រដ្ឋមន្ត្រីកសិកម្ម ឌិត ទីណា ចុះពិនិត្យ និងពិភាក្សាការងារអំពីស្ថានភាពស្រូវអង្ករនិងតម្លៃ នៅខេត្តបាត់ដំបង
21-September-2026 / សេដ្ឋកិច្ច
ខេត្តបាត់ដំបង ៖ នៅព្រឹកថ្ងៃទី១០ ខែកញ្ញា ឆ្នាំ២០២៣ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានជួបពិភាក្សាការងារជាមួយ លោក សុខ លូ អភិបាល នៃគណៈអភិបាលខេត្តបាត់ដំបង និងឧកញ៉ា ភូ ពុយ ម្ចាស់រោងម៉ាស៊ីនកិនស្រូវប៉ៃតងកម្ពុជាខេត្តបាត់ដំបង ដើម្បីសិក្សាស្វែងយល់ពីស្ថានភាពពិតប្រាកដនៃតម្លៃស្រូវអង្ករ។
លោករដ្ឋមន្ត្រី បានណែនាំឱ្យមានការសហការគ្នាល្អ និងកសាងបណ្តាញពូជស្រូវសុទ្ធ ពិសេសពូជស្រូវសែនក្រអូបនិងផ្ការំដួល ដែលមានតម្លៃថ្លៃ មានការចុះបញ្ជី មានវិញ្ញាបនបត្រត្រឹមត្រូវ មានខ្សែច្រវាក់ទីផ្សារល្អ។ លើសពីនេះទៀត ត្រូវជំរុញឱ្យកសិករប្រើប្រាស់ពូជស្រូវសុទ្ធនេះ និងប្រមូលទិញមកវិញ តាមតម្លៃកិច្ចសន្យា។ គោលបំណង គឺដើម្បីជួយដល់កសិករឱ្យមានទីផ្សារ ទទួលបានផលចំណេញទាំងអស់គ្នា និងជួយដល់សេដ្ឋកិច្ចជាតិ។ក្នុងពេលចុះពិនិត្យឃ្លាំងស្តុកស្រូវ ឡសំងួត គ្រឿងចក្រកសិកម្ម និងសិក្សាពីដំណើរការនៃការផលិតពូជស្រូវរួចមក លោករដ្ឋមន្ត្រីកិសកម្ម បានជំរុញឱ្យយកចិត្តទុកដាក់ផលិតពូជស្រូវល្អ សែនក្រអូបនិងផ្ការំដួល ដើម្បីឆ្លើយតបនឹងតម្រូវការទីផ្សារនិងការប្រើប្រាស់។
សម្រាប់តម្លៃស្រូវលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និង លោក យង់សាំង កុមាររដ្ឋលេខាធិការបានអះអាងដូចគ្នាពីតម្លៃស្រូវ នៅតែមានតម្លៃខ្ពស់ សម្រាប់ផលចំណេញ ។ ការអះអាងប្រតិកម្ម ទៅនឹងការចេញផ្សាយ របស់វិទ្យុអាស៊ីសេរី ដែលបានលើកឡើងថា ប្រជាកសិករ នៅខេត្តបាត់ដំបង កំពុងជួបបញ្ហាដោយសារ តម្លៃស្រូវធ្លាក់ថ្លៃជាបន្តបន្ទាប់ ធ្វើឲ្យពួកគាត់ខាត់បង់ថវិកា ៣០ម៉ឺនរៀល ក្នុង១តោន ។ កសិករម្នាក់បានឲ្យដឹងថា នៅថ្ងៃ៨ កញ្ញា តម្លៃមានតម្លៃ១ពាន់រៀលក្នុង១គីឡូ ។
សម្រាប់ករណីនេះ លោកឌិត ទីណា និង លោក យង់សាំង កុមារ បានចេញ សារពាក់ព័ន្ធតម្លៃស្រូវ ក្នុងថ្ងៃតែមួយដូចគ្នា កាលពីថ្ងៃ១០ កញ្ញាគ្រាន់ ខុសម៉ោងប៉ុណ្ណោះ នៅលើបណ្តាញទំនាក់ទំនង សង្គមហ្វេសប៊ុកផ្ទាល់រៀងៗខ្លួន ។ ក្នុងនោះ សម្រាប់លោករដ្ឋមន្ត្រីកសិកម្មវ័យក្មេង បានបង្ហាញ ពីថ្លៃស្រូវ នៅបាត់ដំបងជាក់ស្តែង ធៀបនឹងចលនាបំភ្លៃ លើបណ្ដាញសង្គមផងដែរ ។លោកបញ្ជាក់ថា “ស្រូវបានឡើងថ្លៃខ្ពស់ ហើយក៏បានចុះមកវិញ តែនៅតែជាតម្លៃខ្ពស់ សម្រាប់ស្រូវស្រងែ សមរម្យជូនកសិករ មានប្រាក់ចំណេញ ។ ទៅមុខ ស្រូវពូជសែនក្រអូប និងផ្ការំដួលរបស់ខ្មែរយើង នឹងទទួលការគាំទ្រខ្ពស់ពីគោលនយោបាយពូជសុទ្ធ”។
លោក យង់សាំង កុមារវិញ អះអាងថា រាជរដ្ឋាភិបាលយកចិត្តទុកដាក់ លើការបង្កើនប្រាក់ ចំណេញរបស់កសិករអ្នកផលិតស្រូវ ។ សម្រាប់ស្រូវដើមរដូវដែល ច្រូតកាត់នៅខែសីហា និងកញ្ញា២០២៣ ថ្លៃដើម១គីឡូស្មើនឹង៥០០ ទៅ៧០០ រៀល ។ តម្លៃស្រូវសើមលើទីផ្សារស្រុកខ្មែរ នៅថ្ងៃ៨ កញ្ញា ២០២៣ ចន្លោះពី១១០០ ទៅជាង១២០០ រៀល។ កសិករអាចបានចំណេញចន្លោះ ពី៤០០ ទៅ ៧០០ រៀលក្នុងមួយគីឡូអាស្រ័យ លើការគ្រប់គ្រង ថ្លៃដើមនិងគុណភាពស្រូវ របស់កសិករនីមួយៗ។
លោករដ្ឋលេខាធិការក្រសួងកសិកម្មបានឲ្យដឹងថា វិស័យស្រូវ-អង្ករនាំចំណូលចូលជាតិប្រមាណ ១១០០ លានដុល្លារក្នុងរយៈពេល៨ខែ និងជួយធានាសន្តិសុខស្បៀងជូនជាតិទាំងមូល។ “ក្នុងរយៈពេល៨ខែឆ្នាំ២០២៣ កម្ពុជានាំអង្ករចេញបាន៤០ម៉ឺនតោន (គិតជាស្រូវស្មើនឹង១លានតោន) និងស្រូវជិត៣លានតោន បើសរុបរួមគ្នាគិតជាស្រូវស្មើនឹង៤ លានតោន ជាទឹកប្រាក់ប្រមាណជិត ១១០០ លានដុល្លារ” ។ អង្ករនាំចេញ៨០ភាគរយ ជាអង្ករប្រណីត ដែលជាក្រអូបបាយ ទន់ពូជផ្ការំដួលនិងសែនក្រអូប១”។
លោកយ៉ាងសាំងកុមារថា ដើម្បីពង្រីក ការនាំចេញអង្ករ ប្រណីតខ្មែរឲ្យបានកាន់តែច្រើន ក្រសួង កសិកម្មកំពុងដឹកនាំ ការកសាងប្រព័ន្ធពូជ សុទ្ធផ្ការំដួល និង សែនក្រអូប១ និង ជំរុញយន្តការ កិច្ចសន្យា កសិកម្មរវាង សហគមន៍ អ្នកផលិតស្រូវ (ប្រើពូជសុទ្ធ) និងរោងម៉ាស៊ីន ដែលត្រូវការ ស្រូវអង្ករប្រណីតពូជ សុទ្ធល្អ សម្រាប់ផលិតអង្ករនាំចេញ ។លោកឧកញ៉ា ភួ ពុយ អ្នកតំណាងរាស្ត្រមណ្ឌលបាត់ដំបង និងជានាយកក្រុមហ៊ុនប៉ៃតងវិញបានអះអាងប្រាប់ពលរដ្ឋជាកសិករ និងអាធ្ញាធរមូលដ្ឋានថា ចំពោះមុខនេះលោកធានាទទួលទិញស្រូវពីកសិករឲ្យបានលឿន នឹងធានាមិនឲ្យតម្លៃស្រូវធ្លាក់ទាបក្រោម ១.១៥០.០០០រៀលឡើយនៅក្នុងមួយតោន។
ទាក់ទងបញ្ហានេះអ្នកស្រី សុង ស៊ីយា កសិកររស់នៅក្នុងភូមិអូសទូក ឃុំកំពង់ព្រៀង ស្រុកសង្កែ ខេត្តបាត់ដំបងបានប្រាប់ឲ្យដឹងនៅថ្ងៃទី១០ ខែកញ្ញា ឆ្នាំ២០២៣ចុងសប្តាហ៍នេះថា÷ រដូវបង្កបង្កើនផលឆ្នាំនេះលោកស្រីបានដាំដុះដំណាំស្រូវដូចរាល់ឆ្នាំមានចំនួន៦ហិកតា ជាប្រភេទស្រូវស្រាលនិងហុចផលបានច្រើនជាងឆ្នាំចាស់ ដោយក្នុងមួយហិកតាទទួលបានផលពី៥ ទៅ៦តោន ខណ:ឆ្នាំមុនៗបានត្រឹមតែ៤តោនប៉ុណ្ណោះ។
លោកស្រីបន្តថា÷ បើប្រៀបធៀបរវាងឆ្នាំកន្លងមករយ:ពេលដូចគ្នាតម្លៃស្រូវឆ្នាំនេះមានហាងឆេងខ្ពស់គួរសម ដែលជាក់ស្តែងប៉ុន្មានថ្ងៃមុននេះតម្លៃស្រូវបានហក់ឡើងរហូតក្នុងមួយតោនលក់បានតម្លៃ ១.៣១០.០០០រៀល ទៅ ១.៣២០.០០០រៀល ខណៈឆ្នាំ២០២២ ក្នុងមួយតោនលក់បានត្រឹមតែតម្លៃ ១.១៥០.០០០រៀល និងចុះដល់ ១.០៥០.០០០រៀលប៉ុណ្ណោះ។
