ទីតាំងច្រកទ្វារអន្តរជាតិប៉ោយប៉ែតត្រូវលោកទូច ពិនតារារំលោភយកសង់អាគារយ៉ាងរំភើយ
27-March-2024 / ព័ត៌មានជាតិ
បន្ទាយមានជ័យ÷បរិវេណច្រកទ្វារអន្តរជាតិប៉ោយប៉ែតប៉ែកខាងឆ្វេងដៃជិតនិងច្រកចូលកាសុីណូបនល្បែងHolyday Poi Pet ជាប់នឹងអូរព្រំដែនកម្ពុជា-ថៃ ត្រូវបានប្រជាពលរដ្ឋរាយការណ៍មកថា ឈ្មោះទូច ពិនតារា បានរំលោភយកដី ព្រមទាំងកាប់បំផ្លាញ់ដើមពោធិព្រឹក្សដែលជាទីសក្ការៈចោលហើយយកដីសង់អាគារផ្ទាល់ខ្លួនធើ្វដូចជាប្រទេសគ្មានច្បាប់ ។
ប្រភពព័ត៌មានពីមន្ត្រីមូលដ្ឋាននិយាយថា ការសង់អគារចូលអូរព្រំដែនកម្ពុជា -ថៃនោះគ្មាចំណេញអ្វីដល់រាជរដ្ឋាភិបាល កម្ពុជាទេ គឺជាចេតនាបង្កបញ្ហាអោយក្តៅក្រហាយ ដល់រាជរដ្ឋាភិបាលតែប៉ុណ្ណោះ។ ព្រោះថាថ្មីៗនេះ មានស្ថាប័នអង្គភាពសារព័ត៌មានក្នុងស្រុក បានចុះផ្សាយថា អាគារដែលសង់ដោយ ឈ្មោះ ទូច ពិនតារា គឺបានបំផ្លិចបំផ្លាញ ដើមពោធិ៍មួយដើមដែលបានផ្ដល់ម្លប់ដល់ភ្ញៀវទេសចរណ៍ឈប់សម្រាក និងជាទីសក្ការៈគោរពបូជារបស់ប្រជាពលរដ្ឋទៀតផង។ ប៉ុន្តែមិនដឹងថា ហេតុអ្វីបានជា ឈ្មោះ ទូច ពិនតារា ថ្លើមធំហ៊ានកាប់បំផ្លាញ់ ដើម្បីសង់អាគារបែបនេះដូច្នេះ? ។
ពលរដ្ឋលើកឡើងនិងរិះគន់ចំៗ សម្តែងការមិនសប្បាយចិត្តចំពោះទង្វើល្មើសច្បាប់ របស់បុគ្គល ទូច ពិនតារា បិទភ្នែករំលោភយកដីរដ្ឋ សង់អាគារព្រោះតែផលប្រយោជន៍ក្រុមគ្រួសាររបស់ខ្លួន ។ប្រភពពី មន្ត្រីនគរបាលប៉ុស្តិ៍ច្រកទ្វារអន្តរជាតិប៉ោយប៉ែតសុំមិនបញ្ចេញឈ្មោះ បានឲ្យដឹងថា ករណីដែលឈ្មោះ ទូចពិនតារា កាប់បំផ្លាញ់ដើមពោធិ៍ហើយ សង់អាគារ បំរើឲ្យផលប្រយោជន៍ក្រុមគ្រួសាររបស់ខ្លួននោះ គឺជា មានការឃុបឃិតគ្នា ជាលក្ខណៈជាប្រព័ន្ធ មន្ត្រីដដែលលើកឡើងថា ពួកគេធ្វើអ្វីមិនដែលចេះគិត ពិចារណាខ្លាចប៉ះពាល់ផលប្រយោជន៍រួមទេ អ្វីក៏ហ៊ានធ្វើដែរ កុំថាឡើយប៉ះពាល់ទីសក្ការៈសូម្បីតែប៉ះពាល់ដល់សតិអារម្មណ៍ កងកម្លាំងក៏មិនខ្វល់ដែរឲ្យតែបានផល ប្រយោជន៍ ។
បែបណាក្តីករណីបុគ្គល ឈ្មោះ ទូច ពិនតារា ត្រូវបានប្រភពទម្លាយថា មានខ្នងបង្អែកដ៏រឹងមាំ បច្ចុប្បន្នជា រដ្ឋលេខាធិការក្រសួងមហាផ្ទៃ ទទួលបន្ទុកអន្តោប្រវេសន៍ ?។ប្រហែលដោយសារតែ បុគ្គលនេះ មានសែស្រលាយជា មន្ត្រីគ្រាក់ៗ អីចឹងបានជា គ្មានអ្នកណាហ៊ានក្អក ជាមួយ? ។
ជាក់ស្តែងកាលពីថ្ងៃទី១០ខែធ្នូឆ្នាំ២០២១ មន្ត្រីការិយាល័យទំនាក់ទំនងព្រំដែនកម្ពុជា ថៃប្រចាំនៅ ច្រកទ្វារអន្តរជាតិប៉ោយប៉ែត បានឲ្យដឹងថា ករណីសង់អាគារ នៅមាត់ច្រកព្រំដែន ដោយបុគ្គល ឈ្មោះ ទូច ពិនតារា ត្រូវបានភាគីថៃ គេមិនសប្បាយចិត្តទេ ព្រោះសំណង់សង់ចូលជ្រៅ ទៅមាត់អូរទ្វេភាគី ប៉ុន្តែគ្មានអាជ្ញាធរណាហ៊ានទប់ស្កាត់ឡើយ ។
ចំណែកលោក ទូច ពិនតារា ធ្លាប់ប្រាប់អង្គភាពយើងថា មូលហេតុដែលលោក សង់សំណង់រឹងមាំ នៅមាត់អូរព្រំដែននោះ គឺខ្លាចចោរចូលលួចយកទ្រព្យ របស់លោក ព្រោះថា អាគារដែលលោក សង់នេះ ដើម្បីលក់ស្រាបារី និងទំនិញផ្សេង បើសំណង់មិនរឹងមាំទេ ចោលមុខជាគាស់យកអស់ ។ លើសពីនេះលោក បង្ហើបថា សាច់ប្រាក់ដែលចាយលើអាគារកំពុងសាងសង់នឹងអស់ជាង ២ម៉ឺនដុល្លារហើយ មិនទាន់រួចរាល់ទេ នៅសល់៣០%ទៀតទើបរួច ។
ចំណែកលោក វួច អូន ប្រធានគណៈកម្មការច្រកទ្វារអន្តរជាតិប៉ោយប៉ែត នៅព្រឹកថ្ងៃទី ១៨ខែធ្នូឆ្នាំ២០២១ សារព័ត៌មានយើងមិនអាច ទាក់ទងសុំឲ្យលោក ធ្វើការអធិប្បាយជុំវិញ ករណីសង់អាគារ ពីសំណាក់លោក ទូច ពិនតារា បាននៅឡើយទេ គិតត្រឹមម៉ោងចេញផ្សាយនេះ ។
