វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4512 នាក់
ម្សិលមិញ 5544 នាក់
សរុប 13945609 នាក់
កំពង់ស្ពឺ ៖ ស្ដ្រីម្នាក់ រស់នៅឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ បានបង្ហោះសារជាថ្មីម្ដងទៀត ដើម្បីស្វែងរកកិច្ចអន្តរាគមន៍ ឱ្យរួចផុតពីការវាយដំធ្វើបាបពីសំណាក់បុរសជាឪពុកចុង តាមរយៈគណនីហ្វេសប៊ុក “chhinamo chhinamo”។
ប្រភពពីសមត្តកិច្ចបានឲ្យដឹងថា៖នាង សុខ ស្រីអន បានរៀបរាប់តាមបណ្តាញសង្គម facebook ថា «នាងខ្ញុំឈ្មោះ សុខ ស្រីអន មានម្ដាយបង្កើត និងឪពុកចុង រស់នៅក្នុងផ្ទះជាមួយគ្នា ដោយឪពុកចុង និងម្ដាយបង្កើតបានបង្ខំឲ្យនាងខ្ញុំរៀបការជាមួយបុរសម្នាក់ដែលខ្ញុំគិតថា មិនបានស្រឡាញ់ទាល់តែសោះ និងជាមនុស្សមានប្រវត្ដិកើតរោគាទៀតផង។ ក្រោយឪពុកចុងនិងម្ដាយបង្ខំឱ្យរៀបការនាងខ្ញុំប្រកែកមិនឈ្នះ ហើយពិធីអាពាហ៍ពិពាហ៍មួយបានកើតឡើងដោយបញ្ចប់ទៅវិញទាំងស្ថានភាពដ៏សោះកក្រោះ»។
ឪពុកចុង និងម្ដាយខ្ញុំប្រាប់ថា បើនាងខ្ញុំមិនយក(ប្តី)ទេ គឺគាត់នឹងសងបណ្ដាការគេច្រើនណាស់ដូច្នេះនាងខ្ញុំមានជម្រើសតែមួយគត់ គឺផ្ញើសារសុំកិច្ចអន្ដរាគមន៍ពីថ្នាក់ដឹកនាំ ពិសេសសម្ដេចពុក។ នៅក្នុងនោះ នាងបានបង្ហោះរូបដែលរងនូវអំពើហិង្សាពីសំណាក់បុរសជាឪពុកចុង ចូលទៅផេករបស់សម្ដេចពុក ដើម្បីសុំអន្តរាគមន៍ទៀតផង។ឃើញសារបែបនេះនៅថៃ្ងទី១៧ ខែមករា ឆ្នាំ២០២៣ កម្លាំងជំនាញបានបញ្ជាឱ្យកំម្លាំងនគរបាល នៃអធិការដ្ឋាននគរបាលស្រុកភ្នំស្រួច ចុះទៅកាន់ផ្ទះនារីរងគ្រោះ និងជួបជាមួយឪពុកចុង ម្ដាយបង្កើត រួមជាមួយអាជ្ញាធរមូលដ្ឋាន ដើម្បីស្ដាប់ការបកស្រាយ និងបំភ្លឺជុំវិញរឿងរ៉ាវដែលនាងស្រីអន បានបង្ហោះសារដ៏កម្សត់ និងស្នើសុំរកកិច្ចអន្ដរាគមន៍ឲ្យជួយនាងរួចផុតពីកណ្ដាប់ដៃបុរសជាប្ដីតាមអំណាចបង្ខំលោកឪពុកចុង និងម្ដាយបង្កើត ដែលបង្ខំឲ្យកូនយកប្ដីដែលខ្លួនមិនពេញចិត្ដ និងចាប់ចិត្ដស្រឡាញ់។
តែទីបំផុតរឿងរ៉ាវមិនដូចការពិតនោះទេ នាងស្រីអន បានទទួលស្គាល់ថា ប៉ុន្មានថៃ្ងនេះខ្លួនទើបនឹងរៀបការរួចបានចេញទៅផ្ទះខាងប្ដី ដើម្បីសែនព្រេនជីដូនជីតាខាងប្ដី និងបានវិលត្រឡប់មកដល់ផ្ទះនៅភូមិទី៦ ឃុំយាយម៉ៅពេជ្រនិល ស្រុកភ្នំស្រួច ហើយបានជម្រាបជូនសមត្ថកិច្ចថា ខ្លួនមិនមានបំណងប្ដឹងទៅឪពុកចុង និងម្ដាយបង្កើតទេ តែមានបំណងសុំឲ្យសមត្ថកិច្ចជួយឱ្យនាងបានលែងប្ដីដើម្បីទៅរស់នៅជាមួយអ្នកដែលរង់ចាំនាង។សមត្ថកិច្ចបានពន្យល់ និងណែនាំនាងស្រីអន ថាបញ្ហាបង្ហោះព័ត៌មានបែបនេះ ធ្វើឱ្យមហាជនមានការភ័យតក់ស្លុត និងកង្វល់ណាស់ ដូច្នេះនាងបានសុំទោសមកដល់សមត្ថកិច្ច និងមហាជនកុំឱ្យខឹងនាងមកពីនាងចង់បានចាកចេញទៅរកក្ដីសុខជាមួយមនុស្សដែលអាចផ្ដល់ក្ដីស្រឡាញ់ជូននាង៕