វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2392 នាក់
ម្សិលមិញ 3261 នាក់
សរុប 13059181 នាក់
ភ្នំពេញ៖ លោក សុខ រ៉ាស៊ីពិធីករទូរទស្សន៍ ឲ្យដឹងពីបុគ្គលដែលជំពាក់ប្រាក់ និងគេវេសមិនសង ដោយអូសបន្លាយជិតមួយឆ្នាំគឺលោក អ៊ិន សុភិន អគ្គនាយកផលិតកម្មមហាហង្សដែលទទួលសិទ្ធិរៀបចំកម្មវិធីប្រកួតកញ្ញាឯកនោះ។ លោកសុខ រ៉ាស៊ីបានសម្រេចប្តឹងទាមទារសំណងពីលោក អ៊ិន សុភិនចំនួន១៥.៧០០ដុល្លារអាមេរិក។
លោកសុខ រ៉ាស៊ីថា បើទោះបីជារដូវកូវីដ-១៩ក៏លោកមិនជឿថា លោក អ៊ិន សុភិនគ្មានប្រាក់ទូទាត់ដែរ ព្រោះតែលោករស់នៅផ្ទះវីឡាធំស្កឹមស្កៃ តែការមិនព្រមសងឲ្យលោកនេះមកពីលោកមិនទទួលខុសត្រូវ ដូចនេះមានតែទុកឲ្យផ្លូវច្បាប់ជាអ្នកដោះស្រាយ។លោកថាមុនពេលសម្រេចចិត្តដោះស្រាយតាមផ្លូវច្បាប់នេះគឺលោកពិតជាព្យាយាមទំនាក់ទំនងដោយភាពយោគយល់ជាទីបំផុតជាមួយលោក អ៊ិន សុភិន ប៉ុន្តែគាត់នៅតែមិនទទួលខុសត្រូវ ហើយបើទោះបីជាលោកទុកឱកាសឲ្យពេលវេលាច្រើន និងការបង់តាមដំណាក់កាលក៏ដោយ។
លោកសុខរ៉ាស៊ី លើកឡើងថា លោកបានសម្រេចចិត្តប្ដឹងលោកអ៊ិន សុភិន នៅពេលនេះគឺដើម្បីកុំឲ្យលោកធ្វើអីចឹងទៀតដាក់អ្នកផ្សេង នាំឲ្យខូចកេរ្ដិ៍ឈ្មោះផលិតករនិងថៅកែផលិតកម្មគេល្អផ្សេងៗទៀត ម្យ៉ាងទៀតជៀសវាងមានអ្នកផ្សេងទៀតរងគ្រោះដូចរូបលោក។
លោក អ៊ិន សុភិនវិញបានសសេរសារលើបណ្តាញសង្គមហ្វេសប៊ុក ថា “មានរឿងថ្មីរហូត តែខ្ញុំទុកឲ្យផ្លូវច្បាប់ជាអ្នកដោះស្រាយចុះ ខ្ញុំ មិនមានការបកស្រាយអីទេ តើចុងក្រោយទៅជាយ៉ាងម៉េច? អរគុណចំពោះបងប្អូនដែលកង្វល់អំពីរឿងនេះ តែហ៊ានធានាថាមិនមានរឿងអីទេ”។ ក្រៅពីនេះអ៊ិន សុភិនក៏បានប្រាប់កាសែតសប្បាយថា៖"ខ្ញុំអត់មានរឿងអីធ្ងន់ធ្ងរជាមួយគាត់(សុខ រ៉ាស៊ី)សោះ! យើងចាំមើលលទ្ធផលនៅតុលាការចុះ នេះជាជំហររបស់ខ្ញុំ ហើយជាចម្លើយរបស់ខ្ញុំ រឿងជំពាក់ប៉ុន្មានអីប៉ុន្មានហ្នឹងខ្ញុំអត់អាចបកស្រាយបានទេ ខ្ញុំមានចម្លើយតែប៉ុណ្ណឹង...សុំទោសប៉ុណ្ណឹងចុះ"។
ទោះជាយ៉ាងណានេះមិនមែនជាករណីលើកដំបូងទេដែលផ្ទុះចេញរឿងចម្រូងចម្រាស់ទាក់ទិននឹងរឿងលុយកាក់នោះ ដែលកន្លងទៅក៏មានសិល្បករមួយចំនួនបានបញ្ចេញសារដោយរិះគន់ចំៗទៅកាន់ផលិតកម្មមហាហង្សរបស់លោក អ៊ិន សុភិន ក្នុងការបើកប្រាក់ឲ្យសិល្បករតាមការកំណត់ និងគ្រប់ចំនួននោះ៕