រង្ស៊ីអ្នកនយោបាយជាប់គុកមួយជិវិតបន្ទាប់ពីមានការថ្កោលទោសមួយនគរនៅក្នុងស្រុក
ភ្នំពេញ៖តុលាការសាលដំបូងរាជធានីភ្នំពេញបានប្រកាសសម្រេចកាត់ទោសឱ្យលោក សម រង្ស៊ី ជាប់ពន្ធនាគារអស់មួយជីវិត និងដកសិទ្ធិធ្វើនយោបាយជាស្ថាពរ ក្រោមបទចោទ «ប្រគល់ឱ្យរដ្ឋបរទេស» ពាក់ព័ន្ធនឹងករណីដែលលោកចុះហត្ថលេខាលើកិច្ចព្រមព្រៀងកាត់ទឹកដីកម្ពុជាចំនួន៤ខេត្ត ឱ្យជនជាតិដើមភាគតិចម៉ុងតាញ៉ាដើម្បីរស់នៅ។តុលាការបានបើកសវនាការជំនុំជម្រះសំណុំរឿង «ប្រគល់ឱ្យរដ្ឋបរទេស» កាលពីថ្ងៃទី១១ ខែសីហា ឆ្នាំ២០២២ ដែលមានជនជាប់ចោទ លោក សម រង្ស៊ី សហស្ថាបនិកគណបក្សសង្គ្រោះជាតិដែលត្រូវបានតុលាការរំលាយ។
ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក ស៊ិន សុវណ្ណរ័ត្ន នៅថ្ងៃពុធនេះ បានប្រកាសសាលក្រមផ្ដន្ទាទោសឱ្យលោក សម រង្ស៊ី ជាប់ពន្ធនាគារអស់មួយជីវិត និងដកសិទ្ធិធ្វើនយោបាយជាស្ថាពរ។ ក្រៅពីដកសិទ្ធិធ្វើនយោបាយហើយ តុលាការក៏បានចេញដីកាបង្គាប់ឱ្យចាប់ខ្លួនលោក សម រង្ស៊ី ហើយចាត់ទុកការប្រកាសសាលក្រមនេះនៅចំពោះមុខជនជាប់ចោទ។ទោះជាយ៉ាងណា តុលាការក៏បានបើកសិទ្ធិឱ្យ លោក សម រង្ស៉ី ប្តឹងតវ៉ាទៅកាន់សាលាឧទ្ធរណ៍ផងដែរ ប្រសិនបើមិនពេញចិត្តនឹងការសម្រេចនេះ។ការប្រកាសសាលក្រមនេះបានធ្វើឡើងក្រោយពីមានការចេញញត្តិចេញទូទាំងប្រទេសគាំទ្រសម្តេចតេជោហ៊ុនសែនហៅលោកសមរង្ស៊ីថាជាជនក្បត់បីជំនាន់ហើយប្រកាសប្រឆាំងរហូត។ការប្រកាសរបស់សម្តេចតេជោបានថ្វើឡើងតបនិងសេចក្តីថ្លែងការណ៍លោក សម រង្ស៉ី អតីតប្រធានគណបក្សសង្គ្រោះជាតិ ដែលកំពុងរត់គេចខ្លួនទៅក្រៅប្រទេស តាមបណ្តាញសង្គមថានឹងវិលចូលស្រុកវិញព្រមទាំងអំពាវនាវកុំឲ្យកម្លាំងប្រដាប់អាវុធបាញ់ប្រជាពលរដ្ឋ។
មេធាវីការពារក្ដីឱ្យលោក សម រង្ស៊ី គឺលោក យុង ផានិត បញ្ជាក់ថា ការសម្រេចរបស់ចៅក្រម ដោយសម្អាងទៅបទចោទប្រកាន់ និងកិច្ចព្រមព្រៀងដែលកូនក្ដីរបស់លោកចុះជាមួយលោក កុក ស នៅសហរដ្ឋអាមេរិក កាលពីថ្ងៃទី១៤ ខែមេសា ឆ្នាំ២០១៣។លោក យុង ផានិត ថ្លែងថា៖ «បទចោទហ្នឹង គេដាក់ទណ្ឌកម្មអស់មួយជីវិត។ ជុំវិញរឿងនេះ ខ្ញុំបានលើកនៅក្នុងសេចក្ដីសន្និដ្ឋានហើយ វាអត់មានភស្ដុតាងគ្រប់គ្រាន់»។ខេត្តកម្ពុជាចំនួន៤ ដែលលោកសម រង្ស៊ី ប៉ុនប៉ងកាត់ទៅឱ្យជនជាតិភាគតិចវៀតណាមនេះ រួមមាន៖ ខេត្តរតនគិរី មណ្ឌលគីរី ស្ទឹងត្រែង និងខេត្តក្រចេះ ជាដើម។
សម្រាប់ លោក សម រង្ស៊ី មិនមែនទើបតែត្រូវបានតុលាការកាត់ទោសឱ្យជាប់ពន្ធនាគារតែសំណុំរឿង «ប្រគល់ឱ្យរដ្ឋបរទេស» នេះទេ លោកក៏ត្រូវបានចៅក្រមសាលាដំបូងរាជធានីភ្នំពេញ ផ្តន្ទាទោសឱ្យជាប់ពន្ធនាគារ១០ឆ្នាំ ពីបទ រួមគំនិតក្បត់ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់យោធាមិនឱ្យស្តាប់បង្គាប់ ដែលផ្តើមចេញពីការប៉ុនប៉ងវិលត្រលប់ចូលប្រទេសកម្ពុជាកាលពីឆ្នាំ២០១៩ និងការបង្កើតចលនាសង្គ្រោះជាតិ (CNRM) បន្ទាប់ពីការរំលាយគណបក្សសង្គ្រោះជាតិ កាលពីឆ្នាំ២០១៧។
កាលពីដើមខែមីនា ឆ្នាំ២០២១ លោក សម រង្ស៊ី ក៏ត្រូវបានតុលាការសម្រេចផ្តន្ទាទោសឱ្យជាប់ពន្ធនាគារ២៥ឆ្នាំ ពីបទ «ឧបឃាត» ជុំវិញការជាប់ពាក់ព័ន្ធនឹងប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាល ក្នុងគម្រោងវិលចូលប្រទេសកម្ពុជាវិញកាលពីថ្ងៃទី៩ ខែវិច្ឆិកា ឆ្នាំ២០១៩ រួមនឹងបទល្មើសមួយចំនួនទៀតផងដែរ។បច្ចុប្បន្ន តុលាការក៏កំពុងដំណើរការសវនាការលើសំណុំរឿងរបស់លោក សម រង្ស៊ី និងថ្នាក់ដឹកនាំ រួមទាំងសកម្មជនគណបក្សសង្គ្រោះជាតិដែលតុលាការបានរំលាយ សរុបចំនួន៣៩រូប ពាក់ព័ន្ធនឹងបទ «រួមគំនិតក្បត់» ផងដែរ៕
