វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3074 នាក់
ម្សិលមិញ 8227 នាក់
សរុប 14129955 នាក់
ភ្នំពេញ៖ កម្ពុជា បានផ្អាកការនាំចូលសត្វជ្រូករស់ពីប្រទេសថៃ និងវៀតណាម ពេលប្រទេសជិតខាងកំពុងផ្ទុះជំងឺប៉េស្តជ្រូកអាហ្វ្រិកហើយការចិញ្ចឹមក្នុងស្រុកបានកើនលើសតម្រូវការកាលពីអំឡុងពេលបុណ្យភ្ជុំបិណ្ឌកន្លងទៅ ។
លោក តាន់ ផាន់ណារ៉ា ប្រតិភូរាជរដ្ឋាភិបាល ទទួលបន្ទុក ជាអគ្គនាយកនៃអគ្គនាយកដ្ឋានសុខភាពសត្វ និងផលិតផលសត្វនៃក្រសួងកសិកម្ម រុក្ខាប្រមាញ់ និងនេសាទ បានមានប្រ សាសន៍ឲ្យកាសែតដឹងថា កម្ពុជា បានផ្អាកការនាំចូលសត្វជ្រូករស់ពីប្រទេសថៃ និងវៀតណាម រយៈពេលពីរខែមកហើយ បន្ទាប់ពីការផ្គត់ផ្គង់បានគ្រប់គ្រាន់ទៅតាមតម្រូវការក្នុងស្រុក និងម្យ៉ាងទៀតតម្លៃ ជ្រូកនៅប្រទេសថៃ និងវៀតណាម មួយរយៈចុងក្រោយនេះថ្លៃជាងប្រទេសកម្ពុជា។
លោក អគ្គនាយកដ្ឋានសុខភាពសត្វ និងផលិតផលសត្វ បានឲ្យដឹងដែរថាការចិញ្ចឹមនៅក្នុងស្រុករបស់យើងសព្វថ្ងៃនេះអាចផ្គត់ផ្គង់គ្រប់គ្រាន់ពី ៨ពាន់ទៅ ៩ពាន់ក្បាលក្នុងមួយថ្ងៃ។ អគ្គនាយកដ្ឋានបានណែនាំដល់មន្ត្រីពេទ្យសត្វនៅតាមព្រំដែនឲ្យបង្កើនការត្រួតពិនិត្យឲ្យបានតឹតរ៉ឹងចៀសវាងការលួចនាំចូលជ្រូកចូលដោយខុសច្បាប់ពីប្រទេសក្បែរខាង និងអំពាវនាវដល់អ្នកចិញ្ចឹមជ្រូកក្នុងស្រុកទាំងអស់ ត្រូវយកចិត្តទុកដាក់ធ្វើជីវសុវត្ថិភាព និងអនាម័យ ក្នុងការចិញ្ចឹមរបស់ខ្លួនជាប្រចាំ ដើម្បីចៀសវាងការឆ្លងជំងឺផ្សេងៗ ដែលនាំឲ្យប៉ះពាល់ដល់សត្វចិញ្ចឹមរបស់ខ្លួន និងចម្លងទៅកន្លែងផ្សេងទៀត។
យោងតាមការចុះផ្សាយរបស់កាសែតបាងកកប៉ស្តិ៍ បានឲ្យដឹងថា អាជ្ញាធរថៃ នៅថ្ងៃអង្គារសប្ដាហ៍នេះបានប្រកាសពីការរកឃើញករណីឆ្លងនៃ «ជំងឺបេស្តជ្រូកអាហ្វ្រិក» តាមរយៈការពិនិត្យលើសំណាកដែលត្រូវបានប្រមូលពីទីសត្តឃាតមួយកន្លែង នៅក្នុងខេត្ត Nakhon Pathom។ការទទួលស្គាល់ករណីឆ្លងជំងឺបេស្តជ្រូកអាហ្វ្រិកកើតមានឡើង បន្ទាប់ពីអាជ្ញាធរថៃបានបដិសេធជាច្រើនឆ្នាំមកហើយថា មិនមានករណីឆ្លង ជំងឺនេះនៅលើសត្វជ្រូកនៅក្នុងស្រុកនោះទេ ហើយនេះក៏ជាលើកដំបូងបំផុតដែលអាជ្ញាធរថៃទទួលស្គាល់ជាផ្លូវការពីវត្តមានជំងឺនេះផងដែរ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា បានសារទរនឹងចំណាត់ការរបស់ក្រសួងកសិកម្ម ដែលសម្រេចផ្អាកការនាំចូលសត្វជ្រូករស់ពីប្រទេសជិតខាងបានទាន់ពេលវេលា ដើម្បីការពារដល់អ្នកចិញ្ចឹមក្នុងស្រុក។ប្រធានសមាគមរូបនេះ បានអំពានាវដល់រាជរដ្ឋាភិបាល ក៏ដូចជាក្រសួងជំនាញជួយបង្កើនការលើកទឹកចិត្តដល់អ្នកចិញ្ចឹមក្នុងស្រុកបន្ថែមទៀត និងចុះជួយណែនាំពីរបៀបធ្វើជីវសុវត្ថិភាពដល់កសិករអ្នកចិញ្ចឹម ព្រមទាំងជួយបាញ់ថ្នាំសម្លាប់មេរោគនៅទីតាំងចិញ្ចឹមរបស់ពួកគាត់ផងដែរ។
លោក ស្រ៊ុន ពៅក៏ បានបង្ហាញក្តីបារម្ភថា ការផ្គត់ផ្គង់សាច់ជ្រូកនៅលើទីផ្សារកម្ពុជា អាចនឹងប្រឈមការខ្វះខាតនាពេលខាងមុខដ៏ខ្លីនេះ ដែលដូចទៅនឹងប្រទេសថៃ និងវៀតណាម នាពេលនេះដែរ បន្ទាប់ពីជ្រូកដែលនៅសល់ក្នុងស្តុកកាលពីអំឡុងពេលបុណ្យភ្ជុំបិណ្ឌត្រូវបានបញ្ចេញលក់អស់។បញ្ហាកង្វល់ធំមួយទៀត គឺកសិករចិញ្ចឹមជ្រូកនាពេលនេះ កំពុងប្រឈមកង្វះកូនជ្រូកពូជសម្រាប់ចិញ្ចឹម ហើយបើបញ្ហានេះនៅតែបន្តអូសបន្លាយពេលយូរ វានឹងបង្កផលប៉ះពាល់ខ្លាំងដល់ផលិតកម្មចិញ្ចឹមជ្រូកនៅកម្ពុជា ក្នុងឆ្នាំនេះ៕