កូនស្រីពៅលោកថាក់ស៊ីនបាននិងកំពុងក្លាយជាតារានយោបាយរបស់គណបក្សភឿថៃ
26-March-2024 / ព័ត៌មានអន្តរជាតិ
ប្រទេសថៃ៖នៅក្នុងប្រទេសថៃ ត្រកូលស៊ីណាវ៉ាត់ត្រូវបានគេដឹងថាបានគ្របដណ្តប់ខ្លាំងលើជីវិតនយោបាយថៃអស់រយៈពេលជិត ១០ឆ្នាំ។ លោកថាក់ស៊ីនបានកាន់តំណែងនាយករដ្ឋមន្ត្រីពីឆ្នាំ ២០០១ ដល់ឆ្នាំ ២០០៦ ហើយលោកស្រីយីងឡាក់ដែលជាប្អូនស្រីបានកាន់តំណែងនាយករដ្ឋមន្ត្រីពីឆ្នាំ ២០១១ ដល់ឆ្នាំ ២០១៤។ ទោះជាយ៉ាងណាបងប្អូនបង្កើតប្រុស ស្រីទាំងពីរនាក់នេះសុទ្ធតែត្រូវបានកងទ័ពកំចាត់ពីអំណាចដូចគ្នាតាមរយៈរដ្ឋប្រហារ។ បច្ចុប្បន្ន លោកថាក់ស៊ីន និងលោកស្រីយីងឡាក់កំពុងរស់នៅក្នុងប្រទេសអេមីរ៉ាតអារ៉ាប់រួមដើម្បីគេចខ្លួនពីការតាមធ្វើទុក្ខបុកម្នេញពីកងទ័ពតាមផ្លូវតុលាការ ។ ទោះបីយ៉ាងណា ត្រកូលស៊ីណាវ៉ាត់មិនបានបាត់ពីទឹកដីថៃតែថែមទាំងកំពុងបន្តមានឥទ្ធិពល រួមទាំងបន្តមានប្រជាប្រិយភាពនៅក្នុងចំណោមប្រជាជនថៃភាគច្រើនទៀតផង ពិសេសអ្នករស់នៅតាមជនបទ។ ថ្មីនេះវត្តមានលោកស្រីផែថងថាន ស៊ីណាវ៉ាត់ដែលជាកូនស្រីពៅរបស់លោកថាក់ស៊ីនបង្កឲ្យមានការចាប់អារម្មណ៍មុនការបោះឆ្នោតមកដល់ក្នុងឆ្នាំ២០២៣។
លោកស្រីផែថងថាន(PaetongtarnShinawatra)ជាស្ត្រីអ្នកជំនួញម្នាក់ដែលគ្រប់គ្រងសាខាសណ្ឋាគារនៃក្រុមហ៊ុនអចលនទ្រព្យរបស់គ្រួសារឈ្មោះ « RendeDevelopment »។លោកស្រីផែថងថានស៊ីណាវ៉ាត្រា(PaetongtarnShinawatra)មានអ្នកFollowកន្លះលាននាក់នៅលើបណ្តាញសង្គមInstagram។ មានអាយុ ៣៥ឆ្នាំ លោកស្រីផែថងថានស៊ីណាវ៉ាត្រា(PaetongtarnShinawatra)ត្រូវបានគេសំឡឹងឃើញជាបេក្ខជននាយករដ្ឋមន្ត្រីរបស់គណបក្សភឿថៃសម្រាប់ការបោះឆ្នោតនៅឆ្នាំ ២០២៣ ខាងមុខ។ ឆ្លើយនឹងសំណួររបស់ AFP ដែលថា តើលោកស្រីយល់ព្រមធ្វើជាបេក្ខជននាយករដ្ឋមន្ត្រីទេ បើមានសំណើពីគណបក្ស?។ លោកស្រីផែថងថានបានត្រឹមបញ្ជាក់ថា លោកស្រីទុកឲ្យគណបក្សជាអ្នកសម្រេចជ្រើសរើសបេក្ខជននាយករដ្ឋមន្ត្រីនៅប៉ុន្មានខែមុខ។
ក្នុងរយៈពេលចុងក្រោយនេះ កូនស្រីពៅរបស់លោកថាក់ស៊ីនរូបនេះបានបង្ហាញមុខញឹកញាប់ជាសាធារណៈ។ ក្នុងខែឧសភាកន្លងទៅថ្មីៗនេះ លោកស្រីផែថងថានចូលរួមនៅក្នុងយុទ្ធនាការឃោសនាបោះឆ្នោតជ្រើសរើសចៅហ្វាយក្រុងបាងកកថ្មីដោយបានចែកខិត្តប័ណ្ណនិងថត Selfiesជាមួយសកម្មជនបក្សភឿថៃ។ « យើងត្រូវការលោកស្រី។ យើងនឹកឱពុកលោកស្រី »នេះជាសម្តីរបស់សកម្មជនបក្សភឿថៃម្នាក់។
« តើឲ្យខ្ញុំនៅស្ងៀមម្តេចនឹងកើតចំពោះអ្វីដែលឱពុកខ្ញុំបានធ្វើសម្រាប់ប្រទេសរបស់គាត់។ ខ្ញុំនៅជាកូនស្រីគាត់ជានិច្ច។ ការគាំទ្ររបស់គាត់បានផ្តល់កម្លាំង និងភាពក្លាហានឲ្យខ្ញុំ »នេះជាការឆ្លើយតបវិញរបស់លោកស្រីផែថងថាន។ ក្រៅពីមានវត្តមាននៅទីកន្លែងសាធារណៈ លោកស្រីផែថងថានបានបង្ហាញមុខ និងមានសកម្មភាពយ៉ាងសកម្មនៅលើបណ្តាញសង្គមដែរ ពិសេសមិនញញើតនឹងបង្ហាញរូបថតដែលបានថតជាមួយឱពុក។ កត្តាវិជ្ជមានមួយទៀត លោកស្រីផែថងថានជាមនុស្សជំនាន់ក្រោយដែលតំណាងឲ្យយុវជនជំនាន់ថ្មី។
លោកថាក់ស៊ីនដែលមានអាយុ ៧២ឆ្នាំសង្ឃឹមថា បើគណបក្សភឿថៃឈ្នះឆ្នោត ហើយកូនស្រីឡើងកាន់តំណែងនាយករដ្ឋមន្ត្រី លោកអាចនឹងវិលត្រឡប់ចូលស្រុកវិញតាមទ្វារធំ និងប្រកបដោយកិត្តិយស។ តែក្នុងពេលឥឡូវ លោកស្រីផែថងថានគ្រាន់ជាមនុស្សតុក្កតារបស់ឱពុកតែប៉ុណ្ណោះ នេះជាការយល់ឃើញរបស់លោក Paul Chambers អ្នកជំនាញជនជាតិអាមេរិកខាងប្រទេសថៃ។ ពិតណាស់ ត្រកូលស៊ីណាវ៉ាត់បន្តមានឥទ្ធិពលនៅក្នុងឆាកនយោបាយថៃ។ តែផ្លូវឈានទៅយកអំណាចជាថ្មីនៅវែងឆា្ងយ និងពោរពេញដោយឧបសគ្គច្រើន។ ដើម្បីអាចឲ្យលោកស្រីផែថងថានក្លាយជានាយរដ្ឋមន្ត្រីបាន គណបក្សភឿថៃត្រូវទទួលបានសំឡេងភាគច្រើនទាំងនៅក្នុងសភាដែលមាន ៥០០អសនៈ និងទាំងនៅក្នុងព្រឹទ្ធសភាដែលមាន ២៥០អសនៈ។
តែឧបសគ្គ័នៅត្រង់ថាកាលពីឆ្នាំ ២០១៧ របបសឹកបានកែប្រែរដ្ឋធម្មនុញ្ញ ដោយឲ្យកងទ័ពជាកាន់កាប់អសនៈទាំងអស់នៅក្នុងព្រឹទ្ធសភា។ ជាក់ស្តែងនៅក្នុងការបោះឆ្នោតឆ្នាំ ២០១៩ គណបក្សភឿថៃទទួលបានសំឡេងភាគច្រើននៅក្នុងសភា។ តែគណបក្សគាំទ្រកងទ័ពរបស់លោកប្រាយុទ្ធចាន់អូចាទៅវិញទេដែលត្រូវបានឲ្យបង្កើតរដ្ឋាភិបាលចម្រុះថ្មីដោយសារមានសំឡេងគាំទ្រពីព្រឹទ្ធសភាដែលទាហ៊ានកាន់កាប់។ ដូច្នេះបើគណបក្សភឿថៃអាចនឹងទទួលបានសំឡេងភាគច្រើននៅក្នុងការបោះឆ្នោតឆ្នាំ ២០២៣ ខាងមុខ ក៏ប្រហែលគ្មានអ្នកណាអាចដណ្តើមអំណាចពីដៃកងទ័ពបានដែរ៕
