះមានអ្នកស្នើសុំបណ្ណសម្គាល់អត្តសញ្ញាណអ្នកសារព័ត៌មាន មានចំនួនជិត ៤ពាន់នាក់»។
បើតាមលោក នេត្រ ភក្ត្រា, បច្ចុប្បន្ននេះ ស្ថាប័នព័ត៌មានទាំងបុរាណ និងទំនើប ដែលបានចុះបញ្ជីនៅក្រសួងព័ត៌មានមានជាង ២ពាន់អង្គភាព រួមមាន គេហទំព័រ និងទូរទស្សន៍អនឡាញ ៩៣៨អង្គភាព កាសែតចំនួន ៤៤៧អង្គភាព សមាគមសារព័ត៌មាន ៥២អង្គភាព ទស្សនាវដ្តី ១៩៤អង្គភាព ព្រឹត្តិបត្រ ២១អង្គភាព រោងពុម្ភ ១១៣អង្គភាព សៀវភៅចំនួន ២២អង្គភាព ទីភ្នាក់ងារព័ត៌មានបរទេស និងការិយាល័យតំណាង ២៧អង្គភាព ភ្នាក់ងារផ្សព្វផ្សាយពាណិជ្ជកម្ម ២អង្គភាព ស្ថានីយវិទ្យុ FM រាជធានីភ្នំពេញ និងខេត្ត ២៨៣អង្គភាព និងវិទ្យុ AM ភ្នំពេញ ចំនួន១ ទូរទស្សន៍ផ្សាយផ្ទាល់ ១៩ស្ថានីយ៍ និងផ្សាយបន្ត ១៦៥ស្ថានីយ៍។ ស្ថានីយ៍ទូរទស្សន៍ឌីជីថល ១២ស្ថានីយ៍ និងទូរទស្សន៍អនឡាញ ១០ស្ថានីយ៍ ទូរទស្សន៍ខ្សែកាប រាជធានីភ្នំពេញ និងតាមខេត្ត ចំនួន ៤៤ស្ថានីយ៍ និងទូរទស្សន៍អាណាឡូក ១៤៤ស្ថានីយ៍ ប្រព័ន្ធ OOT ៨ស្ថានីយ៍ និងប្រព័ន្ធផ្កាយរណប ចំនួន២។
លោក នេត្រ ភក្ត្រា បានប្រកាសថា ក្រសួងព័ត៌មាន ជាស្ថាប័នតែមួយគត់ក្នុងការចេញកាតសម្គាល់អ្នកសារព័ត៌មាន។ សម្តេចធិបតី ហ៊ុន ម៉ាណែត បានថ្លែងថា សារព័ត៌មានដើរតួនាទីសំខាន់ ក្នុងការចូលរួមពង្រឹងលទ្ធិប្រជាធិបតេយ្យ ផ្អែកលើនីតិរដ្ឋ, ផ្តល់ព័ត៌មានពិត, ផ្តល់ការអប់រំ, ចូលរួមចំណែកកែលម្អសង្គម និងបង្ហាញសកម្មភាពការងាររបស់រាជរដ្ឋាភិបាល។សម្តេចធិបតី ហ៊ុន ម៉ាណែត ក៏បានថ្លែងថា ក្រមសីលធម៌ និងវិជ្ជាជីវៈរបស់អ្នកសារព័ត៌មាន គឺមានសារសំខាន់ណាស់ ក្នុងការថែរក្សាតម្លៃរបស់អ្នកសារព័ត៌មាន។ ដើម្បីថែរក្សាតម្លៃសារព័ត៌មាន អ្នកសារព័ត៌មានត្រូវរួមគ្នាការពារកុំឱ្យអ្នកសារព័ត៌មានប្រព្រឹត្តទង្វើខុសក្រមសីលធម៌វិជ្ជាជីវៈ។
សម្រាប់អ្នកសារពត៍មានវិញក្រុមសីលធម៍វិជ្ជាជីវជាកត្តាគនឺះហើយតែបើលំហរនៃការទទួលនិងយកពត៍មានតូចចង្អៀតក៏ពិបាលក្នុងការអនុវត្តន៍វិជ្ជាជិវៈផងដែរ។គេនៅចាំបានថាកាលពីពីអាណត្តិទី៍៦សម្តេចតេជោហ៊ុនសែនបានលើកពីបំណងឲ្យច្បាប់ស្តីពីសិទ្ធទទួលពតីមានចេញតែទៅមិនរួច។មកដល់អានត្តិទី៧លោករដ្ឋមន្ត្រីក្រសួងពត៍មានក៏មិនហ៊ាននិយាយពីច្បាប់ស្តីពីសិទ្ទទទួលពត័មានផងដែរដោយទម្លាក់កំហុសលើក្រសួងយុត្តិធម៍ថាជាអ្មកទទួលខុសត្រូវទៅវិញ៕ប្រសិនបើច្បាប់ស្តីពីសិទ្ធទទួលពត័មានចេញមិនរួចសេចក្តីប្រកាសអន្តរក្រសួងពត័មាននិងក្រសួងមហាផ្ទៃស្តីពីការបង្កើតអ្នកនាំពាក្យនាពេលកន្លងមកក៏គួត្រូវបានអនុវត្តន៍ឲ្យបានល្អផងដែរទើបលំហរនៃការអនុវត្តន៍វិជ្ជាជីវៈសារពត៍មានអាចអនុវត្តន៍បានល្អ៕
