២០២៣កម្មករឡើងប្រាក់ខែ២០០ដុល្លាររដ្ឋមន្ត្រីការងារអំពាវនាវ កុំឲ្យមានការដំឡើងថ្លៃទំនិញ និងផ្ទះជួល
06-June-2026 / សេដ្ឋកិច្ច
ភ្នំពេញ៖ នៅព្រឹកថ្ងៃទី ២១ ខែកញ្ញាបន្ទាប់ពីបញ្ចប់កិច្ចប្រជុំក្រុមប្រឹក្សាប្រាក់ឈ្នួលអប្បបរមា ដោយសម្រេចដំឡើងប្រាក់ឈ្មួលកម្មករ-និយោជិតផ្នែកវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ ២០២៣ ដល់ ២០០ដុល្លារអាមេរិកក្នុងមួយខែ ដែលនឹងចាប់ផ្តើមអនុវត្ត ចាប់ពីខែមករា ឆ្នាំ ២០២៣លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្មួលអប្បបរមា បានអំពាវនាវកុំឲ្យមានការដំឡើងថ្លៃទំនិញ ម្ហូបអាហារ និងផ្ទះជួល ដើម្បីចូលរួមលើកស្ទួយដល់ជីវភាពកម្មករ-និយោជិត និងរក្សាផលប្រយោជន៍បានយូរអង្វែង។
លោករដ្ឋមន្ត្រី «ខ្ញុំសូមយកឱកាសនេះ អំពាវនាវដល់អ្នកលក់ម្ហូបអាហារ នៅតំបន់រោងចក្រ និងម្ចាស់ផ្ទះជួលសូមកុំដំឡើងថ្លៃសូមលក់ និងជួលក្នុងតម្លៃដដែល កុំឃើញប្រាក់ឈ្មួលឡើងនាំគ្នាឡើង ដែលអាហ្នឹងវាមិនសមស្របទេ អីចឹងការរក្សាតម្លៃនៅដដែលវាជាការធានា សម្រាប់ផលប្រយោជន៍ទាំងអស់គ្នា»។ លោកថា ដូច្នេះមានន័យថា កម្មករ-និយោជិត ក៏នៅបង់ថ្លែឈ្នួលផ្ទះនៅឆ្នាំនេះ ហើយលុះដល់ឆ្នាំក្រោយពួកគាត់មានប្រាក់ចំណូលខ្ពស់ នៅតែបង់បន្តហើយម្ចាស់ផ្ទះជួល ទទួលបានប្រាក់ចំណូលដដែល។
លោកបណ្ឌិត អ៊ិត សំហេង បានបញ្ជាក់ថា ចាប់ពីខែមករា ឆ្នាំ ២០២៣តទៅ ប្រាក់ឈ្មួលកម្មករ-និយោជិត ត្រូវបានដំឡើងចំនួន ១៩៨ដុល្លារ។ ប៉ុន្តែសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជួយឧបត្ថម្ភបន្ថែមចំនួន ២ ដុល្លារបន្ថែមទៀត។ ហេតុនេះជារួមប្រាក់ឈ្នួលរបស់កម្មករ-និយោជិត គឺចំនួន ២០០ដុល្លារ លើសប្រាក់ឈ្មួលឆ្នាំ ២០២២នេះ ចំនួន ៦ដុល្លារ។ បើបូកនឹងប្រាក់អត្ថប្រយោជន៍ផ្សេងៗទៀត ដូចជា៖ ប្រាក់សោហ៊ុយធ្វើដំណើរ និងស្នាក់នៅចំនួន ៧ដុល្លារអាមេរិកក្នុងមួយខែ ប្រាក់រង្វាន់ធ្វើការទៀងទាត់ចំនួន ១០ដុល្លារអាមេរិកក្នុងមួយខែ ប្រាក់ថ្លៃបាយសម្រាប់ការធ្វើការងារបន្ថែមម៉ោង ដោយស្ម័គ្រចិត្តចំនួន ២,០០០រៀលក្នុងមួយថ្ងៃ ឬការទទួលបានបាយមួយពេលដោយឥតគិតថ្លៃ និងប្រាក់រង្វាន់អតីតភាពការងារចាប់ពី ២ទៅ ១១ដុល្លារអាមេរិកក្នុងមួយខែ សម្រាប់កម្មករនិយោជិត ដែលបានធ្វើការចាប់ពីឆ្នាំទី ២ដល់ឆ្នាំទី ១១។ ដូចនេះ ជាមធ្យមកម្មករនិយោជិតម្នាក់ៗ នឹងទទួលបានប្រាក់បៀវត្សយ៉ាងតិចចំនួនពី ២១៧-២៣២ដុល្លារអាមេរិក ក្នុងមួយខែ។
ទោះជាយ៉ាងណាកម្មកររោងចក្រម្នាក់ឈ្មោះ ឈឹម សារិទ្ធ ប្រាប់កាសែតថា ការដំឡើងប្រាក់ឈ្នួលគោលឱ្យកម្មករត្រឹម៦ដុល្លារនេះ គឺមិនជួយសម្រួលឱ្យកម្មកររស់នៅបានសមរម្យនោះទេ ប្រសិនបើទំនិញនៅលើទីផ្សារហក់ឡើងថ្លៃខ្ពស់ និងបន្ទប់ជួលឡើងថ្លៃដែរនោះ។គាត់ថា បច្ចុប្បន្ន ទំនិញនៅលើទីផ្សារសឹងគ្រប់មុខ រួមទាំងប្រេងសាំងផង បានហក់ឡើងថ្លៃខ្ពស់។ លោកថា ត្រឹមរូបលោកម្នាក់ឯងរស់នៅរាជធានីភ្នំពេញ ត្រូវចំណាយប្រហែល៥០ម៉ឺនរៀល (ប្រហាក់ប្រហែល១២៥ដុល្លារ) ក្នុង១ខែ និងត្រូវចំណាយឱ្យកូនរៀន ឪពុកម្តាយចាស់ជរាចាយវាយនៅស្រុកកំណើត រួមទាំងថ្លៃមើលជំងឺផ្សេងៗផង សរុបជាង៣០០ដុល្លារក្នុង១ខែ។
លោកបន្ថែមថា៖ «ប្រសិនបើទំនិញទីផ្សារនិងផ្ទះជួលនៅតែឡើងថ្លៃទេ គឺកម្មករនៅតែជួបការលំបាកដដែលហ្នឹង។ ឧទារហ៍ថា បើបន្ទប់ជួល គាត់ឡើងថ្លៃ៥ដុល្លារទៀត អ៊ីចឹងគាត់នៅសល់១ដុល្លារហ្នឹង ចុះគាត់ត្រូវការចំណាយផ្សេងៗទៀត? បើសម្រាប់ខ្ញុំ ខ្ញុំចាយម្នាក់ឯងប្រហែល៥០ម៉ឺនរៀលហើយហ្នឹង ហើយខ្ញុំនៅសល់លុយតិចតួចទុកឱ្យកូនរៀន កូនឈឺទៅពេទ្យទៅ គឺវាអត់សល់! វាត្រូវឱ្យយើងចាយក្បិតក្បៀតបំផុត។ អ៊ីចឹងក្នុងមួយខែ បើចង់ឱ្យគ្រប់គ្រាន់ ទាលល់តែ៣៥០ដុល្លារ»។
