វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 6268 នាក់
ម្សិលមិញ 5020 នាក់
សរុប 14121715 នាក់
ខេត្តកំពង់ស្ពឺ៖សាលាដំបូងខេត្តកំពង់ស្ពឺ បានលើកលែងការចោទប្រកាន់ និងបន្ធូបន្ថយទោសលើអតីតមន្ត្រីយោធាផ្កាយ២បន្ទាប់ពីបានរងការចោទប្រកាន់ពីបទចាប់បង្ខាំងដោយខុសច្បាប់ និងប្រើហិង្សាលើស្ត្រីម្នាក់បណ្តាលឱ្យរងបួសធ្ងន់កាលពីដើមឆ្នាំ២០២១។នេះបើយោងតាមដីការបស់តុលាការខេត្តកំពង់ស្ពឺ ដែលមានលោក ស៊ លីនណា ចៅក្រមជំនុំជម្រះចេញកាលពីថ្ងៃទី២២ ខែធ្នូ ឆ្នាំ២០២២ ហើយត្រូវបានសារព័ត៌មាន ចុះផ្សាយ ។
ក្នុងដីការបស់តុលាការបានបញ្ជាក់ថា ទី១. ឱ្យ(អតីតមន្ត្រីយោធា) ឈ្មោះ សូយ ចាន់សឿន ឬទេស ចាន់សឿន ហៅវ៉ា ភេទប្រុស អាយុ៤៨ឆ្នាំ ជនជាតិខ្មែរ រួចផុតពីបទ «បង្ខាំងដោយខុសច្បាប់» ប្រព្រឹត្តនៅក្រុងតាខ្មៅ ខេត្តកណ្តាល និងខេត្តកំពង់ស្ពឺ កាលពីថ្ងៃទី២២ ខែមករា ឆ្នាំ២០២១ ។ ទី២៖ ផ្តន្ទាទោសឈ្មោះ សូយ ចាន់សឿន ដាក់ទោសពន្ធនាគារកំណត់រយៈពេល ៣ឆ្នាំ តែទោសនេះអនុវត្តក្នុងពន្ធនាគាររយៈពេល ០១ ឆ្នាំ និង ៦ខែ ទោសសល់ពីនេះព្យួរធម្មតា និងពិន័យជាប្រាក់ចំនួន ៦ ០០០ ០០០រៀល ពីបទ «ហិង្សាដោយចេតនាមានស្ថានទម្ងន់ទោស» ប្រព្រឹត្តនៅក្រុងតាខ្មៅ ខេត្តកណ្តាល និងនៅខេត្តកំពង់ស្ពឺ កាលពីថ្ងៃទី២២ ខែមករា ឆ្នាំ២០២១។
ដោយឡែក ចំណុច ទី៣ តុលាការតម្រូវឱ្យឈ្មោះ សូយ ចាន់សឿន សងសំណងថ្លៃព្យាបាលរបួសជាប្រាក់ចំនួន ១០ ០០០ ដុល្លារអាមេរិក និងសងសំណងជំងឺចិត្តជាប្រាក់ចំនួន ៥ ០០០ដុល្លារអាមេរិក ទៅដើមបណ្តឹងរដ្ឋប្បវេណីឈ្មោះ ឌួង ហេម៉ាលីស តាមបញ្ញត្តិមាត្រា ៣៥៥ នៃក្រមនីតិវិធីព្រហ្មទណ្ឌ។អតីតមន្ត្រីយោធាផ្កាយ២ នៅក្រសួងការពារជាតិ មានឈ្មោះ សូយ ចាន់សឿន ឬ ទេស ចាន់សឿន ហៅវ៉ា អាយុ៤៨ឆ្នាំ ដែលត្រូវស្ត្រីម្នាក់ឈ្មោះ ឌួង ហេម៉ាលីស បានប្តឹងពីបទចាប់បង្ខាំំង និងប្រើហិង្សាយ៉ាងធ្ងន់ធ្ងរលើនាងកាលពីខែមករា ឆ្នាំ២០២១ ហើយត្រូវបានសមត្ថកិច្ចចាប់ខ្លួនបញ្ជូនទៅកាន់តុលាការកាត់ទោស។
សូមបញ្ជាក់ដែរថា៖ក្រៅពីសំណុំរឿងហិង្សានិងបង្ខាំងមនុស្សនៅខេត្តកំពង់ស្ពឺ អតីតមន្ត្រីយោធាផ្កាយ២រូបនេះ ក៏មានសំណុំរឿងនៅសាលាដំបូងរាជធានីភ្នំពេញ ដោយមានមនុស្ស២នាក់ប្តឹងពីបទ «ប្រើអំពើហិង្សាលើអ្នកកាន់កាប់អចលនវត្ថុដោយសុច្ចរិត និងបទបរិហារបង្កាច់កេរ្តិ៍»។ចំពោះបទល្មើសនេះ ត្រូវបានចៅក្រម ធាម ច័ន្ទពិសិដ្ឋ សម្រេចចេញសាលក្រមផ្តន្ទាទោសឈ្មោះ សូយ ចាន់សឿន ដាក់ពន្ធនាគារ ១ឆ្នាំថែមទៀត និងប្រាក់ជំងឺចិត្តទៅដើមបណ្តឹងមួយចំនួនទៀតផងដែរ។