វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 9367 នាក់
ម្សិលមិញ 8227 នាក់
សរុប 14136248 នាក់
រុស្ស៊ីសហរដ្ឋអាម៉េរិក៖ រដ្ឋាភិបាលលោកចូបៃដិនកំពុងស្វះស្វែងរៀបចំបញ្ជូនប្រព័ន្ធការពារដែនអាកាស Patriot ដ៏ទំនើបគ្មានពីរនៅលើលោកទៅឱ្យប្រទេសអ៊ុយក្រែដើម្បីការពារខ្លួនពីការវាយប្រហារតាមផ្លូវអាកាសរបស់រុស្ស៊ីដែលកំពុងបន្ដកើតមានឡើងឥតឈប់ឈរសឹងជារៀងរាល់ថ្ងៃ។លោកប្រធានាធិបតីចូបៃដិនគ្រោងនឹងធើ្វសេចក្ដីប្រកាសជាសាធារណៈនៅចុងសប្តាហ៍នេះអំពីផែនការផ្តល់ជំនួយយោធាបន្ថែមរបស់ខ្លួនទៅឱ្យអ៊ុយក្រែន ស្របពេលដែលស្ថានភាពជនស៊ីវិលនៅក្នុងប្រទេសមួយនេះកំពុងជួបការលំបាកខ្លាំងដោយសារបញ្ហាកង្វះថាមពលអគ្គិសនីប្រើប្រាស់នារដូវរងា បន្ទាប់ពីទីតាំងស្ថានីយថាមពលជាច្រើនកន្លែងបានរងការបំផ្លិចបំផ្លាញដោយសារតែការវាយប្រហារដោយមីស៊ីលរបស់ទីក្រុងមូស្គូ ។
មិនទាន់ដឹងច្បាស់ថាតើរដ្ឋាភិបាលអាម៉េរិកគ្រោងនឹងបញ្ជូនប្រព័ន្ធការពារដែនអាកាស Patriot ប៉ុន្មានគ្រឿងទៅឱ្យអ៊ុយក្រែននៅឡើយទេ ដោយផែនការខាងលើនេះនឹងត្រូវរងចាំការចុះហត្ថលេខាឯកភាពពីខាងស្ថាប័នកំពូលៗដែលពាក់ព័ន្ធជាមុនសិន មុននឹងអាចចាប់ផ្តើមការដឹកជញ្ជូនឱ្យប្រទេសអ៊ុយក្រែនបាន។ឯកអគ្គរដ្ឋទូតរុស្ស៊ីប្រចាំនៅអាមេរិកបានបញ្ជាក់ថា រដ្ឋាភិបាលទីក្រុងមូស្គូបានព្រមានថា ការបញ្ជូនប្រព័ន្ធការពារដែនអាកាសដ៏ទំនើបរបស់អាមេរិក គឺមីស៊ីល Patriot ទៅឱ្យអ៊ុយក្រែនគឺជាសកម្មភាពឌឺដងរបស់រដ្ឋាភិបាលលោកបៃដិន អាចជំរុញឱ្យមានលទ្ធលអាក្រក់ ។វិមានក្រឹមឡាំង បានឱ្យដឹងថា ប្រព័ន្ធការពារមីស៉ីល ប៉ាទ្រីយ៉ូត (Patriot)នឹងក្លាយជាគោលដៅវាយប្រហារស្របច្បាប់នៃកងកម្លាំងរុស្ស៉ី ប្រសិនបើប្រព័ន្ធមីស៊ីលនេះត្រូវបានបញ្ជូនទៅឱ្យអ៊ុយក្រែន ដើម្បីស្ទាក់ចាប់មីស៊ីលរបស់ខ្លួនមែននោះ។អតីតប្រធានាធិបតីរុស្ស៊ី លោក ឌីមីទ្រី ម៉េដវ៉េដេវ (Dmitry Medvedev) កាលពីថ្ងៃពុធសប្តាហ៍នេះ បានព្រមានអង្គការណាតូ (NATO) ប្រឆាំងនឹងការផ្តល់ឱ្យទីក្រុងកៀវនូវប្រព័ន្ធការពារមីស៊ីល Patriot ខណៈដែលវិមានក្រឹមឡាំងនឹងចាត់ទុកសកម្មភាពនេះជាការបង្កហេតុ។
អ៊ុយក្រែនបាននិងកំពុងស្នើសុំឱ្យសម្ព័ន្ធមិត្តលោកខាងលិចរបស់ខ្លួន បង្កើនការផ្តល់ប្រព័ន្ធការពារដែនអាកាសដើម្បីទប់ទល់នឹងការវាយប្រហាររបស់រុស្ស៊ី ព្រមជាមួយនឹងការប្រកាសពីជោគជ័យនៃកងកម្លាំងរបស់ខ្លួនដែលបានបាញ់ទម្លាក់យន្តហោះដ្រូនរបស់រុស្ស៊ីចំនួន១៣គ្រឿង ដែលត្រូវបានបាញ់បង្ហោះឆ្ពោះទៅកាន់ទីក្រុងកៀវ កាលពីថ្ងៃពុធសប្តាហ៍នេះ។ប្រព័ន្ធការពារដែនអាកាស Patriot គឺជាគ្រឿងសព្វាវុធដ៏ទំនើបដែលត្រូវបានចូលរួមអភិវឌ្ឍន៍រួមគ្នារវាងក្រុមហ៊ុនបច្ចេកវិជ្ជាល្បីៗរបស់សហរដ្ឋអាម៉េរិក ដែលមានដូចជាក្រុម Raytheon, Hughes និង RCA ដែលសុទ្ធសឹងជាក្រុមហ៊ុនឯកទេសខាងផលិតប្រព័ន្ធមីស៊ីស រ៉ាដា និងផ្កាយរណប ក្រោមគម្រោងឧបត្ថម្ភរបស់រដ្ឋាភិបាលអាម៉េរិក។
សំណុំឧបករណ៍នៃប្រព័ន្ធការពារដែនអាកាស Patriot ត្រូវបានគេចែកចេញជា ៣ សំខាន់ៗដែលរួមមាន ប្រព័ន្ធរ៉ាដា ប្រព័ន្ធបញ្ហាគ្រប់គ្រង និងតួរថយន្តសម្រាប់ផ្ទុកគ្រាប់មីស៊ីល (Launcher) និងអាចមានសមត្ថភាពចាប់សញ្ញាបានចម្ងាយជាង ១៧០គីម៉ែត្រ និងអាចវាយប្រហារគោលដៅដោយផ្ទាល់បានចម្ងាយ ១៦០គីឡូម៉ែត្រចេញពីទីតាំងដែលបានដាក់ពង្រាយ។ ប្រព័ន្ធការពារដែនអាកាសប្រភេទនេះគឺមានប្រសិទ្ធភាពបំផុតក្នុងការបាញ់ទម្លាក់យន្តហោះចម្បាំង ដ្រូន រួមនិងគ្រាប់មីស៊ីល ប៉ុន្តែជាទូទៅប្រព័ន្ធគ្រាប់មីស៊ីលមួយនេះត្រូវបានគេប្រើសម្រាប់បាញ់កម្ទេចប្រភេទយន្តហោះចម្បាំងធំៗ និងគ្រាប់មីស៊ីលរំលងទ្វីបតែប៉ុណ្ណោះ ដោយសារតែគ្រាប់មីស៊ីលរបស់វាមានតម្លៃខ្ពស់ខ្លាំងរហូតដល់ជាង ២លានដុល្លារអាម៉េរិកនៅក្នុងមួយគ្រាប់។
ទាក់ទងនិងសង្គ្រាមដែលអូសបន្លាយនេះដែរកាលពីពេលថ្មីៗនេះដែរ មេបញ្ជាការកងទ័ពរុស្ស៊ីមួយរូបដែលកំពុងដឹកនាំការប្រយុទ្ធនៅក្នុងតំបន់ Donetsk ភាគខាងកើតប្រទេសអ៊ុយក្រែន ហាក់ដូចជាបានទទួលស្គាល់ការពិតនូវស្ថានភាពទល់ច្រកនាពេលបច្ចុប្បន្នរបស់ខ្លួននៅលើទីលានប្រយុទ្ធជាមួយនឹងកងកម្លាំងអ៊ុយក្រែន និងបានងាកមកជំរុញឱ្យរដ្ឋាភិបាលរុស្ស៊ីធើ្វការប្រើប្រាស់អាវុធនុយក្លេអ៊ែរកលកិច្ច(តាក់ទិក)ដើម្បីអាចយកឈ្នះនៅក្នុងសង្គ្រាមមួយនេះបាន។ថ្លែងតាមរយៈប្រព័ន្ធផ្សព្វផ្សាយក្នុងស្រុករបស់ប្រទេសរុស្ស៊ី មេបញ្ជាការយោធារុស្ស៊ីលោក Alexander Khodakovsky បានអះអាងបញ្ជាក់ទៅកាន់ពលរដ្ឋរុស្ស៊ីថា ការប្រើប្រាស់អាវុធនុយក្លេអ៊ែរកលកិច្ច (តាក់ទិក)គឺជាមធ្យោបាយសេសសល់តែមួយប៉ុណ្ណោះរបស់រុស្ស៊ីសម្រាប់យកឈ្នះសង្គ្រាមនៅក្នុងប្រទេសអ៊ុយក្រែននៅពេលនេះ ដោយលោកបានមើលឃើញនូវស្មារតីនិងសន្ទុះនៃការវាយប្រយុទ្ធរបស់សត្រូវទទួលបានការគាំទ្រផ្នែកយោធាពីក្រុមប្រទេសលោកខាងលិចយ៉ាងច្រើនសន្ធឹកសន្ធាប់នៅក្នុងទីសមរភូមិ បានបង្កការខូចខាតយ៉ាងសម្បើមចំពោះយោធារុស្ស៊ី រហូតសឹងតែមិនអាចមានលទ្ធភាពគ្រប់គ្រាន់ដើម្បីបន្ដបើកប្រតិបត្តិការយោធារបស់ខ្លួនបាននៅលើទឹកដីអ៊ុយក្រែន។ មេទ័ពរុស្ស៊ីខាងលើបានថ្លែងសង្កត់ធ្ងន់ថា លទ្ធភាពក្នុងការប្រើប្រាស់អាវុធនុយក្លេអ៊ែរទំនងជាមិនអាចគេចផុតនោះទេ ប្រសិនបើស្ថានភាពសង្គ្រាមមួយនេះកាន់តែអាក្រក់ឡើងៗនៅថ្ងៃខាងមុខនោះ ពោលគឺនៅពេលដែលក្រុមប្រទេសជាសមាជិកអង្គការណាតូបន្ដធើ្វសកម្មភាពណាដែលហួសទៅនិងដែនកំណត់របស់រុស្ស៊ីនៅក្នុងបញ្ហាជម្លោះដែលរកអ្នកឈ្នះ និងអ្នកចាញ់មិនឃើញនោះ។
ជាមួយនិងការអំពាវនាវឲ្យប្រើអាវុធនុយក្លែអែរនេះក្រសួងការពារជាតិរុស្ស៊ី និងប្រព័ន្ធផ្សព្វផ្សាយរបស់ប្រទេសនេះ បានចេញផ្សាយវីដេអូអំពីកងកម្លាំងរុស្ស៊ី ចូលទៅក្នុងលេណដ្ឋានបាញ់បង្ហោះ នៃអគារអាវុធបរាមណូ RS-24 Yars ដែលត្រូវបានគេស្គាល់ថាជា “កូនប្រុសរបស់ មេបិសាចសាតាំង”។កាសែត Komsomolskaya Pravda របស់រុស្ស៊ី បានឲ្យដឹងថាទីតាំងកាំជ្រួច Yars បច្ចុប្បន្នដាក់ពង្រាយនៅតំបន់ Kaluga មានទម្ងន់ដល់ទៅ ៤៦.០០០ តោន ចម្ងាយប្រតិបត្តិការរហូតដល់ ១២.០០០ គីឡូម៉ែត្រ អាចទៅដល់ដីគោកអាមេរិក ឬប្រទេសណាមួយក្នុងតំបន់ណាមួយក្នុង អឺរ៉ុប។កាំជ្រួចនេះមានកម្លាំងបំផ្លាញរហូតដល់ ៥០០ គីឡូតោន ដែលមានកម្លាំងខ្លាំងជាងគ្រាប់បែកបរមាណូរបស់អាមេរិក ១២ ដង ដែលបានទម្លាក់លើទីក្រុង ហ៊ីរ៉ូស៊ីម៉ា របស់ប្រទេសជប៉ុន កាលពីថ្ងៃទី ៦ ខែសីហា ឆ្នាំ ១៩៤៥ ។ក្រសួងការពារជាតិរុស្ស៊ីបាននិយាយកាលពីថ្ងៃទី ១៤ ខែធ្នូថាកងកម្លាំងរុស្ស៊ីបានប្រើប្រាស់ការដឹកជញ្ជូនពិសេសដើម្បីដាក់ពង្រាយកាំជ្រួចនៅទីតាំងបាញ់។ ការងារនេះចំណាយពេលពីរបីម៉ោង។ ប្រតិបត្តិការនេះបានធ្វើឡើងមុនថ្ងៃទិវាកងកម្លាំងមីស៊ីលយុទ្ធសាស្ត្ររបស់រុស្ស៊ី (១៧ ធ្នូ)។“សារៈសំខាន់នៃប្រតិបត្តិការនេះ គឺស្ថិតនៅត្រង់ថា កាំជ្រួចនេះនឹងត្រៀមរួចរាល់ ដើម្បីប្រើប្រាស់សម្រាប់បេសកកម្មប្រយុទ្ធ ដូចដែលបានគ្រោងទុក។ លោក Alexei Sokolov មេបញ្ជាការបង្កើតកាំជ្រួចមីស៊ីល Kozelsky បាននិយាយថា ប្រទេសនេះនឹងទទួលបានគំរូថ្មីនៃអាវុធបរមាណូ ដែលនឹងជួយយើងដោះស្រាយកិច្ចការណាមួយក្នុងកម្រិតយុទ្ធសាស្ត្រ៕ប្រភព៖ Newsweek,BBC