សម្ដេចតេជោ ហ៊ុន សែន វិលត្រឡប់មកដល់មាតុភូមិ ប្រកបដោយសុវត្ថិភាពនិងថ្លែងអំណរគុណដល់ការជូនពរប្រតិភូអមគ្មានបញ្ហា
16-November-2025 / សុខភាពនិងកីឡា
ភ្នំពេញ៖ នៅវេលាម៉ោងប្រមាណ៧យប់ថ្ងៃទី១៥ ខែវិច្ឆិកា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ានប្តូវេនឆ្នាំ២០២២ បានដឹកនាំគណៈប្រតិភូអញ្ជើញត្រឡប់ពីប្រទេសឥណ្ឌូណេស៊ិមកដល់មាតុភូមិវិញហើយ ដោយសារតែការរកឃើញវិជ្ជមានជំងឺកូវីដ១៩ ។
សម្តេចតេជោ ហ៊ុន សែន បានដឹកនាំគណៈប្រតិភូជាមន្ត្រីជាន់ខ្ពស់របស់រាជរដ្ឋាភិបាលកម្ពុជា ហោះទៅកាន់កោះបាលី ប្រទេសឥណ្ឌូនេស៊ី កាលពីថ្ងៃទី១៤ ខែវិច្ឆិកា ម្សិលមិញនេះ ដើម្បីចូលរួមកិច្ចប្រជុំកំពូលG20 ដែលគ្រោងធ្វើឡើងពីថ្ងៃទី១៥ ដល់ថ្ងៃទី១៦ ខែវិច្ឆិកា។ តាមការគ្រោងទុកសម្តេចតេជោ និងគណៈប្រតិភូ នឹងត្រូវហោះទៅកាន់ប្រទេសថៃ ដើម្បីចូលរួមកិច្ចសន្ទនាក្រៅផ្លូវរបស់មេដឹកនាំប្រទេស APEC ពីថ្ងៃទី១៧ ដល់ ១៨ ខែវិច្ឆិកា។តែការចូលរួមក្នុងកម្មវិធីទាំងពីរត្រូវបានខកខានទៅវិញ បន្ទាប់ពីសម្តេចតេជោ ហ៊ុន សែន ត្រូវបានរកឃើញជំងឺកូវីដ១៩ ពេលអញ្ជើញទៅដល់ប្រទេសឥណ្ឌូនេស៊ី។
ពេលមកដលប្រទេសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅយប់ថ្ងៃទី១៥ ខែវិច្ឆិកា ឆ្នាំ២០២២នេះ បានផ្ញើសារជាសម្លេងជូនប្រជាពលរដ្ឋដោយបញ្ជាក់អំពីស្ថានភាពសុខភាពរបស់សម្តេច ។
សម្ដចតេជោ ហ៊ុន សែន បានគូសបញ្ជាក់ថា បញ្ហាជំងឹកូវីដ១៩ គឺជារឿងតូចតាចនោះទេសម្រាប់សម្ដេច ប៉ុន្ដែអ្វីដែលសម្ដេចមានកង្វល់ធំជាងគេ តើមេដឹកនាំដែលចេញពីប្រទេសកម្ពុជា ទៅចូលរួមប្រជុំនៅប្រទេសឥណ្ឌូនេស៉ី និងការវិលត្រឡប់ទៅកាន់ប្រទេសរៀងៗខ្លួនវិញ មានវិជ្ជមានកូវីដឬអត់ ដែលនេះទើបជាបញ្ហាកង្វល់ធំរបស់សម្ដេច។
សម្ដេចតេជោ ហ៊ុន សែន បានអះអាងទៀតថា មេដឹកនាំបណ្ដាប្រទេសដែលប្រជុំនៅកោះបាលី ប្រទេសឥណ្ឌូនេស៉ី ក្នុងកិច្ចប្រជុំ G20 នោះ គឺភាគច្រើនស្ទើទាំងអស់ចេញពីកម្ពុជាទៅ ក្នុងនោះប្រធានាធិបតីឥណ្ឌូនេស៉ី ជាប្រធានអាស៊ានបន្ដវេនពីសម្ដេចនោះ គឺនៅជាប់ជាមួយសម្ដេចជានិច្ច។ ក្រៅពីនោះមានមេដឹកនាំមួយចំនួនទៀត ក៏នៅជាប់គ្នា ចាប់ដៃគ្នា ហើយធ្វើដំណើរជាមួយទៀត រាប់ទាំងលោក ចូ បៃឌិន ប្រធានាធិបតីសហរដ្ឋអាមេរិក ដែលអង្គុយទទួលទានអាហារជាប់សម្ដេចថា «កង្វល់ធំរបស់ខ្ញុំព្រះករុណាខ្ញុំ គឺសុខាភាពរបស់មេដឹកនាំបណ្ដាប្រទេស និងអង្គការអន្ដរជាតិនានា ដែលបានមកប្រជុំនៅប្រទេសកម្ពុជា ថាតើពួកគាត់មានឆ្លងកូវីដ១៩ ឬអត់? ប៉ុន្ដែឆ្លងកាត់ការស្រាវជ្រាវអ្នកដែលចូលរួមប្រជុំនៅប្រទេសឥណ្ឌូនេស៉ី និងអ្នកដែលត្រឡប់ទៅប្រទេសវិញ ពុំឃើញមាន ថ្នាក់ដឹកនាំរូបណាមួយ ដែលមានកូវីដឆ្លងចេញពីកម្ពុជានោះទេ»។
សម្ដេចតេជោនាយករដ្ឋមន្ដ្រី យល់ឃើញថា អ្វីដែលឆ្លងសម្រាប់សម្ដេចនៅពេលនេះ ប្រហែលស្ថិតនៅពេលវេលាដែលសម្ដេចហត់នឿយខ្លាំងបំផុត ក្នុងរយៈពេលចុងក្រោយនេះ ពោលមួយសប្ដាហ៍ចុងក្រោយ ដែលសម្ដេចក្នុងមួយថ្ងៃធ្វើការក្នុងរង្វង់១៥ម៉ោង ដូច្នេះការហត់នឿយរបស់សម្ដេច គឺជាមូលហេតុក្នុងការវាយលុកនៃជំងឹកូវីដ១៩។
បើតាមប្រសាសន៍របស់សម្ដេចតេជោ ហ៊ុន សែន, មកដល់ពេលនេះ អាការៈរបស់សម្ដេច គឺធម្មតាទាំងអស់មិនមានអ្វីខុសប្លែកនោះទេ ពោលសូម្បីតែទទួលទានក៏បានធម្មតា ការសម្រាកក៏ធម្មតា។ សម្ដេចបញ្ជាក់ទៀតថា សម្ដេចនឹងធ្វើការងារពីផ្ទះ លើកលែងតែការទទួលភ្ញៀវប៉ុណ្ណោះ ដែលត្រូវអាក់ខាន។សម្តេចតេជោ បានមានប្រសាសន៍ទៀតថា «ពិតណាស់ គ្មាននរណាមានបំណង ដើម្បីឱ្យខ្ញុំព្រះករុណាខ្ញុំ មិនមានវត្តមាននៅក្នុងកិច្ចប្រជុំG20 នៅឥណ្ឌូនេស៊ី និងកិច្ចប្រជុំ APEC នៅប្រទេសថៃ។ ខ្ញុំសូមឱ្យបំបាត់ចោលនូវការភ័ន្តច្រឡំ និងការវិភាគណា ដែលនាំទៅដល់ការយល់ច្រឡំ។ ប្រធាន G20 គឺប្រទេសឥណ្ឌូនេស៊ី ចង់ណាស់មានវត្តមានរបស់សម្តេចជាប្រធានអាស៊ាន ហើយថៃដែលជាម្ចាស់ផ្ទះកិច្ចប្រជុំ APEC ពិតជាចង់ណាស់ ឱ្យសម្តេចមានវត្តមាន»។
សម្ដេចតេជោ ហ៊ុន សែន ក៏ថ្វាយនូវការថ្លែងអំណរគុណចំពោះព្រះមហាក្សត្រ និងហ្លូងម៉ែ ដែលប្រទាននូវព្រះរាជសារ ប្រទានពរចំពោះសម្ដេច ដើម្បីឆាប់ជាសះស្បើយ ហើយក៏ថ្លែងអំណរគុណចំពោះព្រះតេជគុណព្រះសង្ឃគ្រប់ព្រះអង្គ ថ្នាក់ដឹកនាំ ប្រជាពលរដ្ឋដែលបានព្រួយបារម្ភពីសុខភាពរបស់សម្ដេច។ក្នុងវេទិកាទាំងពីរខាងលើនេះ ជាឱកាសដ៏ល្អមួយសម្រាប់សម្តេចតេជោ និងគណៈប្រតិភូ ស្វះស្វែងរកឱកាសវិនិយោគនានា ដើម្បីជួយជំរុញកំណើនសេដ្ឋកិច្ចជាតិ និងការលើកកម្ពស់ជីវភាពប្រជាពលរដ្ឋ។ កាន់តែពិសេសនោះ ក្នុងដំណើរអញ្ជើញទៅកាន់ប្រទេសថៃ សម្តេចតេជោ ហ៊ុន សែន នឹងត្រូវជួបទ្វេភាគីជាមួយប្រធានាធិបតីចិន លោក ស៊ី ជិនពីង និងលោក ម៉ាក្រុង ប្រធានាធិបតីបារាំង។
ឱកាសនៃជំនួបទាំងពីរខាងលើនេះ គឺសំខាន់ណាស់សម្រាប់សម្តេចតេជោ ហ៊ុន សែន ក្នុងការពង្រីកពង្រឹងទំនាក់ទំនង និងកិច្ចសហប្រតិបត្តិការសម្រាប់ជាឧត្តមប្រយោជន៍ជាតិ និងប្រជាជនកម្ពុជា។ទាក់ទងនិងប្រតិភូអមដំណើរលោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានប្រាប់កាសែត ថា គណៈប្រតិភូអមដំណើរសម្តេចតេជោ ហ៊ុន សែន នាយករដ្ឋមន្ត្រីកម្ពុជា សរុបជាង ៤០នាក់ បន្ទាប់ពីធ្វើតេស្តរហ័សមិនមានអ្នកវិជ្ជមានកូវីដ១៩នោះទេ។បើទោះបីយ៉ាងណា ដើម្បីធានាឱ្យលទ្ធផលកាន់តែប្រាកដនោះ សំណាករបស់គណៈប្រតិភូទាំងអស់ ត្រូវបានយកទៅពិនិត្យជាមួយម៉ាស៊ីន PCR បន្ថែមទៀត។ លទ្ធផលយ៉ាងណានោះ លោកស្រី យក់ សម្បត្តិ នឹងផ្តល់ព័ត៌មានជាបន្តទៀត។ លោកស្រី យក់ សម្បត្តិ បានគូសបញ្ជាក់ថា គណៈប្រតិភូអាចនឹងមិនមានការឆ្លងពីសម្តេចនោះទេ ដោយសារប្រព័ន្ធភាពស៊ាំក្នុងរាងកាយរបស់មន្ត្រីជាគណៈប្រតិភូមានភាពរឹងមាំ ព្រោះពួកគាត់សុទ្ធតែបានចាក់វ៉ាក់សាំងបង្ការជំងឺកូវីដ១៩ ចាប់ពី ៥ដូសឡើង។
