វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 210 នាក់
ម្សិលមិញ 6359 នាក់
សរុប 14086843 នាក់
វៀតណាម៖ប្រទេសជប៉ុន ឥឡូវនេះ អាចផ្តល់បរិក្ខារ និងបច្ចេកវិជ្ជាយោធាទៅឲ្យប្រទេសវៀតណាមហើយ នៅក្រោមកិច្ចព្រមព្រៀងមួយដែលត្រូវបានចុះហត្ថលេខាកាលពីថ្ងៃសៅរ៍ទី១១កញ្ញា។
រដ្ឋមន្ត្រីក្រសួងការពារជាតិជប៉ុន លោក ណូប៊ូអូ គីស៊ី (Nobuo Kishi) បាននិយាយថា កិច្ចព្រមព្រៀងនេះនឹងជំរុញភាពជាដៃគូយោធារបស់ប្រទេសទាំងពីរឲ្យដល់ «កម្រិតថ្មីមួយ» ។ ជប៉ុន និងវៀតណាមមានផែនការបង្កើនទំនាក់ទំនងយោធាឲ្យកាន់តែស៊ីជម្រៅឡើងតាមរយៈសមយុទ្ធយោធាពហុជាតិរួមគ្នា និងមធ្យោបាយដទៃទៀត។ក្រសួងការពារជាតិជប៉ុនបានបញ្ជាក់ថា សេចក្តីលម្អិតអំពីការផ្ទេរបរិក្ខារជាក់លាក់នានាដែលរួមមានទាំងនាវាចម្បាំងផង នឹងត្រូវដាក់ចេញក្នុងកិច្ចពិភាក្សាបន្តបន្ទាប់ទៀត។
ក្រសួងការពារជាតិជប៉ុនក៏បានប្រកាសថា រដ្ឋមន្ត្រីការពារជាតិជប៉ុន និងសមភាគីវៀតណាមបានយល់ស្របអំពីសារសំខាន់នៃការរក្សាសេរីភាពនាវាចរណ៍ និងការហោះហើរឆ្លងកាត់នៅក្នុងតំបន់ឥណ្ឌូប៉ាស៊ីហ្វិក ព្រមទាំងកិច្ចសហប្រតិបត្តិការនៅក្នុងផ្នែកផ្សេងៗនៃវិស័យយោធា រាប់ទាំងសន្តិសុខតាមប្រព័ន្ធអ៊ីនធឺណិតផងដែរ។
គួរកត់សម្គាល់ថា ជំនួបរវាងរដ្ឋមន្ត្រីការពារជាតិជប៉ុន និងសមភាគីវៀតណាមនៅក្នុងរដ្ឋធានីហាណូយ បានធ្វើឡើងជួនគ្នានឹងដំណើរទស្សនកិច្ច ២ថ្ងៃ របស់ប្រមុខការទូតចិន លោក វ៉ាង យី (Wang Yi) នៅក្នុងប្រទេសវៀតណាមផងដែរ។លោក វ៉ាងបានបញ្ចប់ដំណើរទស្សនកិច្ចនៅវៀតណាមជាមួយនឹងការសន្យាជួយវ៉ាក់សាំងកូវីដ-១៩ ចំនួន ៣លានដូសទៀតដល់វៀតណាម។