វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3702 នាក់
ម្សិលមិញ 4292 នាក់
សរុប 14113401 នាក់
ភ្នំពេញ៖នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទបានអនុញ្ញាតឱ្យលោកវរសេនីយ៍ឯកថាងចេគីលី( Thang Jacky Ly) អនុព័ន្ធយោធាថ្មីរបស់សហរដ្ឋអាមេរិក ប្រចាំកម្ពុជា ចូលជួបសំដែងការគួរសម នៅអគ្គបញ្ជាការដ្ឋាន នាព្រឹកថ្ងៃទី១៥ ខែកញ្ញា ឆ្នាំ២០២១ នេះ។
នាយឧត្តមសេនីយ៍ វង្ស ពិសេន បានលើកឡើងពីទំនាក់ទំនងការទូតរវាងកម្ពុជា និងសហរដ្ឋអាមេរិក ដែលមានតាំងពីឆ្នាំ១៩៥០ ហើយមកដល់បច្ចុប្បន្ននេះ កម្ពុជានៅតែមានជំហររក្សាកិច្ចសហប្រតិបត្តិការល្អជាមួយសហរដ្ឋអាមេរិក។ អគ្គមេបញ្ជាការកងទព័កម្ពុជា បានថ្លែងអំណរគុណដល់សហរដ្ឋអាមេរិក ដែលថ្មីៗនេះបានជួយដល់កម្ពុជាក្នុងការប្រយុទ្ធប្រឆាំងជំងឺកូវីដ១៩ តាមរយៈការផ្ដល់វ៉ាក់សាំងចំនួន១លាន ៦សែនដូស រួមទាំងសម្ភារៈបរិក្ខារពេទ្យមួយចំនួនទៀត។ ក្រៅពីនោះ សហរដ្ឋអាមេរិកនៅបានផ្ដល់ជំនួយមនុស្សធម៌ដល់កម្ពុជា ដូចជា ការជួយសង្គ្រោះគ្រោះមហន្តរាយផ្សេងៗ ការជួយកសាងហេដ្ឋារចនាសម្ព័ន្ធ និងការបណ្ដុះបណ្ដាលធនធានមនុស្សជាដើម។
នាយឧត្តមសេនីយ៍វង្ស ពិសេន ក៏បានរំលឹកឡើងពីកិច្ចសហប្រតិបត្តិការរវាងកម្ពុជា និងសហរដ្ឋអាមេរិក នាពេលកន្លងមក ក្នុងការស្រាវជ្រាវរុករកអដ្ឋិធាតុកងទ័ពអាមេរិក ដែលបាត់ខ្លួនក្នុងសង្គ្រាមនៅកម្ពុជា និងកិច្ចសហប្រតិបត្តិការបង្ក្រាបអំពើភេរវកម្ម ការជួញដូរមនុស្ស ក៏ដូចជាការហ្វឹកហ្វឺនឆ្មាំអង្គរ និងការកសាងកម្លាំងរបស់កងយោធពលខេមរភូមិន្ទ ដែលត្រូវទៅបំពេញបេសកកម្មនៅអង្គការសហប្រជាជាតិ និងលំហសមុទ្រផងដែរ។
នាយឧត្តមសេនីយ៍ វង្ស ពិសេន មានជំនឿថា ទៅថ្ងៃអនាគត សហរដ្ឋអាមេរិកនៅតែបន្តទំនាក់ទំនង និងកិច្ចសហប្រតិបត្តិការល្អជាមួយកម្ពុជា ដោយឈរលើគោលការណ៍គោរពអធិបតេយ្យភាព ការគោរពគ្នា និងការជឿទុកចិត្តគ្នាទៅវិញទៅមក ហើយកម្ពុជានៅតែចាត់ទុកសហរដ្ឋអាមេរិកជាមិត្តល្អរបស់កម្ពុជា។
ដោយឡែកកាលពីនៅព្រឹកថ្ងៃព្រហស្បតិ៍ ទី៩ ខែកញ្ញា ២០២១ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការងនៃកងយោធពលខេមរភូមិន្ទនិងជា មេបញ្ជាការកងទ័ពជើងគោក ក៏បានទទួលជួបសម្តែងការគួរសម ជាមួយ លោកប៉ាទ្រិកមឺហ្វី( W. Patrick Murphy )អគ្គរដ្ឋទូតសហរដ្ឋអាមេរិកប្រចាំកម្ពុជាដែលមានលោកវរសេនីយ៍ឯកថាងចេគីលី( Thang Jacky Ly) អនុព័ន្ធយោធាថ្មីអមដំណើរផងដែរ។គេជឿថាជាជំនួបដែលមានសារល្អៗជាមួយគ្នា។
លោកវរសេនីយ៍ឯក Thang Jacky បានជម្រាបជូននាយឧត្តមសេនីយ៍ អគ្គមេបញ្ជាការ ពីគោលបំណងនៃការមកបំពេញបេសកកម្មការទូតនៅកម្ពុជា ដោយទី១. ធ្វើការសិក្សាស្វែងយល់ពីវប្បធម៌ និងទំនៀមទម្លាប់របស់ប្រទេសកម្ពុជា ទី២. ធ្វើការយ៉ាងជិតស្និតជាមួយថ្នាក់ដឹកនាំនៃកងយោធពលខេមរភូមិន្ទ ដើម្បីជំរុញកិច្ចសហប្រតិបត្តិការរវាងកងទ័ពប្រទេសទាំងពីរ។
លោកជំទាវឱវ៉ាន់ឌីនរដ្ឋលខខាធិការនិងជាអ្នកនាំពាក្យក្រសួងសុខាភិបាលពេលចុះចែកអំណោយជូនអ្នកចាក់វ៉ាក់សាំងនៅខេត្តស្វាយរៀងកាលពីថ្ងៃទី១៣កញ្ញាក៏បានរំលឹកឡើងពីគុណសម្បត្តិអាមេរិកដែលបានជួយផ្តល់ជំនួយលើវិស៏យសុខាភិបាលកម្ពុជាយ៉ាងច្រើននាពេលកន្លងមកតាមរយៈអង្គការនានាផងដែរ។សូមជម្រាបថាសម្រាប់ការរកស៊ីវិញជញ្ជីងពាណិជ្ជកម្មរវាងកម្ពុជាអាមេរិកគឺការនាំចេញពីស្រុកខ្មែរទៅអាមេរិកប្រមាណជាង៥ពាន់លានដុល្លារអាមេរិកគឺច្រើនជាងការនាំពីអាមេរិកចូលមកស្រុកខ្មែរដែលមានប្រមាណជា៣រយលានដុល្លារប៉ុណ្ណោះក្នុង១ឆ្នាំ៕