វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2688 នាក់
ម្សិលមិញ 5544 នាក់
សរុប 13943785 នាក់
កូរ៉េ៖រុស្ស៊ីនៅថ្ងៃពុធ (១៩ មេសា) បានព្រមានកូរ៉េខាងត្បូងអំពីផែនការបញ្ជូនអាវុធទៅកាន់អ៊ុយក្រែននិងបង្ហើបពីការប្រគល់អាវុធឲ្យកូរ៉េខាងជើងវិញផងដែរ ។ ទីភ្នាក់ងារសារព័ត៌មាន AFP នៅថ្ងៃពុធ ទី១៩ ខែមេសា ឆ្នាំ២០២៣ឲ្យដឹងថា៖វិមានក្រឹមឡាំងបានឆ្លើយតបថា ការចាប់ផ្តើមការផ្គត់ផ្គង់អាវុធនឹងមានន័យថា ការចូលរួមដោយប្រយោលនៅក្នុងជម្លោះអ៊ុយក្រែន។
អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានថា «គួរឱ្យសោកស្តាយ! ទីក្រុងសេអ៊ូលមានអាកប្បកិរិយាមិនគួរឱ្យរាក់ទាក់»។ លោកបានបន្ថែមថា «ការចាប់ផ្តើមនៃការផ្គត់ផ្គង់សព្វាវុធនឹងមានន័យដោយប្រយោលនូវដំណាក់កាលជាក់លាក់នៃការចូលរួមក្នុងជម្លោះនេះ»។ទីភ្នាក់ងារសារព័ត៌មាន Reuters នៅថ្ងៃពុធ ទី១៩ ខែមេសា ឆ្នាំ២០២៣ឲ្យដឹងថាប្រធានាធិបតីកូរ៉េខាងត្បូង លោក យូន ស៊ុកយុល (Yoon Suk Yeol) បាននិយាយថាទីក្រុងសេអ៊ូលអាចនឹងផ្ដល់ជំនួយគាំទ្រសម្រាប់អ៊ុយក្រែន លើសពី ជំនួយមនុស្សធម៌ និងសេដ្ឋកិច្ច ប្រសិនបើមានការវាយប្រហារ ឬការសម្លាប់រង្គាលលើជនស៊ីវិលកើតឡើង។
លោក យូន ធ្វើឡើងក្នុងបទសម្ភាសន៍ផ្ដាច់មុខជាមួយទីភ្នាក់ងារសារព័ត៌មាន Reuters នៅមុនត្រូវបំពេញទស្សនកិច្ចទៅកាន់សហរដ្ឋអាមេរិក នៅសប្ដាហ៍ក្រោយប្រធានាធិបតីកូរ៉េខាងត្បូងរូបនេះ បានគូសបញ្ជាក់បន្ថែមដូច្នេះថា «ប្រសិនបើមានស្ថានការណ៍មួយដែលសហគមន៍អន្តរជាតិមិនអាចអត់ឱនឱ្យបាន ក្នុងនោះរួមមាន ដូចជាការវាយប្រហារទ្រង់ទ្រាយធំលើជនស៊ីវិល ការសម្លាប់រង្គាល ឬក៏ការបំពានច្បាប់សង្គ្រាមធ្ងន់ធ្ងរ នោះវានឹងពិបាកណាស់សម្រាប់ពួកយើងក្នុងការទទូចបន្តផ្ដល់ត្រឹម តែជំនួយមនុស្សធម៌ ឬហរិញ្ញវត្ថុ»។បើតាមលោក យូន រដ្ឋាភិបាលរបស់លោក បាន និងកំពុងស្វែងរកមធ្យោបាយជួយការពារ និងការកសាងអ៊ុយក្រែនឡើងវិញ ដូចគ្នាទៅនឹងអ្វីដែល កូរ៉េខាងត្បូងធ្លាប់ទទួលបានជំនួយពីសហគមន៍អន្តរជាតិ អំឡុងសម័យសង្គ្រាមកូរ៉េឆ្នាំ១៩៥០ ដល់ឆ្នាំ១៩៥៣។
នេះគឺជាលើកដំបូងបំផុតហើយដែលកូរ៉េខាងត្បូង លើកឡើងពីបំណងបញ្ជូនអាវុធឱ្យអ៊ុយក្រែន ខណៈទីក្រុងបានប្រកាន់ជំហរ មិនព្រមផ្ដល់អាវុធអាចសម្លាប់ជីវិតមនុស្ស ចាប់តាំងពីសង្គ្រាមអ៊ុយក្រែនផ្ទុះឡើងមក។សូមរំលឹកថា នៅក្នុងចំណោមឯកសារសម្ងាត់អាមេរិក ដែលបានបែកធ្លាយកាលពីសប្តាហ៍មុន គឺមានឯកសារខ្លះ បានបង្ហាញឲ្យដឹង ថារដ្ឋាភិបាលអាមេរិក បានព្យាយាមបញ្ចុះបញ្ចូល និងដាក់សំពាធទៅលើកូរ៉េខាងត្បូង ឲ្យជួយជាគ្រឿងសព្វាវុធទៅឲ្យអ៊ុយក្រែន។ អាមេរិកបានសង្កត់ធ្ងន់ជាពិសេស នូវសព្វាវុធចាំបាច់មួយចំនួន ដូចជាគ្រឿងសព្វាវុធការពារផ្លូវអាកាស ព្រមទាំងគ្រាប់កាំភ្លើងធំជាដើម។
ការលើកឡើងរបស់ប្រធានាធិបតីកូរ៉េខាងត្បូងនេះ ក៏បានទាញការព្រមានពីអតីតមេដឹកនាំរុស្ស៊ីលោក Dmitry Medvedev ដែលធ្លាប់កាន់តំណែងជាប្រធានាធិបតីចន្លោះឆ្នាំ ២០០៨ ដល់ឆ្នាំ ២០១២ផងដែរ។
លោក Medvedev បាននិយាយថា ទីក្រុងមូស្គូអាចតបស្នង និងបញ្ជូនអាវុធទៅកាន់ប្រទេសកូរ៉េខាងជើង ដែលត្រូវបានគេស្គាល់ជាផ្លូវការថាជាសាធារណៈរដ្ឋប្រជាធិបតេយ្យប្រជាមានិតកូរ៉េ។លោកបានបន្ថែមថា «ខ្ញុំឆ្ងល់ថាតើប្រជាជននៃប្រទេសនេះនឹងនិយាយអ្វីនៅពេលពួកគេឃើញអាវុធរុស្ស៊ីចុងក្រោយបំផុត នៅជាមួយប្រទេសជិតខាងបំផុតរបស់ពួកគេ គឺប្រទេសដៃគូរបស់យើង កូរ៉េខាងជើង»។ បើតាមការរំពឹងទុក លក្ខខណ្ឌលំអិតយ៉ាងណា ស្តីពីការបញ្ជូនគ្រឿងសព្វាវុធរបស់កូរ៉េខាងត្បូងទៅជួយអ៊ុយក្រែន នឹងត្រូវគេលើកយកទៅនិយាយគ្នា ក្នុងពេលលោកយូន ស៊ុកយោល ទៅជួបលោកចូ បៃដិន នៅសេតវិមានក្រុងវ៉ាស៊ីនតោន នាថ្ងៃទី២៦មេសាខាងមុខនេះ ដែលជាថ្ងៃខួបគម្រប់៧០ឆ្នាំនៃសម្ព័ន្ធភាពរវាងប្រទេសទាំង២៕