សម្តេចធិបតី ហ៊ុន ម៉ាណែត៖ មន្ត្រីបម្រើរាស្ត្រប្រៀបដូចបម្រើខ្លួនឯង និងគ្រួសារ គឺត្រូវការការផ្តល់សេវាសាធារណៈមួយដែលល្អប្រសើរ
11-February-2026 / ផ្សេងៗ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងបញ្ជាក់ថា មន្ត្រីជាអ្នកបម្រើរាស្ត្រ មិនមែនជាចៅហ្វាយរបស់ប្រជារាស្ត្រនោះទេ ហើយមន្ត្រីបម្រើរាស្ត្រប្រៀបដូចជាបម្រើខ្លួនឯង និងក្រុមគ្រួសារផងដែរ ព្រោះមន្ត្រីនៅពេលដោះតួនាទីចេញ ក៏ជាប្រជារាស្ត្រដូចគ្នាដែរ។
នៅព្រឹកថ្ងៃទី១០ ខែមិថុនា ឆ្នាំ២០២៤នេះ នាឱកាសដែលសម្តេចបានអញ្ជើញជាអធិបតីបិទវគ្គបណ្តុះបណ្តាលឆ្នាំ២០២៣ និងបើកវគ្គបណ្តុះបណ្តាលឆ្នាំ២០២៤ របស់សាលាភូមិន្ទរដ្ឋបាលសម្តេចមហាបវរធិបតី ហ៊ុន ម៉ាណែត បានថ្លែងថា «មន្ត្រីគ្រប់រូបក៏ជាប្រជារាស្ត្រដែរ យើងដោះតែតួនាទី ដោះតែកន្លែងធ្វើការចេញ យើងក៏ជាប្រជារាស្ត្ររស់នៅក្នុងសង្គម រស់នៅក្នុង ភូមិ ឃុំ យើងចប់យើងត្រូវការចូលនិវត្តន៍ យើងចេញពីមន្ត្រីរាជការ យើងក៏ជាប្រជារាស្ត្រសាមញ្ញ កូនរបស់យើង ប្រពន្ធរបស់យើង ចៅរបស់យើងក៏ជាប្រជារាស្ត្រដែរ ចឹងបម្រើប្រជារាស្ត្រគឺដូចជាបម្រើខ្លួនឯង និងគ្រួសារខ្លួនឯង»។
សម្តេចមហាបវរធិបតី ហ៊ុន ម៉ាណែត បានថ្លែងដែរថា សម្តេចតេជោ ហ៊ុន សែន ធ្លាប់មានប្រសាសន៍ហើយថា មន្ត្រីជាអ្នកបម្រើរាស្ត្រ មិនមែនជាចៅហ្វាយរបស់ប្រជារាស្ត្រនោះទេ កិច្ចការនេះគឺពិតណាស់ មន្ត្រីមានការងារនិងមានឱកាសតួនាទីដូចពេលបច្ចុប្បន្ននេះ គឺដោយសារមានការគាំទ្រពីប្រជាជន មិនថាតាមរយៈការបោះឆ្នោត ឫការចូលរួមបង្កើតកំណើនសេដ្ឋកិច្ចនោះទេ គឺដើម្បីឱ្យរដ្ឋមានចំណូលដើម្បីទៅបម្រើដោះស្រាយនូវបញ្ហាផ្សេងៗជូនពួកគាត់។
សម្តេចមហាបវរធិបតី ហ៊ុន ម៉ាណែត បានបន្ថែមថា បើយើងចង់បានបរិស្ថានមួយដែលងាយស្រួលខ្លួនការរស់នៅ មានសេវាសាធារណៈល្អសម្រាប់ខ្លួនយើង និងក្រុមគ្រួសារយើង យើងគួរអនុវត្តន៍ក្នុងការផ្តល់សេវាសាធារណៈឱ្យបានល្អដល់មន្ត្រី និងប្រជារាស្ត្រផ្សេងៗទៀត នៅតំបន់ដែលយើងធ្វើការផងដែរ។សម្តេចមហាបវរធិបតី ហ៊ុន ម៉ាណែត បានបញ្ជាក់ដែរថា គ្មានប្រជាពលរដ្ឋណាមួយដែលចង់រស់នៅក្នុងបរិស្ថាន ដែលមានសេវាសាធារណៈមិនប្រាកដប្រជានោះទេ ដូចនេះប្រជាពលរដ្ឋគឺចង់បានអ្នកណាដែលផ្តល់សេវាសាធារណៈដែលមានលំនឹង និងភាពអាចទុកចិត្តបានក្នុងការផ្តល់សេវាសាធារណៈជូនពួកគាត់ផងដែរ។
ជាមួយនិងអនុសាសន៍ធ្វើការងារសម្តេចធិបតី ក៏បានលើកឡើងថា អភិក្រមទាំង៥ របស់រាជរដ្ឋាភិបាល គឺប្រើទាំងអស់ ប៉ុន្តែការអនុវត្ត ៤ដំបូង ចាំបាច់ត្រូវធ្វើជាប្រចាំ ហើយសម្តេចធិបតី ក៏ពុំចង់ឃើញការមន្ត្រីធ្វើខុស រហូតដល់ត្រូវអនុវត្តអភិក្រមទី៥ នោះដែរ។សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «គ្មានពីណាល្អឥតខ្ចោះគ្រប់គ្នាទេ ប៉ុន្តែត្រូវខិតខំដើម្បីយើងល្អឥតខ្ចោះ។ យើងត្រូវដាក់ចិត្តបែបនេះ ទើបយើងឃើញថា ពេលយើងចន្លោះប្រហោង ទើបយើងទទួលស្គាល់ ហើយយើងកែខ្លួនដោយខ្លួនឯង ដោយស្មារតីទទួលខុសត្រូវ»។
បើតាមប្រសាសន៍សម្តេចធិបតី រាជរដ្ឋាភិបាល អាណត្តិទី៧ បានអនុវត្តអភិក្រមនេះ ដោយមានការដាក់វិន័យ ការទម្លាក់ឋានន្តរស័ក្តិ និងបណ្តេញចេញពីក្របខណ្ឌ ជាដើម។សូមជម្រាបថា អត្ថន័យរបស់អភិក្រមទាំង៥ រួមមាន៖១៖ ឆ្លុះកញ្ចក់ គឺត្រូវចេះស្វ័យទិតៀន ឬដាក់ខ្លួនឱ្យមហាជនរិះគន់រាល់ចំណុចអវិជ្ជមាននានា។២៖ ងូតទឹក គឺត្រូវសម្អាតកាយ វាចា និងចិត្ដ ពោលគឺ រៀបចំការស្លៀកពាក់សមរម្យឱ្យសក្ដិសមជាមន្ដ្រីរាជការ និយាយស្ដីពីពីរោះពិសាជាមួយមិត្ដរួមការងារ ក៏ដូចជាមហាជនទូទៅ មិនត្រូវឈ្នានីស ប្រកាន់ ច្រណែន ខឹង ស្អប់ ព្យាបាទ។៣៖ ដុសក្អែល គឺត្រូវលុបបំបាត់នូវទម្លាប់អាក្រក់ និងទង្វើអសកម្មទាំងឡាយដូចជាអំពើពុករលួយ បក្សពួកនិយម។៤៖ ព្យាបាល គឺត្រូវដាក់វិន័យរាល់កំហុសឆ្គង ចេះកែប្រែឥរិយាបថរបស់ខ្លួនដែលឆ្គាំឆ្គង ដើម្បីជាគំរូផង និងជួយដាស់តឿនមនុស្សជុំវិញខ្លួនផងដែរ។
