វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 8137 នាក់
ម្សិលមិញ 5020 នាក់
សរុប 14123584 នាក់
កំពង់ស្ពឺ ៖ រណ្ដៅដីមួយកន្លែង ស្ថិតនៅភូមិក្រាំងស្ពឺ ឃុំរលាំងចក ស្រុកសំរោងទង កំពុងបង្កហានិភ័យដល់ប្រជាពលរដ្ឋរស់នៅតំបន់នោះយ៉ាងខ្លាំង។ បុរសម្នាក់ ឈ្មោះ ភក្តី ដែលគេថាជាមេការរណ្ដៅដីមួយកន្លែង បាននិយាយថា ពេលនេះមេម៉ៅ និងមេស្រ៊ុន របស់ខ្លួនបានប្រាប់គាត់ថា ឱ្យផ្អាកសកម្មភាពសិន ព្រោះកាសែតផ្សាយច្រើនណាស់ ចាំលោកអភិបាលខេត្តចុះហត្ថលេខាអនុញ្ញាតច្បាប់ចាំធ្វើបន្ត?។
ប្រជាពលរដ្ឋរស់នៅភូមិក្រាំងស្ពឺ ឃុំរលាំងចក ជាប់នឹងភូមិត្រពាំងខ្យង ឃុំរលាំងគ្រើល ស្រុកសំរោងទង ខេត្តកំពង់ស្ពឺ បានឱ្យដឹងថា មានរណ្តៅដីមួយកន្លែង ស្ថិតនៅភូមិត្រពាំងខ្យង ជារបស់ឈ្មោះ ប៊ុត ចន្ថា មន្ត្រីយោធានៅកងកាំភ្លើងធំ និងមានរហ័សនាមឧកញ៉ា ម៉ៅ (ហៅឧកញ៉ាវត្ត) គឺជាឈ្មួញកាយអាចម៍ដីយកទៅលក់គ្មានច្បាប់អនុញ្ញាត មិនតែប៉ុណ្ណោះថែមទាំងមិនបានដាក់ឈ្មោះខ្លួនឯងនោះទេ គឺដាក់ឈ្មោះ ស្រ៊ុន ជាអ្នកសុំច្បាប់អាជីវកម្មទៅវិញ។
ប្រជាពលរដ្ឋបានលើកឡើងទៀតថា ចំពោះករណីនេះដែរ ប្រសិនបើកាសែតមិនផ្សាយទេ គេក៏មិនឈប់ដែរ បើរំពឹងលើអាជ្ញាធរ និងជំនាញស្ងាត់ដូចចោរលួចសេះ។ គេសង្កេតឃើញថា ក្រុមឈ្មួញ បានផ្អាកសកម្មភាពហើយ និងបានយកគ្រឿងចក្រទៅលាក់ទុកតាមភូមិក្បែរនោះផងដែរ។ក្រុមឈ្មួញទាំងនោះ ប្រើសុទ្ធតែរថយន្តកង់៦ និងរថយន្តយីឌុបដែលជាហេតុធ្វើឱ្យផ្លូវជាតិ និងស្ពានឆាប់ខូច ចំពោះការដឹកដីវិញ គឺគ្មានសណ្តាប់ធ្នាប់ គឺដីហៀរធ្លាក់រាយប៉ាយពេញដី ដែលបង្កគ្រោះថ្នាក់ដល់អ្នកដំណើរ ខូចខាតស្ពាន និងផ្លូវភូមិរបស់ពួកគាត់ ដោយមិនឃើញជំនាញពាក់ព័ន្ធណាមកត្រួតពិនិត្យនោះឡើយ។
ប្រជាពលរដ្ឋ និយាយថា ឈ្មួញរកស៊ីកាយអាចម៍ដីរូបនេះ កំពុងធ្វើអាជីវកម្មដោយពុំមានការអនុញ្ញាត ឬលិខិតបញ្ជាក់ពីមន្ទីររ៉ែ ថាមពល និងខេត្តឡើយ ព្រោះឈ្មួញឈ្មោះ ប៊ុត ចន្ថា នេះតែងតែប្រើអំណាចខ្សែបណ្ដាញ និងអំណាចទឹកប្រាក់ ទើបអាចបាំងភ្នែកអាជ្ញាធរមានសមត្ថកិច្ចបាន ទើបដំណើរការទៅយ៉ាងរលូន។ប្រជាពលរដ្ឋបាន សូមសំណូមពរដល់មន្ត្រីជំនាញពាក់ព័ន្ធគ្រប់ក្រសួងទាំងអស់ ក៏ដូចជាលោកអភិបាលខេត្តកំពង់ស្ពឺ គួរមានវិធានការចំពោះឈ្មួញខាងលើនេះ ដើម្បីកុំឱ្យបុគ្គលដែលប្រើអំណាចទឹកប្រាក់ ធ្វើអ្វីតាមអំពើចិត្ត និងប៉ះពាល់ដល់សុខសុវត្ថិភាពក្នុងការធ្វើដំណើររបស់កូនចៅពួកគាត់ផងដែរ។សារព័ត៌មាន យើង មិនអាចសុំការទំនាក់ទំនង ឈ្មោះ ប៊ុត ចន្ថាដែលប្រជាពលរដ្ឋថាជាថៅកែរណ្តៅដីសុំការបកស្រាយ បានទេ។