វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 8853 នាក់
ម្សិលមិញ 8227 នាក់
សរុប 14135734 នាក់
ភ្នំពេញ៖រថយន្តឃ្លុបដឹកទំនិញមួយគ្រឿង ដាច់ហ្វ្រាំងបានមកបុករះម៉ូតូ ម៉ូតូកង់បីខូចខាតអស់ជាច្រើនគ្រឿងនិងរបួសមនុស្សជាច្រើននាក់នៅគល់ស្ពានព្រះមុនីវង្សចាស់។ ហេតុការណ៍នេះ កើតឡើងនៅវេលាម៉ោង២និង៣០នាទីរសៀល ថ្ងៃទី២៣ ខែធ្នូ ឆ្នាំ២០២១ នៅចំណុចក្រោមស្ពានអាកាសក្បាលថ្នល់ មុខការ៉ាស់សាំងភីធីធី សង្កាតទន្លេបាសាក់ ខណ្ឌចំការមន រាជធានីភ្នំពេញ។
រថយន្តបង្កម៉ាក ហ៊ីណូ ក្បាលពណ៍ខៀវ ពាក់ស្លាកលេខភ្នំពេញ3G-3338 បើកបរដោយបុរសម្នាក់វ័យជាង៣០ឆ្នាំ បានធ្វើអោយមនុស្ស១៣នាក់រងរបួសនិងខូចខាតរថយន្ត ម៉ូតូ ម៉ូតូកង់បីជាច្រើនគ្រឿង។ ក្រោយបង្កហេតុម្ចាស់រថយន្តព្យាយាមរត់គេចដែ តែត្រូវសមត្ថកិច្ចឃាត់ខ្លួនបានទុកប្រគល់ឲ្យជំនាញចាត់ការ។
សូមបញ្ជាក់ថាគ្រោះថ្នាក់នេះបានកើតចំថ្ងៃដែល សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានអញ្ជើញជាអធិបតីដ៏ខ្ពង់ខ្ពស់ក្នុងទិវាអន្ដរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោក លើកទី១៦ ដែលប្រារព្ធធ្វើនៅស្រុកជើងព្រៃ ខេត្តកំពង់ចាម។
សម្ដេចក្រឡាហោម ស ខេង បានសម្ដែងនូវការចូលរួមរំលែកមរណទុក្ខចំពោះគ្រួសារសពជនរងគ្រោះនៅទូទាំងប្រទេស ដែលស្លាប់ដោយគ្រោះថ្នាក់ចរាចរណ៍ក្នុងពេលកន្លងមក និងជូនពរដល់ជនរងគ្រោះដែលកំពុងព្យាបាល ឱ្យឆាប់បានជាសះស្បើយ និងវិលមកកាន់ជីវភាពរស់នៅធម្មតាវិញ។
សម្តេចក្រឡាហោម បានមានប្រសាសន៍បន្តថា ពិធីទិវាអន្ដរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកនេះ ត្រូវបានរាជរដ្ឋាភិបាល ប្រគល់ភារកិច្ចឱ្យគណៈកម្មាធិការជាតិសុវត្ថិភាពចរាចរណ៍ផ្លូវគោក ចាត់តាំងរៀបចំប្រារព្ធធ្វើពិធីជារៀងរាល់ឆ្នាំចាប់តាំងពីឆ្នាំ២០១៦មក ក្នុងសក្ខីភាពដើម្បីបង្ហាញពីការយកចិត្តទុកដាក់គិតគូរដល់សុខទុក្ខប្រជាពលរដ្ឋ ព្រមទាំងចូលរួមយ៉ាងសកម្មជាមួយចលនាពិភពលោក។
សម្ដេចក្រឡាហោម មានប្រសាសន៍បន្ថែមទៀតថា ក្នុងការប្រារព្ធពិធីនេះមិនមែនតែចូលរួមចំណែករំលែកទុក្ខប៉ុណ្ណោះទេ ប៉ុន្តែក៏ជាព្រឹត្តិការណ៍ក្រើនរំលឹក និងពញ្ញាក់ស្មារតីដល់អ្នកប្រើប្រាស់ផ្លូវឱ្យមានការយល់ដឹងពីហានិភ័យ នៃគ្រោះថ្នាក់ដែលបណ្តាលមកពីការបើកបរធ្វេសប្រហែសដូចជាការបើកបរលឿនលើសកំណត់ ការមិនគោរពស្លាកសញ្ញាចរាចរណ៍ ការមិនប្រកាន់ស្តាំ ការបើកបរក្រោមឥទ្ធិពលនៃជាតិស្រវឹង ឬសារធាតុញៀន ការមិនពាក់មួកសុវត្ថិភាព ឬខ្សែក្រវ៉ាត់សុវត្ថិភាពជាដើម។