ក្រុមបាតុករជាតិស្រីលង្កានៅតែបន្តតាមលងបន្លាចអតីតប្រធានាធិបតីបន្ទាប់ពីធ្វើមាតុភូមិនិវត្តន៍ដល់ក្រុងកូឡុំបូ
21-May-2025 / ព័ត៌មានអន្តរជាតិ
ស្រីលង្កា៖ បន្ទាប់ពីការវិលត្រឡប់ពីការវិលចូលស្រុកមិនទាន់បាន២៤ម៉ោងផង អតីតប្រធានាធិបតីស្រីលង្ការលោក ហ្គោតា បាយ៉ា រាចាប៉ាក់សា(Gotabaya Rajapaksa) ដែលរត់គេចពីចលនាប្រជាពលរដ្ឋកំពុងតែប្រឈមមុខទៅនឹងចលនាថ្មីមួយឈុតទៀតពោលគឺ មានការជួបជុំរបស់ក្រុមបាតុករដែលតែងតែលងបន្លាចរូបលោកតាំងតែពីនៅក្នុងស្រុក រហូតដល់រត់ចេញក្រៅស្រុក ដោយពួកគេទទូចឱ្យមានការចាប់ខ្លួនលោក ហ្គោតាបាយ៉ា រាជបសេ បើទោះបីជាមានកិច្ចការពារពីសំណាក់រដ្ឋាភិបាលបច្ចុប្បន្នដែលជាគ្នីគ្នារបស់លោកយ៉ាងណាក៏ដោយ។
លោករាជប៉ាក់សា បានភៀសខ្លួនរកព្រះអាយុចេញពីប្រទេសក្រោមកិច្ចការពារពីសំណាក់កងយោធាកាលពីខែកក្កដា បន្ទាប់មហាជនមានភាពទោមនស្ស ហើយសម្រុកចូលទៅនិវេសនដ្ឋានផ្លូវការរបស់លោក ដែលកាលណោះអំពាវនាវសូមឱ្យលោកចុះចេញពីតំណែងដោយសារតែអសមត្ថភាព និងបក្សពួកនិយមហួសប្រមាណនៅក្នុងរដ្ឋបាលរបស់លោកបានធ្វើឱ្យសេដ្ឋកិច្ចជាតិដួលដាច់ផ្ងារលុងលុះឥឡូវ ដែលមិនទាន់រកច្រកចេញបាននៅឡើយទេ។ប្រព័ន្ធផ្សព្វផ្សាយក្នុងស្រុកបានរាយការណ៍ថាអតីតមេដឹកនាំអាយុ៧៣ឆ្នាំបានចុះចតនៅទីក្រុងកូឡុំបូតាមជើងហោះហើររបស់ Singapore Airlines ពីប្រទេសថៃ។
លោកRajapaksaបានចាកចេញពីប្រទេសស្រីលង្កាតាមយន្តហោះយោធាកាលពីពាក់កណ្តាលខែកក្កដា បន្ទាប់ពីហ្វូងបាតុករបានសម្រុកចូលការិយាល័យប្រធានាធិបតីហើយឡោមព័ទ្ធគេហដ្ឋានរបស់លោក។ មេដឹកនាំបានមកដល់ម៉ាល់ឌីវនៅថ្ងៃទី០៩ខែកក្កដាដោយបន្តឆ្លងកាត់ប្រទេសសិង្ហបុរីហើយបន្ទាប់មកនៅក្នុងប្រទេសថៃក្នុងរយៈពេលប៉ុន្មានសប្តាហ៍ចុងក្រោយនេះតាមទិដ្ឋាការការទូត។មុននេះ លោក Rajapaksa បានដាក់ពាក្យលាលែងពីតំណែង ហើយត្រូវបានអនុម័តដោយសភាស្រីលង្កា។ ទោះជាយ៉ាងណាក៏ដោយ ការលាលែងពីតំណែងរបស់លោកមានន័យថាលោកRajapaksaលែងមានអភ័យឯកសិទ្ធិពីការកាត់ទោសហើយ។
ទីភ្នាក់ងារព័ត៌មានបារាំង(AFP) បានរាយការណ៍នៅរសៀលថ្ងៃអាទិត្យទី៤ កញ្ញា ដោយបានដកស្រង់សំដីមេហ្វូងធ្វើយុទ្ធនាការតវ៉ាដើម្បីផ្តួលរំលំរដ្ឋាភិបាលនិងតាមទទូចឱ្យចាប់ខ្លួនលោកហ្គោតាបាយ៉ា រាចាប៉ាក់សា បានឱ្យដឹងថា “លោកអតីតប្រធានាធិបតីរលាយអភ័យឯកសិទ្ធិអស់ហើយ គួរល្មមដល់ពេលសមរម្យអាចនាំគាត់ឆ្ពោះទៅកាន់តុលាការហើយ”។ អ្នកខ្លះបានបង្ហាញជាកំហឹងបុគ្គលប្រាប់ដល់បណ្តាញផ្សព្វផ្សាយថា “គាត់គួរតែត្រូវឃាត់ខ្លួនភ្លាមៗ បន្ទាប់ពីការនិវត្តមកវិញរបស់គាត់នៅកូឡុំបូ ដោយសារតែគាត់បង្កឱ្យមានភាពសោកសៅខ្លាំងដល់ពលរដ្ឋស្រីលង្កាប្រមាណជា ២២លាននាក់ មិនគួរឱ្យរស់នៅបែបហ៊ឹកហ៊ាក់ លាក់កំហុសប្រវត្តិសាស្ត្រនេះឡើយ”។
រហូតមកទល់នឹងរសៀលថ្ងៃអាទិត្យនេះ ពុំមានសេចក្តីរាយការណ៍ណាមួយអះអាងថា មានការចាប់ខ្លួនអតីតប្រធានាធិបតី ហ្គោតាបាយ៉ារ៉ាចាប៉ាក់សាពីរដ្ឋាភិបាលដែលជាគ្នារបស់លោកនៅឡើយទេ ខណៈក្រុមបាតុករនៅតែទទូចឱ្យមានការឃាត់យ៉ាងណាក្តី។គួររំលឹកផងដែរថា លោកហ្គោតាបាយ៉ា រាចាប៉ាកសាក៏នៅតែប្រឈមមុខទៅនឹងការចោទប្រកាន់ផងដែរ ពីតុលាការសហរដ្ឋអាម៉េរិកលើករណីមនុស្សឃាតដល់លោក ឡាសានដ្ឋៈ វីក្រេម៉ាតុងហ្គេ(Lasantha Wickrematunge)ជាអ្នកនយោបាយ អ្នកកាសែត និងជាសកម្មជនសិទ្ធិមនុស្ស កាលពីថ្ងៃទី៨ ខែមករា ឆ្នាំ២០០៩ រួមទាំងបទចោទធ្វើទារុណកម្មលើទណ្ឌិតក្រុមប្រឆាំងខ្លាទមិឡ(Tamil) នៅអំឡុងនៃការបញ្ចប់សង្គ្រាមស៊ីវិលដ៏សោកសង្រេងរបស់ប្រទេសដែនកោះមួយនេះក្នុងឆ្នាំ២០០៩៕ AFP
