រដ្ឋមន្ត្រីអប់រំអំពាវនាវកុំឲ្យបេក្ខជនប្រឡបាក់ឌុបបាក់ទឹកចិត្តពីរឿងគុណភាពសញ្ញាបត្រ័!
27-March-2024 / សុខភាពនិងកីឡា
ភ្នំពេញ៖ លោកហង់ជួន ណារ៉ុនរដ្ឋមន្ត្រីក្រសួងអប់រំនៅព្រឹកថ្ងៃចន្ទទី២៧ធ្នូនេះដែលជាថ្ងៃទី១បានធ្វើការបើកកញ្ចប់វិញ្ញាសាប្រឡងនៅវិទ្យាល័យព្រះសីសុវត្ថិនៃដំណើរការប្រឡងបាក់ឌុបដោយលោករដ្ឋមន្ត្រីបានអំពាវនាវកុំឲ្យសិស្សានុសិស្សបាក់ទឹកចំពោះអ្វីដែលជាការលើកឡើងថាការប្រឡងបាក់ឌុបឆ្នាំនេះមិនសូវមានតម្លៃគឺគ្រាន់តែធ្វើបង្គ្រប់កិច្ចឬជាសញ្ញាបត្រកូវីដ។
លោករដ្ឋមន្ត្រីហង់ជួនណារ៉ុនបានបញ្ជាក់ថាសញ្ញាបត្រមធ្យមសិក្សាទុតិយភូមិឬបាក់ឌុបឆ្នាំ២០២១នេះ គឺមានតម្លៃស្មើគ្នានឹងសញ្ញាបត្របាក់ឌុបដែលបានរៀបចំការប្រឡងកាលពីអំឡុងពេលមុនកូវីដកើតឡើងដែរ។លោកអះអាងថាទាំងការគ្រប់គ្រងការប្រឡងទាំងវិញ្ញាសាគឺមានលក្ខណៈតឹងតែងដូចឆ្នាំមុនៗខណៈមានកិច្ចសហការជាមួយក្រសួង-ស្ថាប័នពាក់ព័ន្ធ ដែលមានដូចជា ក្រសួងមហាផ្ទៃ ក្រសួងសុខាភិបាលនិងអង្គភាពប្រឆាំងអំពើពុករលួយជាដើម។
លោកហង់ជួន ណារ៉ុន អំពាវនាវកុំឲ្យម្ចាស់ក្រុមហ៊ុនក្តីឬម្ចាស់សាលានានាដែលត្រូវការជ្រើសរើសសិស្សឲ្យចូលរៀនបន្ត មានការរើសអើងចំពោះសញ្ញាបត្របាក់ឌុបរបស់សិស្សឆ្នាំនេះដោយលោកធានាអះអាងថា ការប្រឡងបាក់ឌុបឆ្នាំនេះគឺគោរពតាមគោលការណ៍ច្បាប់យុត្តិធម៌តម្លាភាពនិងគួរឲ្យទុកចិត្តបាន។ កូវីដ១៩គឺជាឧបសគ្គនៃការរៀបចំការប្រឡងបាក់ឌុបកាលពីឆ្នាំ២០២០នៅពេលនោះក្រសួងបានសម្រេចឲ្យបេក្ខជនទាំងអស់ជាប់ដោយស្វ័យប្រវត្តិ។
ការដែលបេក្ខជនទាំងអស់ជាប់ដោយស្វ័យប្រវត្តិនេះហើយបានជាធ្វើឲ្យចំនួនបេក្ខជនដែលមានឈ្មោះប្រឡងបាក់ឌុបឆ្នាំ២០២១នេះមានការថយចុះជាងឆ្នាំមុនៗប្រហែល៣០០០នាក់ ពីព្រោះតែនៅឆ្នាំនេះមិនមានបេក្ខជនស្វ័យរិន។ សូមរម្លឹកថា ក្នុងឆ្នាំសិក្សា២០២០-២០២១ មានបេក្ខជនចុះឈ្មោះប្រឡងសរុប ១១៤ ១៨៣នាក់ ស្រី ៦០ ៣៩៧នាក់។ បេក្ខជនត្រូវបានរៀបចំចំនួន២៥នាក់ក្នុងមួយបន្ទប់ លើកលែងតែបន្ទប់ចុងក្រោយ និងបន្ទប់ដែលមានបេក្ខជនមកពី វិទ្យាល័យអប់រំពិសេស។ចំណែកមណ្ឌលសំណេរមានចំនួនសរុប ២០៤មណ្ឌល ត្រូវជា ៤ ៦១៦បន្ទប់។
មណ្ឌលកំណែសម្រាប់ការប្រឡងសញ្ញាបត្រមធ្យមសិក្សាទុតិយភូមិ មានចំនួន ១០មណ្ឌល នៅរាជធានីភ្នំពេញ និងមានបេក្ខជនសរុបចំនួន ១១៤ ១៨៣នាក់ (ស្រី ៦០ ៣៩៧នាក់)។ សូមបញ្ជាក់ថា តារាងប្រព្រឹត្តទៅនៃវិញ្ញាសាប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៧ ខែធ្នូ ឆ្នាំ២០២១ គឺថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម។ សម្រាប់ថ្នាក់វិទ្យាសាស្ត្រសង្គម មុខវិជ្ជាដែលត្រូវប្រឡងថ្ងៃទី២៧ ពេលព្រឹកមានពីរមុខវិជ្ជា ផែនដី និងបរិស្ថានវិទ្យា មានរយៈពេល ៦០នាទី និងប្រវត្តិវិទ្យា មានរយៈពេល៩០នាទី និងពេលរសៀលមានមុខវិជ្ជា ភូមិវិទ្យា រយៈពេល ៩០នាទី និងភាសាបរទេស រយៈពេល ៦០នាទី។ នៅថ្ងៃទី២៨ ខែធ្នូ ឆ្នាំ២០២១ ដែលជាថ្ងៃទី២ ពេលព្រឹកមានមុខវិជ្ជា គណិតវិទ្យា រយៈពេល ៩០នាទី និងសីលធម៌ ពលរដ្ឋវិជ្ជា មានរយៈពេល ៩០នាទីនិង ពេលរសៀល អក្សរសាស្ត្រខ្មែរ មានរយៈពេល ១៥០នាទី។
ការប្រឡងរយៈពេល២ថ្ងៃ ស្មើនឹង ៦៣០នាទី ដែលមានពិន្ទុប្រឡងអតិបរមា ៥០០ពិន្ទុ ប៉ុន្តែដោយមុខវិជ្ជាភាសាបរទេស ជាវិញ្ញាសាតាមស្ម័គ្រ ដូច្នេះពិន្ទុប្រឡងជាប់ គឺ៥០០ ដក២៥ រួចចែកនឹង២ ស្មើនឹង ២៣៧.៥ពិន្ទុ យកត្រឹម ២៣៧ពិន្ទុ។ ចំពោះការកំណត់និទ្ទេសមាន A, B, C, D និង E។ លទ្ធផលនៃការប្រឡង ក្រសួងអប់រំ នឹងកំណត់យកថ្ងៃទី១៨ ខែមករា ឆ្នាំ២០២២ ប្រកាសលទ្ធផលនៅរាជធានីភ្នំពេញ និងខេត្តកណ្តាល និងនៅថ្ងៃទី១៩ ខែមករា ឆ្នាំ២០២២ សម្រាប់បណ្តាខេត្ត ទូទាំងប្រទេស។
ដើម្បីធានាបានថាការប្រឡងប្រព្រឹត្តទៅដោយរលូន ក្រសួងអប់រំ យុវ ជន និងកីឡា បានពង្រឹងកិច្ចសហការយ៉ាងស្អិតល្មួតជាមួយក្រសួង-ស្ថាប័នពាក់ព័ន្ធដែលមានដូចជា ក្រសួងមហាផ្ទៃ ក្រសួងសុខាភិបាល កងរាជអាវុធហត្ថ អង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា អគ្គិសនីកម្ពុជានិងក្រុមគ្រូពេទ្យស្ម័គ្រចិត្តយុវជនសម្តេចតេជោ។ក្រសួងអប់រំ យុវជន និងកីឡា បានឱ្យដឹងថា ដំណើរការសំណេរប្រឡងសញ្ញាបត្រមធ្យមសិក្សាទុតិយភូមិ សម្រាប់ថ្ងៃទី១ នៅព្រឹកថ្ងៃទី២៧ ខែធ្នូ ឆ្នាំ២០២១ បានប្រព្រឹត្តទៅដោយរលូនល្អ មិនមានបាតុភាពមិនប្រក្រតីណាមួយកើតឡើងគួរឱ្យកត់សម្គាល់ឡើយ។
ក្នុងអំឡុងពេលដំណើរការប្រឡងនេះ ក៏មានបេក្ខជនដែលមានបញ្ហាសុខភាពផ្ទាល់ខ្លួនចំនួន ២៥ ករណីផងដេរ ក្នុងនោះបេក្ខជនមានជំងឺកូវីដ-១៩ ដែលជាកីឡាការិនីចំនួន ២នាក់ បេក្ខជនមានកម្តៅលើសធម្មតា ដែលត្រូវដាក់ឱ្យប្រឡងនៅបន្ទប់ដាច់ដោយឡែកចំនួន ៧នាក់ និងបេក្ខជនមានបញ្ហាសុខភាពដ៏ទៃទៀតចំនួន ១៦ នាក់។ សម្រាប់បេក្ខជនដែលមានបញ្ហាសុខភាពទាំងអស់ និងវិជ្ជមានជំងឺកូវីដ-១៩ អាចបន្តការប្រឡងបន្តក្រោមការសហការរៀបចំដោយក្រសួងអប់រំ យុវជន និងកីឡា ក្រសួងសុខភិបាល និងអាជ្ញាធរពាក់ព័ន្ធ៕
