វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 207 នាក់
ម្សិលមិញ 6359 នាក់
សរុប 14086840 នាក់
អូស្ត្រាលី៖ លោកScott Marrison ត្រូវបាន តែងតាំងជា នាយករដ្ឋមន្ត្រីថ្មីនៃប្រទេសអូស្ត្រាលី ជំនួសលោក Malcolm Turnbull ដែលត្រូវបានគេបណ្តេញពីបក្សដែលកម្មភាពនេះត្រូវបានគេហៅថាការធ្វើ បក្សប្រហារ ។
ជម្រើសនាយករដ្ឋមន្ត្រីថ្មី ដែលបង្កការភ្ញាក់ផ្អើលខ្លាំង និងជាប្រៀបដូចជាព្រនង់វាយសំពងលើរូបអតីតរដ្ឋមន្ត្រីក្រសួងមហាផ្ទៃ លោក Petter Dutton ដែលជាមេក្រុមដឹកនាំចលនាប្រឆាំងក្នុងបក្សដើម្បីផ្តួលលោកនាយករដ្ឋមន្ត្រី Turnbull !។ លោក Scott Morrison អតីតរដ្ឋមន្ត្រីក្រសួងហិរញ្ញវត្ថុ ជាជំនិតម្នាក់របស់លោកនាយករដ្ឋមន្ត្រីចាស់នោះ លោក បានទទួលសំឡេងគាំទ្រ ៤៥ទល់នឹង៤០សំឡេងសម្រាប់លោកDutton ជាគូប្រជែង។
ក្នុងវ័យ៥០ឆ្នាំ ជាគ្រិស្តិសាសនិក ដ៏ស្មោះស្ម័គ្របំផុត លោក ម៉ូរីសាន់ បានឡើងកាន់តំណែងតាំងពីខែកញ្ញា២០១៥មក ជារដ្ឋមន្ត្រីក្រសួងហិរញ្ញវត្ថុ ដែលជាតួនាទីឈ្នាន់សម្រាប់ឈោងទៅកាន់តំណែងជានាយករដ្ឋមន្ត្រី។ លោក ម៉ូរីសាន់ ជាអ្នកអភិរក្សស្តាំនិយមខ្លាំង ជាងនាយករដ្ឋមន្ត្រីមុនលោក Malcolm Turnbull ។
ដោយសារចឹងហើយបានជាថ្មីៗនេះ តាមលទ្ធផលស្ទង់មតិ របស់ Newspoll បង្ហាញឲ្យឃើញថា ក្រោយវិបត្តិនយោបាយ ធ្វើឲ្យមានផ្លាស់ប្តូរនាយករដ្ឋមន្ត្រីថ្មី ធ្វើឲ្យគណបក្សកាន់អំណាចបាត់ជំនឿពីប្រជាពលរដ្ឋលើបក្សកាន់អំណាចហើយគណបក្សប្រឆាំងនៅអូស្ត្រាលីបានកើនការគាំទ្រខ្ពស់រហូតដល់ទៅ៥៦ភាគរយ ចំណែកគណបក្សសម្ពន្ធមិត្តកាន់អំណាចវិញមានតែ៤៤ភាគរយប៉ុណ្ណោះ ដែលពីមុន គណបក្សកាន់អំណាចមានសម្លេងគាំទ្រ៥១ភាគរយ ។មេដឹកនាំគណបក្សប្រឆាំង លោក Bill Shorten ទទួលបានការស្រឡាញ់ពីពលរដ្ឋច្រើនជាងនាយករដ្ឋមន្ត្រីថ្មីនៃគណបក្សកាន់អំណាចគឹលោក Scott Morrison ដោយមានសម្លេងគាំទ្រ ៣៩ភាគរយ និង៣៣ភាគរយ។
ឧប្បនាយករដ្ឋមន្ត្រីអូស្ត្រាលី លោក Michael McCormack បាននិយាយទៅកាន់សារព័ត៌មាន ABC ថា រដ្ឋាភិបាលថ្មី នឹងខិតខំដើម្បីទទួលបានការគាំទ្រពីពលរដ្ឋឡើងវិញ ដោយផ្តល់អាទិភាពទៅលើគោលនយោបាយសំខាន់ៗដូចជា តម្លៃថាមពល ប្រាក់ខែ កំណើនសេដ្ឋកិច្ច និងសន្តិសុខជាតិ។ទោះជាយ៉ាងណាវិបត្តិនយោបាយនៅក្នុងជួរថ្នាក់ដឹកនាំអូស្ត្រាលីមិនទាន់បញ្ចប់នៅឡើយ ។រដ្ឋមន្ត្រីការបរទេសអូស្ត្រាលី លោកស្រី Julie Bishop បានឲ្យដឹង ថា លោកស្រីបានលាលែងចេញពី តំណែងនៅក្នុងជួររដ្ឋាភិបាលរបស់នាយករដ្ឋមន្ត្រីថ្មី លោក Scott Morrison ហើយ។
ការសម្រេចចិត្តនេះ ធ្វើឡើងតែពីរថ្ងៃប៉ុណ្ណោះ បន្ទាប់ពីលោកស្រីចាញ់នៅក្នុងការបោះឆ្នោតជ្រើសរើសមេដឹកនាំ នៃគណបក្សសេរី និយម។ បន្ថែមពីលើនេះ លោកស្រី Bishop ថែមទាំងបញ្ជាក់ដែរថា លោកស្រីអាចនឹងចូលរួមជាមួយក្រុមគណបក្សប្រឆាំង ហើយទន្ទឹមគ្នាមិនបានប្រាប់ថានឹងចូលរួមក្នុងការបោះឆ្នោតសកលនៅខែឧសភា ឆ្នាំ២០១៩ ខាងមុខនេះ ឬយ៉ាងណានោះទេ។ គួរបញ្ជាក់ថា លោកស្រី Julie Bishop ក៏បានចូលរួមនៅក្នុងការបោះឆ្នោតជ្រើសរើសមេដឹកនាំ នៃគណបក្សសេរីនិយម កាលពីថ្ងៃសុក្រទី២២សីហាផងដែរ តែបានបរាជ័យ ខណៈលោក Scott Morrison បានស្បថឡើងកាន់តំណែងជានាយករដ្ឋមន្ត្រីអូស្ត្រាលីទី៣០ នៅក្នុងថ្ងៃដដែល ជំនួសលោក Malcolm Turnbull ដែលត្រូវបណ្តេញចេញ៕