វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1082 នាក់
ម្សិលមិញ 8227 នាក់
សរុប 14127963 នាក់
ភ្នំពេញ ៖ អង្គភាព នគរបាលប្រឆាំងបទល្មើស បច្ចេកវិទ្យាបាន រកឃើញ ពីការកើនឡើង ក្នុងការប្រើប្រាស់ URL shortener ដើម្បីចែកចាយ កម្មវិធីមេរោគ សម្រាប់ទូរស័ព្ទ ដែលមានប្រព័ន្ធប្រតិបត្តិការ iOS និង Androidដែលទាមទារការប្រុងប្រយត្ន័។
នាយកដ្ឋាននគរបាលប្រឆាំងបទល្មើស បច្ចេកវិទ្យា នៃអគ្គស្នងការដ្ឋាននគរបាលជាតិ នៅព្រឹកថ្ងៃទី២៣ ខែកក្កដា ឆ្នាំ២០២១ បានលើកឡើងថា URL shortener គឺជាវិធីសាស្ត្របង្រួញ URL ដែលជាតំណភ្ជាប់ របស់គេហទំព័រ ដើម្បីងាយស្រួល ក្នុងការចម្លង ឬដើម្បីអាចផ្ញើតាមរយៈសារ ដែលមានកំណត់តួអក្សរ ឱ្យបានខ្លីបំផុតនោះ។ នៅពេលដែល អាសយដ្ឋាន របស់គេហទំព័រ ត្រូវបានបង្រួញ អ្នកប្រើប្រាស់ នឹងពុំអាចមើលឃើញ ឈ្មោះរបស់ គេហទំព័រដើម ទាំងស្រុងនោះទេ ដែលនេះ អាចឱ្យជនខិលខូច បន្លំផ្ញើតំណភ្ជាប់ ទៅគេហទំព័រ ដែលមានផ្ទុកមេរោគ បានយ៉ាងងាយស្រួល។
នគរបាល ប្រឆាំងបទល្មើសបច្ចេកវិទ្យា បញ្ជាក់ថា ជនខិលខូច បានប្រើ វិធីនេះ ដើម្បីបញ្ចូលព្រឹត្តិការណ៍ ទៅក្នុងប្រតិទិនរបស់ទូរស័ព្ទ ដើម្បីឱ្យអ្នកប្រើប្រាស់ ចុចនៅលើ តំណភ្ជាប់ ដែលមានផ្សព្វផ្សាយ ពាណិជ្ជកម្ម កម្មវិធីមេរោគ ឬរូបភាពអាសអាភាស។ សម្រាប់ទូរស័ព្ទ ដែលមានប្រព័ន្ធប្រតិបត្តិការ Android វិញ ជនខិលខូច អាចបន្លំឱ្យអ្នកប្រើប្រាស់ បញ្ចូលកម្មវិធី ជាច្រើនទៀត ដោយសារតែទូរស័ព្ទ ប្រភេទនេះ អាចបញ្ចូលកម្មវិធី ពីប្រភពផ្សេងៗបាន។
ឧទាហរណ៍ ពួកគេបានបង្ហាញ អ្នកប្រើប្រាស់ នូវកម្មវិធីដែលមាន ឈ្មោះ “adBLOCK” ប៉ុន្តែតាមការពិត កម្មវិធីនេះ គឺជាកម្មវិធីដែលពួកគេ ចែកចាយ ដើម្បីផ្សព្វផ្សាយសារបង្ខិតបង្ខំ អ្នកប្រើប្រាស់ ទាក់ទងទៅនឹងកម្មវិធីមេរោគទៅវិញ។ដូច្នេះដើម្បីសុវត្ថិភាព ក្នុងការប្រាស់ទូរស័ព្ទ នាយកដ្ឋានប្រឆាំង បទល្មើសបច្ចេកវិទ្យា សូមឱ្យអ្នកប្រើប្រាស់ មានការប្រុងប្រយ័ត្ន នៅពេលដែលលោកអ្នកទទួលបានសារណាមួយនោះ។ សូមលោកអ្នក កុំចុចនៅលើតំណភ្ជាប់ ដែលមាននៅក្នុងសារ ដែលមិនមានប្រភពច្បាស់លាស់ ដើម្បីចៀសវាងពីការទាញយក កម្មវិធីមេរោគ ឬការលួចយកទិន្នន័យផ្សេងៗ៕