ក្រសួងប្រៃសណីយ៍ចម្រុញឲ្យប្រតិបត្តករក្រុមហ៊ុនទូរសព្ទ័ដោះស្រាយរឿងសេវាខ្សោយឬគ្មាន
08-July-2026 / ព័ត៌មានជាតិ
ភ្នំពេញ ៖ ក្រសួងប្រៃសណីយ៍នៅថ្ងៃទី២០កក្កដា បានចេញសេចក្តីប្រកាសព័ត៌មាន ស្តីពីការដាក់ឱ្យអនុវត្តប្រកាសស្តីពីគុណភាពសេវាទូរគមនាគមន៍។បន្ទាប់ពីការចេញប្រកាស ប្រតិបត្តិករទូរគមនាគមន៍នានាមាន រយៈពេល ១០ (ដប់) ខែ ដើម្បីកែលំអ និង ពង្រឹងគុណភាពសេវាទូរគមនាគមន៍របស់ខ្លួន ។ក្នុងករណីប្រតិបត្តិករទូរគមនាគមន៍ណាមិនអនុវត្តតាមស្តង់ដារអប្បបរមាដែលបាន កំណត់ក្នុងប្រកាសនេះទេ ប្រតិបត្តិករទូរគមនាគមន៍នោះនឹងត្រូវទទួលរងពិន័យ។ការប្រកាសនេះកើតក្រោយពីប្រមុខរាជរដ្ឋាភិបាលជម្រុញឲ្យមានការពង្រឹងប្រពន្ធ័សេវាទូរសព្ទ័ដែលបាននិងកំពុងយ៉ាបនាពេលសព្ធថ្ងៃនេះ។
ក្រសួងប្រៃសណីយ៍និងទូរគមនាគមន៍ (ក.ប.ទ.) បានបញ្ជាក់ថា ក.ប.ទ. បានចាត់ទុកការពង្រឹងគុណភាពសេវាទូរគមនាគមន៍ គឺជា កិច្ចការ អាទិភាពបំផុត និងបានយកចិត្តទុកដាក់យ៉ាងខ្លាំង ក្នុងការ ស្វែងរក មធ្យោបាយ និងដំណោះស្រាយនានា សំដៅបង្កើន គុណភាពសេវាទូរសព្ទចល័តនិងអ៊ីនធឺណិត និងលើកកម្ពស់ការ ការពារសិទ្ធិរបស់ អ្នកប្រើប្រាស់ ដោយសារ តែគុណភាពសេវាទូរគមនាគមន៍បច្ចុប្បន្ន នៅមានកម្រិតនៅឡើយ ។
ដូច្នេះ ប្រតិបត្តិករសេវាទូរគមនាគមន៍ ត្រូវគោរពតាមមូលដ្ឋាន ដោយត្រួតពិនិត្យឱ្យបានម៉ត់ច្មត់ពីគុណភាពសេវា ដូចជាសំឡេង ល្បឿន រួចហើយត្រូវចូលរួមជាមួយក្រសួងប្រៃសណីយ៍ ដើម្បីធ្វើការវាស់ស្ទង់គុណភាពសេវាទូរគមនាគមន៍។ ក្រសួងប្រៃសណីយ៍ បានតម្រូវឱ្យមានការវាស់ស្ទង់ ៤ចំនុច ដូចជា ការវាស់ស្ទង់ ដែលត្រូវធ្វើ ដោយការប្រើទិន្នន័យពីប្រព័ន្ធគាំទ្រប្រតិបត្តិករ។ វាស់ស្ទង់តាមទីតាំងជាក់ស្តែង ដែលមានតាមការប្រើត្រាហ្វិកសិប្បនិម្មិត (Artificially Generated Traffic) ប្រើវិធីសាស្ត្រដ្រាយតេស្ត (Drive Test) និងវិធីស្រាស្ត្រក្រាវដឺសស់ស៊ីង (Crowdsourcing)។ វាស់ស្ទង់ពីភាពពេញចិត្តរបស់អ្នកប្រើប្រាស់ ដោយត្រូវប្រើកម្រងសំណួរបែបចំណាត់ថ្នាក់គុណភាព ពីទាបទៅខ្ពស់ និងចុងក្រោយគឺវិធីសាស្ត្រវាស់ស្ទង់ដោយនិយ័តករទូរគមនាគមន៍កម្ពុជា។
ចំពោះការវាស់ស្ទង់ទាំងអស់ ត្រូវធ្វើជាប្រចាំ ស្របតាមនីតិវិធីស្តង់ដារ ឬ ត្រូវតែធ្វើតាមសំណើររបស់និយ័តករទូរគមនាគមន៍ តាមបណ្តឹងរបស់អ្នកប្រើប្រាស់ ឬ តាមការចាំបាច់។ ហើយប្រតិបត្តិករទូរគមនាគមន៍ ក៏អាចទទួលទណ្ឌកម្មតាមការកំណត់នៃច្បាប់ស្តីពីទូរគមនាគមន៍ដែរ ប្រសិនបើខកខានក្នុងការរាយការណ៍គុណភាពសេវាទូរគមនាគមន៍នោះ។ទន្ទឹមនឹងនេះដែរ ក.ប.ទ. ក៏បានធ្វើការពិគ្រោះយោបល់ ជាមួយ ប្រតិបត្តិករទូរគមនាគមន៍ ដើម្បី ទទួលបាន នូវ ធាតុចូលបន្ថែម និង ផ្លាស់ប្តូរយោបល់គ្នា ដើម្បីឱ្យ ការអនុវត្ត ប្រកាសនេះ មានភាពរលូន នាពេលខាងមុខ ពីព្រោះ ការពង្រឹង គុណភាព សេវា ទូរសព្ទចល័ត នឹងត្រូវការពេលវេលាច្រើនក្នុងការដោះស្រាយ ដែល ក.ប.ទ. និងនិយ័តករទូរគមនាគមន៍ កម្ពុជា (ន.ទ.ក.) ត្រូវជួយ សម្របសម្រួល និងគាំទ្រ ដល់ ប្រតិបត្តិករទូរគមនាគមន៍ ក្នុងការរៀបចំឱ្យបានច្បាស់លាស់ នូវផែនការ នៃ ការ កែលំអ គុណភាពសេវា ទូរគមនាគមន៍។
ក្នុងរយៈពេល ១០ខែ ចាប់ពីថ្ងៃដែលប្រកាសត្រូវបានចុះហត្ថលេខា ប្រតិបត្តិករទូរគមនាគមន៍ ដែលផ្តល់សេវាទូរស័ព្ទអចល័ត សេវាទូរស័ព្ទចល័ត និងសេវាអ៊ីនធឺណិតអចល័តក្នុងប្រទេសកម្ពុជា ត្រូវតែអនុវត្តតាមសូចនាករគុណផលគន្លឹះក្នុងប្រកាស ដែលមានកម្រាស់ ៦១ទំព័រ ចែកចេញជា ៨ជំពូក និង ២០ប្រការ។ក្រសួងប្រៃសណីយ៍ ក៏តម្រូវឱ្យប្រតិបត្តិករទូរគមនាគមន៍ទាំងអស់ ត្រូវផ្សព្វផ្សាយរបាយការណ៍គុណភាពសេវាលើគេហទំព័ររបស់ខ្លួន ឬ តាមមធ្យោបាយផ្សព្វផ្សាយនានាជាកំហិត។ ហើយប្រសិនបើមានការរំខាន ឬ ការកាត់ផ្តាច់សេវាទូរគមនាគមន៍ដោយមានការគ្រោងទុក ប្រតិបត្តិករទូរគមនាគមន៍ ត្រូវជូនដំណឹងឱ្យបានមុន ៤៨ម៉ោង ព្រមទាំងធានានិរន្តរភាពនៃគុណភាពសេវាក្នុងកម្រិតដែលអាចទទួលយកបាន និងមានផលប៉ះពាល់តិចបំផុតដល់អ្នកប្រើប្រាស់។ ប្រសិនបើមានករណីវិវាទពាក់ព័ន្ធនឹងគុណភាពសេវាទូរគមនាគមន៍វិញ គ្រប់ភាគី ត្រូវតែផ្សះផ្សាយក្រោមកិច្ចសម្របសម្រួលរបស់និយ័តករទូរគមនាគមន៍កម្ពុជា។
