មុនប្រជុំកំពូលអាស៊ានសម្ដេចអគ្គមហាសេនាបតីតេជោ ហ៊ុន សែន ស្នើសុំវៀតណាមជួយសម្រួល
11-February-2026 / ព័ត៌មានជាតិ
ភ្នំពេញ ៖ សម្តេចតេជោ ហ៊ុន សែនាយករដ្ឋមន្ត្រីកម្ពុជា បានស្នើដល់ នាយករដ្ឋមន្ត្រីវៀតណាមឲ្យជួយសម្របសម្រួលដល់ការអូសខ្សែបញ្ជូនអគ្គិនីក្រោមបាតសមុទ្រ ទៅកាន់ប្រទេសសិង្ហបុរី នៅពេលខាងមុខ។នៅក្នុងឱកាសជួបពិភាក្សាជាមួយ លោក ផាម មិញជិញ នាយករដ្ឋមន្ត្រីវៀតណាម អំឡុងពេលទៅចូលរួមកិច្ចប្រជុំកំពូលអាស៊ាន នៅប្រទេសឥណ្ឌូនេស៊ី នារសៀល ថ្ងៃទី០៩ ខែឧសភា ឆ្នាំ២០២៣ សម្តេចតេជោ ហ៊ុន សែន ក៏បានថ្លែងផងដែរថា កម្ពុជាមានបំណងទិញអគ្គិសនីពីប្រទេសឡាវ ចេញមកកាន់កម្ពុជា ហើយបន្តលក់ទៅកាន់ប្រទេសសិង្ហបុរី ដោយថ្មីៗនេះ ដើម្បីទទួលបានកិច្ចការងារនេះជោគជ័យក្នុងការអូសខ្សែបញ្ជូនក្រោមបាតសមុទ្រនោះ ក៏ត្រូវការភូមិសាស្ត្រទឹកដីរបស់វៀតណាមខាងត្បូងតំបន់កាម៉ៅ បន្តឆ្ពោះទៅប្រទេសម៉ាឡេស៊ី និងបន្តទៅកាន់ប្រទេសសិង្ហបុរី។
ក្នុងន័យនេះ សម្ដេចតេជោ ហ៊ុន សែន ក៏បានស្នើសុំ នាយករដ្ឋមន្ត្រីវៀតណាម ឱ្យជួយសម្របសម្រួលកិច្ចការនេះទទួលបានជោគជ័យ ខណៈដែលកម្ពុជាក៏បានរៀបចំឯកសារនានា ពាក់ព័ន្ធទៅកាន់ស្ថាប័នរបស់វៀតណាមរួចរាល់ហើយដែរ។លោកនាយករដ្ឋមន្ត្រីវៀតណាម បានលើកឡើងថា លោកបានទទួលនូវព័ត៌មាននេះហើយ លោកនឹងបញ្ជូនទៅឲ្យក្រុមការងារជំនាញពិនិត្យទៅលើកិច្ចការនេះ។លោកនាយករដ្ឋមន្ត្រីវៀតណាម បានឆ្លៀតថ្លែងកោតសរសើរចំពោះការបើកព្រឹត្តិការណ៍ស៊ីហ្គេម ដែលកម្ពុជាធ្វើជាម្ចាស់ផ្ទះប្រកបដោយភាពជោគជ័យនិងអស្ចារ្យ។នាយករដ្ឋមន្ត្រី នៃប្រទេសវៀតណាម ក៏បានគោរពអញ្ជើញសម្ដេចតេជោ ហ៊ុន សែន អញ្ជើញទៅបំពេញទស្សនកិច្ចផ្លូវការ នៅប្រទេសវៀតណាម នាពេលខាងមុខផងដែរ.។
ក្រៅពីជួបសមភាគីវៀតណាមសម្តេចតេជោ ហ៊ុន សែន នៅរសៀល ថ្ងៃក៏ បានទទួលជួបពិភាក្សាការងារជាមួយ លោក Taur Matan Ruak នាយករដ្ឋមន្ត្រីទីម័រខាងកើត អំឡុងអញ្ជើញទៅចូលរួមកិច្ចប្រជុំកំពូលអាស៊ាន នៅប្រទេសឥណ្ឌូនេស៊ី។សូមបញ្ជាក់ថា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានដឹកនាំគណៈប្រតិភូអញ្ជើញទៅចូលរួម កិច្ចប្រជុំកំពូលអាស៊ានលើកទី៤២ និងកិច្ចប្រជុំកំពូលពាក់ព័ន្ធក្នុងក្របខ័ណ្ឌអាស៊ាន ក្រោមប្រធានបទ «សារៈសំខាន់ អាស៊ាន៖ ស្នូលនៃកំណើន» ដែលនឹងប្រព្រឹត្តទៅពីថ្ងៃទី១០ ដល់ទី១១ ខែឧសភា ឆ្នាំ២០២៣ នៅទីក្រុងឡាប៊ូនបាចូ សាធារណរដ្ឋឥណ្ឌូនេស៊ី។យន្តហោះពិសេសរបស់ព្រះរាជាណាចក្រកម្ពុជាជើងហោះហើរលេខ ០០១ បានធ្វើការចុះចតនៅអាកាសយានដ្ឋានអន្តរជាតិ កូម៉ូដូ ក្រុងឡាប៊ូន បាចូ
នៅវេលាម៉ោង១២៖៥៥នាទី ម៉ោងនៅក្រុងឡាប៊ូនបាចូ សាធារណរដ្ឋឥណ្ឌូណេស៊ីត្រូវនឹងម៉ោង១១៖៥៥នាទីម៉ោងនៅរាជធានីភ្នំពេញព្រះរាជាណាចក្រកម្ពុជា ថ្ងៃទី៩ឧសភា ឆ្នាំ ២០២៣ ក្រោមវត្ត មាននៃការធ្វើគារវកិច្ចស្វាគមន៍យ៉ាងស្និទ្ធស្នាលបំផុតពីថ្នាក់ដឹកនាំរដ្ឋាភិបាលឥណ្ឌូណេស៊ីនិងឥស្សរជនការទូតរបស់ព្រះរាជា ណាចក្រកម្ពុជាប្រចាំសាធារណរដ្ឋឥណ្ឌូណេស៊ី ជាច្រើនរូប ។ វត្តមាននៃការអញ្ជើញដល់របស់សម្តេចតេជោនិងសម្តេចកិត្តិព្រឹទ្ធបណ្ឌិតត្រូវបានស្វាគមន៍ពីក្រុមសិល្បះប្រពៃណីមហាជន ក្រុងឡាប៊ូន បាចូ ។សម្តេចតេជោនិងសម្តេចកិត្តិព្រឹទ្ធបណ្ឌិតអញ្ជើញចូលរួមពិធីបើកកិច្ចប្រជុំកំពូលអាស៊ានលើកទី ៤២ ដែលគ្រោងធ្វើឡើងនៅព្រឹកថ្ងៃទី ១០ និងទី១១ ឧសភា ៕
