វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4623 នាក់
ម្សិលមិញ 6359 នាក់
សរុប 14091256 នាក់
ភ្នំពេញៈ រាជរដ្ឋាភិបាលកម្ពុជា បានសម្រេចបិទបញ្ចប់ការអនុវត្តនូវយុទ្ធនាការ ពង្រឹងវិធានការប្រយុទ្ធ និងទប់ស្កាត់ ការឆ្លងរាលដាលនៃជំងឺកូវីដ១៩ នៅទូទាំងប្រទេសចាប់ពីថ្ងៃទី២០ ខែសីហាតទៅ ។
នេះបើតាមរយៈសេចក្តីណែនាំ ស្តីពីការពង្រឹងការអនុវត្តវិធានការប្រយុទ្ធ និងទប់ស្កាត់ការឆ្លងរាលដាល នៃជំងឺកូវីដ១៩ ដែលចុះហត្ថលេខាដោយសម្តេចនាយករដ្ឋមន្ត្រី ហ៊ុន សែន នាល្ងាចថ្ងៃទី១៩ ខែសីហានេះ។
សូមបញ្ជាក់ថាដើម្បីប្រយុទ្ធ និងទប់ស្កាត់ការឆ្លងរាលដាលជំងឺកូវីដ១៩ ជាពិសេសមេរោគបំប្លែងថ្មី ប្រភេទដែលតា (Delta) រាជរដ្ឋាភិបាលបានសម្រេចដាក់ចេញ និងបន្តអនុវត្តនូវយុទ្ធនាការ ពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺនេះនៅទូទាំងប្រទេស រយៈពេល ២១ ថ្ងៃ ចាប់តាំងពីថ្ងៃទី២៩ ខែកក្កដា ដល់ថ្ងៃទី១៩ ខែសីហា។សម្តេច ហ៊ុន សែន បានណែនាំនេះថា ៖ «ការអនុវត្តនៅទូទាំងប្រទេស រយៈពេល ២១ ថ្ងៃ កន្លងមកនេះ បានប្រព្រឹត្តទៅដោយរលូន និងទទួលបាន លទ្ធផលវិជ្ជមាន ដោយបានជួយដល់ការគ្រប់គ្រង និងការពន្យារពេលបានមួយកម្រិតនូវការឆ្លងរាលដាល ទ្រង់ទ្រាយធំ ក្នុងសហគមន៍នៃមេរោគកូវីដ១៩ ប្រភេទដែលតា (Delta)»។
ការវិវត្តសភាពការណ៍ ក្នុងរយៈពេល ២ សប្តាហ៍ចុងក្រោយនេះ បង្ហាញថា អត្រានៃការឆ្លងរាលដាល ក្នុងសហគមន៍នៃមេរោគកូវីដ១៩ និងអត្រាអ្នកជំងឺកូវីដ១៩ កម្រិតមធ្យម ក៏ដូចជាអត្រាអ្នកស្លាប់ ដោយសារជំងឺនេះ មានទិន្នាការថេរ ហើយទន្ទឹមនេះ អត្រាអ្នកជាសះស្បើយ ក៏មានការកើនឡើង បើទោះបីជាមេរោគបំប្លែងថ្មី បានឆ្លងរាលដាលក្នុងសហគមន៍ក្នុងចំនួនកាន់តែច្រើនឡើងៗ រហូតទៅដល់ ២៣ រាជធានី-ខេត្តក្តី។
សម្តេច បញ្ជាក់ថា ៖ រាជរដ្ឋាភិបាល បានសម្រេចបិទបញ្ចប់ការអនុវត្តយុទ្ធនាការនេះ ប៉ុន្តែគ្រប់បណ្តាគណៈអភិបាល រាជធានីខេត្ត ត្រូវបន្តអនុវត្តការរឹតបន្ដឹង វិធានការសុខាភិបាល វិធានការរដ្ឋបាល និងវិធានការច្បាប់ ដោយផ្អែកតាមសភាពការណ៍វិវត្តជាក់ស្តែងនៃជំងឺនេះ ក្នុងភូមិសាស្ត្ររាជធានី-ខេត្ត ដែលស្ថិតក្រោមសមត្ថកិច្ចរបស់ខ្លួន ក្រោមការសម្របសម្រួលរបស់គណៈប្រតិបត្តិនៃគណៈកម្មការអន្តរក្រសួង និងអនុគណៈកម្មការដែលមានការពាក់ព័ន្ធ។
ទាក់ទងបញ្ហានេះដែររដ្ឋបាលរាជធានីភ្នំពេញ បានសម្រេចបិទបញ្ចប់ទាំងស្រុងនូវបម្រាមគោចរពេលរាត្រី ដែលបានដាក់ដាក់ចេញឱ្យអនវុត្តនៅក្នុងរាជធានីភ្នំពេញ រយៈពេល២១ថ្ងៃកន្លងមក ក្នុងគោលបំណងទប់ស្កាត់ការរីករាលដាលជំងឺកូវីដ១៩ ដែលបំប្លែងខ្លួនថ្មីឈ្មោះ Delta។ ទាក់ទងនិងការបើកគោចរនេះលោក ឃួង ស្រេង អភិបាលរាជធានីភ្នំពេញ បណ្តាញព័ត៌មាន ថា សម្រាប់រាជធានីភ្នំពេញ អាជ្ញាធរបិទបញ្ចប់តែបម្រាមគោចរមួយប៉ុណ្ណោះ ដោយឡែកវិធានការផ្សេងៗទៀត ដូចជាការផ្អាកនូវអាជីវកម្មដែលមានហានិភ័យខ្ពស់ ការហាមជួបជុំដែលមានមនុស្សច្រើនចាប់ពី១៥នាក់ឡើងទៅ នៅតែរក្សាដដែល។