វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7124 នាក់
ម្សិលមិញ 8227 នាក់
សរុប 14134005 នាក់
កំពង់ឆ្នាំង៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា នាពេលអនាគត ខេត្តកំពង់ឆ្នាំងនឹងមានស្ពានឆ្លងទន្លេសាបប្រវែង ៣,៣គីឡូម៉ែត្រ ដែលវែងជាងគេបំផុតនៅកម្ពុជា។
ក្នុងឱកាសអញ្ជើញចុះពិនិត្យទីតាំងសាងសង់កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង នាថ្ងៃទី៩ ខែមីនា ឆ្នាំ២០២៣លោកទេសរដ្ឋមន្ត្រី ស៊ុន ចាន់ថុល បានលើកឡើងថា ថ្មីៗនេះសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានឯកភាពជាលាយលក្ខណ៍អក្សរថា ក្នុងឆ្នាំ២០២៤ ធ្វើយ៉ាងណាត្រូវរកថវិកាដើម្បីកសាងផ្លូវ ៥០សេ (50C) ឆ្លងពីខេត្តកំពង់ធំ តភ្ជាប់មកខេត្តកំពង់ឆ្នាំងឲ្យខាងតែបាន។ ផ្លូវ៥០សេ (50C) នេះល្អខ្លាំងណាស់ដែលបម្រើដល់ប្រជាពលរដ្ឋក្នុងការដឹកជញ្ជូននានា ជាពិសេសវិស័យកសិកម្ម ដោយឆ្លងកាត់ពីខេត្តព្រះវិហារចូលមកខេត្តកំពង់ធំដោយត្រង់ និងឆ្លងចូលមកខេត្តកំពង់ឆ្នាំងបានលឿនរហ័ស ដោយពុំចាំបាច់ធ្វើដំណើរឆ្លងកាត់រាជធានីភ្នំពេញទៀតនោះឡើយ។
គម្រោងស្ពានដែលតភ្ជាប់ពីខេត្តកំពង់ឆ្នាំង ឆ្ពោះទៅខេត្តកំពង់ធំ នឹងត្រូវសាងសង់ឆ្លងកាត់ដៃទន្លេចំនួន៣ រួមមាន ទន្លេផ្សារក្រោម ទន្លេជល់មុខ និងទន្លេកំពង់ហាវ ដែលមានប្រវែងសរុប ៣.៩០០ម៉ែត្រ។ ចំពោះការសាងសង់ផ្លូវ គឺមានប្រវែង ៥៨គីឡូម៉ែត្រ ដែលនឹងត្រូវសាងសង់ចាប់ពីស្រុកកំពង់លែងរបស់ខេត្តកំពង់ឆ្នាំង ទៅស្រុកស្ទឹងសែន របស់ខេត្តកំពង់ធំ។ គម្រោងនេះនឹងត្រូវសាងសង់ដោយ ក្រុមហ៊ុន សាវ៉ាក់ ខុនស៊ុលថិន គិតជាទឹកប្រាក់ទាំងអស់ តាមតម្លៃប៉ាន់ស្មានក្នុងការកសាងគឺ ២៥០លានដុល្លារ ដោយបែងចែកទៅផ្លូវប្រហែល ១៥០លានដុល្លារ និងស្ពានប្រហែលជា ១០០លានដុល្លារ៕