ក្រសួងការងារប្រាប់កាសែតនិងអង្គការសង្គមស៊ីវីកុំនិយាយាអីផ្តេសផ្តាសពីពលករមកពីអារ៉ាប
15-March-2026 / សេដ្ឋកិច្ច
ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈកាលពីថ្ងៃទី៣១ ខែឧសភា ឆ្នាំ២០២៤ បានចេញសេចក្តីជូនដំណឹងមួយជម្រាបជូនសាធារណជនឲ្យបានជ្រាប៖ ក្រសួងបានសហការ យ៉ាងសកម្មជាមួយក្រសួងការបរទេស និងសហប្រតិបត្តិការអន្តរជាតិ ស្ថានឯកអគ្គរាជទូតកម្ពុជាប្រចាំប្រទេស អារ៉ាប៊ីសាអូឌីត រាជរដ្ឋាភិបាលនៃប្រទេសអារ៉ាប៊ីសាអូឌីត និងស្ថាប័នពាក់ព័ន្ធ ក្នុងការអន្តរាគមន៍ និងសម្រប សម្រួលឱ្យបងប្អូនពលការិនីចំនួន ៥៧នាក់ បានវិលត្រឡប់មកប្រទេសកម្ពុជាវិញរួចហើយ។
ជាមួយគ្នានេះ សម្រាប់បងប្អូនពលការិនីដែលពុំទាន់បានវិលត្រឡប់មកកម្ពុជាវិញតាមការស្នើសុំ ក្រសួងបាននិងកំពុងបន្ត សម្របសម្រួលឱ្យបានវិលត្រឡប់មកវិញនាពេលឆាប់ៗខាងមុខនេះ។ បច្ចុប្បន្ន ស្ថានឯកអគ្គរាជទូតកម្ពុជាប្រចាំ ប្រទេសអារ៉ាប៊ីសាអូឌីតបានផ្តល់កន្លែងស្នាក់នៅ អាហារហូបចុកគ្រប់គ្រាន់ និងតម្រូវការផ្សេងៗ ជូនបងប្អូន ពលការិនីដែលកំពុងរង់ចាំការវិលត្រឡប់មកប្រទេសកម្ពុជាវិញ។
សម្រាប់បងប្អូនពលការិនីដែលបានវិលត្រឡប់មកដល់ប្រទេសកម្ពុជាកន្លងមក ថ្នាក់ដឹកនាំ និងមន្ត្រី នៃក្រសួងការងារ និងបណ្តុះបណ្តាលវិជ្ជាជីវៈ បានទទួលស្វាគមន៍យ៉ាងកក់ក្តៅនៅព្រលានយន្តហោះអន្តរជាតិ ភ្នំពេញ ផ្តល់ការពិនិត្យសុខភាព ផ្តល់ការណែនាំអំពីឱកាសការងារថ្មីនៅក្នុងប្រទេស ផ្តល់ព័ត៌មានអំពីកម្មវិធី បណ្តុះបណ្តាលជំនាញវិជ្ជាជីវៈ និងបច្ចេកទេស និងផ្តល់បណ្ណមូលនិធិសមធម៌សុខាភិបាល ព្រមទាំងបានរៀបចំ មធ្យោបាយធ្វើដំណើរជូនបងប្អូនពលការិនីទៅកាន់គេហដ្ឋានរៀងៗខ្លួនប្រកបដោយសុវត្ថិភាព។
ទន្ទឹមនេះ ក្រសួងការងារ និងបណ្តុះបណ្តាលវិជ្ជាជីវៈ សូមអំពាវនាវដល់បងប្អូនពលការិនីដែលកំពុង រង់ចាំវិលត្រឡប់មកវិញ អង្គការសង្គមស៊ីវិល សារព័ត៌មាន និងសាធារណជន មេត្តារក្សាភាពស្ងៀមស្ងាត់ និង ស្វែងយល់អំពីបែបបទនិងនីតិវិធីក្នុងប្រទេសនីមួយៗឱ្យបានច្បាស់ ចៀសវាងបង្កើតព័ត៌មាន ឬរូបភាពផ្សេងៗ ដែលអាចបង្កឱ្យមានការយល់ច្រលំ ឬបញ្ហាកាន់តែស្មុគស្មាញដល់ការបំពេញបែបបទទិដ្ឋាការសម្រាប់ចាកចេញ ពីប្រទេស (Final Exit Visa) របស់បងប្អូនពលការិនី។
សូមបញ្ជាក់ថាមុននេះអ្នកនាំពាក្យក្រសួងការងារ លោក កត្តា អ៊ន បានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី១២ឧសភានេះថា ក្រសួងការងារនឹងចាត់ការតាមផ្លូវច្បាប់ទៅលើក្រុមហ៊ុនបញ្ជូននិងទទួលពលករពីប្រទេសកម្ពុជាទៅអារ៉ាប៊ីសាអូឌីតណា ដែលរកឃើញថាបានរំលោភបំពានលក្ខខណ្ឌការងារ។ តាមលោក កត្តា អ៊ន ក្រសួងការងារកំពុងស៊ើបអង្កេតយ៉ាងល្អិតល្អន់ក្នុងសំណុំរឿងនេះ និងថាប្រសិនបើរកឃើញមានការប្រព្រឹត្តិខុសនឹងច្បាប់មែន ក្រសួងការងារនឹងលុបអាជ្ញាប័ណ្ណក្រុមហ៊ុននោះចោល ជាមួយការផាកពិន័យជាទឹកប្រាក់។ នេះនៅពុំទាន់រាប់បញ្ចូលចំណាត់ការផ្លូវច្បាប់ផ្នែកព្រហ្មទណ្ឌនៅឡើយទេ។
តាមការចុះផ្សាយរបស់សារព័ត៌មានមួយចំនួន ពលករខ្មែរទាំង២៤នាក់នេះគឺជាពលករស្របច្បាប់ដែលបានបញ្ជូនទៅធ្វើការនៅអារ៉ាប៊ីសាអូឌីតដោយក្រុមហ៊ុនឈ្មោះថា ហ្វាទីណា។ ក្រុមហ៊ុន ហ្វាទីណានេះ កាលពីថ្ងៃទី៥ឧសភាកន្លងទៅបានធានាអះអាងថានឹងសម្របសម្រួលកិច្ចអន្តាគមន៍ជួយដល់ពលករខ្មែរនៅប្រទេសអារ៉ាប៊ីសាអូឌីតណាដែលមានបំណងចង់វិលត្រឡប់មកប្រទេសកម្ពុជាវិញ ដោយសុវត្ថិភាពនិងស្របតាមច្បាប់។
គួររម្លឹកថា ក្រុមពលករខ្មែរនៅអារ៉ាប៊ីសាអ៊ូឌីតមួយក្រុមបានស្រែករកជំនួយអន្តរាគមន៍តាមបណ្តាញសង្គមកាលពីអំឡុងខែមេសាកន្លងទៅថ្មីនេះ ដោយអះអាងថា ពួកគេកំពុងរងការបង្ខាំងធ្វើបាប និងបង្អត់អាហារពីថៅកែ។ ក្រុមពលករអះអាងទៀតថា មុនដាក់ពាក្យមកធ្វើការ ក្រុមហ៊ុនហ្វាទីណាបញ្ជាក់ថា ពួកគេនឹងទទួលប្រាក់ខែ៤០០ដុល្លារ និងធ្វើការ ៨ម៉ោងក្នុងមួយថ្ងៃ ក៏ប៉ុន្តែតាមពិតជាក់ស្តែង ពួកគេត្រូវធ្វើការច្រើនលើសម៉ោងដែលកំណត់។ អ្នកខ្លះធ្វើ ១៨ម៉ោងក្នុងមួយថ្ងៃ និងអ្នកខ្លះធ្វើការរហូតដល់ទៅ ២២ម៉ោង។ នេះបើតាមក្រុមពលករខ្មែរនៅអារ៉ាប៊ីសាអូឌីត។ ពលករខ្មែរធ្វើការនៅអារ៉ាប៊ីសាអូឌីមានសរុប ១៣៣នាក់ ក្នុងនោះ ១១៤នាក់បានស្នើសុំត្រលប់មកស្រុកខ្មែរវិញ។ យោងតាមក្រសួងការងារ គិតត្រឹមថ្ងៃទី១២ឧសភានេះ ពលករខ្មែរនៅអារ៉ាប៊ីសាអូឌីតសរុបចំនួន ៥២នាក់ បានបញ្ជូនមកដល់ប្រទេសកម្ពុជាវិញ ខណៈពលករសេសសល់ផ្សេងទៀត ក្រសួងការងារអះអាងបញ្ជូនមកកម្ពុជាវិញជាបន្តបន្ទាប់៕
