តុលាការស្រីលង្កាហាមមិនឲ្យអតីតនាយករដ្ឋមន្ត្រីចាកចេញពីប្រទេស
27-March-2024 / ព័ត៌មានអន្តរជាតិ
ប្រទេស្រីលង្កា៖តុលាការស្រីលង្កាបានហាមប្រាមអតីតនាយករដ្ឋមន្ត្រីមហិន្ទ្រារ៉ាចាប៉ាសា( Mahinda Rajapaksa) កូនប្រុសរបស់លោក និងសម្ព័ន្ធមិត្ត១៥នាក់មិនឱ្យចាកចេញពីប្រទេសពាក់ពន្ធ័និង អំពើហិង្សាដែលបង្កឲ្យនាយករដ្ឋមន្ត្រីលាលែងពីតំណែង។
កាលពីថ្ងៃទី០៩ឧសភា អ្នកគាំទ្រអតីតនាយករដ្ឋមន្ត្រី Mahinda Rajapaksa បានប្រើដំបងវាយប្រហារក្រុមបាតុករប្រឆាំងរដ្ឋាភិបាលដោយសន្តិវិធីនៅកណ្តាលទីក្រុង Colombo ដោយញុះញង់ឲ្យមានអំពើហិង្សាសងសឹកដែលបានបណ្តាលឲ្យមនុស្ស០៩នាក់ស្លាប់និងខូចខាតទ្រព្យសម្បត្តិជាច្រើន។ ចៅក្រមក្នុងរដ្ឋធានីកូឡុំបូថ្ងៃនេះបានបញ្ជាឱ្យប៉ូលីសស៊ើបអង្កេតការវាយប្រហារនេះ ហើយបានបញ្ជាឱ្យអតីតនាយករដ្ឋមន្ត្រី Rajapaksa កូនប្រុសរបស់លោកឈ្មោះ Namal និងសម្ព័ន្ធមិត្តចំនួន១៥នាក់ត្រូវបានហាមឃាត់មិនឱ្យចាកចេញពីប្រទេសដើម្បីបម្រើការស៊ើបអង្កេត។ជនរងគ្រោះនៃអំពើហិង្សាកាលពីថ្ងៃទី០៩ឧសភាបាននិយាយថាអតីតនាយករដ្ឋមន្ត្រី និងជំនួយការរបស់លោកបាននាំអ្នកគាំទ្រចំនួន៣,០០០នាក់ចូលទៅក្នុងរដ្ឋធានី ហើយបានបង្កការវាយលុកលើបាតុករដោយសន្តិវិធី។
យ៉ាងហោចណាស់មនុស្ស២២៥ នាក់ត្រូវបានបញ្ជូនទៅមន្ទីរពេទ្យ រួមទាំងព្រះសង្ឃពុទ្ធសាសនានិងបូជាចារ្យកាតូលិកផងដែរ។ អំពើហិង្សាបានបង្កឱ្យមានរលកនៃការសងសឹកទូទាំងប្រទេស។ អ្នកប្រឆាំងរដ្ឋាភិបាលបានដុតផ្ទះរាប់សិបខ្នងដែលជាកម្មសិទ្ធិរបស់ក្រុមអ្នកស្មោះត្រង់ Rajapaksa ។នៅថ្ងៃដដែលនោះ លោក Rajapaksa អាយុ៧៦ ឆ្នាំបានលាលែងពីតំណែងជានាយករដ្ឋមន្ត្រី ហើយត្រូវបានជម្លៀសដោយកងកម្លាំងប្រដាប់អាវុធទៅកាន់បន្ទាយកងទ័ពជើងទឹកនៅភាគខាងកើតនៃប្រទេសកោះនេះ។
កូនប្រុសរបស់លោកឈ្មោះNamalRajapaksaអាយុ៣៦ឆ្នាំដែលមានតួនាទីជារដ្ឋមន្ត្រីក្រសួងយុវជននិងកីឡាបាននិយាយថាគ្រួសារនេះមិនមានចេតនាចាកចេញពីប្រទេសនោះទេ។ប្រទេសស្រីលង្កាស្ថិតនៅចំកណ្តាលនៃវិបត្តិសេដ្ឋកិច្ចដ៏អាក្រក់បំផុតរបស់ខ្លួនចាប់តាំងពីទទួលបានឯករាជ្យ។កាលពីខែមេសា រដ្ឋាភិបាលបានប្រកាសមិនអាចសងបំណុលបរទេសចំនួន ៥១ ពាន់លានដុល្លារអាមេរិក។ ប្រជាជនរស់នៅដោយការដាច់ចរន្តអគ្គិសនី កង្វះខាតស្បៀងអាហារ ប្រេងឥន្ធនៈ និងថ្នាំពេទ្យ អស់ជាច្រើនខែ។វិបត្តិនេះបានចាប់ផ្តើមបន្ទាប់ពីជំងឺរាតត្បាត Covid-19 ប៉ះពាល់យ៉ាងខ្លាំងដល់រូបិយប័ណ្ណបរទេសនិងផ្ទេរប្រាក់យ៉ាងសំខាន់ដែលធ្វើឱ្យប្រទេសនេះមានការខ្វះខាតរូបិយប័ណ្ណបរទេសដើម្បីសងបំណុលនិងបង្ខំឱ្យរដ្ឋាភិបាលហាមឃាត់ការនាំចូលទំនិញជាច្រើន ដែលបណ្តាលឱ្យមានការខ្វះខាតកាន់តែខ្លាំង។
អតិផរណាខ្ពស់និងការដាច់ភ្លើងយូរ។ក្រុមអ្នកតវ៉ាបានស្តីបន្ទោសមេដឹកនាំនិងមន្ត្រីស្រីលង្កាចំពោះការគ្រប់គ្រងសេដ្ឋកិច្ចមិនត្រឹមត្រូវ។ អស់រយៈពេលជាងមួយ១ខែហើយ ដែលពួកគេបានតវ៉ាទាមទារឲ្យលោក Mahinda Rajapaksa ចុះចេញពីតំណែងនិងប្រធានាធិបតី Gotabaya Rajapaksa ដែលជាប្អូនប្រុសរបស់លោក។រដ្ឋាភិបាលស្រីលង្កាកាលពីថ្ងៃទី០៦ ខែឧសភាបានប្រកាសដាក់ប្រទេសក្នុងគ្រាអាសន្ន ដោយផ្តល់អំណាចដល់កងទ័ពក្នុងការចាប់ខ្លួន និងឃុំខ្លួនអ្នកដែលធ្វើសកម្មភាពរំខាន។ កាលពីថ្ងៃទី ១១ ខែឧសភាប៉ូលីសស្រីលង្កាត្រូវបានអនុញ្ញាតឱ្យវាយប្រហារយ៉ាងសកម្មនិងប្រើប្រាស់គ្រាប់រំសេវផ្ទាល់ដើម្បីការពារ”ភាពអនាធិបតេយ្យ”៕ប្រភព AFP
