វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1137 នាក់
ម្សិលមិញ 5378 នាក់
សរុប 14080430 នាក់
បាត់ដំបង៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលកម្ពុជាចុះមូលដ្ឋានខេត្តបាត់ដំបងនៅរសៀលថ្ងៃទី២៧ ខែឧសភា ឆ្នាំ២០២២ បានណែនាំដល់អាជ្ញាធរមូលដ្ឋានខេត្តបាត់ដំបង និងស្រុកទាំង៤ នៅជាប់ដែនបឹងទន្លេសាបក្នុងភូមិសាស្ត្រខេត្តបាត់ដំបង មានស្រុកមោងឫស្សី សង្កែ ឯកភ្នំ និងស្រុកថ្មគោល ព្រមទាំងមន្ត្រីតាមមន្ទីរជំនាញពាក់ព័ន្ធនានា ក្នុងខេត្តត្រូវរួមសហការគ្នាឱ្យបានល្អ ក្នុងការចុះពិនិត្យវាយតម្លៃអំពីតំបន់២ និងតំបន់៣ឱ្យច្បាស់លាស់ ដើម្បីកាត់ឆ្វៀលដី ដែលប្រជាពលរដ្ឋ បានអាស្រ័យផលជាក់ស្តែង។
សម្តេចក្រឡាហោម ស ខេង បានដឹកនាំកិច្ចប្រជុំពិសេសមួយ ជាមួយក្រុមការងារក្រសួងរៀបចំដែនដីនគររូបនីយកម្ម សំណង់ និងសូរិយោដី រួមនឹងរដ្ឋបាលខេត្ត ស្រុកទាំង៤ នៅជាប់ដែនបឹងទន្លេសាបក្នុងភូមិសាស្ត្រខេត្តបាត់ដំបង និងកងកម្លាំងប្រដាប់អាវុធទាំង៣ប្រភេទ ដើម្បីធ្វើការពិភាក្សាអំពីតំបន់ណាខ្លះដែលអាចកាត់ឆ្វៀលផ្ទៃដីនៅក្នុងតំបន់២ និងតំបន់៣បាន សម្រាប់ផ្តល់ជូនប្រជាពលរដ្ឋ ដែលជាអ្នកធ្លាប់អាស្រ័យផលយ៉ាងតិច ១០ឆ្នាំ តាមការណែនាំពីប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីកម្ពុជា តាមរយៈសារសំឡេងពិសេសនាថ្ងៃទី២៧ ខែឧសភា ឆ្នាំ២០២២។
សម្តេចក្រឡាហោម ស ខេង បានបញ្ជាក់ថា សម្តេចប្រមុខដឹកនាំរាជរដ្ឋាភិបាលកម្ពុជា នឹងខិតខំអនុវត្តនូវគោលការណ៍ចំនួន២ គឺទី១. ការខិតខំអភិរក្សតំបន់បឹងទន្លេសាប និងទី២ ការខិតខំគោរពទៅតាមប្រវត្តិសាស្ត្រតំបន់ដែលប្រជាពលរដ្ឋរស់នៅ ក្នុងន័យដើម្បីគិតគូអំពីការប្រកបរបររបស់ប្រជាកសិករក្នុងការដាំដុះ។សម្តេច ស ខេង បានសម្រេចជាគោលការណ៍ថា នឹងរៀបចំឡើងវិញតំបន់មួយចំនួនដែលចាំបាច់ ដូចជាព្រំប្រទល់រវាងតំបន់១ និងតំបន់២ អាចថា ទាញពីតំបន់២មកជាតំបន់១ ក្លាយទៅជាកម្មសិទ្ធិជូនប្រជាពលរដ្ឋបាន ហើយទាញតំបន់៣មកជាតំបន់២ ព្រោះតំបន់៣ជាតំបន់ហាមឃាត់ មិនឱ្យមានការប៉ះពាល់ប្រមូលផលទាំងអស់ ហើយការទាញតំបន់៣មកជាតំបន់២ ដើម្បីប្រជាពលរដ្ឋបានបង្កបង្កើនផល និងអាស្រ័យផល ប៉ុន្តែមិនមែនផ្តល់ជាកម្មសិទ្ធិទេ។
សម្តេចក្រឡាហោម ស ខេង បានបន្តទៀតថា ក្រៅពីនេះគឺទាក់ទងនឹងការអភិរក្សបឹងទន្លេសាប ដូចជាការបោះបង្គោលព្រំប្រទល់ ដើម្បីសម្រួលធ្វើយ៉ាងម៉េចកុំឱ្យបង្គោលនេះមានការលួចចល័តព្រំដែន ហើយចុងក្រោយទាក់ទងនឹងបញ្ហាផែនការយុទ្ធសាស្ត្រ ក្នុងការរក្សាបឹងទន្លេសាប ដែលសមត្ថកិច្ចពាក់ព័ន្ធត្រូវរៀបចំផែនការយុទ្ធសាស្ត្រនេះ ដើម្បីរួមសហការគ្នាក្នុងការថែរក្សាការពារបឹងទន្លេសាបឱ្យបានគង់វង្សតទៅអនាគត៕