វៀតណាមសម្រុកទិញស្រូវពីកម្ពុជាតាមច្រកព្រៃវល្ល៍តែឲ្យតម្លៃទាប!
11-March-2026 / សេដ្ឋកិច្ច
ខេត្តស្វាយរៀង ៖ ទូកឈ្មួញវៀតណាមរាប់សិបគ្រឿង បានសម្រុកចូលមកទិញស្រូវខ្មែរតាមផ្លូវទឹកនៅចំណុចប្រឡាយទាហានស្លាបប៉ុស្តិ៍ច្រកទ្វាព្រំដែនអន្តរជាតិព្រៃវល្ល៍ប៉ុន្តែកសិករនៅតែត្អូញត្អែថា ឈ្មួញអ្នកប្រមូលទិញស្រូវឲ្យតម្លៃទាប ត្រឹមតែ៨០០រៀល ទៅ៩៥០រៀលប៉ុណ្ណោះសម្រាប់ស្រូវចម្រុះ។ សមត្ថកិច្ចច្រកបានឲ្យដឹងថា គិតចាប់ពីពាក់កណ្តាលខែវិច្ឆិកា២០២២នេះ ឈ្មួញបាននាំស្រូវចេញទៅប្រទេសវៀតណាមគិតជាមធ្យមជាង៣០០តោន ទៅ៥០០តោនក្នុង១ថ្ងៃ ។
មន្ត្រីម្នាក់សុំមិនបញ្ចេញឈ្មោះព្រោះខ្លាចថ្នាក់លើរករឿងឲ្យដឹងដែរថា ឈ្មួញអ្នកប្រមូលទិញស្រូវពីប្រជាកសិករផ្ទាល់ ស្រូវចម្រុះ «ស្រូវ ខា ៥៤ ឬស្រូវស្រាលបាយរឹង» ស្រូវសើម ក្នុង១គីឡូ ក្រាម៨០០រៀល ទៅ៩៥០រៀល ។ បើដឹកមកដល់ចំណតទូក វៀតណាមទិញក្នុង១គីឡូក្រាម១,១០០រៀល ចំពោះស្រូវក្រអូប ទិញពីកសិករផ្ទាល់១គីឡូក្រាម១,០៥០ ទៅ១,១០០រៀល លក់ឲ្យឈ្មួញវៀតណាមតម្លៃ ១គីឡូក្រាមតម្លៃ១,២០០ទៅ១,៣០០រៀល។
បើតាមអាជីវករអ្នកប្រមូលទិញស្រូវពីកសិករផ្ទាល់វិញបានលើឡើងថា បញ្ហាពួកគេប្រមូលទិញស្រូវពីកសិករផ្ទាល់ឲ្យតម្លៃទាប ដោយចំណាយតាមផ្លូវច្រើន គិតថ្លៃឈ្នួលរថយន្តដឹក ថ្លៃកម្មករលើកដាក់រថយន្ត លើកចុះទូក និងបង់សេវាសមត្ថកិច្ចតាមផ្លូវនិងចំណតទូក ដូច្នេះ ត្រូវចំណាយច្រើន បើកសិករគាត់យកមកលក់ផ្ទាល់ដល់ចំណតទូកវៀតណាមទិញ ស្រូវចម្រុះ១គីឡូក្រាមតម្លៃ១,១០០រៀល ស្រូវក្រអូបស្ងួត១គីឡូតម្លៃ១,៣០០រៀល។
អាជីវករម្នាក់បានឲ្យដឹងថា គាត់ទិញស្រូវក្រអូប (ផ្កាម្លិះ) ពីខេត្តបន្ទាយមានជ័យ គឺត្រូវចំណាយលើសមត្ថកិច្ចតាមដងផ្លូវអស់ច្រើន ហើយអាជីវករវៀតណាមទិញ ស្រូវគេកាត់ក្នុងរថយន្ត១គ្រឿង១០០គីឡូក្រាមស្រូវសើម (រថយន្ត១គ្រឿង២០តោនទៅ២៥តោន) ។ប្រភពពីមន្ត្រីសមត្ថកិច្ចឈជើងនៅច្រកទ្វារព្រំដែនទឹកព្រៃវល្លិ៍ប្រាប់ថា ចាប់ពីពាក់កណ្តាលខែវិច្ឆកា២០២២នេះ ក្នុង១ថ្ងៃឈ្មួញនាំស្រូវទៅប្រទេសវៀតក្នុង១ថ្ងៃ៣០០តោនទៅ៥០០តោន ។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដាក់ចេញផែនការជាបន្តបន្ទាប់ ដើម្បីដោះស្រាយវិបត្តិផ្សេងៗ ចំពោះមុខ ដែលកំពុងកើតឡើង នៅក្នុងវិស័យកសិកម្ម។ ជាក់ស្តែង នាពេលថ្មីៗនេះ បញ្ហាដែលកើតឡើងគឺការធ្លាក់ចុះតម្លៃស្រូវនៅខេត្តបាត់ដំបង និងបន្ទាយមានជ័យ។ប៉ុន្តែបញ្ហានេះ ត្រូវបានដោះស្រាយរួចហើយ ដោយលោក ឌិត ទីណា បានបញ្ជាឱ្យក្រុមការងារចុះត្រួតពិនិត្យ និងសហការជាមួយរោងម៉ាស៊ីនកិនស្រូវ ជួយទិញស្រូវកសិករ ក្នុងតម្លៃមួយសមរម្យ ដែលអាចទទួលយកបាន។
ដើម្បីរក្សាតម្លៃស្រូវលោករដ្ឋមន្ត្រីបានបន្តថា« មធ្យោបាយ គឺការកែទម្រង់របៀបធ្វើកសិកម្មទាំងមូល ទាំងកសិករ ទាំងឈ្មួញកណ្តាល ទាំងអ្នកលក់ ទាំងអ្នកទិញ ទាំងមន្ត្រីកសិកម្ម ត្រូវធ្វើការួមគ្នា ទើបអាចជំនះបញ្ហាកាត់បន្ថយថ្លៃដើម និងបង្កើនផលចំណេញបានដល់គ្រប់គ្នា ក្នុងច្រវាក់ផលិតកម្មបាន»។លោក ឌិត ទីណា សង្កត់ធ្ងន់ថា «ខ្ញុំត្រូវការពេលមួយរួមផ្សំនឹងការកែប្រែឥរិយាបទរបស់អ្នកទាំងអស់គ្នា ទើបអាចសម្រេចកំណែទម្រង់ដ៏ធំនេះបាន»។ លោក លើកឡើងបែបនេះ ឆ្លើយតបនឹងខមិនរបស់ពលរដ្ឋ នៅលើបណ្តាញសង្គម អំពីបញ្ហាខ្វះទីផ្សារស្រូវដែលកំពុងកើតឡើង។
សម្រាប់ជួយរក្សាតម្លៃស្រូវពេលរដូវប្រមូលទិញស្រូវនេះរាជ រាជរដ្ឋាភិបាល បានសម្រេចផ្តល់ថវិកាបន្ថែមចំនួន ១០លានដុល្លារ លើមូលនិធិសម្រាប់ទិញស្រូវចំនួន ៨៣លានដុល្លារ តាមរយៈធនាគារអភិវឌ្ឍន៍បទ និងកសិកម្ម សម្រាប់គាំទ្រដល់រោងម៉ាស៊ីនកិនស្រូវ និងក្រុមហ៊ុនកែច្នៃនាំចេញអង្ករ ជួយប្រមូលទិញស្រូវពីកសិករតាមតម្លៃសមស្របជៀសវាងការទិញទម្លាក់ថ្លៃពីឈ្មួញខិលខូចមួយចំនួន។
